Loi e Troa Catre Sine La Itre Icasikeu “Ke Easenyi Pala Ha” La Drai
1 Ame la troa icasikeu, ke celë pala hi ka nyipi ewekë catre kowe la nöje i Iehova. Hnei angetre isaraela hna xupe la ēnē memine la itre sunago, nyine göhnene la nyipi hmi, memine la ini qa thei Akötresie, me hnë troa iöhnyi me madrine hnene la itre trejin. Ketre tune fe la itre keresiano ne la hneijine i Iesu, laka, thaa hna thëthëhmine kö hnei angatre la itre aliene cili, matre hnei angatre pala hi hna ce icasikeu. Ame enehila easë a melëne la itre drai hnapin, nge kola kökötre nyimenyime la itre jole me itre itupath; qa ngöne lai, nyipi ewekë mina fe koi së troa hane kapa la trenge catre ngöne la ua, hna hamëne hnine la itre icasikeu ne la ekalesia, nge easë a ajane lai “ke easenyi pala ha” la drai. (Heb. 10:25) Hanawange la köni kepine matre loi e tro së a sine la itre icasikeu.
2 Göi Troa Caas: Kola eamo së hnei Tusi Hmitrötre troa “akeukawane ipitön, tune lo hnei nyipunie hna kuca.” (1 Thes. 5:11) Hetre thangane catre la kola icasikeu së hnei Akötresie, ke kola nyialiene la itre he së hnene la itre nyipi mekun, nge kola upi së fe troa kuca la itre huliwa ka loi. Ngo maine easë pe kö a ananyine la itre keresiano, haawe, tro hë së a tro menu, me selë së kö, maine troa hnahone la itre mekune ka ngazo.—Ite edomë 18:1.
3 Göi Troa Ini: Kola hamëne pala hi hnene la itre icasikeu ne la itre keresiano, la ketre porogarame ne ini qa hnine la Tusi Hmitrötr, matre tro pala hi a catre e kuhu hni së la ihnimi së koi Akötresie ngöne la itre hni së. Hetre thangane ka lolo qa ngöne la itre ini cili, ke itre eje a amamane hnyawa la aqane troa trongëne la “nöjei hna mekuatin’asë hnei Akötesie.” (Ite Huliwa 20:27) Kola xatua së hnene la itre icasikeu troa atreine cainöjëne la maca ka loi, me troa inine la itre atr; nge kola ajane catrëne hne së enehila la itre ini hna kapa, matre troa hane melëne la madrine hna thatreine troa qeje pengön, ene la troa thele me xatuane la itre atr ka troa kapa la nyipici hnine la Tusi Hmitrötr.
4 Göi Troa Thupë Së: Ekalesia hmekuje hi la hnapo ngöne la ua, ngöne la fene ka ngazo hne së hna mele ngön enehila—ketre göhnë gaa tingeting, nge gaa hetre ihnim. Hetre thangane catre la uati hmitrötre i Akötresie koi së, ngöne la easë a sine la itre icasikeu ne la ekalesia, ngöne laka, hetrenyi la itre wene ne ej, ene “ihnim, me madin, me tingeting, me xomi hni ahoeany, me metöt, me thina ka loi, me nyipici, me thina ka menyik, me xome hnöth.” (Gal. 5:22, 23) Kola xatua së hnene la itre icasikeu troa cile huti me catre ngöne la lapaun. Itre eje a xomexatua së me canga hnëkë së kowe la itre itupathi ka troa traqa koi së.
5 Maine tro pala hi së a sine la itre icasikeu, haawe, tro fe së a hane melëne la ewekë hna qeje pengöne hnene la ka traqa kowe la atre cinyihane la salamo, mekune ka eje ngöne la Salamo 133:1, 3: “Hana wang, lolopi hë me sheminge pi hë la kola ce lapa la ange tejin!” Ame ngöne la hna hmi me hna ce icasikeu ngön, hnene la nöje i Akötresie enehila, “Hnei Iehova hna ahnith’ e cili la manathith, ene la mele epine palua.”