Xatuane Jë La Itre Xaa Atr Troa Atre Pengöne Lo Atr Ka Tru
1 Atraqatre la madrinene la itre atr ka e hë lo itus Le plus grand homme de tous les temps, hnene laka hetre thangan’eje kowe la itre mele i angatr. Hna cinyihane hnene la ketr’e angatr, ka hape: “Ame la eni a ase e asë la itus, eni a drenge e kuhu hning, kösë lo kola hë ni hnei Iesu troa ce tro me Nyidrë, troa mele easenyi Nyidrë, troa ce kapa me Nyidrë la itre akötre i Nyidrë, itre aja i Nyidrë memine la nöjei götrane la huliwa i Nyidrë . . . Ame la easë a e lai itus, ke, kösë lo easë a goeëne la ketre filimene la mele i Iesu.”
2 Kola xatua së hnyawa hnene la itus Le plus grand homme troa atre Iesu, nge me Iehova fe (Ioane 14:9). Hnene la ketre nekönatre ka 12 lao macatre, hna qaja la hnei angeice hna mekune ngöne lai itusi me hape: “Hnene laka tru la ixatua qa ngön, hnenge hna thithi koi Iehova, me treije koi Nyidrë cememine la hni ka madrin, nge thupene lai, eni a goeëne lai itus. Nge hnene la etrune me ejuine lai itus, eni a trotrohnine hnyawa laka, Iehova me Iesu a thupë së.” Hnei Iesu hna qaja ngöne tusi Ioane 17:3, ka hape: “nge drei lola mele ka tha ase paluakö koi së, ene laka tro së a atrehmekua Iehova memine la hupuna i Nyidrë.” Hawe, ame la troa inine me atre pengöne la mele i Iesu jëne lai itus, ke, celë hi ketre jëne troa atre Iehova hnyawa ngöne laka, Iesu la “hnaiji Nyidrë.” — Heb. 1:3.
3 Hna fejaane la 19 milio lao itus Le plus grand homme ngöne la 70 lao qene hlapa. Qangöne lai, kola amamane hnyawa laka, alanyimu la itre atr ka kapa madrine itr’ej. Nyimutre la itre ka e asë lai itusi ngöne la angatr’a xötrei kapa. Hnene la ketre thupëtresiji hna aca tro e lai itusi ngöne hi la lue wiike thupene la angeic’a kapa. Hna qaja hnene la ketre mekene hmi ka hane kapa lai itus, ka hape: “Thatreine kö ni troa inu memine lai itusi cili. Ngöne la nöjei jidr, ke, eni me föi eni a e la itre xaa götrane qëmekene tro nyiho a meköl.”
4 Nyipi ewekë la cainöje ngöne la nöjei ijin: Hnene la ketre trejine hna amamane la itus Le plus grand homme kowe la itre atr ka ce huliwa me angeic. Nge kola drei mejene ka hape, hetrenyi thei angeice lai itus, kolo fe a iqajakeune la alien’ej. Celë hi matre, hnene la itre ka ce huliwa me angeice hna xome la ëjene la itre ka ajane troa hane e lai itusi cili. Qangönelai, 461 lao itusi hnei angeice hna hamën! nge faifi lao atr ka nyiqane etid. Hna hamëne fe hnine la avio la itus Le plus grand homme hnene la ca söre së, kowe la ketre peene ka troa elemekene la ketre huliwa katru, ene la troa acilëne la kardinal ka hnyipixe. Hetre 40 hë lao macatre ne huliwa nyidrë hnine la Vatika. Qangöne lai, loi e tro së asë a wangatrehmekune la nöjei ijine ka ijij, troa trofë lai itusi cili koi itre xan.
5 Nyimutre la itre thöthi ka madrine hë hnene lai itusi cili: Atraqatre fe la madrine ne la itre thöthi hnene lai itusi cili. Hna cinyihane hnene la ketre, ka naene lao macatre ka hape: “Ame la itusi ka sisitria koi ni, ke, Le plus grand homme de tous les temps, pine laka nyimutre la itre ewekë hnenge hna inine me kapa qa ngön’ej.” Maine easë a cainöje trootro, nge ixelë ju hi së memine la ketre thöth, ke, nyipi ewekë tro së a pane cile troa amamane koi angeice la itus, me ce wange la itre mekune ka ijij me angeic. Ngo troa eje lai, e kapa hnene la keme me thine i angeic. Loi e tro palahi së a majemine troa hane hamëne la itre itusi së. Ame enehila, ke, atreine fe hë la itre thöthi troa hane qeje Iesu, pine laka, hna aijijë angatre troa hane atre Nyidrë, jëne lai itusi cili. Iesu la ketre thupëtresiji hna ajane troa easenyine hnene la nöjei atr. — Mat. 19:14, 15.
6 Kola saze la melene la itre atr ka e la itus Le plus grand homme. Nyipi ewekë tro së a hane thuemacane la nöjei atr lo alien’ej. Fe jë ngöne la qaane lai itus, ngöne lo götrane hna cinyihane ka hape: “Apprenons à le connaïtre, pour notre bien (manathithi ngöne la troa atre pengöi Nyidrë)”. Ketre mekune lai ka troa xatuane la itre atr troa, atrehmekune ngöne la angatr’a e lai itus, lo manathithi hnei angatre hna troa hetrenyi qa ngön. Alanyimu ngöne la götrane i epun, itre atr ka hai, tuune la ketre atr celë ka ase e lolai itus; angeic’a hape: “Pëkö itusi ka sisitria hnenge hna hane e hune la itusi celë! pine laka, ej’a saze la meleng.”