Porogarame Ka Hnyipixe Ne La Icasikeu Ne La Ekalesia
1, 2. Nemene la itre ewekë hna saze ngöne la itre icasikeu hna troa kuca qaan e Januare 2009?
1 Ame ngöne lo wiike ne 21-27 Eiperem 2008, tre, hnene la lapa ne la itre trejine e cailo fen hna drenge la ketre ithuemacanyi ka lolo catr. “Qaan e 1 Januare 2009, tro ha kuca la Ini Tus Ne La Ekalesia ngöne la ijine kola kuca la Ini Ne Cainöj Qaathei Akötresie memine la Icasikeu Ne La Huliwa. Tro ha saze la ëje ne la Ini Tus Ne La Ekalesia koi Ini Tusi Hmitrötr Ne La Ekalesia.”
2 Porogaram Ne La Icasikeu Cili Ne La Wiik: Caa hawa nge footre faif lao menetr (1h 45mn) la etrune la hawa ne la icasikeu cili, itre nyima me itre thithi a hna e mina fe. Troa nyiqaane la icasikeu hnene la nyima me thith (5 men.), thupene lai kola kuca la Ini Tusi Hmitrötr Ne La Ekalesia (25 men.). Troa sisedrëne lai hnene la Ini Ne Cainöj Qaathei Akötresie (30 men.). E ase hë lai, kola nyiqaane la Icasikeu Ne La Huliwa (35 men.) hnene la ketre nyima (5 men.). Kola nyipune la icasikeu hnene la nyima me thith (5 men.). Tro ha mama ngöne la nöjei treu la porogaram ne La Ini Tusi Hmitrötr Ne La Ekalesia, me Ini Ne Cainöj Qaathei Akötresie, memine la Icasikeu Ne La Huliwa, ngöne la Huliwa Ne Baselaia, matre troa xatua nyipunie troa hnëkë kowe la itre icasikeu cili.
3. Tune kaa la aqane troa xomiujine la Ini Tusi Hmitrötr Ne La Ekalesia?
3 Ini Tusi Hmitrötr Ne La Ekalesia: Ame la icasikeu celë, tre, troa xomiujine ceitu memine la ini ne la Tour de Garde. Thaa nyipi ewekë kö troa amexeje hmaca la itre mekune hna wange hë lo wiik hnapan. Ngo loi e tro hi a qaja la itre hnepe mekun nyine troa nyiqaan. Tro lai a aijijëne la itre ka sine la icasikeu troa nango isa qeje mekun. Tro la qatre thup perezida a athipe kowe la itre qatre thup la hnëqa troa ithöeëne me xomiujine la icasikeu cili, matre thaa caasi kö la ka kuca e nöjei wiik.
4. Nemene la itre ewekë hna troa saze ngöne la Icasikeu Ne La Huliwa?
4 Icasikeu Ne La Huliwa: Caasi pala hi la aliene la Icasikeu Ne La Huliwa, ngo hna ahopatrene la itre hnëqa. Tro pala hi a faifi lao menetr ne la Itre Hna Amekötiin. Celë hi matre ijije troa qaja la itre ithuemacanyi ka nyipi ewekë, me e la itre xaa tusi ne la bethela. Ame lo itre xaa ithuemacany, tune la itre hna hnëkën göi cainöje trootro memine la itre porogarame ne troa nyidrawane la Uma Ne Baselaia me hna ithingë, memine la itre xaa tusi ne la bethela hna majemine kapa, tre, thaa nyipi ewekë kö troa e qa ngöne la ita ne cainöj, ngo loi pe troa afedrene ngöne la tablo matre ijije kowe la itre trejine troa e. Ame la itre ka trene hnëqa, tre, loi e tro angatr a hnëkë hnyawa me catre metrötrëne pala hi la hawa hna sa koi angatr, memine fe la itre hna amekötine koi angatr.
5. Ame ngöne la wiik ne iwai ne la atre thupëne la sirkoskripsio, nemene la porogaram ne la icasikeu ne la ekalesia?
5 Iwai Ne La Qatre Thup Ka Wange Trongëne La Itre Ekalesia: Thaa tro kö a saze la porogarame ne la wiike ne la atre thupëne la sirkoskripsio. Ame e Drai Menu, tre, troa kuca la Ini Ne Cainöj Qaathei Akötresie memine la Icasikeu Ne La Huliwa; nge troa sisedrëne memine la ketre nyima. Thupene lai, tro la atre thupëne la sirkoskripsio a cile fë la ketre cainöj ne 30 menetr. Tune lo hne së hna majemine kuca ngöne la wiik ne iwai nyidrë, troa kuca ngöne la ketre hej la Ini Tusi Hmitrötr Ne La Ekalesia, thupene lai troa thinge la ketre nyima; nge e ase hë lai, kola tro fë la ketre cainöj thatraqane la huliwa ne cainöj, hnene la atre thupëne la sirkoskripsio. Troa nyipune la icasikeu hnene la ketre nyima memine la thith.
6. Nemene la hnëqa ne la atre thupëne la gurup?
6 Itre Icasikeu Göi Cainöje Trootro: Tro la lapa ne la itre qatre thup a athipi hnëqane la itre atre thupëne la gurup troa thupëne hnyawa la itre gurup göi cainöje trootro, memine la itre atren, angatr isa ala caas. Maine kola troa xome la huliwa cili hnene la ketre drikona, haawe, loi e troa hë angeice ka hape “drikona ne la gurup.”
7. Nemene la hne së hna thele ngöne la porogarame ne la icasikeu ka hnyipixe ne la ekalesia së?
7 Kola mama hnyawa qa ngöne la itre ithuemacanyi celë hna hamëne göne la icasikeu ka hnyipixe ne la ekalesia laka, hetrenyi la itre ini me itre ithuecatr hne së hna troa kapa ngöne la itre heji ne pui ne xeni ne la ua. Tro mina fe lai a aijijë së troa maca troa cainöj me hamë ini, me hane wa wene la huliwa ne cainöje së.—Efe. 4:13, 14; 2 Tim. 3:17.
8. Tro hë së memine la itre xan a kepe thangane tune kaa qa ngöne la hne së hna isa sipu hnëkë?
8 Ame la easa hnëkë me xome hnyawa la itre ini qëmekene la itre icasikeu celë, tre, tro lai a xatua së troa wanga atrune la itre mekun ka tru hna hamëne ngöne la itre icasikeu. Tro asë hi së a isa qeje mekun me ithuecatrekeu. (Rom. 1:11, 12; Heb. 10:24) Ame la hne së hna thele troa eatrën, tre, ene la troa ‘mama la tropane la huliwa së,’ hnene la hna “thawa hnyawa la wesi ula ka nyipici.”—1 Tim. 4:15; 2 Tim. 2:15.
9. Nemene la ewekë hne së hna catre thele troa eatrën, nge pine nemen?
9 Easa madrine atraqatre la itre hna amekötin thatraqane la itre icasikeu ne la ekalesia. Epi tro pala hi sa nue kowe la “hlue ka nyipici me ka inamacan” troa eatrongë së, me lapa qale catre kowe la Atre Thupë Mamoe Ka Sisitria, ke, Nyidrëti a hnëkë së kowe “la aköte” ka tru, laka calemi catre hë.—Mat. 24:21, 45; Heb. 13:20, 21; Hna ama. 7:14.