Loi e Troa Ithuecatr
1 Easë asë hi a aja ixatua, pine laka easë a melëne “la ijine ka akötr.” (2 Tim. 3:1) Eje mina fe la aja cili ngöne la hneijine i Paulo, pine laka nyidrëti a hnengazone troa iöhnyi memine la itre trejine me nyidrë, ke, kolo itre ijine lai ka ijije troa “ce akeukawanyi nyidrë me angatr.” Hnei nyidrëti hna xatuane la itre trejine me nyidrë troa “xöte thenge la ite ewekë . . . nyine iakeukawanekeun.” (Rom. 1:11, 12; 14:19) Hnene laka angatre palahi a catr, hna “acatene la ite hni angete dreng, me eamo angate troa cile huti ngöne la lapaun.” (Ite Huliwa 14:22) Aja së fe enehila la itre ixatua ka tune lai.
2 Loi e tro la itre ithahnata hne së hna qaja a hane ithuecatre kowe la itre xan. Maine pëkö lolo la itre trenge ewekë hne së hna qaja, ke, atreine troa aceitunëne itr’eje me “ite waucathiene gole hnine ite tenge sileva.” (Ite Edom. 25:11) “Nyine ithuecatre koi itre xane jëne la eamo (NW)” la easë a qejemekune ngöne la itre ijine icasikeu. (Heb. 10:25) Nyipi ewekë tro së a xomehnöthe la sepeneqë së ngöne la easë a iqajakeune la itre ewekë hne së hna melën, me hamëne la itre xatua, maine ithahnatane pena la itre mekune ne ua. E tro së a hmekëne la aqane ithahnata së, ke, celëhi troa ‘tenge ka loi, la nyine troa eamon, mate aciane la loi koi angete deng.’—Efe. 4:29.
3 Ithahnataane Ju La Itre Ewekë Nyine Ithuecatr: Ngöne Filipi 4:8, ke, hnei Paulo hna hamëne la itre mekune nyine ixatua thatraqane la tro së a cainöj. Hnei nyidrëti hna qaja ka hape tro së a wang’atrune la nöjei nyipi mekun, me nöjei ewekë hna qaja aloin, me nöjei ewekë ka meköt, me nöjei ewekë ka wië, me nöjei ewekë ka lolo, me nöjei ewekë ka hlemu loi, maine ketre thina ka loi, me ketre nyine atrun. Loi e tro palahi së a qaja la nyipici, pëkö iaö, matre loie tro itre xane a hane kepe thangane ka loi, pine laka hna nyitrepene la itre ithahnata së ngöne la Wesi ula i Akötresie. (Ioane 17:17) Ejehi laka, itre ewekë nyine qaja aloine la tulu ne keresiano hne së hna melën, ene la itre hne së hna inine hnine la itre icasikeu ne la ekalesia, memine la aqane eatrëne hnyawaane së la huliwa ne cainöje trootro, me itre xaa mekune ju kö ka caas. Ejehi laka, maine hne së hna ithahnataane la itre tulu ka draië, me itre trepene meköti qa hnine la Tusi Hmitrötr, ke, tro hë itr’ej’a xatua së troa “ainamacanë së kowe la mel.” (2 Tim. 3:15) Ijije tro së a hane qaja amamane la madrine së kowe la aqane ujë ka wië hna melëne hnene la itre atrene la organizasio i Iehova ka hmadradra. Tro fe së a hane wangatrune la itre thina ka loi ne la itre trejine me easë. (Ioane 13:34, 35) Ame la itre ewekë hna qaja aloin, ke, ene la itre thina ka eje thene la nöjei keresiano, ene la lapaun, me madrin, me tingeting, me itre akötre hna melëne hnene la itre trejin’asë. Maine hne së hna porotrikëne la itre ewekë ka loi, me itre nyine atrun, ke, nyine ‘loi, me keukawa’ koi itre xan.—Rom. 15:2.
4 Ngöne la nöjei drai, ke, easë a cile kowe la nöjei pengöne ejolene la fene hnengödrai. Drei la elolone e troa paatre pi la itre jole celë, me troa ce mele ngöne la ihnime memine la itre trejine me easë! Ame la traeme ka sisitria hne së hna ce huliwaan, ke, trengamo lai ka tru alamekene nge hne së piin. E maine hne së hna majemine hamë ixatua, me ithuecatr, ke, tro hë itre xan’a qeje së ka hape: “Hnei angate hna akeukawane la unge.”—1 Kor. 16:18.