Xatua Angatre Jë Troa Hane Itretre Drei Nyidrë
1 Ame ngöne 1 Korinito 3:6, hnei Paulo hna cinyihane ka hape: “Hnenge hna tran, hnei Apolo hna fi; ngo hnei Akötesieti hna acian.” Hnei Paulo hna qaja la ceitune celë matre troa xatuane la itre trejine troa trotrohnine la eloine e tro angatr’a ce huliwa, me caasi fene la musi Keriso. Hawe, qa ngöne lai, hnei nyidrëti fe hna xatua angatre matre hetre madrine i angatre troa eatrëne la hnëqa i angatr, ene la troa traane me fi.
2 Tro la huliwa ne iamele celë a traqa kowe la pune ngöne la hneijine së enehila. Celëhi matre, hnëqa së, itre keresiano, troa xatuane la itre xane matre tro fe angatr’a itretre drei Iesu. (Ite Hul. 13:48) Nemene la aqane tro epuni a sisedrëne la ajane la atr jëne la itusi Le plus grand homme de tous les temps?
3 E maine epuni a bëeke troa wange hmaca la ketre atr ka xome la itus, ke, qaja ju ka hape:
◼ “Ame ngöne lo nyiso a xötrei iöhny, ke, hnei nyiso hna ithahnataane la pengöi Iesu Keriso. Tru la madrinenge lo eni a amë pe lo itusi Le plus grand homme de tous les temps. Nemene la ka ketri nyipë ngöne la aqane inii Iesu, memine la thina i nyidrë?” Nuepi troa sa. Fe jë kowe la mekene 113, nge ithahnataane jë la tulu hna amamane hnei Iesu, ene la aqane ipië i nyidrë. E jë la Filipi 2:8 matre amamane la hna qejepengöne hnei Paulo aposetolo la aqane ipië i Iesu. Epuni pë hë a qejepengöne jë la aqane troa atrepengön’atrune jëne la ini Tusi Hmitrötre lapa.
4 Ma epuni a ajane troa nyiqaane tune la:
◼ “Easë a pi ithahnataane la itre ewekë hnei Iesu hna kuca e celë fene hnengödrai pine laka itr’ej’a amamane ka hape tru la hnei nyidrëti hna kukehni së. Hapeue la mekune i nyipë, nemene la hnei nyidrëti hna troa kuca matre mano pi la itre ka akötr?” Nue pi troa sa. Fe jë kowe la mekene 133, nge ce wange hmaca jë la itre mekune ngöne la hnafaifine paragaraf. Fe jë kowe la iatre ne la götrane hnapin, nge qejepengöne jë la itre eloine la mele ngöne la kola aeatrëne la aja i Akötresie e celë fene hnengödrai, tune e koho hnengödrai. Amamane hnyawaane jë la itre thangane ka loi qa ngöne la hna thele troa atrehmekun’atrun.
5 E maine kola thipëne la itusi hnene la atr, ngöne la xötrei iöhny, ke, tupathe ju pena troa nyiqaane la porotrike tune la:
◼ “Eni a mekune laka caasi hi la aqane mekune së kowe la itre atr enehila, kola xomi tulu qa ngöne la aqane mele ne la ketre atr ka mama. Iesu Keriso hmekuje hi la tulu ka sisitria. Eni ajane troa ce thawa me epuni la ketre ini ka nyipiewekë hnenge hna inine qa ngöne la tulu hna amë pe hnei Iesu. [Fe jë kowe la mekene 40 ngöne la itus Le plus grand homme, nge amamane hnyawaane jë la ihnimi ka tru Iesu.] Hna amekunë ni catre matre ketre eni a pi troa amamane la thina celë kowe la nöjei atr.” E jë la Mataio 5:7. Hamëne jë lai itus, maine lo boroshüre lo hna hape “Dieu se soucie-t-il vraiment de nous?”
6 Maine pena tupathe jë la aqane trofë celë:
◼ “Ame lo traqa hnapane ni, ke, hnei nyiso hna ithahnataane la enyipiewekëne la troa atrehmekua Iesu. Ioane 17:3 a qaja ka hape ame la ‘mele ka tha ase palua kö,’ ke, troa hetrenyi la atrehmekune celë. Tuneka la aqane tro së a hetrenyi lai?” Nue pi troa sa. Sisedrëne jë troa qejepengöne la aqane trongene la ini Tusi Hmitrötr, me aqane tro së a kepe thangane qa ngön.
7 Paulo a qaja ka hape ame la nöjei ka menue, ke, tro angatr’a “isa hete thupene ka ijije la huliwa.” (1 Kor. 3:8) E hne së hna catre troa xatuane la itre atr troa itretre drei Iesu, ke, troa nyipi atraqatre la thupene thatraqa së.