Ka Hnëkë Hnyawa Kö Së Troa Cil Kowe La Itre Ewekë Ka Troa Tupath La Lapaune Së Ngöne La Ijine Easa Tro Koi Droketre?
Loi e tro sa ami göhnene hnyawa la itre ithuemacanyi celë, matre thaa tro kö sa ithel elany
1 Thaa hne së kö hna mekune, ka hape, troa hane nyenyape sai së a tro pital elany, maine troa cipaa së pena hnei droketre. Ngo ame pe, thaa tro pi kö sa thëthëhmine laka, ‘ame la ijine memine la ewekë ka xulu xan, te, kola traqa koi easë asë.’ (Ate cai. 9:11) Nyipici laka, hetre itre aqane inyië hne së hna thipën, ngo pane mekune jë së laka, eatre ju hi së ngöne la ketre ijin, nge thaa drenge hë së koilo; nemene la ka troa nyipi thupë së matre thaa tro ju kö a athipi madra së, ngöne la kola nyenyape sai së a tro pital? Ame la easa eatr maine kolo pena tith angazony së hnene la ketre mec, tre, canga traqa hi la itre ewekë ka tupath la lapaune së.
2 Maine troa xomi së koi pital, nge traqa ju ketre a uku së troa athipi madra së wanga tro sa mec, nemene la ka troa xatua së troa cile catr? Tro kö sa canga kei thenge la hna qaja koi së hnene laka, xou së troa mec? Ka xeci hnyawa kö e kuhu ngöne la isa hni së laka, thaa aja madra kö së? Ka hnëkë kö së troa cil kowe la ewekë celë ka troa tupath la lapaune së, matre atreine së troa ‘iananyi memine la madra’?—Ite hu. 15:28, 29.
3 Qëmekene tro sa atreine troa thipëne la madra ka troa angazone la aqane mele së ngöne la götrane ua, tre, loi e tro sa pane acatrene e kuhu hni së la mekune hne së hna sajuën. Nyipi ewekë mina fe tro sa trotrohnine hnyawa la hnei Tusi Hmitrötr hna qaja göne la madra, matre tro lai a nyitrepene la mekuna së. Maine thaa tro kö sa trongëne la mekune celë, tre, canga tro hi sa kei thenge la hna qaja hnene la ketre atr ka sipu selën, ka hape, atre catr kö angeice la ka loi koi së. Tune kaa fe la mekuna së, tro kö sa nu troa amenu së hnene la mekune, ka hape, atre catre kö itre droketre la pengöne la madra, hui Akötresie? Ohea, isa qeje mekune ju hë la itre atr ngöne la ijine cili, ngo ame kö së, tre, easa hnine lo hna hape koi së, “wange jë kö eö;” nge easa ajane mina fe troa kuca “la ka meköt” xajawa i Iehova. (Deu. 12:23-25) Ngo hapeu, hna nu axöji së kö troa cile caas kowe la itupath celë?—Ate cai. 4:9-12.
BIERO NE ITHUEMACANY GÖI PITAL ME COMITÉ DE LIAISON HOSPITALIER
4 Maine hetre itre ka aja ixatua matre troa cile catr kowe la itre jole göi troa ihamë madra, tre, hnei Sasaiatri hna acile la Biero Ne Ithuemacany Göi Pital e Brooklyn me ngöne itre Filial. Hnei Sasaiatri mina fe hna acile la itre comité de liaison hospitalier ngöne la itre nöje ka tru. Ame la ka nyi atrene la lue pengöne komite celë, tre, kolo itre qatre thup hna troxom me inin thatraqane la huliwa ne ithuemacany.
5 Hetre itre itus ka qeje pengöne la itre xaa aqane inyië ka thaa hane kö huliwaane la madra, me itre xaa aqane ixöj fe ka loi, ngacama pëkö madra hna hamën; celë hi itre ithuemacany lai hna thele hnene la itre atrene la Biero Ne Ithuemacany Göi Pital, ngöne la 3 600 nge sin lao itus hna cinyihane hnene la itre droketre qaa cailo. E öhne hë angatre la itre ithuemacany, tre, angatr hë a qeje pengöne kowe la itre comité de liaison hospitalier, me itre pital me itre xaa doketre mina fe. (Hnene la Biero Ne Ithuemacany Göi Pital e itre xaa ijine hna iupi fë la itre zonal ka amamane la itre aqane troa ixöj laka, thaa kolo kö a hane hamë madra; celë hi la ixatua hna hamën hnene la Biero ne ithuemacany, matre thaa icilekeu ju hi hnene la itre droketre, pine la ewekë celë.) Biero cili mina fe la ka thuemacanyi itre komite la itre wathebo hna acil ngöne la hna kootr, nge ka sajuën la aja së; itre ithuemacany hi lai ka troa xatuane la itre ka ithanatane la pengö së ngöne la hna kootr, troa atreine amekötine la itre mekun hna troa xom thatraqai së. Hetre itre dosie mina fe hna eköth hnene la Biero Ne Ithuemacany Göi Pital, matre amë hnine itre ej la itre ëje ne droketre ka ixöj ngo ka thaa hane kö hamë madra; qa ngöne lai, hetrenyi pala hi thei angatre la itre ithuemacany ka hnyipixe, nge ka nyipi ewekë hna troa huliwaane ngöne la ijine kola cile hnene la ketre trejin kowe la itre jol göi xomi madra.
6 Biero Ne Ithuemacany Göi Pital mina fe a elemeken la aqane inin la itre atrene la itre comité de liaison hospitalier, me goeëne fe la huliwa hna kuca hnei angatr. Aja i comité de liaison hospitalier troa hamëne kowe la itre atrene pital, la itre ithuemacany ka nyipi ewekë, matre ijij tro angatr a ce huliwa memine la itre atrene la komite. Maine hetrenyi ngöne la ketre pital la itre droketre me itre xaa atr ju kö ka ajane troa thele nyin la meci së ka troa nyi hnane la madra, tre, komite mina fe a amë la itre ejë i angatr ngöne la itre dosie hna eköth. Ka itreqe hë la itre atrene la itre komite troa xatua së; ngo hetre itre ewekë ka sisitria nyine tro sa kuca panën, matre hmaloi pëhë koi angatr troa kuca hnyawa la götrane qâ i angatr.
ASE KÖ SË TRONGËNE LA ITRE HNA AMEKÖTINE KA NYIPI EWEKË CATR?
7 Loi e troa pane xeci hnyawa koi së laka, hnene la itre atrene la hnepe lapa së hna isa nyialie i pepane hnyawa; nyipi ewekë troa wang maine hna siji drain kö la pepa, me saenën, me anyipicin hnene la itre atrekë hnëqan. Ame la itre xaa trejin, tre, traqa ju hi angatr ngöne la pital, nge hna pane thipëne hnene la itre droketre la sine pepa i angatr, ke, thaa hna siji draine ju kö, maine amë pena la itre ëjene la itre ka troa anyipicin la aja i angatr. Tune kaa fe la itre nekö së ka thaa bapataiso petre kö, hna hane kö nyialien la itre sine pepa i nyudren? Pane mekune jë së laka, thaa nyialien ju kö së lai sine pepa nge eatre ju hi la ketre nekö së; tro ha atre tune kaa hnene la itre atrene la pital la itre atr nyine troa thuemacan, maine mekuna së göi madra pena?
8 Ame la hnaaluene ewekë nyine troa kuca, tre, ene la troa wang, ka hape, EJE PALA HI thene la itre atrene la hnepe lapa së la sine pepa cili. Qëmekene tro la itre neköi së a tro troa ini, maine nyudreni pena a tro kowe la ketre hnë elo, tre, pane goeëne ju thei nyuden laka hetrenyi kö nyudren lai sine pepa cili. Tro ju hë së kowe la hna huliwa, maine ngöne la itre götrane hne së hna tro kow ngöne la itre ijine mano, me ngöne la hna asabele pena, ngo loi e xeci hnyawa e kuhu hni së laka, hne së hna xom trongëne la sine pepa së. Thaa tro pi kö sa a inu memine ej!
9 Pane mekune ju së la ewekë celë: kola nyenyape sai së a tro pital, nge thaa drenge hë së koilo nge maine jë, ketre thaa ijiji së kö troa ithanata, ke, ngazo la aqane eatre së; nemene jë la ewekë ka troa traqa koi së? Maine paatre kö the së lo sine pepa së nge ketre paatre kö la ketre sinee së, maine ketre qatre thup pena ka troa nyi trenge ewekë së, nge önine jë hi la itre droketre, ka hape, nyipi ewekë troa hamë madra koi së, haawe! tro hë angatr a athipi madra së. Ngazo pe, hna traqa fe hë koi itre xan la ewekë celë. Ngo maine hetrenyi së la sine pepa së, haawe, sin eje hi lai ka troa nyi trenge ewekë së, me amamane la aja së.
10 Celë hi kepin matre ka loi kö la troa hetreny lai sine pepa cili, hune la troa sipo finicein maine otrene ime nyine anyipicin pena thei droketre. Thaa ijiji së kö troa sija asë ngöne la lue ewekë cili la itre kepine matre easa thipëne la madra, thenge la hna qaja hnei Tusi Hmitrötr; nge ketre, thaa ijije kö tro sa saenëne lue ej nyine anyipicine, ka hape, ame la itre mekune hna sija ngöne la finicein, maine otrene ime pena, tre, celë hi aja së lai. Hnene la ketre atrene la hna kootr e Kanada hna qaja göne la sine pepa ne la ketre trejine föe, ka hape: “[Hnene la föe ka wezipo] hna huliwaane la ketre ewekë ka lolo matre troa thuemacan la itre droketre me itre ka ce huliwa me angatr, e thatreine ju eahlo ithanata hnene laka, ma thaa drenge hë eahlo koilo; nge nyipici laka, celë hmekuje hi la aqane ithuemacany ka lolo nyine troa amamane la aja ne la atr ka wezipo.” Haawe, the tro pi kö sa a inu memine ej!
11 Loi e tro sa mekune hnyawa laka, hna kuca la sine pepa celë göne la itre ijine jol, tune la kola nyenyape sai së koi pital nge thaa drenge hë së koilo; ngo maine hna eköth amë hë la ijine troa xöji së, tre, nyipi ewekë tro sa ketre sipu cinyanyine la itre xaa hne së hna amekötin, tune la pengöne la aqane troa xöji së (thenge la hne së hna amë ngöne lo sine pepa së, lo Instructions médical/Directives anticipées), memine la itre ëjene la itre droketre me itre pital hne së hna ajan troa tro kow. Celë hi emeköti së lai, matre ketre sipu tro kö sa iëne la nyine inyië hna troa hamëne koi së. Ngacama thatreine kö droketre, me easë hi troa canga atrepengöne la aqane trongene la itre ewekë elany, ngo ame pe, tre, loi e troa qeje pengöne hnyawa koi nyidrë, ka hape, e traqa ju ngazo la aqane ixöj, tre, ase hë qaja la itre hna amekötine nyine tro nyidrëti a trongën.—Ite edomë 22:3.
12 Ame la ketre nyine tro sa kuca nge ka nyipi ewekë catr, tre, ene la troa ce ithanatane memine la itre droketre la itre aqane inyië hne së hna iën. Haawe, drei hë la itre hne së hna troa ithanata memin?
LOI E TROA ITHANATA MEMINE LA ITRE DOKETRE KA TROA IXÖJ
13 Ame la ijine easa troa ithanata memine la ITRE DROKETRE KA TROA IXÖJ, tre, thaa ijine tro pi kö sa xoue atr. (Ite edomë 29:25) Thaa tro pi kö sa nue angatr troa mekune laka easa luelu, wanga qaja jë la ketre e angatr, ka hape, mekune i itre xan la hne së hna xom, ngo thaa mekuna së kö. Pane mekune jë së, ka hape, kola nyenyape sai së koi droketre maine ase pena ha së isapui me nyidrë göi troa ixöj; maine kola mekune hnene la droketre, ka hape, troa canga xöji së, haawe, nyipi ewekë tro së, maine ketre atrene la hnepe lapa së pena, a atreine hnying kowe la atre elemekene la huliwa ne ixöj. Loi e tro sa hnyingë nyidrëti, ka hape, ‘Maine traqa ju jole la aqane trongene la hna ixöj, tro kö nyipë memine la itre ka ce huliwa me nyipë a metrötrëne la ajang, me thupëne matre thaa tro pi kö a hamë madra koi ni?’ Maine thaa tro kö sa hnyinge tune lai, tre, pëkö xaa aqane troa thupë së.
14 Loi e tro sa qaja amamane hnyawa la hne së hna ajan, me catre sajuëne la mekuna së cili, cememine la hni menyik. Epi tro sa thuemacanyi angatr hnyawa, ka hape, easa aja itre xaa aqane inyië ka troa nyi hnane la madra. Thaa tro kö sa xou troa ithanatane lo sine pepa së ne anyipicine laka, thaa aja madra kö së; nge ketre tro fe sa hane qeje pengöne kowe la droketre me itretre ixöj lo ketre pepa së hna hape, attestation de refus de transfusion. Maine sixele la droketre troa trongëne la itre hne së hna ajan, tre, ijije hi tro sa thele ketre droketre pena ha.
15 Drei la ketre droketre hna hape, ANESTHÉSISTE: Ala nyim nge isa hetre hnëqan la itre droketre ka troa ixöj, ngo ame la droketre, laka THAA TRO PI KÖ SA THËTHËHMINE TROA ITHANATA MEMIN, tre, ene hi la anesthésiste. Hnëqa ne la droketre celë troa thupëne la mele së ngöne la ijine kola xöji së hnene la itre xaa droketre; nyidrëti hi la hne së hna troa ithanata memin göne la itre mekune nyine troa xom, tune la itre pengöne aqane inyië hne së hna kapa maine thipëne pena. Haawe, mama hnyawa koi së, ka hape, thaa tro kö sa ithanata hmekuje hi memine la droketre ka xöji së. Qa ngöne lai, loi e tro sa ithanatan me qaja hnyawa kowe la anesthésiste la mekune hne së hna xom; nge ketre, loi e xeci hnyawa koi së, ka hape, tro nyidrëti a metrötrëne la aja së.—Pane goeëne ju la Luka 18:3-5.
16 Hna majemine hnene la anesthésiste troa traqa troa iwai ngöne la jidri qëmekene troa xöji së; ngo maine ka icilekeu nyidrë memine la mekuna së göi madra, tre, maine jë tro hi nyidrëti a traqa hmiitr. Catre jë së sipon kowe la droketre ka troa xöji së troa xom la ketre anesthésiste ka kapa la mekuna së, matre ijije tro sa ce ithanata hnyawa me nyidrë qëmekene la kola troa xöji së. Loi e tro sa trongëne hnyawa la itre ithuemacany celë matre, e thipëne kö hnene la pane anesthésiste la mekuna së, tre, ijije hi troa canga thele ketre. Emeköti së la troa iën me atrepengöne hnyawa la anesthésiste ka troa hane ixatua ngöne la kola troa ixöj; nge thaa tro pi kö sa nue koi itre xan troa sewe së.
17 Nyipi ewekë catr tro sa qaja hnyawa, ka hape, ame göi aqane inyië, tre, THAA EASË KÖ A XOMI MADRA; thaa nyine tro kö a ithanatan. Loi e tro pe sa sipone troa hamëne koi së la itre aqane inyië ka troa nyi hnane la madra. Tro fe sa qaja koi angatre la pengöne la itre xaa aqane inyië. Maine önine la itre droketre ka troa ixöj, ka hape, ame la hne së hna qaja, tre, thaa celë kö la nyin kowe la meci së, haawe, sipo angatr jë troa thele ngöne la itre xaa itus i angatr la itre xaa aqane inyië ka ihmeku memine la aja së. Loi e tro mina fe sa qaja hnyawa koi angatr, ka hape, maine angatr a ajan, tre, tro sa sipone kowe la itre qatre thup troa hëne la comité de liaison hospitalier, matre tro ej a hamëne koi së la itre xaa ithuemacany.
CATRE JË SË SAJUËNE LA ITRE EMEKÖTI SË
18 Ame ngöne la itre xaa nöj, tre, kola sipone hnene la itre ka elemekene la pital troa nyialien me saenëne la ketre pepa ka anyipicine laka, thaa tro kö a zö i angatr elany e tro ngazo pi hë la aqane xöje la atr ka thipëne la madra. Ngo thaa itre pital asë kö la ka sipone la pepa celë. Qa ngöne lai, loi e tro kö la atr ka wezipo a ketre hamëne lai pepa cili, maine ketre pepa pena, hna hape attestation de refus de transfusion de sang; ketre pepa lai hna troa nyialien thenge la itre hna amekötine ngöne la ketre Huliwa ne Baselaia ekö (tune lo km 12/85 g. 5). Hetre itre xaa droketre ka troa sipone matre troa saze la itre ithuemacany ngöne lai pepa nge troa cinyihane, ka hape, e jole ju hë la aqane trongene la hna ixöj, tre, easa ajan troa hamëne koi së la aqane inyië ka loi matre mel. Maine kola mekun troa hamë madra koi së, tre, meköti troa thipëne la sipo i angatr. Ame itre xaa ijin, tre, itre ka elemekene la pital a hamë së la pepa ne anyipicin laka, thaa zö i angatr pë hë la kola tro ngazo la aqane ixöj, hnene la hne së hna thipëne la madra; haawe, meköt tro sa ketre cinyihane, ka hape, easa kapa la itre xaa aqane inyië, ngo thaa tro kö a hamë madra koi së. Maine pena, ijije fe troa sija trije lai mekune cili. Pepa lai ne anyipicine la hne së hna ce ithanatan me axecië mekun me pital. Maine thaa kapa kö së la itre mekun ka eje ngöne lai pepa, tre, thaa tro kö sa saenën la pepa. Nge maine kola iele së hnei ketre atr troa saenën lai pepa cili, tre, loi e tro sa sipone troa hëne la ketre atrene la comité de liaison hospitalier, maine ketre qatre thup ne la ekalesia së pena, matre tro nyidrëti a xatua së troa atre la nyine troa kuca.
19 Ijiji së kö troa trongëne la itre eamo celë? Ijiji së hi. Haawe, loi e tro sa atrehmekune hnyawa la itre emeköti ne la atr ka wezipo. E lö hë së kowe la pital, tre, thaa tro pi kö sa thëthëhmine la itre emeköti ne la atr ka wezipo. Thaa tro pi kö sa nue kowe la aja ne troa canga öhnyi nyin la meci së, troa wange sixan la itre emeköti cili. Nge ketre, the tro pi kö sa nu koi ketre atr troa sewe së troa trongëne la itre emeköti së.
20 Hna hëne la emeköti cili, ka hape, le droit au consentement éclairé, pengön: thaa tro kö la itre droketre a hamëne koi së la ketre aqane inyië, e thaa hne së kö hna nue angatr troa hamën. Ijiji së mina fe troa hane thipëne la itre xaa aqane inyië. Qëmekene troa kapa la ketre aqane ixöj maine ketre aqane inyië pena, tre, nyipi ewekë tro sa pane atre la hnei itre droketre ka troa ixöj hna troa kuca koi së, memine la itre engazone la ketre aqane ixöj. Thupene jë hi lai, loi e tro angatr a qaja koi së la itre xaa pengöne aqane inyië ka ijije koi angatr troa hamën. Maine ase asë hë së trongëne la itre ithuemacany celë, nge atre hnyawa ha së la hne së hna ajan, tre, ijiji së hë troa iëne la aqane troa xöji së.
21 Maine easa ajane troa atre hnyawa la pengöne la hna troa kuca koi së, tre, nyipi ewekë tro sa atreine hnyingë pengöne la itre hne së hna thaa trotrohnine kö, tune la itre hnëewekë ka ketre pengön hna majemine qaja hnene la itre droketre. Drei la ketre ceitun: önine jë hi la ketre droketre, ka hape, nyidrëti a ajane troa hamë “plasma” koi së; thaa tro kö sa mekune menun, ka hape, maine jë nyidrëti a qaja lo “restaurateur du volume plasmatique,” ke, thaa eje fe kö lai. Haawe, qëmekene troa nangë droketre, tre, loi e troa pane hnying, ka hape: “Ketre igötranene la madra kö la hna troa hamëne koi ni?” Nge maine hetre itre aqane inyië hnei nyidrëti hna ajan troa hamë së, haawe, hnyingë nyidrëti jë, ka hape: “Ame la itre aqane inyië cili, tre, kolo kö a hane huliwaane la madra?” Nge maine hetre itre masiin hnei nyidrëti hna ajan troa huliwane göi së, tre, pane hnyinge jë, ka hape: “Ame la kola troa saan lai masiin koi së, tre, thaa tro jë kö lai masiin a xeene la madrang?”
22 Ngo pane mekune jë së, ka hape, ase asë hë së trongëne la itre ithuemacany celë ngo thaa kapa pala hi hnei droketre la aja së, nge kösë ketre kolo fe a hane nyiqaane icilikeu memine la mekuna së, nemene hë la nyine troa kuca? Thaa tro pi kö sa cile troa canga sipo ixatua. Ame la itre xan, tre, hnei angatr hna huli hmiitr troa sipo ixatua, nge ame hë la pun, tre, hna jole la aqane trongëne la itre ewekë göi angatr.
KETRE IXATUA KA SISITRIA NGÖNE LA NYIPI IJIN
23 Ame ngöne la ketre ijin, tre, traqa pi hi koi së la ketre jol: (1) kola nyenyape sai së a tro pital matre troa xöji së nge öni droketre jë hi, ka hape, loi e troa hamë madra koi së (maine kowe la ketre sinee së pena ka wezipo); maine pena (2) ngazo catre hë la meci së, nge ma tro hë sa mec; (3) maine jë, nekö së pena la hna tith hnei mec (maine ka tru pena) nge kola qaja hnene la droketre, maine ketre infirmière, maine hene la pital pena, ka hape, angatr a troa tro fë koi hna kootr la aqane catrefë mekune së. Maine easa aja ixatua, tre, drei e cahu la itre nyine tro sa kuca:
24 LOI E TRO SA HËNE LA ITRE QATRE THUP NE LA EKALESIA SË. (Pine laka, thaa easë kö a xomi madra, haawe, nyipi ewekë tro sa canga thuemacane la itre qatre thup ne la ekalesia së, qëmeken tro sa tro koi pital.) Nge maine easa goeëne laka, nyipi ewekë troa hëne la comité de liaison hospitalier ka thaa nanyi kö qa ngöne la götran hne së hna mele ngön, tre, LOI E TRO LA ITRE QATRE THUP A HË ANGATR. Maine easë fe a ajan tro la itre xaa atrene la comité de liaison hospitalier a tro koi së e pital matre troa xatua së, tre, ijije hi troa sipo angatr.—Is. 32:1, 2.
25 Atre hi la itre qatre thup ka nyi atrene la comité de liaison hospitalier la ëjene la itre droketre ka huliwa ngöne la nöje hne së hna mele ngön nge ka kapa la aja së göi aqane inyië; ijiji angatre fe troa thele la itre xaa droketre maine itre xaa pital kö ka kapa troa xatua së. Maine pë kö droketre ka kapa la aja së ngöne la götrane hne së hna mele ngön, tre, tro la itre qatre thup a hëne la itre atrene la ketre comité de liaison hospitalier ka thaa nanyi kö qa the së. Ijiji angatr mina fe troa sipone kowe la ketre droketre ka kapa la aja së göi aqane inyië, matre tro nyidrëti a qeje pengöne kowe la itre droketre ka troa ixöj la nyine troa kuca e pëkö madra hna troa hamën. Atre hnyawa hi la comité de liaison hospitalier la nyine tro angatr a kuca ngöne la kola traqa la itre ewekë celë, pine laka, ka hnëkë hnyawa ha angatr.
26 Maine easa aja ixatua maine ketre sinee së pena göi troa ithanata me ketre droketre maine ketre atre elemeken la pital pena, tre, loi e tro sa sipo ixatua thene la comité de liaison hospitalier; aja i angatr troa xatua së ngöne la götrane cili. Nyipici laka thaa angatre kö la itre ka troa axecië mekun koi së, ngo ame pe, tre, tro angatr a xatua së troa atre la mekuna i Sasaiatri ngöne la götrane cili; ketre, hnei angatr hna hnëkëne la itre ithuemacany ka nyipi ewekë koi së göne la itre aqane inyië maine göne la itre emeköti së pena.
27 Maine sixele kö la itre droketre troa kapa la aja së, tre, loi e troa ithanata memine la ka elemekene la pital, me sipone troa nyi hnane lo la itre droketre cili hnene la itre xaa droketre ka kapa la itre sipo së göi aqane inyië. Ame ngöne la itre xaa ijin, tre, hmiitre la hene ne la pital troa eatrëne la sipo së, ene pe thele ketre droketre ka ixöj jë hi së, ka troa metrötrëne la aja së. MAINE öhnë hë së la ketre droketre ka tune lai, nge drengë hë së laka, ijije hi troa xomi së a tro kowe la pital hna huliwa ngön hnene lai droketre cili, tre, meköti troa ami ëjene la itre droketre ka icilekeu memine la aja së ngöne la ketre sine pepa hna saenën me ami drain. Pepa hi lai nyine troa thuemacanyine la atr elemekene la pital, ka hape, thaa itre droketre cili hmaca kö la itre ka troa thele nyin la meci së.
28 Meköti kö tro sa ujë tune lai? Nyipici, meköti hi lai! Nge maine troa tro fë kowe la hna kootr la jol ka eje the së, nge e ju hi hnene la ketre atre cilëne lo pepa hne së hna nyi alien, ame e cili, maine jë tro hë nyidrëti a nyi xöle së. Ketre, tro la ewekë hne së hna melën a ketr la itre xaa droketre ka troa atrehmekune, ka hape, meköti tro sa isa iëne la itre aqane inyië ka loi koi së; nge maine jë, saqe hi tro angatr elany a hane thele nyin la meci së. Loi e troa canga thele nyin la meci së e ijine petre kö, wanga troa jole catr la meci së. Haawe, loi e thaa tro pi kö sa treqene troa trongëne caha itre ithuemacany!
29 Nyipici laka, thaa qa nyi eahuni kö troa uku nyipunie troa xomi pepa ne assurance-maladie, ngo e pëkö the së la itre pepa cili, jole catre koi huni troa thele droketre ka kapa troa ixöj, nge ka metrötrëne fe la aja së göi aqane inyië.
ITRE MEKUNE KA JUI NYINE TRO PALA HI SA THUPËN
30 Nyipi ewekë tro sa atre laka, ame la itre droketre a hnying ngöne la itre xaa ijin, tre, thaa hnene kö la angatr a meku së, ngo hetre ketre kepine kö matre angatr a hnying. Hnene la itre droketre (me itre xaa ka huliwa ngöne la hna kootr) hna majemine hnying ka hape:
• “Epuni a pi mec (nue la nekö i epuni troa mec) hune la troa xomi ‘madra matre mel’?”
31 Maine tro së sa, ka hape, “nyipici,” tre, ka meköti hi lai thenge la hna amekötine hnei hmi. Ngo ame pe, tre, tria kö la aqane trotrohnine hnene la itre atr la aqane troa sa tune lai; nge ame itre xaa ijin, tre, maine jë tro pena ha la itre atrene la hna kootr a icilekeu me easë. The tro pi kö sa mekun, ka hape, thaa easë kö ngöne la huliwa ne cainöj. Easë pe a ithanatane la itre aqane inyië ka nyipi ewekë koi së matre nyi nyin la meci së. Qa ngöne lai, loi e tro sa thupëne la aqane troa sa kowe la itre droketre maine koi itre ka cilëne pena la hna kootr.—Sal. 39:1; Kol. 4:5, 6.
32 Maine tro së sa kowe la ketre droketre, maine ketre atre cilëne la hna kootr, maine kowe la atre elemeken la pital, ka hape, “nyipici,” tre, tro hë angatre lai a mekun ka hape, easa tune lo itre xaa ka hmi ka ajan troa mec, maine ka nue pena la itre nekö i angatr troa mec, pine la hmi angatr. Nge ketre, e qaja hë së koi angatr ka hape, ka catr la lapaune së kowe la mele hmaca, tre, thaa aqane tro kö së lai a nyi nyin la jole celë. Tro pena ha angatr a goeë së tune lo itre ka ujë qene hmo pi hmi, nge ka thatreine axecië mekun thenge la atrehmekun ngöne la ijine kola tro ngazo la mec. Nge maine nekö së pena la ka wezipo, tre, tro hë angatr a goeë së ceitu me itre kem me thin ka thaa hnimi kuku kö nge ka cipane koi nyëne la itre aqane inyië ka loi “matre mel.”
33 THAA EASË KÖ a thipëne la itre aqane inyië ka loi. Easë hi a thipëne la mekuna ne la droketre göne la PENGÖNE aqane inyië. Maine tro sa qaja koi angatr la mekune celë, haawe, maine jë tro ha saze la aqane trongene la itre ewekë koi angatr me koi së fe. Ame koi angatr, tre, madra HMEKUJE hi la nyin ka loi kowe la meci së “matre mel;” nge celë hi mekune lai ka troa amenu angatr. (Pane goeëne ju lo brochure Comment le sang peut-il vous sauver la vie ?, götrane 7 koi 22.) Haawe, nyipi ewekë tro sa qeje pengöne hnyawa koi angatr la mekune cili. Tro sa qaja ka hapeu? Drei la ketre aqane troa sa, kola hape:
• “Thaa ajange kö troa (tro la neköng a) mec. Ke maine nyipici ju lai, ka hape, ena ajan troa (tro nyën a) mec, tre, paatre kö ni la, eni kö e koilo hnalapang. Ngo eni hi la matre tro epun itre droketre a hamë ni la itre nyine inyië ka Ioi koi ni matre thaa tro kö ni (kowe la neköng matre thaa tro kö nyën) a mec. Ame la hnenge hna ajan koi ni (kowe la neköng), tre, ene la itre xaa nyine inyië ka nyi hnan la madra. Hetre aqane inyië ka tune lai.”
34 Ame la itre xaa aqane hnyinge hnene la itre ka cilëne la hna kootr me itre droketre, tre, kola hape:
• “Ngo tune kaa fe e amekötine jë hi ngöne la hna kootr, ka hape, troa hamë madra koi epun ngacama xele epun? Drei la hna troa nyi zön?”
• “Maine tro epuni a xomi madra, maine troa hamë madra koi epun ngo xele pe epun, hapeu, tro ha upi epuni hnei hmi, nge thaa tro hë epuni a hane kapa la mele ka epine palua? Nge tune kaa fe la aqane troa goeë epuni hnene la ekalesia i epun?”
35 Hnene la ketre trejine föe hna sa kowe la ketre atre cilëne la hna kootr, ka hape, ame ngöne la götrane celë, maine tro nyidrëti a iup troa hamë madra koi eahlo ngo xele pe eahlo, tre, thaa zö i eahlo pë hë la aqane xomi mekuna i nyidrë. Önine jë hi la atre cilëne la hna kootr, ka hape, maine thaa tro kö a jele ngazo eahlo pine laka thaa mekuna i eahlo kö la hna axeciën, haawe, nyidrëti pë hë la atrekë zön. Ene pe, nyidrëti a iupi ju troa hamë madra.
36 Nyipi ewekë tro sa trotrohnin, ka hape, ame la kepin matre kola hnying tune caha, tre, göne tro hi a ujëne la mekuna së, matre tro hë sa hane xomi madra. The tro pi kö sa nue angatr troa iaö së! Haawe, nemene hë la nyin kowe la itre aqane ujë ka tune lai? Ijije hi troa sa, ka hape:
• “Maine tro epuni a hamë madra koi ni ngo xele pe ni, tre, kösë epune hi lai a angazo ni. Tro pë hë ni lai a thue la akötr hna kuca koi ni ngöne la nöjei drai ne mele ni, ke, ase hë angazone la meleng ngöne la götrane ua, nge ketre thaa hna metrötrëne kö la itre aliene hning; hnene hi la hna iele ni troa kapa la ketre ewekë hnenge hna xelen. Tro pala kö ni a cile catr kowe la itre ka thel troa amë ngöne la ngönetreing la ewekë hnenge hna xelen. Nge ketre, ame hë la aqane tro ni a tro fë kowe la hna kootr la hna kuca koi ni, tre, ceitune hi memine lo aqane iuti sai hnene la ketre atr hna angazon.”
37 Loi e tro sa amamane hnyawa kowe la itre xaa atr, ka hape, ame la troa hamë madra koi së ngo xele pe së, tre, kösë kolo hi lai a angazone la ngönetrei së. Thaa ewekë kö la nyine tro sa nu me wanga ahmalohmaloeën. Haawe loi e tro sa catr sajuëne la itre emeköti së. Loi e tro sa qaja hnyawa koi angatr, ka hape, easa ajane la itre xaa aqane inyië ka troa nyi hnane la madra.
NEMENE HË LA HNE SË HNA TROA KUCA MATRE TRO SA HNËKË?
38 Ase hë së wange la itre xaa nyine tro sa kuca matre troa thupë së qa ngöne la troa hamë madra ngo xele pe së. (Tro pë hë sa ithanatane hnyawa la itre aqane tro sa cile kowe la itre jole ka ketr pena la itre nekönatr ngöne la götrane la xomi madra.) Hne së fe hna goeëne la aqane hnimi së hnene la itre atrene la Sasaiatri, ngöne la aqane hamë ixatua hnei angatr koi së ngöne la nyipi ijin. Nemene la ka nyipi ewekë koi së troa kuca matre xeci hnyawa koi së laka, ijiji së hë troa cil kowe la ejolene la itre aqane inyië ka troa tupath la lapaune së?
Ame la hnapan, tre, loi e tro sa ithanatane hnine la hnepe lapa së la itre hnepe jole celë me ce wange la itre mekune hne së hna troa xom me trongën ngöne la ijin kola troa nyenyape sai së a tro pital.
Thupene jë hi lai, loi e troa xeci hnyawa koi së, ka hape, hetreny asë hi së la itre pepa ka nyipi ewekë koi së ngöne la ijine cili.
Ame la ewekë hnapine nyine troa kuca, tre, ene la troa pane thithi fë koi Iehova la hna axecië mekun, me sipone koi Nyidrë la trenge catr ka ijij matre atreine së catre trongëne la mekune hne së hna sajuën, ene la troa ‘iananyi memine la madra.’ Maine tro sa trongëne la wathebo hnei Iehova hna hamëne göi madra, tre, tro hë Nyidrëti lai a madrine troa hamëne koi së la mele ka epine palua.—Ite hu. 15:29; Ite edomë 27:11, 12.
[Hna eköhagen götran 5]
Maine kola jole la meci së, maine ketre sinee së pena, nge kola ithanatane hnene la itre droketre troa hamë madra, tre, drei cahu itre mekune hna eköhagen nge ka amamane koi së la nyine troa kuca:
1. Troa pane hëne la itre qatre thup ne la ekalesia me sipo angatr troa xatua së.
2. Maine easa ajane troa xatua së hnene la comité de liaison hospitalier, haawe, tro sa sipone kowe la itre qatre thup troa hë angatr.
3. Aja ne la comité de liaison hospitalier troa xatua së troa ithanata koi droketre me itre xaa atr fe.
4. Ijije hi tro la comité de liaison hospitalier a xatua së troa hëne la itre xaa droketre ka troa waipengöne la meci së me ce ithanatan memine la itre droketre ka troa ixöj, la itre xaa aqane inyië ka troa nyi hnane la madra.
5. Ijiji comité de liaison hospitalier mina fe troa xatua së matre troa sipon troa xomi së kowe la ketre pital ka metrötrën me kapa la aja së göi itre aqane inyië.
6. Maine hna ati së ngön avio a tro pital, tre, CANGA hëne jë la comité de liaison hospitalier. Angatr la ka troa xatua së troa wang maine hnei droketre ne CAFAT kö hna trongëne la nyine troa kuca matre xomi së kowe la pital ka troa metrötrën me kapa la itre aja së ngöne la götrane la itre aqane inyië. Loi e tro sa canga qaja hnyawa koi droketre la mekuna së ngöne la götrane cili.