Hapeu Ijiji Së Fe Kö?
1 Kola traqa la ketre ewekë ka tru ngöne la macatre 778 M.P.K. Isaia perofeta a meköle goeë “[“Iehova,” MN] kola tuenie hune la therone ka draië me sisitria.” Thupene lai, Isaia a drenge la itre serafi kola atrune la lolo i Iehova me hape: “Hmitöt, hmitöt, hmitöt, Iehova ne sabaoth.” Drei la ketre ewekë nyine hain! E cili Iehova a hnyinge me hape: “Tro ni a upi dei? Dei la ate tro thatraqai shë?” Thaa hna qaja kö la pengöne la huliwa, maine thangane la huliwa cili pena hna troa kapa hnene lai atr. Ngo, thaa trotro ju kö la hnying, nge Isaia a sa ka hape: “Inieti la, upengë nieti jë.”—Is. 6:1, 3, 8.
2 Eje thene la itre hlue i Iehova la hni ne ajane troa kuca la itre hnei Nyidrëti hna amekötin. (Sal. 110:3) Nge enehila hetrenyi la ketre ihë ka sisitria catr, kola könëne la itre atr ka ijije troa huliwa. Hapeue fe së, hetrenyi kö the së la hni ne ajane troa huliwa i Akötresie, matre tro së a hane sa tui Isaia?
3 Kola aja ka huliwa ngöne la Bethela, itre trejine trahmany. Kolo lai a hape koi angatr, troa hetrenyi la ajane troa amë panëne la itre aja ne la Baselaia, nge troa thele troa sajuëne la huliwa ne cainöje e cailo fen. (Mat. 6:33) Eje hi laka, ame la troa nyihlue i Iehova hnine la Bethela, ke celë hi ketre sipu aqane tro lai a huliwa koi Nyidrë ngöne la mele së ka pexej. Troa tune kaa?
4 Huliwa Hna Kuca Hnine La Bethela: Pane mekune ju së la nöjei huliwa hna kuca lapaane hnine la Bethela ne Kaledonia, e Normandie. Ketre hnëqa ka lolo catre hna xome hnene la itre trejine trahmanyi me föe ka mele hnine la Bethela, ene laka, angatre a ce huliwa memine la hlue ka nyipici me ka inamacan, memine la Collège Central, matre troa kuca la itre itus ka qeje pengöne la Tusi Hmitrötr, a hna troa cainöje fë, me ini tusi ngön memine la itre atr. (Mat. 24:45) Hna amekötine fe troa ujëne hnene la itre trejine la itre itus ngöne la köni qene hlapa: Tas, Drehu me Walis. Nyimutre la itre huliwa hna kuca matre thaa tro kö a isazikeu la aqane troa ce elemekene la itre ekalesia ka ala 28 ngöne la köni nöj. Ketre hetre ixatua mina fe hna hamëne kowe la Kometr ne Xupi Uma ngöne la nöj, göi troa ahnyipixene me xupe pena la itre Uma ne Baselaia. Kola thele la itre trejine ka hetre hni ne ajane troa kuca la itre huliwa ka tune la, maine troa cilëne la itre itus, me nyihnyawane la itre hnahag, me nyihnyawane la itre ejolene göi uma, me hnëkë xen, me itö, me xome la hnëqa göi itre ejolene göi mani, me itre xaa nyine tro ju kö a kuca hnine la Bethela.
5 Celë hi itre huliwa lai ka hamëne la itre manathithi ka tru ngöne la götrane la ua. Troa atraqatre catre la madrine së, ke, thaa luelue kö së laka, ame la trenge catre hne së hna kuca, ke göi troa cainöj me troa inine la itre atr. Kola xatua së fe hnene la itre huliwa hne së hna kuca ngöne Bethela, troa atrepengöne hnyawa la itre götrane ka nyimutre ne la organizasio i Iehova. Hna amekunë së pala hi hnene la atre cinyihane la salamo, la aqane xatua angetre Isaraela troa atrepengöne hnyawa la iwahutine la musi Akötresie e celë fen, ngöne la hneijine i angatr.—Sal. 48:12, 13.
6 Itre Emanathithine La Huliwa Hnine Bethela: Nemene la thangane hna kapa hnene la itre trejine ka huliwa hnine la Bethela? Hanawange cahu itre mekune hna hamëne hnene la itre trejine ka mele hnine la fami ne la Bethela, itre thöth me itre ka qatre hë. Hna qaja hnene la ketre trejine föe ka madrine troa mele hnine la Bethela, a köni macatre hë, ka hape: “Hna acatrene la aqane imelekeu ni me Iehova, qa ngöne laka eni e hnine la Bethela. Eni a huliwa pala hi itre macatre e hnine la bethela, nge eni a trotrohnine hnyawa la aqane trongene ej, nge ketre ini ka tru koi ni, ngöne la thiina i Iehova. Ketre ame la eni a huliwa e hnine la Bethela, eni a trotrohnine hnyawa la aqane iëne Iehova la itre atr ka troa huliwa i Nyidrë, laka nöjei pengöne atr. Nge thaa Nyidrëti kö a treqene tro së a pexej, matre troa kepe së hnei Nyidrë.”
7 Kola mekune hmaca hnene la ketre trejine ka thöthi petre kö, ka hape: “Eni a pane mekune hmaca la meleng, laka, ‘Drei la madrinenge elanyi ngöne la kola troa mele ngöne la fene ka hnyipixe, nge eni a troa qaja kowe la itre atr ka mele nyipici ekö koi Akötresie hna troa amelene hmaca, laka hnenge hna nyihlue i Iehova itre macatre e hnine la Bethela, ngo thaa hnenge kö hna thele troa kete atr ka trene manie.’ ”
8 Kola mekune hnyawa hnene la ketre trejine thöth la ini hnei angeice hna kapa, öni angeice ka hape: “Ketre manathithi ka tru la eni a thele troa atrepengönge hnyawa, me troa atre la ka nyipi ewekë thatraqane la huliwang, nge thupene lai troa melëne la itre thiina cili ka lolo. Enehila, eni a drenge laka, atreine hnyawa ha ni troa nyihlue i Iehova. Eni a öhne laka, nango atreine hë ni troa treqene la itre hna amekötin, me troa xomihni, nge atreine hë ni troa hane amamane la ihniming, ngacama nango jole koi ni.”
9 Kola mekune hnene la ketre trejine föe la itre manathithi hnei nyidroti hna kapa uti hë enehila: “Jëne la itre porogarame ngöne la götrane la ua e celë hnine Bethela, eni a atrepengöi Iehova hnyawa, me trotrohnine la aqane tro ni a xötrethenge hnyawa la tulu i Nyidrë, ngöne la mekun, me ekuhu hning, me ngöne la aqane ujë i eni. Nge pine laka thaa fenesi pala kö la ini, haawe, ketre eni pala hi a kapa la itre thangane ka lolo.”
10 Hetrenyi la ketre trejine ka nue la mele i angeice ka pexeje troa cainöj, 59 hë lao macatre, nge kösë 43 lao macatre e hnine la Bethela, öni angeice ka hape: “Thaa ceitune kö la Bethela memine la ketre monastère, ene lo hna lapa hnei ange moines; tune la aqane mekune hnei itre xan. Tru la itre ewekë hne së hna kuca, pine laka, hna eköthe hnyawa ha la itre nyine troa kuca. . . . Pëkö ketre drai ne thaa madrine ni, ngöne la nöjei ijine eni a troa kuca la huliwang. Nemene kepine lai? Pine laka, ame la easë a nue la mele së ka pexeje koi Iehova, atraqatre la madrine së, nge lapa hnyawa la mekune së, ke atre hi së laka, ‘ase hë së kuca la qâ së.’ ”—Luka 17:10.
11 Hna qaja hnene la ketre trejine ka 62 hë lao macatre e hnine la Bethela, ka hape: “Eni a mejiune hnyawa laka, ame la Bethela, celë hi göhnë ka sisitria hna troa mele ngön e celë fen, qëmekene troa acile hmaca lo Paradraiso. Thaa ka luuzi kö nge eni a madrine laka, hnenge hna hane nue la melenge ka pexeje troa hane kuca la aja i Akötresie. Drei la ketre madrine troa cainöj, me troa hane huliwa matre troa akökötrene la itre aja ne la organizasio i Iehova e celë fen! Celë hi aja ka catre theng, laka, jëne la ixatua i Iehova, eni a catre troa xome la Bethela nyine hnalapang, me thele troa nue la melenge ka pexeje troa eatrëne la itre aja ne la Baselaia.”
12 Kolo hi a qaja hnene caha itre atrene la Bethela, lo itre xaa hnepe manathithi hna troa kapa, e tro nyipunie a hane nue la mele i nyipunie troa huliwa e hnine la Bethela. Ngo eje hi laka, maine nyipunie a ajane troa hane kuca la itre xaa huliwa e hnine la Bethela, hetrenyi la itre ewekë hna pane thele thei nyipunie. Nemene la itre nyine troa kuca matre ijije tro nyipunie a hane mele e hnine la Bethela?
13 Nyine Troa Kuca Göi Huliwa e Hnine La Bethela: Hna hamëne la itre hna amekötine göi itre ka ajane troa huliwa hnine Bethela, ngöne itre mekune hna eköhagene ka ce tro memine la hna cinyihane celë. Ketre, nyipi ewekë tro angatre a hetre hni ne ajane troa catre huliwa, ngo thaa tro kö a “itete ajane la nyine amadine.” (2 Tim. 3:4; 1 Kor. 13:11) Loi e tro la itre atrene la fami ka mele e hnine la Bethela, a itre trahmanyi me föe ka macaje ngöne la götrane la ua, me majemine isa inine la Tusi Hmitrötr, me eköthe hnyawa la aqane mekune i angatre matre troa “wangate hmekune la loi me ngazo.” (Heb. 5:14) Loi e mama hnyawa ha ngöne la nöjei götrane la mele i angatre ka hape, itre Keresiano ka macaj, a ngöne mina fe la aqane heetr, me aqane isej, me aqane ië pengöne miuzik, me itre nyine madrin. Ame la itre ka mele hnine la Bethela ke angatre a kapa qa kuhu hni angatre la itre huliwa hna upi angatre troa kuca. Hna majemine athipe la itre huliwa ka nango catr, kowe la itre thöth, maine ngöne lo itre imasine ka feja pepa, ngöne fe lo hna hnëkëne me iupi fë la itre itus, me göi nyihnyawa uma me wange la itre ejolen, waasi mano, me kuci xen. (Ite edomë 20:29) Thaa ceitune kö la itre huliwa cili memine la huliwa i maseta, atraqatre la madrine hne së hna kapa qa ngöne la isa hnëqa hne së hna isa eatrën, pine laka, celë hi huliwa ka hmitrötre ka atrunyi Iehova.—Kol. 3:23.
14 Kola pane nue la caa macatre kowe la itre ka ajane troa huliwa hnine la Bethela. Kola aijijë angatre troa inine troa itre atr ka catre huliwa. Ame la hna mejiune ke, ene la tro angatre a hane mele e hnine la Bethela. Ihnimi Iehova la ka upe la itre atrene la Bethela, troa amë panëne la itre aja ne la Baselaia, celë hi madrine i Akötresieti lai, ngo thaa itre sipu aja i angatre kö.—Mat. 16:24.
15 Itre Hna Ajane Enehila: Pine la pengöne huliwa hna kuca hnine la Bethela, haawe, ame la hna pane ajane enehila, ke itre trejine trahmanyi ka thaa faipoipo petre kö. Ngacama thaa hna amekötine kö, ngo hna pane xome pala hi la itre pionie lapaa, qa ngöne laka, angatre hë a cainöje ngöne la drai ka pexej. Ame itre xaa ijin, ke, hna fe angangane la qëhnelö kowe la itre trejine jajinyi me itre ka faipoipo ka 19 koi 35 lao macatren, nge ka hetre atreine ngöne la itre götrane hna ajane hnine la Bethela. Ketre kolo mina fe a ithuecatre me hane ajane la itre trejine trahmanyi me jajinyi ka nango sasaithe hë la 35 lao macatre troa mele hnine la Bethela, ngo kolo itre ka hetre atreine nge ka inine hë la itre pengöne la ketre huliwa hna troa kuca hnine la Bethela. Maine troa cilëne la itre ejolene la hna ithingë, me kuci xen, maine troa goeëne la itre ejolene göi itre masine hna huliwan, nge itre xaa huliwa ju kö. Ngo thaa eahuni kö a ithuecatre kowe la itre trejine troa sisedrëne pala ha la itre ini me atreine, matre thaa tro kö a jole e troa lö koi Bethela. Ame koi itre ka kapa ha la ketre sipu ini ngöne la ketre huliwa, maine jë qëmekene troa atre la nyipici, haawe, ka loi e troa cinyihane asë la itre pepa, me ce iupi fë memine la pepa ne sipo troa huliwa hnine Bethela.
16 Maine thaa hna hë nyipunieti kö troa huliwa hnine la Bethela, the kucakuca kö. Ngo loi pe troa sipone pala hi ngöne la nöjei macatre. Hnene la itre xaa trejine ka hetre atreine ngöne la itre huliwa hna ajane hnine la Bethela, hna nango hamëne qa kuhu hni angatre la hnepe ijine ka co hi. Ijije tro angatre a sipone troa huliwa hnine la Bethela koi caas, maine luetre, maine köni wiik, maine koi köni treu. Hetrenyi thene la seketere ne la ekalesia la pepa ne sipo thatraqane la itre ka ajane troa ixatua tune lai. Loi e troa komaadëne jëne la Pepa Ne Sipo Itus.
17 Ketre manathithi ka tru kowe la itre ka huliwa hnine la Bethela, troa ce mele me huliwa memine la itre trejine me Keriso. Kola madrine hnene la Collège Central, la aqane hujëne hnene la itre trejine ka nue la mele i angatre troa huliwa kowe la itre hna ajane hnene la itre trejine e cailo fen.—Fil. 2:20-22; 2 Tim. 4:11.
18 Itre Thöth—Hnëkë Jë Nyipunie Enehila Troa Huliwa Hnine La Bethela: Hna hnëkëne hnyawa troa huliwa e hnine la Bethela, a nyimu macatre qëmekene tro la thöthi a traqa kowe la 19 lao macatre i nyën. Nemene la nyine troa kuca hnene la itre thöthi matre troa hane hnëkë troa hane huliwa hnine la Bethela? Hna qaja hnei Iesu ka hape: “Ke dei e nyipunie, ate pi xupi ita, nge tha pane lapa kö troa e la thupen?” (Luka 14:28) Pine laka nyipi ewekë troa hnëkë matre troa atreine xupe la itre uma me eatrëne la mekun, haawe loi e tro mina fe epuni a waipengöne hnyawa la aqane tro angatre a eköthe la mele i angatre thatraqane la huliwa i Iehova elany! Troa hetre trepene ka catre thei angatr, e hna canga hane thele ngöne la mele i angatre troa aeatrëne la itre mekune ngöne la götrane la ua. Haawe, tune kaa epun itre thöth, nemene la aqane tro nyipunie a nyitrepene hnyawa la mele i nyipunie? Maine epuni a hane ajane troa huliwa hnine la Bethela, tro hë nyipunie a kepe thangane hnyawa cahu itre mekun.
19 “Kapa Ju” La Hnëqa Ka Sisitria Celë: Tune la hna qaja ngöne Mataio 19:12, hnei Iesu hna ithuecatre kowe la itretre drei nyidrë troa “kapa” la mele ne la atr ka thaa faipoipo kö. Pine nemen? Thaa hnei isa mekuna së kö, ngo “thatraqane la baselaia ne hnengödrai.” Hnei Paulo mina fe hna sajuëne la aqane mele celë, laka “pëkö ejolen’ e tro nyipunie a nyi hlue ne la Joxu.” (1 Kor. 7:32-35) Eje hi lai laka thaa tru kö hnei thöthi trahmanyi ka thele troa kapa la huliwa hnine Bethela, ke nyimutre la itre ka canga faipoipo. Eahuni a thuecatre koi nyipunie itre thöthi trahmanyi troa huliwa i Akötresie ngöne la drai la pexej, e thaa nyipunieti petre kö a hane xome la itre hnëqa ka eje thene la itre ka faipoipo. Nge maine thupene la itre hnepe macatre, angatre a mekune troa faipoipo, tro hë angatre a itre trahmanyi ka macaj, qa ngöne laka, hetrenyi hë thei angatre la inamacane ngöne la pengöne la mel, me ngöne mina fe la huliwa ne la Keresiano. Thupene la itre macatre ne huliwa hnene la itre xane hnine la Bethela, haawe faipoipo jë hi angatre nge angatre a ce huliwa memine la föe i angatre e hnine la Bethela. Maine ame hë thupene lai, angatre a kapa ju pena la itre xaa hnëqa, maine troa wange trongëne la itre ekalesia, maine troa mesinare pena, thaa tro jë kö angatre a thëthëhmine la itre ijine angatre a pane kapa la itre huliwa hnine la Bethela.
20 The Tro Kö a Thepe Së Hnene La Pi Hetre Mo: Loi e tro la itre thöthi a isa hnyinge ka hape: ‘Hapeu tro kö ni elanyi a hane nue la melenge ka pexej, thupene la hna ini, matre troa huliwa i maseta, maine troa nyihlue i Iehova ngöne la drai ka pexej?’ Eje hi laka, thaa ewekë ka hmaloi kö la troa nyihluei Iehova. Ngo maine iëne jë së troa huliwa i maseta ngöne la mele së ka pexej! Ame hë ngöne la pun, nemene huliwa la ka troa hamë së la pune ka lolo nge ka epine palua? Hnei Iesu hna sa hnyawa la hnyinge cili. Thenge la hnei nyidrëti hna qaja ngöne Mataio 6:19-21, kola hape: “The amë kö thatraqai nyipunie la tenga mo e celë fen, ga hete neköi fenifeni me xojene troa an, nge ga hete ate kë ’nö angete thë me ënö. Ngo amëjë thatraqai nyipunie la tenga mo e koho hnengödrai, ga pë nekö i fenifeni me xojene troa an, nge ga pë ate kë ’nö troa thë me ënö. Ke ame la hna amë la trenge nyi ’ö ngön, te, eje fe hi la hni ’ö.” Thaa tro pi kö la itre hni së a uku së troa thepe së hnene la fene celë, maine troa thele troa hetre mo, ngo tro pe së a pexeje me nue la mele së troa nyihlue i Iehova. Easë asë hi a atrehmekune laka, ame la sipu trenga mo nyine tro sa thele ke, ene la troa lolo la aqane imelekeu së me Iehova, nge easë hi lai a amadrinë Nyidrë. (Ite edomë 27:11) Maine tro së a amë panë Iehova ngöne la mele së ngöne la easë a thöth, haawe, easë hi lai a amamane ka hape, ka sisitria catre kö la itre ewekë ne la ua ngöne la mele së, nge ka nyipi ewekë catre la Baselaia koi së. Mekune hnyawa kö së laka, “ame la manathithi qa thei Iehova, te, kola atena mon; nge tha hnei nyidëti hna aköte fë.” (Ite edomë 10:22) Hanawange la ketre ewekë ka ijije kowe la itre thöth, matre troa amamane la hnei angatre hna amë ngöne la itre hni angatr, ene la troa hamëne la ketre ewekë ka tru alameken, nyine troa olene la itre ewekë asë hnei Iehova hna hamëne koi angatr. Ame la troa huliwa hnine la Bethela, ke ketre ewekë lai ka ijij, nge ka mingöminge kowe la itre ka hetre atreine ngöne la itre götrane hna ajan.
21 Loi e Troa Pë Gelene Ngöne La Aqane Ujë La Itre Ka Huliwa Hnine La Bethela: Hna hnyinge hnene la atre cinyihane la itre salamo ka hape: “Tro la thupëtesiji a nyidrawane la jë i angeice tune ka?” Hnei angeice hna sa ka hape: “Mate troa thupën’ eje thenge la wesi ula i [“Iehova,” MN].” (Sal. 119:9) Kolo fe a amamane laka troa neëne fe la nöjei ewekë ka sis qa ngöne la fene i Satana troa angazone la thiina së. Hetrenyi la itre xaa hnö hna traane hnei Satana matre troa sawa la itre thöthi troa thele la itre huliwa ngöne la götrane la ua, ene la kuci huliwa ka sisi jëne internet, me ngazo thiina kowe la itre trahmanyi maine föe, me itre miuzike ka ngazo, me itre nyine madrine ka iathixötrë, me iji gorok. Nyipi ewekë troa hetre hni ne ajane ka catr, matre troa cile kowe la itre itupathi cili. Maine ka kuca nyipunie la ketre ngöne la itre ewekë celë, haawe, pane ithahnata ju memine la itre qatre thupe ngöne la ekalesia i nyipunie, nge pane thele jë troa trije la itre ewekë cili, qëmekene troa nyialiene la pepa ne sipo troa hane huliwa hnine la Bethela. Nyipi ewekë troa hetre mekuthethewe ka loi, ngöne la kola mekune troa nue la mele së ka pexeje troa nyihlue i Iehova.—1 Tim. 1:5.
22 Inine Jë Troa Ce Kökötre Memine La Itre Xan: Ame la ketre nyine troa kuca ka nyipi ewekë catr, matre troa hetre thangane ka loi la huliwa hnine la Bethela, ke ene la troa atreine ce huliwa memine la itre xan. Ame la itre ka huliwa hnine la Bethela e celë e Kaledonia, itre trejine trahmanyi me föe, ke thaa ceitui angatre asë kö. Ngacama lolo e troa wange laka, nyimu pengöne thiinane atr, a hna nyixane hnene la emingömingöne la Bethela ngöne la götrane la ua, ngo ame pe ke hetre itre itupathi pala hi. Maine nyipunie a hane ajane troa huliwa hnine Bethela, pane isa hnyinge ju ka hape: ‘Hapeu, ka canga wesitre kö ni ngöne la kola thaa kapa hnene la itre xane la mekuneng? Hapeu ka thaa jole kö koi itre xane troa ce huliwa me eni?’ Maine nyipunieti a öhne ka hape, itre ewekë lai nyine troa akökötrene thei nyipunie, haawe, canga nyiqaane huliwane jë enehila. Maine tro nyipunieti a kuca tune lai, haawe troa hmaloi koi nyipunie troa atreine ce mele me ce huliwa memine la itre trejine e hnine la Bethela.
23 Catre pi troa akökötrene la aqane imelekeu i nyipunieti me Iehova, matre itre atr nyipunie ka macaje ngöne la götrane la ua. Catre pi troa ami ijine troa isa inine pala hi la Tusi Hmitrötr, tune la troa e pala hi eje ngöne la nöjei drai. Catre pi fe troa hane tro fë kowe la itre xaa atr la maca ka loi. Maine tro nyipunie a kuca la itre ewekë cili, tro mama laka nyipunie a kökötre ngöne la götrane la ua. (1 Tim. 4:15) Drei la ketre manathithi ka lolo hna troa kapa hnene la itre ka nyiqaane hnëkë enehila, troa nue la mele i angatre kowe la huliwa i Akötresie ngöne la drai ka pexej!
24 Itre Keme Me Thin, Inine Jë La Itre Neköi Nyipunie: Nemene la nyine troa kuca hnene la itre keme me thin, matre troa xatuane la itre nekö i angatre troa hane xome la huliwa ne cainöj ngöne la drai ka pexej? Hnei Iesu hna qaja ka hape: “Tro ha ceitune la nöjei ate ka inamacane memine la atr ini angat.” (Luka 6:40) Ame la nekönatre hna inine hnyawa, ke kola mama thei nyëne la itre thiina ka lolo ne la atre ini nyën. Loi e troa mekune hnyawa hnene la itre keme me thine la trepene meköti celë, ngöne la angatre a catre inine la itre nekö i angatr, matre “troa tune la thina i Akötresie.” (1 Tim. 4:7) Pine laka, canga nyitipune hi hnene la itre nekönatre la aqane ujë ne la itre keme me thine kowe la itre ewekë ngöne la ua, loi e troa isa hnyinge hnene la itre keme me thine ka hape: ‘Hapeu, eni kö a hane nyipi ewekëne la huliwa hna kuca hnine la Bethela, matre troa hane akökötrene la itre aja ne la nyipi hmi Iehova? Easë kö a hane wangatrehmekune la manathithi hnei Iehova hna hamëne jëne la Bethela? Hapeu, easë kö a hane mejiune laka, huliwa ka sisitria nyine troa iëne hnene la itre nekö së, la troa huliwa i Iehova ngöne la mele i angatre ka pexej?’ Maine easë a amamane laka hetre madrine së kowe la itre huliwa hna kuca e hnine la Bethela, tro fe hë a hane hetrenyi fe thene la itre nekö së la madrine cili.
25 Atraqatre la madrine me ole i Elekana me Hana kowe la nyipi hmi Iehova. Angatre a amë la ketre tulu ka lolo kowe la itre keme me thine ne la hnedrai së enehila. Ame ngöne la nöje Isaraela ekö, itre trahmanyi hmekuje hi la ka troa “mama xajawa i Joxu Iehova” akönia tro kowe la uma mano ngöne la macatre. Ngo hna trongë iwaca pala hi hnei Elekana, 30 km, cememine la hnepe lapa i angeic, “o macate” troa huje e cili göhnë hna hnëkëne thatraqane la hmi Iehova. (Eso. 23:17; 1 Sam. 1:3, 4, 9, 19; 2:19) Kola mama hnyawa laka, hna ajane hnene la hene fami celë kowe la hnepe lapa angeice asë, troa ce thawa la sipu aja ka eje thei nyidrë kowe la itre ewekë ngöne la götrane la ua.
26 Hnei Hana hna kapa la aja ka eje thene la föi nyidro, ene la aja kowe la nyipi hmi. Hnei nyidroti hna canga thele troa hane ixatua matre troa sajuëne la nyipi hmi ngöne la uma ne mano. Hnei Hana hna sisinyi ka hape, maine tro Iehova a hamëne koi nyidroti la caa nekönatr, haawe tro hë nyidroti a kuca matre tro nyëne a hane huliwa e hnine la uma ne mano. (1 Sam. 1:11) Hna aijijëne hnene la wathebo i Mose tro la trahmanyi a apëne la hna sisinyi hnene la föe i angeic. (Num. 30:6-8) Ngo hnei Elekana hna kapa la mekune i Hana, me amamane laka, nyidrëti fe a sajuëne la aqane ujë cili matre troa cilëgöline la nyipi hmi!—1 Sam. 1:22, 23.
27 Hapeu, hna ketre kö la hni Samuela, hnene la eloine la aqane ujë ne la keme me thine i angeic? Eje hi. Nekönatre petre kö angeic, hnei Samuela hna metrötre me catre kuca la huliwa hna athipe koi angeic, nge hna hamë angeice pala hi la itre hnëqa ngöne la huliwa i Akötresie. Ngacama Samuela hë a huliwa hnine la uma mano, ngo hna wangatrunyi angeice pala hi me ithuecatre koi angeice hnei Elekana me Hana. Hnei nyidroti pala hi hna catre troa wai angeice me hamë ithuecatre koi angeic, me xatua angeice troa catre nue la mele i angeice troa huliwa i Iehova.—1 Sam. 2:18, 19.
28 Drei la ketre tulu ka lolo catre hna hamëne hnei Elekana me Hana, thatraqane la itre keme me thine ne la hnedrai së enehila! Ame la kola öhne me drenge hnene la itre nekö së la aqane wangatrune së la hnëqa ka eje hnine la Bethela, memine la aqane hujëne së la mele së kowe la itre aja ne la Baselaia, haawe angatre mina fe a hane thele jë troa xatuane la itre xan. Nyimutre la itre keme me thine ka kepe thangane ka loi qa ngöne la hnei angatre hna amë ekuhu hni ne la itre neköi angatre la aja ka eje cili. Hna cinyihane hnene la ketre nekönatre ka sevene lao macatre ka hape: “Ame la eni a tru elany, eni a ajane troa mele e hnine la Bethela, nge hetrenyi la itre hnepe ewekë hnenge hna ajane troa kuca. (1) Troa lepe tus, me cinyihane la itre zonal, La Tour de Garde me Réveillez-vous ! (2) troa hane kuca la itre iatr, (3) troa hane huliwa ngöne hnë waasi maano. Ajange troa kuca la nöjei pengöne huliwa asë. Thaa ka jole kö lai koi eni.” Drei la elolone troa öhne la aqane mekune me aja cili ngöne la hni ne la itre nekö së!
29 Itre thöth, mekune hnyawa kö nyipunie laka, “kola pate la fene hnengödrai, memine la hna aja kow; ngo troa cile huti epine palua la atr kuca la aja i Akötesie.” (1 Ioane 2:17) Catre pi troa thele pala hi la itre aja ngöne la götrane la ua, tune la troa huliwa e hnine la Bethela. Itre keme me thin, xötrethenge jë la tulu hna amë pe hnene la itre trefëne ka mele nyipici ekö, a ka ithuecatre pala hi kowe la itre neköi angatr, matre tro nyudrene a hetre hni ne ajane troa nyihlue i Akötresie. (2 Pet. 3:11) Nge epi tro asë hi së a catre xatuane fe la itre thöth, itre trejine trahmanyi me föe, troa nyihluene ngöne la mele i angatre ka pexej, la Atre Xupi së, ke hetre hna “thinge hnaeane thatraqane la mele enehila, memine la mele epin.”—1 Tim. 4:8; Ate Cai. 12:1.
[Hna eköhagen götrane 4]
Hna Amekötine Thatraqai Huliwa Hnine Bethela
● Caa macatre ne Bapataiso hë
● Ketre atr ka macaje ngöne la götrane la ua, nge atraqatre la ihnimi koi Iehova me Organizasio i Nyidrë
● Lolo la aqane mel, ngöne la ua, me mekun, me thiina, nge pëkö mec.
● Atre celë maine ka lapa huti hë e celë e Kaledonia
● Atreine troa e, me cinyany, me qene Farasi hnyawa