The Mano Kö Troa Xötrethenge Iesu
1 Ngöne la ketre ijin, hnei Iesu hna qaja ka hape: “Maine kete ate a ajane troa xöte thenge ni, loi e tro angeic’a xele angeice kö, me xome la satauro i angeice kö, me xöte thenge ni fë.” (Mat. 16:24) Eje hi laka, hetre aja së troa canga kapa la hna ithahnata hna hamëne hnei Iesu. Loi e tro së a pane ce wange la aliene la ihë cili.
2 “Loi e Tro Angeic’a Xele Angeice Kö”: Ngöne la easë a nue la mele së koi Iehova, ke, easë hi lai a xele së kö. Ame la sipu aliene la hnepe hnaewekë celë qene Heleni, ke, kola hape “troa thipën.” Kolo lai a hape, easë a nuetrije qa kuhu hni së la itre sipu hne së hna mekune kow, me itre aja së, me itre ewekë ka thaa nyipi ewekë kö kowe la mele së, me itre xaa nyine amadrinëne ka ngazo—nge troa catre troa amadrinë Iehova uti hë epine palua.—Rom. 14:8; 15:3.
3 “Xome La Satauro i Angeice Kö”: Ame la mele ne keresiano, ke, ene la troa xome la satauro ne huliwa ne huje thatraqai Iehova. Ame la ketre aqane troa hujëne la mele së, ke, ene la troa catre cainöje trootro. Uti hë la macatre celë, alanyimu catre la itretre cainöje ka madrine troa xome la huliwa ne pionie ka ixatua. Maine jë, epuni fe la ketre e angatr, nge atreine fe tro epuni a anyipicine laka atraqatre kö la itre manathithi hnei epuni hna troa kapa, hune la itre huliwa hnei epuni hna hujën. Maine thatreine kö epuni troa hane xome la huliwa ne pionie ka ixatua, ke, ijije fe tro epuni a hane catre cainöje cememine la itre atrene la ekalesia. Haawe, hna axeciëne hnene la itre xaa ekalesia troa canga nyiqaane la itre icasikeu göi troa cainöje trootro. Hna kepe thangane ka loi fe hnei itre xane ngöne laka, hnei angatre hna mekune troa kuca la ‘caa hnalapa hmaca’ maine pena troa ‘nango aqeane’ la hna cainöj.
4 Ame la ketre aqane troa hujëne la mel, ke, ene la troa isa amë la itre mekune hna ajane troa traqa kow. Ame la itre xaa ka cainöj, ke, angatre hë enehila a pionie lapa, pine laka hnei angatre hna kuca matre troa ahmaloëne la mele i angatr, me nyihnyawane hnyawa la porogarame i angatr. Ame itre xan, ke, angatre a thele troa amekötine la mele i angatre matre troa huliwa ngöne la bethela, maine pena troa xome la huliwa ne mesinare. Ame itre xan, ke, angatre a tro kowe la ketre götrane gaa aja ka cainöj.
5 “Xöte Thenge Ni Fë”: Ngacama tru la itre itupathe ka traqa kowe la itretre drei i Iesu, ngo hna xatua angatre hnene la aqane catre huliwa i nyidrë, memine la aqane cile huti nyidrë ngöne la huliwa ne cainöj. (Ioane 4:34) Kola akeukawane la hni i angatre hnene la maca hna tro fë hnei nyidrë, nge hnene fe laka ce nyidrëti me angatr. Celë hi matre, ka hni ka madrine pala hi la itre atr ka xötrethenge nyidrë. (Mat. 11:29) Loi e tro fe së a hane xatuane la itre xaa atr troa cile huti ngöne la huliwa ka sisitria, ene la troa cainöjëne la Baselaia, me troa inine la nöjei atr.
6 Epi kapa hnyawa pala hi së asë la ihë i Iesu troa xötrethenge nyidrë, ene la troa hujëne la mele së. Maine tro së a trongëne lai, eje hi laka, tro ha atraqatre la madrine së enehila, nge atreine fe tro së a hane mejiune kowe la itre manathithi ka tru elany.