Ketre Atrene La Lapa Ne Xomi Meköt Hna Nyipi Acil

AME lo hmakanyi ne Draihnacian 24 Januare 2018, hna traqa la ketre maca ka lolo kowe la Bethela ne Etazini me Canada. Kola kepe Kenneth Cook Jr. troa hane sine la Lapa Ne Xomi Meköt Ne La Itretre Anyipici Iehova.

Hna hnaho Kenneth Cook e Pennsylvanie, Etazini. Ketre sine ini nyidrëti la ka cainöj koi nyidrë. Ame la nyidrëti a fenesi qa hna ini ngöne lycée, hnei nyidrëti hna xomi bapataiso, lo 7 Juun 1980. Ame hë lo 1 Semitrepa 1982, nyidrëti a xome la huliwa ne pionie lapa. Thupene la lue macatre ne nyidrëti a pionie, hna hë nyidrë troa huliwa ngöne Bethela. Hnei nyidrëti hna nyiqane huliwa ngöne la Bethela e Wallkill (Neweyok), lo 12 Okotropa 1984.

Ame ngöne la 25 lao macatre thupene la nyidrëti a lö hnine la Bethela, nyimutre la itre huliwa hnei Cook hna kuca, tune la troa huliwa ngöne la Hnë Feja Itus. Ame lo macatre 1996, hnei nyidrëti hna faipoipo me Jamie, nge hnei eahlo hna hane lö hnine la Bethela e Wallkill. Ame lo Diseba 2009, hna upi nyidroti kowe la Centre d’enseignement des Témoins de Jéhovah de Patterson, e Neweyok. Hna ami Cook troa ce huliwa memine la Service du courrier biblique. Ame hë lo Eiperem 2016, hnei nyidroti hna pane bëek a tro Wallkill, qëmekene troa upi nyidroti tro hmaca a tro Brooklyn (Neweyok). Thupene la faifi lao treu, hna hë nyidroti hmaca troa lapa ngöne la hnalapa ne xomi meköti e Warwick (Neweyok). Ame lo Januare 2017, hna pi Cook troa ixatua ngöne la Kometr Ne Cinyihan Ne La Lapa Ne Xomi Meköt.