Kola Atrunyi Akötresie Hnene La Aqane Nyidrawane La Nöjei Götrane Ne La Mel
1 Hnine la trenge wathebo i Mose, la itre hna amekötine nyine xötrethenge, matre hetrenyi la nöjei pengöne me aqane nyidrawane la nöjei götrane ne la mel. Hnene la itre hna amekötine celë hna thupë angetre Isaraela göi aqane nyidrawane la mele ne ngönetrei, memine fe la ua matre kösë ketre nöje ka ketre pengöne. (Lev. 11:35, 36; 15:1-11; Isa. 52:11) E troa trongëne la thina ne la ka nyidrawane la mel, ke, kola atrunyi Akötresieti lai, nge nyine mele ka loi thatraqane la nöj.
2 Ame enehila, ke, ketre hatrene ka amamane la nöje i Iehova, ene la angetre nyidrawane la nöjei götrane ne la mel. Nge, ame la hatrene celë, ke, maine aqane wangatrehmekune ne la itre atrene asë la nöjei Iehova, Hawe tuneka së isa alacas? Hna amamane hnene la aja së ka tru, troa eatrëne la itre hna amekötine hnei Iehova, matre kola kukehnine la meköti memine la aqane nyidrawane la nöjei ewekë.
3 Hapeu fe la itre hnalapa së? Tha thingejëne kö itr’eje la maca ka loi hne së hna cainöjëne trongëne? Tuneka la elueluene la itre xane la easë a qaja ka hape, tro hë la fene hnengödrai a paradraiso, hapeu tha qangöne kö laka tha hna nyidrawane hnyawane kö la itre uma së, tha hna thelëne kö la hnalapa së matre cia catre la itre hnitre ka ngazo? Maine kola zikoziko menu la nöjei ewekë hnine la uma, nge pui ngazo qangöne laka tha hna nyidrawane lapane kö, hapeu, aqane tro kö lai a amamane la ‘tulu ne la mele hna nyidrawane ngöne lo nöje ka hnyipixe, ka lapa fene la musi ne la Baselaia”? — om pp. 129-31.
4 Nge, hapeu fe la itre loto së hne së hna tithe troa cainöje trootro? Ka lolo kö la aqane nyidrawane la hnine me e kuhu trön, matre tha nyi engazone kö la huliwa hne së hna eatrën? Hapeu fe la hnahetre së memine la watrenge së, memine fe lai hnaihe së? Tha itr’eje jë kö a nyine troa athixötrëne la itre xaa atr? Nyipici laka ame la elolone la atr, ke, qangöne la hna sie lapa me hna wasine hnyawane la itre iheetr. — w89 1/6 pp. 16-19.
5 Nemene la nyine troa kuca maine tro la ketre trejine a ahleuhleune la ekalesia, qangöne laka tha hnei angeice kö hna nyidrawane la ngönetrei angeice maine la hnalapa i angeic? Loi e troa xatua angeic; troa ithahnataane me angeice cememine la ihnim, ka loi mina fe troa atrehmekune la kepin, maine qatre; maine ka hetre kucakuca. Hawe, ka loi e troa tune lai. Ame itre xaa ijine, tha hna mekune kö hnene lai atr ka hape tha hna nyidrawane kö la ngönetrei angeic, ijije troa ujë la thina i angeice e troa hamëne hnyawa la itre ithuemacanyi. Ame la götrane celë, ke, loi palahi tro la atr a amamane la tulu, maine pë kö, tha ijije kö tro angeice a hane kapa la ketre hnëqa ngöne la ekalesia. Tro la itre qatre thup’ a wange matre tha tro kö a acile la sipu meköti angatre memine la itre sipu mekune i angatr.
6 Ame la itre ka xötrei kapa la nyipici, ke, loi e troa hëne matre hane angatre tupathe la xenine la ua hna thawa ngöne la uma ne Baselaia. Hna majemine hne së troa hëne la itre atr kowe la uma ne Baselaia, nge hetre madrine së pine laka ame la aqane nyidrawan, ke, loi, nge pë ethane e troa kapa la itre trehnyiwa. Nge epi troa tune palahi ngöne la nöjei ijine icasikeu. Hawe, wange hnyawa ju e hnine la uma ka hape, hna köle kö la itre ta, tha ka dro kö la ngöne memine la hnine la uma, hna burumëne kö? Hna nyihnyawane kö la itre kabine memine la hna kölaime? Maine majemine së wange la itre uma tha hna nyidrawane kö, maine ka malamala pena la peidrene, ke, nyipici tha canga maca hmaca kö koi së troa wange ka hape ka dro la uma. Itre ewekë lai troa thupëne matre tha tro kö la itre ka hane xötrei traqa a öhnyi engazon. Loi e tro palahi së a aeatrëne la itre ijine hna amekötine koi së troa nyihnyawane lapane la uma ne Baselaia matre mingöming’eje me loi e troa kapa la itre ka xötrei traqa.
7 Tha nyipiewekë kö troa ithahnataane ngo maine tro së a nyihnyawane la ngönetrei së me hnalapa së me loto së ceitune fe memine la uma ne Baselaia, kolo lai a atrunyi Iehova hnene la itre huliwa së cili. Qangöne la tulu ka loi hne së hna amamane tha tro kö a hetrenyi la itre ewekë ka iathixötrë, ngo kolo pe lai a anyipicine la ehmitrötrene memine la emekötine la hmi së. — 1 Kor. 10:31, 32; Iako. 1:27.