Kola Sa La Itre Hnyinge i Nyipunie

◼ Nemene la nyine troa kuca, maine kola traqa hmitre la ka troa cilefë cainöje koi nöjei atr ngöne la ijine icasikeu?

Ame itre xaa ijin, ke, kola traqa la itre xaa jole ka iasesëkötrë, ene pe traqa hmitre ju hi la trejine troa hamëne la cainöje hna athipe koi angeic. Maine canga atre hë hnene la itre qatre thup, laka, troa traqa hmitre la ka troa kuca la cainöj, loi e tro angatre a nyiqane pena ju hnene la etid ne La Tour de Garde; tro pë hë a kuca la Icasikeu koi nöjei atr e thupen. Nemene la nyine troa kuca, ngöne la kola öhne laka, thaa tro ha traqa? Maine jë tro la caasi thei epun, itre ka cile fë cainöje a hamëne la ketre cainöje hnei angeice hna hnëkëne hnyawa hë.

Maine hne së hna canga hnëkëne hnyawa pala hi la porogarame së, ke, ijije hi tro së a neëne la jole celë. Loi e tro la trejine ka hnëkë porogarame ne cainöj, a canga amekunëne la nöjei ka troa cilefë cainöje a canga iamekunë, caa wiike qëmeken. Tro lai ka amekunëne a hane qaja la traeme ne icasikeu, me aderes me telefone ne la uma ne Baselaia, me amamane la itre jëne troa tro kowe la uma. Tro la ka cilefë cainöje a fejane hnyawane la itre hnepe mekune celë. Loi e tro angeice a wangatrune me metrötrëne hnyawa la hnëqa i angeic, hnene la troa ami hnene hnyawa la itre sipu jole i angeic, matre atreine troa aeatrëne la hnëqa celë. Maine hetre ewekë ka asesëkötrë angeice ngöne la ijine cili, matre thatreine kö angeice troa kuca la cainöje i angeic, loi e tro angeice a canga ithuemacanyine la ka amekötine la cainöje koi nöjei atr matre hetre ijine tro pala kö a thele ka troa inyihnai. Loi e troa mekune hnyawa la ewekë cili, matre thaa tro kö a lapaa uthi he ngöne la ijine kolo ha troa kuca la cainöj. Maine hna hetre ka ajolëne la ka cilefë cainöj, nge angeice a troa traqa hmitr, a itre hnepe menetre hi, loi e tro angeice a telefone kowe la uma ne Baselaia, matre maca kowe la itre trejine troa xomiujine la icasikeu.

Maine troa tro la itre ka troa cile fë cainöje a wangatrune me metrötrëne la itre hnëqa hna athipe thatraqane la cainöje koi nöjei atr, me canga hnëkë hnyawa, me wange hnyawa la itre nyine amekunën, me atreine canga hmekën la itre jole ka troa traqa, ke, eje hi laka tro la ekalesia a kepe thangane ka loi me madrine la cainöje koi nöjei atr hna hamëne e nöjei wiik.