Hapeu, Ijije Kö La Hnenge Hna Kuca?
1. Nemene la itre ewekë hna hnehengazone hnene la ketre Keresiano ka mele nyipici?
1 Hapeu, hnei epuni hë hna hane isa hnyinge tune la? Maine jë hna nyi ifegone hi la aqane cainöje i epuni enehila, hnene laka, epuni ha qatre trootro maine hetre sine meci epuni hë, maine pena tru hë la itre hnëqa i epun hnine la hnepe lapa, ene pe kucakuca ha epun. Hetrenyi la ketre trejine föe a köni nekö i eahlo, kola cinyihane, ka hape, ame itre xaa ijin, eahlo a luelu pine laka tru la traeme me trenge catre hnei eahlo hna nue kowe la itre nekö i eahlo, nge co pë hë kowe la huliwa ne cainöj. Haawe, nemene la ka troa xatua së troa atreine tulu ewekë?
2. Nemene la hnei Iehova hna thele the së?
2 Itre Ewekë Hnei Iehova Hna Thele The Së: Eje hi laka, nyimutre the së la itre ka ajane troa tru la hne së hna kuca ngöne la huliwa ne cainöj. Ngo ame itre xaa ijin, hetrenyi la itre ewekë hne së hna ajane troa kuca, ngo hna nyi ifegone hi la itre ewekë hne së hna atreine tro sa kuca. Ame la easa ajane troa tru la hne së hna kuca ngöne la hna cainöj, tre, kolo lai a amamane laka, thaa madrine kö së la huliwa së. Loi e tro sa hnehen laka, atre hnyawa hi Iehova la itre ifego së nge thaa Nyidrëti kö a upi së troa kuca la itre ewekë hne së hna thatreine kuca. (Sal. 103:13, 14) Nemene la itre ewekë hnei Nyidrëti hna thele the së? Nyidrëti a ajane tro sa nyihlue i Nyidrë cememine la u ka pexej, me hamë Nyidrë la hne së hna atrein.—Kol. 3:23.
3. Tune kaa la aqane tro sa isa waipengöne la trenge catre hne së hna kuca ngöne la huliwa ne cainöj?
3 Nemene la ka troa xatua së troa atrehmekune la itre ewekë hne së hna atreine kuca? Loi e tro sa sipone koi Iehova troa xatua së troa waipengöne hnyawa la mele së. (Sal. 26:2) Ijije mina fe troa xatua së hnene la ketre trejine Keresiano hne së hna mejiune kow, me ka maca me ka atre së hnyawa me ka thaa cile hnö kö me xou troa qaja koi së la itre ewekë nyine tro sa saze ngöne la mele së. (Ite edomë 27:9) Ketre, loi e tro sa lapa mekune laka, kola saze la itre ewekë ngöne la mele së, ene pe nyipi ewekë troa isa waipengöne pala hi la aqane mele së.—Efe. 5:10.
4. Tro sa goeëne tune kaa la itre nyine amekunën qa hnine la Tusi Hmitrötr göne la huliwa ne cainöj?
4 Aqane Troa Goeëne La Itre Nyine Amekunën: Ame ngöne la hna iwaja, nyimutre e itre xaa ijin la itre atr ka hamë ithuecatre kowe la itre ka nyinyap. Ame la aja hna thele troa eatrën, tre, ene la troa xatuane la itre atr ka nyinyap troa afenesine la iwaja cili, ngo thaa ene kö la troa ananazijë angatr. Ketre tune mina fe, ame la itre ithuecatre hna xome qa hnine la Tusi Hmitrötr, memine la itre nyine amekunën göi troa ‘catre cainöjëne la wesi ula’ hna hamëne jëne la itre icasikeu me itre itusi së, tre, hna hamëne itre ej nyine loi koi së ngo thaa nyine tro kö a amamane koi së, laka, thaa ijije kö la hne së hna kuca. (2 Tim. 4:2) Loi e tro sa mejiune laka, maine tro pala hi sa thele troa kuca la hne së hna atrein, eje hi lai laka, thaa tro kö Iehova a thëthëhmine la ‘ihnimi me itre huliwa’ së.—Heb. 6:10.