Hnene Kö La Itre Nyine Amekunëne Qathei Iehova Hna Akökötrenyi Së Ngöne La Ua?
1 Hnene la atr cinyihane la tusi salamo hna amamane la madrine i angeice koi Iehova me hape: “Eni a mekune la ite nyine anyipicine i cilie.” (Sal. 119:99) Ame la qene heberu ne la hna ithahnata hna hape “nyine anyipicine,” ene lo itre nyipici hna amexej, ke, kola amamane ka hape Iehova a amekunëne hmaca koi së, la itre hna amekötiine ngöne la itre wathebo i Nyidrë, ngöne la itre hnei Nyidrë hna athnith, ngöne la itre hnei Nyidrëti hna qaja, me ngöne la itre ewekë hnei Nyidrëti hna upi së troa kuca, ngöne la itre hna amekötiine hnei Nyidrë. E tro së a trongëne la itre ewekë cili, ke, ejehi laka tro së a kökötre ngöne la ua, me hetrenyi la manathith.—Sal. 119:2.
2 Ngöne la nöje i Iehova, easë palahi a kapa la itre eamo. Tru la itre hne së hë hna drenge ekö. Ngacama, itre ithuecatre lai hne së hna kapa madrin, ngo ame pe, hne së mina fe hna canga thëthëhmin’itr’ej. (Iak. 1:25) Iehova a amexeje palahi koi së la itre nyipici, hatre ne ihnim, me xomihni aqeany. Hnei Peteru aposetolo hna qaja la itre xaa nyine amekunëne nyine troa ‘thue catene la ite hni ka nyipici hnene la kola amekunëne mate mekune jë së la hna ulatine hnene la wathebo i Joxu.’—2 Pet. 3:1, 2.
3 Hna qaja lapaane koi së la enyipiewekëne la troa isa ini tus, me troa sine la itre icasikeu. Hna amekötine tune lai, pine laka itre huliwa lai ka nyipiewekë matre aegöcatrenyi së ngöne la ua.—1 Tim. 4:15; Heb. 10:24, 25.
4 Ketre huliwa ka tru la troa aeatrëne la hnëqa së, ene la troa cainöje trootro. Loie tro së a catr matre ej’e kuhu hni së la huliwa cili nyine tro së a trofë hutin. Ngacama ka tru huliwane la hnëqa cili, ngo ame pe ijiji së troa “cile hut” hnene laka “hna sile la ite tengene hnatrapaca së, ene la hna hnëkëne la maca ka loi ne tingeting.”—Efe. 6:14, 15.
5 Ame la huliwa së koi Iehova, ke, tha qa ngöne hmekuje kö laka atre hnyawa së la itre hna amekötine hnei Nyidrë, ngo Paulo aposotolo pe a amekunë së la ketre aja ka tro fe a ej’e kuhu hni së, ene la troa trongëne la hna amekötine celë; “ukeineqë la ate qaja amamane la trenge ewekë ne iamele.” (Rom. 10:10) E maine ka catre la lapaune së, nge maine hni së a ajane la itre ewekë hna amekunëne hnei Iehova, ke, tro lai a upi së ngöne la itre ijine cainöje trootro troa atrune la atresiwa i Nyidrë.—Sal. 119:36; Mata. 12:34.
6 Atrehmekune hi së laka qaane madrine së la tro së a catre kuca la itre huliwa ka loi. (Ate Cai. 2:10) Paulo a qaja amamane laka ame la madrin, ke, ketre wene ne la uati hmitrötre i Iehova, celë hi matre loi e tro së a thelejëne troa kökötre ngöne la götrane cili. (Gal. 5:22) Ketre hnei Peteru hna qaja ka hape ka hamë madrine koi së la “nyipi cat”, celëhi manathith.—2 Pet. 1:5-8.
7 Ame la easë a cile kowe la itre jole ka tru, ke, loi e tro së a mekune la aqane catrene la lue aposetolo; tune la hna qaja hnei nyidro ka hape: “Tha’teine kö nyiho troa tha qaja la nöjei ewekë hnei nyiho hna goeëne me deng.” (Ite Huliwa 4:20) Hetre aja së troa sisedrëne la huliwa cili, hnene lo hna amekunë së hnene lo hna qaja ka hape ‘e maine easë a kuca lai tro së a amele së kö, me angatre fe angetre drei së.’ —1 Tim. 4:16.
8 Tha tro kö së a wesitr, maine lapafë elëhni, pine la hna mekune ka hape caasi palahi la itre eamo hne së hna kapa. Ngo, tro pe së a atreine kapa madrine la etrune itr’ej. (Sal. 119:129) Ame la hneijine së enehila, ijine akötr, ke, easë a olene koi Iehova laka Nyidrëti a hamëne palahi la itre ewekë nyine amekunën, me upi së matre troa catre kuca la itre huliwa ka loi!—2 Pet. 1:12, 13.