Aqane Iwai Hmaca Matre Acatrene La Aja Ne La Atr
1 Maine tro easë a bëeke palahi troa vizitëne hnyawane la atr, ke, aqane tro angeice lai a hetrenyi la itre ixatua ka ijije nyine troa akökötrene la lapaune i angeic. Hawe, nemene la itre hnepe ewekë nyine tro easë a atre hmekune ngöne la easë a bëeke hmaca troa wange la itre atr ka ajan?
2 Ame la ewekë hnapan, ke, loi e troa hnëkë hnyawa. Nge tro hi a nyiqaane ngöne la kola xötrei iöhny. Nemene la aqan? Kola hape troa cinyihane la ëje i angeice me itre hna ithahnataan, me itre hna qaja hnei angeice memine fe la itre itusi hna xom. Nge qëmekene troa bëeke hmaca, ke, pane goeëne hmaca jë la itre not, nge ngöne la thithi epun, mekune fe kö amexeje la itre ewekë hnei epuni hna troa ithahnataan.
3 Epuni hë enehila a mekune troa tro. Nemene la nyine troa qaja? Maine hnei epuni hna amë pe ekö la ketre hnyinge thene la atr ngöne la epuni a inue me angeic, ke, nyiqaane ithahnataane hmaca jë, ngöne la epuni a bëek. Hanawange la ceitun? Maine hnei epuni hna ithahnataane ekö la itre manathithi qa thene la Baselaia i Akötresie, ke, sisedrëne hmaca jë hnene la hnyinge ka hape: “Ngo hnauëne kö laka Akötresieti a nue la itre iangazo enehila?”
Nge ngöne la epuni a bëek, thupene la kola iöhny, ke, qaja jë ka hape:
◼ “Hnei easo hna ithahnataane lo ketre ijine me thele la kepine matre hnene la Akötresieti ka ihnim hna nue la itre iangazo enehila. Nemene fe la aliene la mekune i nyipë ngöne la ewekë cili? [Nuepi troa sa.] Tuneka la mekune i nyipë, seseune kö Akötresieti la itre atrene la fene hnengödrai celë? [Nuepi troa sa.] Pane tro easo a wange la hnei Tusi Hmitrötre hna qaja ngöne Ioane 3:16.” Hawe, thupene la hna e la xötr, ke, fepi lo itus La vérité qui conduit à la vie éternelle ngöne mekene 8, nge amamane jë lo kola qaja a hna cinyihane la itre kepine matre kola pane nue enehila hnei Akötresieti la nöjei iangazo.
4 Ame la ketre mekune ka nyipi ewekë nyine tro epuni a amë pe thene la atr ngöne la kola xötrei iöhny, ke, troa hnyinge ka hape: “Maine nyipici laka Akötresieti a ajane tro la atr a mele epine palua, pine nemene matre kola qatre trootro la nöjei atr utihë la meci angatr?” Hawe, ame la epuni a bëek, ke, tro epuni a amamane la aqane sa la hnyinge celë hnene la Tusi Hmitrötre ngöne Roma 5:12. Thupene la hna e la xötr, ke, fepi lo itus Tout finit-il avec cette vie?, ngöne lo hnapane paragarafe götrane 35, ke, hna qeje pengöne e cili la kepine matre kola qatre trootro la atr utihë la meci angeic.
5 Maine hnei epuni hna ithahnataane ngöne la kola xötrei iöhny, la aqane troa wangatrehmekune la hmi ka nyipici, nge maine hnei epuni hna hamëne lo itus L’humanité à la recherche de Dieu, ke, hane la ketre hnyinge nyine troa qaja kowe la atr matre nyine hnëkëne la epuni a bëeke hmaca: “Qa ngöne nemene matre kola hetrenyi la nöjei hmi ka nyimutre?” Hawe, ngöne la epuni a bëeke, ke, ce ithahnataane jë la itre mekune ka eje hnine la mekene 2 ne lo lai itusi cili.
6 Ca ewekë nyine troa hnëkën. Wange hnyawa palahi la itre hnyinge i epuni ngöne la kola bëeke hmaca. Ame la itre hnyinge ka tune la, ka hape “Ase kö nyipëti e lo itre itusi hnenge hna hamë nyipë?” maine “tha thëthëhmi ni kö hnei nyipë?” maine pena “tha thëthëhmine kö nyipëti lo itre hnei easo hna ithahnataane lo ketre ijine qai eni la?”, ame la itre hnyinge ka tune lai, ke, ijije tro itr’ej’a nango ajolëne la atr. Tha tro kö a hetre thangane ka loi la itre hnyinge ka tune lai. Ame la ketre ewekë, ke, loi e tro palahi a hetre ihnim, me ewekë amenyikeny, nge the aqeane kö la hna ithahna. Nge tro la itre aqane ujë cili a nyixane la maca hne së hna trofë trongën.
7 Nyimutre la itre aqane troa ketr la hni ne la itre atr, tune la hne së hna ce wang, matre tro angatr’a ajan. Hapeue matre tha pane tupathe kö troa kuca thenge lai kowe la ca vizite ngöne la wiik? Thelejëne jë troa kuca thenge la itre hna qaja celë koi së, nge thele jë fe troa xomi tulu thene la itretre cainöje ka majemine hë matre troa xatua epun. Nge eje hi laka troa elë la madrine i epun, ngöne laka hnei epuni hna eköthe hune la aja hnapane ne la atr, hnene lo itre vizite ka hetre thangan.