Loi e Tro Palahi Së a Bëeke Me Madrine Troa Xatuane La Itre Atr Ka Drei Së
1 Hetre aja së asë hi itretre cainöje trootro troa xatuane la itre atr ka hmala troa drei së. Nge eje hi laka troa hetre madrine së me manathithi e hne së hna tune lai (wange ju la Salamo 126:5, 6). Qangöne lai, nyipi ewekë tro së a isa hnëkë hnyawa.
2 Troa pane nyiqaane thele la itre pepa ne vizit nyine tro së a huliwaan ngöne la ijine cainöje trootro. Cinyihane ju lai mekune hna ithahnatane hë lo kola xötrei iöhny, memine lo aqane ujë me mekuana ne la atr. Nge qëmekene la tro easë a bëeke troa iwai hmaca, nyipi ewekë tro epuni a cinyihane ngöne pepa la aqane tro epuni a nyiqaane troa porotrik.
3 Maine hne së hna amamane lo thith, Tretretroti anganyihunie ngöne lo xötrei iöhny, me amë la boroshür “Gouvernement”, qaja ju ka hape:
◼ “Ngöne lo nyiso a xötrei iöhny, ke, hne so hna ithahnatane la aqane tro Akötresie a kuca kowe la fene hnengödrai, matre tro së a mele tingetinge ngöne la nöjei götrane ne la mele së. Maine öhne i nyipëti lolai boroshüre ngöne la götrane 29, kola qaja la itre xaa manathithi hnene la Baselaia i Akötresie hna troa hamëne kowe la fene hnengödrai.”
4 Maine easë a öhne ka hape tha ka mejiune kö la atr laka hetre Akötresie, ke, qaja ju ka hape:
◼ “Ame e cili lo, ke, hnei nyiso hna ithahnatane lo ketre mekune hna cinyihane hnei Paulo ngöne Heberu 3:4, kola amamane hnyawa laka, hetre atre xupe la itre ewekë asë, nge ka inamacane Nyidrë.” E hmaca jë lai mekene tus, nge goeëne ju la itre götrane 4 utihë 9 ne la boroshüre Dieu se soucie-t-il vraiment de nous?, wange hmaca ju lo ewekë hna ithahnatane e cili lo. Qaja hmaca ju lo hnyinge hna amë pe me e la paragaraf, nue pi lai atr troa sa lo hnying. Nge maine ijij, ke, xatua angeice jë troa hane xome lai boroshüre me cewange la aliene ej.
5 Maine easë a öhne ngöne la xötrei iöhnyi laka, hetre nyipi madrine ne la atr troa drei së, ngöne kö la itre xaa götrane e tröne la götrane ne la ua, ke, amamane ju la tarak Le monde actuel survivra-t-il? nge e jë la hna qaja ngöne la götrane 6. Hnyingë angeice ju ka hape angeice fe kö a hane ajane troa mele ngöne la paradraiso e celë fen. Amamane ju fe la ketre iatre maine ketre hna ewekë ngöne la ketre zonal, matre trotrohnine lai aja.
6 Ketre ijije fe tro së a hane kuca tune lai ngöne la easë a troa amamane la ketre hna cinyihane ngöne La Tour de Garde maine Réveillez-vous! Ce wange ju fe la ketre hna cinyihane ka ijije ngöne la epuni a xötrei iwai hmaca nge thupene lai amamane ju la ketre mekune ka ijije ngöne lai hna cinyihane cili maine ngöne ketre pena. Nge maine ijij, ke, ce e jë me angeice la ketre mekene tus, nge upi angeice ju troa qeje pengön’ej.
7 The luelue kö së troa abone la itre atr, me amamane koi angatre la itre eloine la troa kapa la itre zonale qa ngöne poos, matre tro palahi a e itr’ej.
8 Nyipi ewekë tro së a mekune hnyawa la aja me hnëqa së, ene la troa nyiqaane ini tus. Celë hi matre, loi e tro së a iwai hmaca palahi, matre akökötrene lai aja. Ketre, tro palahi së a canga bëeke troa wange la itre hna ithahnata hë kow; celë hi aqane tro së a amamane laka, easë a hnime me sipu xatua angatr.
9 Troa kepe manathithi me madrine atraqatre hne së, e hne së hna cainöjëne la Maca ka Loi (Luka 2:10). Nge, ketre madrine katru koi së tro la itre ka hmala troa drei së a xötrethenge Wesiula i Akötresie, thangane lai hne së hna lapa ixatua (Fil. 4:1). Eje hi laka tro ha hetrenyi la nyipi madrine the së, e hne së hna lapa bëeke troa xatuane hnyawa la itre ka hmala troa drei së, itre hne së hna iöhnyi memine ngöne la hna cainöje trootro.