Kola Sa La Itre Hnyinge i Nyipunie

◼ Nemene la nyine tro së a kuca matre troa hetre thangane ka loi la itre icasikeu së?

Maine jë troa mekune hnene la itre xane ka hape, itre qatre thupe hmekuje hi me itre drikona la itre ka troa kuca matre hetre thangane ka loi la itre icasikeu ne la ekalesia, pine laka, angatre a xomiujine itre ej, nge angatre fe a elemekene la itre hnëqa e hnine itre ej. Nyipici, ijiji së asë hi troa kuca matre hetre thangane ka loi me manathithi hna kapa qa ngöne la itre icasikeu. Treene lao aqane troa kuca matre tro loi hnyawa pala hi la itre icasikeu:

Loi e troa canga hnëkë. Troa hetre thangane ka loi koi së la itre icasikeu, e hne së hna hnëkëne hnyawa itre ej. Maine tro asë hi së a kuca tune lai, tro ha hetre madrine e hnine itre ej, me hetre thangane catre itre eje kowe la mele së. Troa sine pala hi itre ej. Ithuecatre koi së isa ala caas, ngöne la easë a öhne laka, ala nyimu së itre ka sine la icasikeu; ketre kola acatrene hnyawa e kuhu itre hni së, la enyipiewekëne la troa sine la itre icasikeu. Troa canga traqa. Maine hne së hna isa lapa ngöne la itre göhnë së qëmekene la troa nyiqaane la porogaram, haawe, ijije hi tro së ce nyiqaane la icasikeu hnene la nyima memine la thith; nge e cili tro hë së a kepe thangane hnyawa la icasikeu. Loi e hna hnëkë hnyawa. Atreine hi tro së a canga trotrohnine me xome hnyawa la itre mekune hna ithahnatan, e hne së hna hane xome fe the së la Tusi Hmitrötre së memine la itre itusi nyine troa ce wang. Loi e troa drenge hnyawa la itre hna qaja. Maine jë, loi e tro së a lapa ngöne la itre pane göhnë, matre troa drenge hnyawa la hna qaja. Thatreine kö troa drenge hnyawa hne së asë la itre hna qaja, e hna iulili, me tro lapa koi kabine. Loi e troa hane qeje mekun. Maine ala nyimu së itre ka liime me qeje mekun, haawe, tro ha ketre ithuecatre ka tru kowe la itre xan, ngöne laka, easë a amamane la ejuine la lapaune së. Thaa tro kö a qea menu pala ha la itre mekun. Kola aijijëne la ka ala nyimu troa hane qeje mekun. Loi e tro së a nyifegone me xome hmekuje la itre mekune ka eje ngöne la jiane huliwa hna ithahnatane ngön. Loi e troa kuca hnyawa la itre xötreqa. Maine hetre hnëqa së ngöne la Ini Ne Cainöje Trootro Qa Thei Akötresie, maine ngöne icasikeu thatraqane la huliwa ne cainöj, loi e tro së a hnëkë hnyawa, me canga wange memine la ka troa ce kuca me easë, nge loi tro së hetrenyi la ajane troa kuca la itre xötreqa hna hamëne koi së. Qaja aloine jë la itre trene xötreqa. Qaja jë kowe la itre xane ka hape, easë a madrine la aqane catre angatre troa eatrëne la hnëqa. Aqane tro hi angatre lai a kökötre ngöne la itre xötreqa hna kuca, nge ketre, kola xatua angatre fe troa kuca alolone hnyawa pala hi itre eje ngöne la itre drai ka troa xulu. Loi e troa ithuecatrekeu. Maine hne së fe hna ibozu me porotrike me itre xane göi troa ithuecatr, qëmekene me thupene la itre icasikeu, haawe, tro hë së a hetrenyi la madrine me kapa la itre manathith, qa ngöne laka, hne së hna sine la itre icasikeu.