Thue Ewekëne Pi La Itre Xan Thenge La Hna Ajan

¹ Iehova a hamë së jën la “hlue” ka nyipici la xen nyine thatraqan la mele së ngöne la götrane la ua. (Mat. 24:45-47) Nyimutre la itre göxeni cili hna hamën jëne la itre itus, itre Tusi Hmitrötr, itre itus hna icasinekeun, me itre video, me itre kaset nyine dreng, me itre CD-ROM göi troa thele mekune hnine la Tusi Hmitrötr. Ka ijiji pala hi la xeni hnei Iehova hna hamën, thaa hna aluuzine kö. Ame la aja i Nyidrë, tre tro së a ce thawa la xeni cili memine la itre xaa atr, nge xecie koi Nyidrë laka, tro asë hi la itre atr a hane kepe thangane ka loi qa ngön.

² Ka tru thupene catr la aqane hnëkëne la göxeni cili. Hna nyithupene la itre ejolene cili hnene la ihnimi ne la itre trejine asë e cailo fene hnengödrai. Kola mama hnyawa lai ngöne lo ijine kola amekötin hnei sasaiatri ka hape, thaa tro hmaca kö a qeje thupen la itre itus hne së hna hamën, ngo tro pë hë a isa hamën hnene la itre atr thenge la hnei angatr hna mekun e kuhu isa hni angatr; celë hi manie lai hna xom troa kuca la itre itus. Ketre, nyimutre la itre wapicine i sasaiatri ka kapa la göxeni cili qaathei Sasaiatri, thaa tru menu kö la thupen hna athipe koi angatr; ene pe kola aijijën la itre trejin ka pëkö manie troa hane kapa la itre itus göi icasikeu, me göi cainöje trootro.

³ Tro Sa Ixatua Tune Kaa: Loi e tro sa kapa la eamo hna hamën hnei Paulo, matre troa hane ce thewe göxen memine la itre “ka pë ewekë” thenge la hnei angatr hna ajan. (Rom. 12:13) Ame ngöne la easë a hamë ahnahna jën la huliwa hne së kuca e cailo fen, easë hi lai a hane ce thawa fe la hne së hna hetreny memine la itre trejine me easë e cailo fen. Celë hi matre hnene la itre xaa trejin hna hnëkëne amë ngöne la nöjei treu la ketre manie thatraqane la huliwa e cailo fen, tune lo aqane kuca angatr kowe la itre ejolen la Uma Ne Baselaia. Angatr a wangatrehmekun laka, kola xome la itre manie cili, thaa nyine thatraqane hmekuje kö la kuci itus, ngo thatraqane mina fe la nöjei götran ne la huliwa. Pane mekune jë së la itre manathithi ka tru hna troa kapa hnene la itre trejine me easë, e tru catr the së la itre ka huliwa tune lai.

⁴ Ketre, ijije mina fe tro sa ce thawa la hne së hna hetreny, e hne së hna tuluth la aqane tro së a sipon la itre itus hna xötrei kapa. Maine tro sa sipone hi la hne së hna nyipi ajan, kolo hi lai a aijijën la itre trejin me easë e cailo troa hane kapa la göxeni ne la ua hnei angatr hna ajan matre troa acatren la lapaune i angatr, me troa hane akökötren la huliwa ne cainöje trootro ngöne la itre xaa götrane hnei angatre hna mele ngön.​—Heb. 13:16.

⁵ Loi e tro pala hi së a atre, laka, ame la easë a sipon la itre jiane huliwa, mekune ju së laka, ka tru thupene itre eje koi Sasaiatri. Kolo lai a qaja la itre video, CD-ROM, itre itus ka nyimutre, itre itus hna iacaasinekeun, itre kaset nyine dreng nyine troa abone ngön. Maine ijije tro pe hi a caas la itre jiane huliwa cili kowe asë la fami, ngo thaa tro kö a isatrën hnene la itre atren? Maine tro së a tuluth la itre jiane huliwa hne së hna xom, tro ha aijijën la itre xan troa hane kapa fe la itre ewekë ka lolo nyine madrine koi së.​—Fil. 2:4.

⁶ Ame la thupen la itre itus hne së hna tro fë ngöne la hna cainöje trootro, tre, easë a troa nyithupen hnene la itre ahnahna hne së hna hamën koi Sasaiatri ngöne la Uma Ne Baselaia, nge hnene mina fe la manie hne së hna kapa qaathen la itre ka xom la itre itusi së. Ngo maine easë a sipo itus thatraqa së kö, tune la itre nyima, me Annuaire, me Tusi Hmitrötr ka hane gool, me itre xane ju kö, thaa itre xaa atre kö la ka troa nyithupene lai. Ame la itre ka pane troa ixatua göi manie, tre, easë itre hlue i Iehova. Qa ngöne lai, nyimutre la itretre cainöj ka atre la etrun la thupen la itre jiane huliwa hnei angatr hna xom, haawe, angatr a hamë ahnahna hmekun itre ej. Hanawang la ketre ceitun, ame koi Tusi Hmitrötr ka hane gool, tre kösë 2 500 F nge sin la thupen, ame koi index tre, 5 000 F ame idrai tre, 600 F, ame CD-ROM, tre, 6 000 F koi 12 000 F, ame disk lazer 2 500 F, nge ame itre video tre tru catre mina fe la thupene itre ej. Maine thaa kuië ahnahna kö së matre troa nyithupene tune lai la itre jiane huliwa së, eje hi lai laka tro ha co la hna kuca hnene la organizasio thatraqane la huliwa e cailo fen.

⁷ Hna qaja hnei Iesu ka hape, troa wangatrehmekune hnyawa la itretre drei nyidrëti ka nyipici, hnene la aqane ihnimekeu i angatr. (Ioane 13:34, 35) Maine tro sa hamën hnene la hni ka pexej la itre trenge nyi së me hane ce thawa memine la itre xan thenge la hnei angatr hna ajan, easë hi lai a amamane hnyawa ka hape, itre Keresiano së ka ihnim.