Itre Icasikeu Ka “Aciane La Ihnimi Me Ite Huliwa Ka Loi”

AME ngöne la itre drai ekö uti hë enehila, hnene la itre hlue i Iehova hna icasikeu lapa thenge la aqane amekötin. Ame ngöne la hneijine i angetre Isaraela ekö, tro la itre trahmanyi asë a fek a tro Ierusalema göi troa sine lo köni pui ne xen ka tru. (Deut. 16:16) Ame ngöne la hneijine itre pane keresiano, hnei angatre hna icasikeu lapa ngöne la uma ne la ketre atr. (Filem. 1, 2) Ame enehila, easa nyipiewekëne la itre icasikeu, me itre asabele ka tru. Pine nemene matre itre hlue i Akötresie a icasikeu? Ame la pane kepin, tre ene laka ketre götrane gaa tru ne la hmi së lai.—Sal. 95:6; Kol. 3:16.

² Ketre, hetre eloin hna kapa hnene la itre ka sine la itre icasikeu. Hetre hna amekötin hnei Iehova ekö göne la hnaasevenene Pui Ne Xeni Ne Uma Ne Hunuma kowe la angetre Isaraela, kola hape: “Troa icasinekeune la nöj, ite trahmanyi me fö, me nekönat, me tenyiwa thei ’ö ngöne la ite lapa i ’ö, mate deng, me inin, me qoue Iehova Akötesi nyipunie, me aköte hnine troa kuca la nöjei tenge ewekë asë ne la wathebo celë.” (Deu. 31:12) Kola mama hnyawa laka, ame la kepine ka tru matre icasikeu jë angatr, tre, ene la troa ‘ini angatr hnei Iehova.’ (Is. 54:13) Hnene la itre icasikeu hna aijijëne fe la itre pane keresiano ekö troa atre la itre trejine me angatr, me ithuecatrekeu, me hane acatrene la lapaune i angatr.

ITRE ICASIKEU NE LA EKALESIA

³ Ame lo itretre dreng ekö ka icasikeu thupene lo Penetekos macatre 33 M.K., hnei angatre palahi hna catre kapa la itre ini hna hamëne hnene la itre aposetolo, nge ketre, “angate palahi a lapa ce hni ngöne la ēnē o drai.” (Ite hu. 2:42, 46) Ame hë e thupen, ame lo kola icasikeu hnene lo itre pane keresiano, angatr a hane e la Itre Hna Cinyihan, ene lo itre tusi hna cinyihane hnene la itre aposetolo memine la itre xa atre dreng. (1 Kor. 1:1, 2; Kol. 4:16; 1 Thes. 1:1; Iako. 1:1) Angatre fe a ce thith. (Ite hu. 4:24-29; 20:36) Ame itre xa ijin, kola ithanatane la itre hna melën hnene la itre mesinare ngöne la huliwa ne cainöj. (Ite hu. 11:5-18; 14:27, 28) Angatre mina fe a ce wange la itre ini ne la Tusi Hmitrötr, memine la aqane eatr la itre hna perofetan. Ketre, angatre a hane kapa la itre ithuemacany göi aqane tro angatr a ujë, me thiina ka amadrinë Akötresie. Nge kolo mina fe a ithuecatre koi angatr asë troa catre cainöjëne la maca ka loi.—Rom. 10:9, 10; 1 Kor. 11:23-26; 15:58; Efe. 5:1-33.

⁴ Easë mina fe enehila a hane xötrethenge la aqane ami ewekë hnene la itre aposetolo ekö göne la aqane trongene la itre icasikeu. Easa wangatrune la ithuecatr hna hamën ngöne Heberu 10:24, 25, MN kola hape: “Tro sha imekunekeune . . . Tha tro kö a trije la icasikeu së tune la thiina i itre xan; ngo loi pe troa itö ithuecatr, e tro nyipunie a goeëne la drai a easenyi hë.” Maine easa ajan tro palahi a catre la lapaune së me mele nyipici koi Akötresie ngöne la itre drai tixenuë ne la fene celë ka ngazo, haawe, nyipiewekë tro palahi sa sine la itre icasikeu, matre tro sa kapa la itre ixatua ka ijij. (Rom. 1:11, 12) Ame easë itre keresiano, easa mel e nyipine la ketre xötr atr ka qaliqali nge ka eni wathebo. Ase hë së xelene la thiina ka tha amadrinë Akötresie, memine la aqane mekune ne la fene ka ngazo celë. (Fil. 2:15, 16; Tito 2:12-14) Eje hi laka, thene hi la itre hlue i Iehova la götrane gaa loi koi së. (Sal. 84:10) Ketre, tru catre la eloine koi së e troa inine me ce ithanatane la Wesi Ula i Akötresie. Tro sa ce wange la itre icasikeu hna acil thatraqai së.

CAINÖJ KOI NÖJEI ATR

⁵ Hna lapa kuca la Cainöj Koi Nöjei Atr e Mecixen maine Sabath nge kola sisedrën hnene la Ini ne la Ita Ne Thup e nöjei wiik. Hna hëne lai ka hape, Cainöj Koi Nöjei Atr, ke, kola cile fë la ketre cainöje thatraqane la nöjei atr, maine jë hetre ka hane xötrei traqa kowe la icasikeu. Ketre ixatua ka tru la icasikeu cili matre troa xatuane la itre ka xötrei traqa, memine la itre atrene la ekalesia.—Ite hu. 18:4; 19:9, 10 .

⁶ Ame la itre cainöje hna cile fë hnei Iesu Keriso, me ange aposetolo, me itre sine hmi angatr ekö, tre, ka ceitune hi memine la itre hna cile fë enehila ngöne la itre ekalesia ne la nöje i Iehova. Iesu hi la ketre atre cile fë cainöje ka tru ngöne la fen. Kola qeje nyidrë ka hape: “Pëkö ate ewekë tune lai.” (Ioane 7:46) Hna haine la aqane ewekë i nyidrë, ke nyidrëti a ithanata ceitu me ketre ka mus. (Mat. 7:28, 29) Tru la ixatua hna kapa hnene la itre atr ka nyipiewekëne la maca i nyidrë. (Mat. 13:16, 17) Hnene la itre aposetolo hna xötrethenge la tulu i nyidrë. Ame ngöne Ite Huliwa 2:14-36, kola mama la cainöje ka catre i Peteru hna hamën ngöne la drai ne Penetekos 33 M.K. Thupene la hna drenge la cainöj, hna ketr la itre thauzane lao atr. Ame hë e thupen, hetre itre atr ka lö kowe la nyipi hmi thupene la hna drenge la cainöje i Paulo e Athenai.—Ite hu. 17:22-34.

⁷ Ketre tune mina fe enehila, nyimutre la itre atr, itre milio la etrun ka kepe eloine la itre cainöj hna cile fë kowe la ka alanyim e nöjei wiik ngöne la itre ekalesia, me itre cainöj hna cile fë mina fe ngöne la itre ijine asabele. Jëne la itre cainöje cili, kola xatua së troa nyipiewekëne palahi la itre ini, nge troa cile hut ngöne la huliwa i Akötresie. Ame la easa könëne la itre atr ka hetre hni ne ajan me itre atr asë, easë hi lai a xatua angatr troa hane atrepengöne hnyawa la itre ini qa hnine la Tusi Hmitrötr.

⁸ Ka nyimu pengön la itre tane mekune hna ce wange ngöne la ijine Cainöj Koi Nöjei Atr. Kola qaja la itre ini qa hnine la Tusi Hmitrötr, me itre hna perofetan, me itre trepene meköt ne la Tusi Hmitrötr, me itre eamo thatraqane la hnepe lapa, me thatraqane la lue trefën, me itre jole hna cile kow hnene la itre thöth, me aqane mele ne la keresiano. Ame itre xa cainöj, kola qejepengöne la aqane xupe Iehova la itre ewekë ka mingöming. Itre xan a amamane la lapaun, me aqane catr, me aqane mele nyipici ne la itre hlue i Iehova e hnine la Tusi Hmitrötr, me xomi ini koi së enehila.

⁹ Maine easa ajane troa kepe thangane hnyawa qa ngöne la Cainöj Koi Nöjei Atr, nyipiewekë tro sa drenge hnyawa, me thele e hnine la Tusi Hmitrötr la itre xötr hna hamën hnene la ka cile fë cainöj, me goeëne itre ej ngöne la nyidrëti a e me qejepengöne itre ej. (Luka 8:18) E mama ha me xecie koi së la itre ewekë hna ithanatan, haawe, loi e tro sa fedre kowe la itre hne së hna inin me trongëne itre ej ngöne la mele së.—1 Thes. 5:21.

¹⁰ Maine nyimu trejine ka cile fë cainöj, haawe, tro la ekalesia a wange matre troa kuca la ca cainöj ngöne la nöjei wiik. Ijije troa sipo ka troa cile fë cainöj thene la itre ekalesia ezin. Maine tha tru kö hnei ka cile fë cainöj, haawe, loi troa thele matre tro palahi a hetre cainöj hna cile fë.

INI NE LA ITA NE THUP

¹¹ Thupene la hna cile fë la cainöj, kolo pena ha sisedrën hnene la Ini Ne La Ita Ne Thup. Kola ce ithanatane la ketre tane mekun hnine la Ita Ne Thup nyine inin jëne la itre hnying, me hna sa. Jëne la Ita Ne Thup, easa kapa qaathei Iehova la xeni ne la u ngöne la nyipi ijin.

¹² Hnene la itre mekune e hnine la Ita Ne Thup hna majemine amamane la aqane troa trongëne la itre trepene meköt ngöne la nöjei drai ne la mele së. Itre ej a acatrene la lapaune ne la itre keresiano matre tha tro kö a hane löthi angatr hnene la “u ne la fen” me thiina ka sisi ne ej. (1 Kor. 2:12) Ketre, hnene la itre mekune ne la Ita Ne Thup hna amamane palahi la itre ini ka hnyipixe qa hnine la Tusi Hmitrötr, me itre hna perofetan. Celë hi ka aijiji së troa ce mekune palahi memine la ijine së, me lapa catre ngöne la gojenyi ne la itre ka meköt. (Sal. 97:11; Prov. 4:18) E tro sa sine la Ini Ne La Ita Ne Thup me thele troa hane qeje mekun e cili, tro së lai a madrin ke hetrenyi së la mejiun, ene la fene ka meköt i Iehova. (Rom. 12:12; 2 Pet. 3:13) Tro fe la icasikeu cili a xatua së troa melën la wene ne la u, me acatrene la aja së troa nyihlue i Iehova. (Gal. 5:22, 23) Tro lai a acatrene la lapaune së matre atreine së troa cile hut ngöne la itre jol ka traqa koi së. Nge tro fe së lai amë “la tepene ka loi nyine thatraqan’ epin” matre tro sa “xölehuje la nyipi mel.”—1 Tim. 6:19; 1 Pet. 1:6, 7.

¹³ Nemene la nyine tro sa isa kuca matre troa kepe thangane la xeni ne la u? Loi e tro sa isa hnëkë hnyawane la ini, maine ce hnëkën pena memine la hnepe lapa së. Loi e tro sa thele la itre xötr ne la Tusi Hmitrötr ka mama, me hane qeje mekun thenge la aqane isa ithanata së. Tro hë së lai a amë hutine la nyipici e kuhu hni së. Nge tro ha kepe thangane hnei itre xan qa ngöne la hne së hna qaja amamane la lapaune së. Maine tro sa drenge hnyawa la itre mekune hna hamën hnene la itre xa trejin, tro së lai a kepe eloine la ini ne la Ita Ne Thup e nöjei wiik.

MEL ME HULIWA NE CAINÖJ NE LA KERESIANO

¹⁴ Kola icasikeu e nöjei wiik ngöne la Uma Ne Baselaia hna hëne ka hape, Mel Me Huliwa Ne Cainöj Ne La Keresiano. Ka köni götrane la icasikeu cili, nge ka xatua së troa maca ngöne la huliwa i Akötresie. (2 Kor. 3:5, 6) Ame la porogaram memine la itre aliene la icasikeu, tre hna hamën e nöjei treu ngöne lo Mel Me Huliwa Ne Cainöj Ne La Keresiano—Pepa Nyine Huliwan. Hetrenyi fe e hnin ej, la itre aqane nyiqaane ithanata thatraqane la huliwa ne cainöj.

¹⁵ Hna hëne la pane götrane la icasikeu cili ka hape, Itre Trengamo Qa Hnine La Wesi Ula. Tro ej a xatua së troa atrepengöne hnyawa la götrane la kola traqa la itre ewekë hna qaja e hnine la Tusi Hmitrötr memine la pengöne la mele ngöne a ijine cili; nge hetre ini hna xome qa ngön. Kola cile fë e cili la ketre cainöj, nge kola e fe la Tusi Hmitrötr, me ce ithanatane la itre mekune hna nyitrepene hnene la itre mekene tus hna hnëkën kowe la wiik. Hetrenyi e hnine la Pepa Nyine Huliwan la itre iatr me itre mekune nyine tro sa isa thele matre troa trotrohnine hnyawan la itre hna melën e hnine la Tusi Hmitrötr. Tro së lai a kepe eloine ngöne la mele së me ngöne la aqane hamë ini së ‘matre hnëkë së kö thatraqane la nöjei huliwa ka loi asëjëihë.’—2 Tim. 3:16, 17.

¹⁶ Ame la hnaaluene götrane lai icasikeu, tre hna hëne ka hape, Isa Tupathe Jë Ngöne La Hna Cainöj. Hna kuca ej matre troa ini së troa cainöje trootro. Hna ce ithanatane la itre tane mekun qa hnine la Pepa Nyine Huliwan, maine qa ngöne la itre xa itusi ju kö me qa ngöne la itre video fe. Ketre, itre trejine trahmanyi me föe a tro fë la itre iamacany, tune la troa amamane la aqane nyiqaane ithanata, maine troa iwaihmaca, maine ini Tusi Hmitrötr. Kola xatua së hnene la götrane celë troa hetrenyi “la sesepeneqë hna inin” matre atreine së “troa hajine la ka kucakuca hnene la tenge ewekë.”—Is. 50:4.

¹⁷ Ame la hnaakönine götran, Mele Ne Keresiano, tre, kola ithanatane la aqane troa trongëne la itre trepene meköti ne la Tusi Hmitrötr ngöne la nöjei drai ne la mele së. (Sal. 119:105) Ame la götrane gaa tru ne ej, tre ene la Ini Tusi Hmitrötr Ne La Ekalesia. Tune la Ini Ne La Ita Ne Thup, kola ce ithanatan, jëne la itre hnying me hna sa. Kola e la itre paragaraf, nge hnyinge jë hë, nge itre atrene la icasikeu a hamë mekun, nge kolo fe a e la itre xötr. Qëmekene troa nyipune la icasikeu hnei nyima me thith, kola pane amekunën la itre mekun hna ce wange ngöne la icasikeu memine la itre hna troa ce wang ngöne la wiik ka troa xulu.

¹⁸ E nöjei treu, lo kola traqa la Pepa Nyine Huliwan, tro la kordinatör ne la lapa ne la itre qatre thup maine ketre trejine pena ka xatua angeic, a waipengöne hnyawa ej me hnëkëne la ketre porogaram. Tro angeice lai a thele mekune thene la atrekë huliwane la Icasikeu Mel Me Huliwa Ne Cainöj nyine xatua angeic. E nöjei wiik, troa ceamen ngöne la icasikeu cili hnene la atrekë huliwane lai, maine ketre qatre thupe hi ka maca troa hamë ini, nge hna kapa hnene la lapa ne la itre qatre thup. Tro angeic a thupën matre tro palahi a nyiqaan me nyipun ngöne la hawa hna sa, me hamë eamo kowe la itre hnainin ka hetre qan.

¹⁹ E hne së hna hnëkën lapane la Icasikeu Mel Me Huliwa Ne Cainöj, me sin, me hane qejemekun e cili, tro hë së lai a atrepengöne hnyawa la Tusi Hmitrötr, me trotrohnine hnyawa la itre trepene meköt hnine ej. Ketre, tha xou së hë troa cainöje trootro, nge maca ha së ngöne la kola hamë ini. Ame la itre ka sin la icasikeu cili, nge tha hna bapataisone petre kö, tro fe angatr a hane kepe eloine la hna cas memine la itre trejin, me kepe eloine fe la itre mekune ka ixatua hna ce ithanatan. Maine easa ajane troa hnëkëne hnyawa la icasikeu celë me itre xa icasikeu, loi e tro sa huliwane hnyawane la Watchtower Library qene Faras, me JW Library qene Drehu, me HNË AMI ITUS ngöne la site së, memine fe la hnë ami itus ngöne la Uma Ne Baselaia. Hetrenyi e cili la itre itusi Itretre Anyipici Iehova, ene la Index des publications des Témoins de Jéhovah maine pena la itus Nyine Thele Mekun Ne La Itretre Anyipici Iehova, me nyimu pengöne Tusi Hmitrötr, me diksioner, me itre xa itusi ju kö ka ixatua. Ijije troa huliwane la itre itusi ngöne la Uma Ne Baselaia qëmeken me e thupene la itre icasikeu.

ICASIKEU GÖI CAINÖJE TROOTRO

²⁰ Anyimua traqa itronyi la Itretre Anyipicine i Iehova ngöne la wiik, matre troa hnëkë kowe la huliwa ne cainöj. Hna majemine amë ngöne la itre uma ne la itre trejin maine itre xa götran ka ijij. Ijije fe troa kuca ngöne la Uma Ne Baselaia. E hetre itre gurupe ka isa icasikeu göi troa cainöje trootro ngöne la itre götrane ka nyimutre ne la teritoar, tha tro kö a jole kowe la itretre cainöj troa sin la icasikeu me canga tro kowe la teritoare i angatr. Tro lai a canga hetre sine ce tro i angatr, me teritoar nyine troa huliwan. Ketre, tro lai a aijijëne la atre thupëne la gurup troa waipengöne hnyawa la itre atrene la gurup. Maine nyipici laka, ka hetre eloine troa isa icasikeu hnene la itre gurup, ngo ame itre xa ijin, tre loi troa ce acasin itre ej. Maine ala xalaithe hi la itre ka cainöj ngöne la wiik, loi e troa acasine la itre gurup, maine pena troa ce icasikeu ngöne la Uma Ne Baselaia, maine ketre götrane ka ijij. Ame e cili, tro palahi a hetre sinatrongene la itre ka cainöj. Ketre, hetre eloine fe la troa icasikeu göi cainöje trootro ngöne la itre drai ne feet ngöne la Uma Ne Baselaia. Maine pena, ijije hi tro la ekalesia a axeciën troa icasikeu göi cainöje trootro thupene la Ini Ne La Ita Ne Thup.

²¹ E isa hetre hnë itronyi kö hnene la itre gurup, qa ne la atre thupëne la gurup troa iujine la icasikeu göi cainöje trootro. Ame itre xa ijin, tro la atre thupëne la gurup a upe la trejin ka ixatua, maine ketre trejine pena ka maca troa kuca lai. Tha tro kö a ce ithanatane la Topik Ne La Drai, ngo loi e tro la ka iujine la icasikeu cili a hnëkë hnyawa matre troa ce ithanatane la ketre mekune ka ijij ka troa xatuane la itre ka cainöj troa tro fë hnyawa la maca ka loi. E ase hë amekötine la huliwa ne cainöj, tro la ketre trejin a tro fë la thith. Haawe, ka hnëkë hë la itre atrene la gurup troa isa tro kowe la teritoar. Tro hi a 5 maine 7 lao menetr ne la icasikeu, ngo tro pala kö a hopatr e ej a sisedrëne la ketre icasikeu ne la ekalesia. Itre icasikeu lai ka troa hamë ixatua, me ithuecatr, me itre hna amekötin kowe la itre trejin ka troa cainöje trootro. Loi e tro la itretre cainöj ka maca a ce huliwa memine la itre ka xötrei cainöj maine itre xane ju kö ka aja ixatua, matre troa ini angatr.

ITRE HNA AMEKÖTINE THATRAQANE LA ITRE ICASIKEU NGÖNE LA ITRE EKALESIA KA HNYIPIXE MAINE KA CO PENA

²² Hnene laka, kola elë la etrune la itre keresiano, haawe, kolo mina fe a elë la etrune la itre ekalesia. Qa ne la atre thupëne la sirkoskripsio troa sipone troa acile la ketre ekalesia. Ngo ame itre xa ijin, tre, loi e tro la itre neköi gurup a ce huliwa memine la ekalesia ka easenyi koi angatr.

²³ Ame itre xa ijin, itre trejine föe hmekuje hi la itre ka nyi atrene la itre ekalesia ka co. Ame e cili, loi e tro la föe a tro fë la thithi kowe la ekalesia maine ka xomiujine pena la icasikeu a petrëne la he i nyiidro hnei sine mano, thenge la hna ahnithe hnei Tusi Hmitrötr. (1 Kor. 11:3-16) Loi e tro palahi angeic a lapa, nge troa qëmekene kowe la gurup. Ame ngöne la itre ijine icasikeu, tha angatre kö a hane cile fë la itre cainöj. Angatre pe a e, me hamë mekune ngöne la kola ce ithanatane la ketre tane mekun, maine iamacanyine pena. Tro la filial a sipone kowe la ketre trejine föe matre troa icinyanyikeu memine la filial me kuca la itre icasikeu. Nge maine hetre trejine trahmanyi pë hë e thupen, ka macaje, nge ka ijije hë troa eatrëne lai, tro ha nue koi angeice la itre hnëqa cili.

ASABELE NE SIRKOSKRIPSIO

²⁴ Hetre itre hna hnëkën e nöjei macatre matre tro la itre ekalesia ne la ca sirkoskripsio a icasikeu ngöne la lue asabele ne sirkoskripsio koi ca drai. Itre ijine madrine lai ka aijijëne la itre keresiano troa ‘atrun,’ ene la ‘troa thele troa atre hnyawa’ la itre xa trejine keresiano. (2 Kor. 6:11-13) Thenge la itre aja ka ej thene la itre atr, organizasio i Iehova a hnëkëne la taan la asabele memine la itre götran ne la porogaram. Hna cile fë la itre mekun jëne la itre cainöj, me itre iamacany, maine jëne la hna elone hmaca la itre hna melën, maine jëne la hna hnying kowe la itre xa trejin, maine jëne la kola ithanata cas. Hna acatrene la lapaunene la itre atrene asë la asabele hnene la itre ini celë hna kapa ngöne la nyipi ijin. Hnene la itre asabele cili hna aijijëne la itre ka xötrei lapaun troa xome la bapataiso, hatrene hi laka ase hë angatre nue la mele i angatr koi Iehova.

ASABELE KA TRU

²⁵ Ame ngöne la macatre, hetrenyi la ketre icasikeu ka tru hna hnëkëne hnene la organizasio i Iehova. Ka köni drai la asabele celë, nge kola iacasinekeune la itre sirkoskripsio ka nyimutre. Maine thaa tru menu kö hnei trejin hnine la ketre filial, haawe, ijije tro hi a ca götrane hnë troa icasikeu hnene la itre ekalesia asë hna thupëne hnene la filiale cili. Kola saze la aqane hnëkën la asabele ka tru ngöne la ketre nöj, thenge la itre ewekë ka traqa me itre aqane amekötine hnene la organizasio. Kolo fe a hnëkën e itre xa ijin ngöne la ketre nöj, la ketre Asabele Koi Itre Nöje Ka Nyimutre maine ketre asabele ka ketrepengön. Kola ce traqa itronyi la itre thauzane lao atr qa ngöne la itre nöje ka nyimutre. Nyimutre la itre atr ka kapa la maca ka loi, ke hnei angatre hna drei mejene la itre icasikeu ka tru cili hna kuca hnene la Itretre Anyipici Iehova.

²⁶ Ame la itre asabele ka tru kowe la itre hlue i Iehova, tre, itre ijine madrine lai, nge kola ce atrunyi Iehova ngöne la cas. Ketre ijine fe lai, kola hamëne la itre ini ka hnyipixe göi troa trotrohnine la nyipici. Ame ngöne la itre xa ijin, kola kapa e cili la itre itus ka hnyipixe göi troa isa inin, maine nyine tro pena a ce inine memine la itre atrene la ekalesia, maine nyine troa tro fë ngöne la hna cainöje trootro. Ketre, ijine tro fe la itre xan a hane xome la bapataiso. Ka sisitria catr la itre ini hne së hna kapa ngöne la itre ijine cili ke, kola acatrene palahi la aqane imelekeu së me Iehova. Jëne la itre asabele ka tru, kola anyipicine hnyawan ka hape, ame la itre hlue i Iehova, angatre hi la lapa ne la itre trejin e cailo fen. Nge hatrene hi lai laka, angatre hi la itretre drei Iesu Keriso.—Ioane 13:35.

²⁷ Maine tro palahi sa sine la itre icasikeu ne la ekalesia së memine la itre asabele ka tru, tro ha hetre trengecatre së troa kuca la aja i Iehova. Ketre, tro lai a thupë së qa ngöne la itre nyinyithiina ne la fen, itre ka troa ajojezine la lapaune së. Kola adraië Iehova me atrunyi Nyidrë hnene la itre icasikeu cili. (Sal. 35:18; Ite edomë 14:28) Loi e tro asë hi së a hetre hni ne ole koi Iehova, hnene laka, hnei Nyidrëti hna hnëkëne la itre icasikeu cili, matre troa akeukawane la hni ne la itre hlue i Nyidrë enehila, ngöne la hneijine la pun.

PUI NE XENI NE LA JOXU

²⁸ Ame e nöjei macatre, hmekune lo ijine Iesu a mec, itre ekalesia asë ne la Itretre Anyipici Iehova a atrune la Drai ne Amekunëne la Meci Keriso, maine pena la Pui Ne Xeni Ne La Joxu. (1 Kor. 11:20, 23, 24) Celë hi icasikeu lai ka sisitria catr kowe la itre hlue i Iehova ngöne la macatre. Ketre, hna ahnithi hnyawa koi së troa atrune la Drai Ne Amekunën.—Luka 22:19.

²⁹ Ka ihmeku la drai ne atrune la Drai ne Amekunën memine lo drai ne atrune ekö la Paseka, tune la hna amamane hnene la Tusi Hmitrötr. (Eso. 12:2, 6; Mat. 26:17, 20, 26) Ame la Paseka, tre, ijine kola amekunëne lo kola thepe angetre Isaraela qa Aigupito ngöne lo macatre 1513 M.P.K. (Ame la aliene la M.P.K., tre, kola hape, “Ite macate ka pate pete kö Keriso”). Ame ngöne lo macatre cili, hnei Iehova hna axeciën ka hape, tro angatr a xeni la Paseka ngöne lo hnaafotrinene drai ne la pane treu (ne la idrai ne la angetre Iudra), nge tro fe a thepe angatr qa ngöne la ithahluë e Aigupito. Hna atrune la ijine cili e nöjei macatre. (Eso. 12:1-51) Easa atre la drai cili, ke hna e la thötrine lao drai qaane la mama treu ka easenyine la équinoxe,a nge ka mama e Ierusalema. Matre, kola atrune la Drai ne Amekunën ngöne la nöjei macatre hmekune la pane dreuma treu thupene la équinoxe.

³⁰ Kola mama hnyawa ngöne Mataio 26:26-28 la itre hna amekötine hnei Iesu, ngöne la aqane troa atrune la Drai ne Amekunën. Isapengöne kö la aqane trongene ej memine la hna majemine kuca hnene la itre ka kuci haze; ngo ketre hneijine pe lai ka nyi hatrene la pui ne xeni hna ce xome hnene la itre hna hëne troa ce musi me Iesu Keriso ngöne la Baselaia i nyidrë e koho hnengödrai. (Luka 22:28-30) Kola ithuecatre kowe la itre keresiano memine la itre atr ka hetre hni ne ajan, troa hane sin la Pui Ne Xeni ne la Joxu. Ame la angatr a sine la pui ne xeni cili, angatre hi lai a amamane la hni ne ole i angatr kowe la itre ewekë hnei Iehova hna hnëkëne thatraqane la nöjei atr asë jëne la Hupuna i Nyidrë, ene Iesu Keriso. Tha qea ju kö thupene la Drai Ne Amekunën, hetrenyi la ketre cainöj ka ketre pengön hna cile fë nyine troa akökötrene la aja thei angatr troa inine la Tusi Hmitrötr.

³¹ Kola treqene hnyawa hnene la Itretre Anyipici Iehova la itre ijine tro angatr a icasikeu, nge e cili, angatr a “imekunekeune mate troa aciane la ihnimi me ite huliwa ka loi.” (Heb. 10:24) Jëne la itre icasikeu, “hlue ka nyipici me ka inamacane” a hamëne la ka nyipiewekë koi së, matre tro sa imelekeu hnyawa me Akötresie. Nyipiewekë tro palahi la itre hlue i Iehova memine la itre ka hetre hni ne ajan a thele troa kepe thangane la itre icasikeu cili. E hetrenyi palahi thei angatr la hni ne ole kowe la itre hna amekötine hnene la organizasio i Iehova, tro hë angatre lai a cas. Nge ame la ka sisitria, easa atrunyi Iehova.—Sal. 111:1.