Könëne Jë La Nöjei Atr Matre Xötrethengene Fe Angatre La Ka Tru Hune La Nöjei Atr’asë
1 Ame ngöne Mataio 5:14, hnei Iesu hna qaja kowe la itretre drei nyidrë ka hape: “Nyipunieti la lai ne la fene hnengödrai.” Kola hape tro angatr’a qaja trongëne la Baselaia i Iehova, memine la itre hnei nyidrëti hna hnëkëne ngöne la ihnime thatraqane la mel, jëne Iesu. Loi e troa amë hutine la mekune celë the së, ngöne la kola troa trofë trongëne la itus Le plus grand homme de tous les temps, e treu diseba. Hanawange la itre xaa mekune nyine troa qaja.
2 Thupene la hnei epuni hna qaja la eje i epun, ke, ma ijije troa sisedrëne memine la sipu aqane ithahnata i epuni troa qaja ka hape:
◼ “Alanyimu la itre atr, angatr’a isa hnyinge ka hape, nemene la pengöne la aqane mele i Iesu, lo nyidrëti e celë fene hnengödrai. Tuneka fe la mekune i epun, hnauëne laka tha ceitui Iesu kö memine la itre xaa atr. [Nue pi troa sa.] Ame ngöne la itusi celë, ene Le plus grand homme de tous les temps, ke, hna qejepengöne la esisitriane la mele i nyidrë, memine la aqane huliwaane nyidrëti la maca ka loi, nge kola xatua së lai troa wangatrehmekune la pengö i Iesu. E thupene la hna e la itus, ke, itre xan’a mekune laka hnei angatre hna hane ce mele me nyidrë, me ce akötre me nyidrë, nge hnei angatre fe hna goeëne la aqane cainöje trootro i nyidrë.” Köjane jë la pane ceitune hna cinyihane ngöne lo taane lai itus. Nge amamane ju fe la qaane lai itus, nge e jë la hnaluene paragarafe fene la hna cinyihane ka hape “Apprenons à le connaitre pour notre bien.” Hamëne pi lai itus, 400 F. la thupen.
3 Maine pena qaja ju ka hape:
◼ “Ame ngöne la itre hneijine celë, alanyimu la itre ka meku Iesu. Ngo, ejehi laka, pine laka elë catre hë la ngazo e celë fene hnengödrai, matre itre xan’a isa hnyinge ka hape kukehni së kö hnei Iesu. Hapeue la mekune i nyipë?” Treqene ju troa sa hnene lai atr. Fe jë kowe la mekene 24 ne lai itus Le plus grand homme, nge qaja jë la kepine matre Iesu a traqa e celë fene hnengödrai, tha tro pe a aqean. Thuepene lai, e jë la Ioane 15:13, nge amamane hnyawaane jë la ihnimi Iesu qa kuhu hni kowe la itre xan. Mekune ju troa hamëne la itre zonale ka hnyipixe, ketre boroshür, maine ketre tarake ka ihmeku memine la aja i nyidrë, e maine hna thipëne la itus.
4 Hane mina fe la ketre aqane trofë:
◼ “Alanyimu la itre thöthe kola thele tulu nyine troa xötrethenge, ngo singödri catre troa öhne la itre tulu ka loi. Hnei Iesu Keriso pe hna amë la tulu ka pexeje koi nöjei atr. [E jë la 1 Peteru 2:21.] Hnei nyidrëti hna amamane ngöne la mele i nyidrë, laka sisitria catre la hmi ne la keme i nyidrë e koho hnengödrai. Tuneka fe la hnei nyipë hna hane mekune e tro la nöjei atr a tupathe troa nyitipu nyidrë?” Nue pi troa sa. Ce goeëne jë la paragarafe 3, ngöne lo hnaluene götrane qëmekene lo hna nyipune lai itus, ene lo hna qejepengöne la itre thina i Iesu. Qejepengöne jë la aqane tro la itus Le plus grand homme a xatua së asë matre tro së a itre nyipi keresiano ka sisitria.
5 Maine pena tro epuni a qaja tune la:
◼ “E kola qaja la eje i Iesu Keriso, ke, hna majemine mekune hnene la itre atr laka ketre nekönatr, maine ketre atr hna akötrëne utihë la mec. Angatre hmekujehi a mekune la kola hnahone me meci hnei nyidrë. Tha hne së kö hna nyipiewekëne la itre ewekë ka sheminge hnei nyidrëti hna qaja me kuca e celë fene hnengödrai. Hawe, ame la hnei nyidrëti hna aeatrën, ke, thatraqane la nöjei atr. Celëhi matre sisitria catre e tro së a thelejëne troa atrehmekune la itre hnei nyidrëti hna kuca thatraqai së.” E jë la Ioane 17:3. Fe jë ngöne la götrane 1, lo qaane lai itusi Le plus grand homme, nge e jë la paragarafe 4. Hamëne jë lai itus, nge qejepengöne jë la aqane troa isa inine la Tusi Hmitrötre jëne la itusi celë.
6 Loi e tro së a waihatrene la aja ka mama, memine la itre itusi hna amë pe, matre troa kuca la itre iwaihmaca. E ijine petrekö, catre jë së troa thele la itre atr ka hni ka loi, me xatua angatre troa hane itretre drenge ne la Atr amele së, ene Iesu Keriso.—Mata. 16:24.