Kola Sa La Itre Hnyinge i Nyipunie

◼ Tune kaa la aqane troa cile fë la nyima göi Ini Ne Cainöj Qaathei Akötresie, me Göi Itre Icasikeu Ne La Huliwa, me Icasikeu Kowe La Ka Ala Nyim, me Ini Ne La Tour de Garde, nge drei la ka troa cile fë la nyima?

Eje e hnine la sine cetrone la Huliwa Ne Baselaia ne Okotropa, la itre nyima hna iën thatraqane la porogaram ne Ini Ne Cainöj Qaathei Akötresie e nöjei wiik. Ame koi itre nyima ne nyiqaan me nyine nyipun hna hnëkën thatraqane la Icasikeu Ne La Huliwa e nöjei wiik, tre, hna amë hnine la götrane 2 ne la Huliwa Ne Baselaia. Ketre, ame koi itre nyima nyine troa thinge ngöne la nöjei wiike ne Ini Ne La Tour de Garde, tre, itre ej ngöne la götrane 2 ne la itre zonal La Tour de Garde. Ame la itre nyima, tre, ka ce tro itre ej memine la itre icasikeu hna hnëkëne kow, celë hi matre loi e troa cile fë la nyima hnene la trejine ka xomiujine la icasikeu cili, ngo thaa tro kö la perezida ne la icasikeu ka tro pa ha a hane cile fë pena ha la nyima hna iën thatraqane la hnaaluene icasikeu.

Hanawange la ketre ceitun, tro la atre thupëne la Ini Ne Cainöj Qaathei Akötresie a olene kowe la itre atrene la icasikeu la hnei angatr hna traqa itrony, me nyiqaan hnene la nyima, me xomiujine la ini, nge thupene lai, angeic a sipone kowe la trejine ka troa kuca la pane hnëqa ne la Icasikeu Ne La Huliwa kowe la ita ne cainöj. Qanyine la trejine cili ka troa nyiqaane la Icasikeu Ne La Huliwa, troa cile fë la nyima nyine troa thing matre troa nyitrepene la Icasikeu Ne La Huliwa.

Ketre tune mina fe göi Cainöj Kowe La Ka Ala Nyim, laka troa nyitrepene hnene la ketre trejine ka troa perezida. Tro angeic a olene la hna traqa itrony me sipone la itre atrene la icasikeu troa ce thinge la nyima nyine nyiqaan; ame la nyima cili, tre, hna iën hnene la ka cile fë la cainöj. Tro lo lai trejine ka ciaman (maine ketre trejine ka maca pena hna canga iën qëmekene troa icasikeu) a nyiqaane la icasikeu hnene la thith. Tro angeic a qaja la ëjene la ka troa cile fë la cainöj memine la taan la cainöje i nyidrë. Thupene la cainöj, tro la perezida a qaja la ketre hnepe mekun nyine olene kowe la ini hna kapa. Tro angeic a ithuemacanyine fe la taan la cainöj koi wiik ka troa xulu, nge thupene lai angeic a sipone kowe la itre atrene la icasikeu troa lapa matre troa ce wange la ini ne La Tour de Garde. Thaa nyipi ewekë kö troa hnyingëne hnene la perezida kowe itre atrene la icasikeu troa hane qaja la ihnimi angatr me ibozu i angatr kowe la ekalesia ne lai ka cile fë cainöj. Thupene lai, tro la perezida a sipone kowe la atre xomiujine la La Tour de Garde troa elë kowe la ita ne cainöj.

Tro la atre xomiujine la ini ne La Tour de Garde a cile fë la pane nyima ka troa nyitrepene lai ini. Tro angeic a xomiujine la ini thenge la aqane amekötin, nge thupene lai, angeic a cile fë la nyima ne nyipun. Hna majemine hnene la atre xomiujine La Tour de Garde troa sipone kowe la trejine ka cile fë la cainöj kowe la ka ala nyim troa nyipune hnene la thith.

Maine tro sa xötrethenge hnyawa lai itre hna amekötine cili, haawe, tro ha xatua së me xecie hnyawa koi së laka, cengöne caasi la aqane eköthe la itre icasikeu së e hnine la ekalesia.