Tune Ka Fe Epuni Göi Troa Xome La Huliwa Ne Pionie?
1 “Thaa ase kö ni mekune ka hape, tro ni a hane kuca hmaca la ketre huliwa. Ngo xecie koi ni enehila laka, pëkö madrine ka sisitria hune la madrine hnenge hna kapa qa ngöne la huliwa celë.” Itre trenge ewekë i drei lai? Celë hi aqane ithahnatane la ketre e angatr, itretre anyipici Iehova, traqa koi itre hadredre thauzane lao etrun; hnei angatre hna nue la mele i angatre ka pexeje matre troa huliwa huti ngöne la hna cainöje trootro. Hapeu, hnei epuni kö hna hane mekune hnyawa ngöne la thith, maine jë thatraqai epuni fe la huliwa ne pionie? Maine ase hë së hane nue la mele së troa nyihluei Iehova, haawe, loi e tro së a wange hnyawa maine ijiji së jë fe troa hane tro fë la maca ka loi ne la Baselaia, ngöne la drai ka pexej. Qa ngöne lai, loi e tro epuni a pane wangatrune cahu itre xaa hnyinge ne la itre trejine ka ala nyim, göi huliwa ne pionie.
HNYINGE 1: “Kola qaja hnei itre xane ka hape, thaa thatraqane asë kö la itre trejin, la huliwa ne pionie. Nemene la aqane tro ni a atre ka hape, thatraqai eni fe?”
2 Troa sa la hnyinge celë thenge la aqane mele i epun, me itre hnëqa i epuni hna ahnithe hnei Tusi Hmitrötr. Nyimutre la itre trejine ka thaa ijije kö troa hane kuca la 90 lao hawa ngöne la treu thatraqane la huliwa ne cainöje trootro, pine laka, itre ka wezipo angatr, maine hnene pena la ketre jole ngöne la mel. Drei la tulu hna hamëne hnene la itre trejine föe ka nyimutre, laka, itre Keresiano föe angatr, nge itre thine fe. Angatre a thele troa akökötrene la aqane cainöje i angatr, thenge la hnei angatre hna atrein. Celë hi matre, e hetre ijine i angatre mina ha, haawe, angatre a pane xome la huliwa ne pionie, caasi maine nyimu treu pena ngöne la macatre; e cili angatre a menuëne la itre madrine ka xulu qa ngöne la hna akökötrene la huliwa ne cainöj. (Gal. 6:9) Ngacama thaa ijiji angatre kö enehila troa huliwa huti ngöne la hna cainöje trootro, pine laka, nyimutre la itre ewekë ngöne la mel ka ajolë angatr, ngo angatre pe a hane akökötrene thene la itre xane la ajane troa pionie; nge hetre thangane ka loi kowe la ekalesia, la aqane catre tro fë angatre la maca ka loi.
3 Haawe, ame pena ha itre xaa trejine föe me trahmanyi ka paatre kö thei angatre la itre xaa hnëqa ka tru cili, angatre a saze la aqane mele i angatr, me thele la itre ewekë nyine troa pane kuca, matre thaa tro kö a nyi jole koi angatre troa hane xome la huliwa ne pionie. Hapeue fe epun? Fenesi hë epuni la itre ini epun? Tuneka fe epuni itre föe, maine epuni a öhne laka, atreine hi troa xome hnyawa hnene la fö i epuni la itre hnëqa ka tru thatraqane la hnepe lapa? Hapeu, pëkö nekö i epun? Tuneka, ka reterete hë epuni hna huliwa i maseta? Isa qanyi mekuna së kö, maine tro së a pionie, maine thaa tro pena kö a xome la huliwa cili. Haawe, matre ame la hnyinge ke, kola hape, ijiji epuni kö troa saze la mele i epuni matre troa hane pionie?
4 Jëne la fene hna musi kowe hnei Satana, angeice a axulune la nöjei pengöne nyine amadrinëne la mel, me ukune la atr troa isa mele thatraqai angatre hmekuj. Maine tro së a catre iananyi memine la fene cili, haawe, tro hë Iehova a xatua së troa amë panëne la itre ewekë ne la Baselaia, me aijijë së troa hane xome la itre hnëqa qa thei Akötresie. Maine atreine hi epuni troa saze la aqane mele i epuni matre troa pionie, tuneka matre kuca thenge hnei epuni lai?
HNYINGE 2: “Tro ni a atre tune ka ka hape, ijije hi tro ni a huliwa huti ngöne la hna cainöj, nge pëkö ejolene göi mani?”
5 Eje hi laka, ame ngöne la itre nöje ka nyimutre, hna elë pala hi ngöne la nöjei macatre, la itre hawa hna xome thatraqane la huliwa i maseta; hna amekötine la itre hawa cili nyine troa kuca ngöne la nöjei wiike koi maseta, thenge la aqane elëne lo itre ewekë ka sisitria thatraqane la mel. Ngo nyimutre pala hi la itre trejine ka xome la huliwa ne pionie, isa trene hë lao macatre enehila, nge Iehova pala hi a xatua angatr. Maine easë a ajane troa tro loi hnyawa la huliwa ne pionie, nyipi ewekë catre tro së a hetrenyi la lapaun, nge tro fe së a ajane troa hujëne la mele së. (Mat. 17:20) Hetrenyi la mejiune së jëne la Salamo 34:10, laka, ‘tha tro kö a pate la kete loi thei angete thele Iehova.’ Loi e troa atraqatre la mejiunene la trejine ka mekune troa pionie, laka, tro Iehova a hamë ixatua koi angeic. Aqane ujë i Nyidrëti lai, kowe la nöjei pionie ka mele nyipici koi Nyidrë e cailo fene hnengödrai asë! (Sal. 37:25) Tune la hna qaja ngöne la 2 Thesalonika 3:8, 10, me ngöne 1 Timoteo 5:8, thaa kolo kö a thele hnene la itre pionie, tro la itre xane a hamë manie koi angatre nyine ixatua.
6 Loi e tro fe la itre trejine ka mekune troa xome la huliwa ne pionie, a pane kuca la hna qaja hnei Iesu, ene laka, troa: “Pane lapa troa e la thupen.” (Luka 14:28) Aqane tro hi lai a amamane ka hape, hetrenyi la inamacane ngöne la aqane ujë. Porotrike jë fe memine la itre trejine ka xome hë la huliwa ne pionie, a nyimutre hë la itre macatre. Hnyingë angatre jë la aqane xatua angatre hnei Iehova. Tro fe a hane madrine la atre thupëne la sirkoskripsio, ketre pionie ka majemine xome hë la huliwa cili, troa hamëne koi epuni la itre ixatua ngöne la aqane troa eatrëne hnyawa la huliwa ne pionie hut.
7 Thatreine jë kö la atr troa melëne hnyawa la enyipicine la hna thingehnaeane hnei Iesu ngöne Mataio 6:33, e thaa nue Iehova kö hnei angeice troa eatrongë angeic. Hna qaja hnene la ketre trejine föe ka pionie ka hape: “Ame ngöne la eni a ce traqa memine la sine ce huliwange ngöne la teritoare ka hnyipixe göi huliwa ne pionie hna ahnithe koi nyio, hna e hi la itre atu ukesil, me caa mookë giris, nge pë hë manie i nyiho. Ase jë hi nyiho kuca la suupe ne hej, nyiho a igoeë me qaja ka hape, ‘pë hë göxeni la thatraqane la drai elany.’ Qëmekene tro nyiho a meköl, hnei nyiho hna pane thithi fë la jole ka eje thei nyiho. Nyiho petre kö a meköl, nge kola iahlë e hmahmakanyi hnene la ketre trejine föe ka lapa ngöne la teritoar, öni nyidroti ka hape, ‘Hnenge hna sipone koi Iehova jëne la thith, troa upe koi huni la itre pionie. Atraqatre la madrinenge troa ce tro me epone ngöne la drai ka pexej, ngo pine laka, nango nanyi la hnenge hna lapa, eni a sipone matre tro së a ce xeni hnaipajö. Hnenge hna xomi xeni ijiji koi së ala kön.’ Tru catre la miitr, nge tru mina fe la itre sil.” Thaa sesëkötre kö së lo Iesu a qaja hnyawa koi së ka hape, atreine hi tro së a ‘thaa kuke hnine la mele së’! Öni nyidrëti fe ka hape: “Dei e nyipunie ate kuke hnine a ateine troa nyixane la hna sa ime kowe la ehoea i nyën?”—Mat. 6:25, 27.
8 Kolo pala hi a hni catre trootro koi mo ne fene la itre atr ka lapa ezi së. Kola ixötrekeu fe la pengöi angatre koi së. Ngo maine tro së a hetrenyi la ipië me wangatrune la huliwa ne pionie hut, haawe, tro hë së a atreine troa kapa me madrine la hne së hna hetreny, ngacama co hi. (1 Tim. 6:8) Ame kowe la itre pionie ka ahmaloeëne la mele i angatr, me xomiujine hnyawa ej, tro ha tru hnei hawa ne tro angatre a cainöj, nge tro fe angatre a hetrenyi la madrine ka tru, me catre ngöne la lapaun, qa ngöne laka, angatre a qaja la nyipici kowe la itre xaa atr. Maine thaa angatre kö a thele menune pala ha la meköti tune lo itre xaa hene hmi, ngo qa ngöne la hnei angatre hna xomihni ngöne la aqane tro angatre a mel, haawe, angatre kapa la itre manathithi jëne la huliwa ne pionie.
9 Maine tro epuni a atrehmekune hnyawa ka hape, easë la a melëne la itre drai hnapin, nge easenyi hë matre paatre pi hë la fene ka ngazo celë, haawe, tro ha hetrenyi thei epuni la ajane troa hujëne la mele i epuni me kuca la hnei epuni hna atrein, matre troa cainöjëne la maca ka loi ne la Baselaia ngöne la nöjei ijin. Maine tro epuni a waipengöne hnyawa la aqane mele i epun, me amë ngöne la ihnatrapa ime i Iehova la mekune ka eje thei epun, maine jë tro epuni a öhne laka, atreine hi tro epuni a nyihluei Nyidrë, ngöne la huliwa ne pionie hut. Maine eje hi laka, epuni a troa xomehnöthe la mele i epun göi aja ewekë, matre ijije troa pionie, ngo tro hë epuni a kapa la itre manathithi ka tru qa thei Iehova.—Sal. 145:16.
HNYINGE 3: “Maine thöthi ni, hnauëne matre thaa xome kö ni la huliwa ne pionie ceitune me ewekë ka tru thatraqane la meleng?”
10 Ame ngöne la epuni a fenesi la itre hnepe macatre ne ini epun, haawe, epuni ha goeëne la hnei epuni hna troa kuca e thupen. Ame la aja i epuni ke, ene la troa mele xetietë, me madrin, me troa hetrenyi la manathith. Maine jë tro la itre ka ini epuni a uku epuni troa sisedrëne la itre ini epun, matre troa hetrenyi elanyi la ketre huliwa hna nyithupene hnyawa. Ngo tro la mekuthetheue hna inine hnyawa hnene la hmi Keresiano, a qaja koi epuni ka hape, loi e tro pe epuni a hnëkë hnyawa troa nyihluei Iehova thenge la hnei epuni hna atrein. (Ate cai. 12:1) Maine jë fe epuni a mekune troa faipoipo, me troa hetre nekönatr. Nemene la hnei epuni hna troa kuca?
11 Ame la itre mekune hnei epuni hna axeciëne ngöne la mele i epuni enehila, itre eje hi lai ka troa eköthe la mele i epuni elany. Maine ase hë epuni nue la mele i epuni troa anyipici Iehova, me xome la bapataiso, haawe, kolo hi lai a hape, tro epuni a hamëne koi Nyidrë la mele i epuni ka pexej. (Heb. 10:7) Ame la nyine tro epuni a pane kuca, ke, ene la troa thele troa pionie ka ixatua, ngöne la caasi maine nyimu treu pena. Tro hë epuni a hane öhne la itre hnëqa memine la itre madrine hna troa kapa qa ngöne la huliwa ne pionie lapa, nge thaa tune kö la ewekë e hnine la gaa hajihaji la ewekë hnei epuni hna troa kuca elanyi ngöne la mele i epun. Haawe, tuneka matre nyiqaane epuni troa pionie, hune la troa huliwa i maseta ngöne drai ka pexej, ngöne la epuni a afenesine la itre ini epun? Ame koi itre xaa trejine ka pane treqene troa hane xome la huliwa ne pionie, angatre pë hë enehila a ietrane laka, loi ju kö ekö tro angatre a canga nyiqaan.
12 Ewekë ka loi koi epuni itre thöthi troa thele troa melëne la mele ne nekö trahmany, me kapa madrine la itre manathithi ka xulu qa ngöne la hna cainöje ngöne la drai ka pexej. Maine epuni a ajane troa faipoipo, ewekë ka loi la troa pane hane xome la huliwa ne pionie lapa, celë hi trepene ka sisitria thatraqane la mele ne trefën. Ame hë la epuni a kökötre trootro ngöne la götrane la ua, me macaje ngöne la atrehmekun, haawe, atreine hi tro epuni a iëne troa xome la huliwa ne pionie ngöne la mele i epun, memine la atr ka caa jëne mekune me epun. Hetrenyi la itre trefëne ka ce xome la huliwa ne pionie, angatre a iwai trootro ngöne la sirkoskripsio, maine kola cainöje pena tune la itre mesinare. Drei la ketre aqane mele ka sisitria catr!
13 Maine thaa tro kö epuni a nuetrije la huliwa cili, eje hi laka, tro ha atraqatre la inamacane i epuni ngöne la nyipici, nge tro fe epuni a kapa la ketre ini hna thatreine kö troa hamëne hnene la ketre huliwa hna kuca e celë fen. Jëne la huliwa ne pionie, kola inine la atr troa atreine xomehnöthe la mele i angeic, me atreine ketre wai ewekë, me aqane troa ce mele memine la itre atr, me lapa qale koi Iehova, memine la aqane troa xomihni ahoeany, me hetrenyi la hni ka menyik; celë hi itre thiina lai ka troa aijijë epuni troa xome la itre hnëqa ka tru.
14 Pë hë mejiune ne la itre atr enehila, kowe la mel. Xalaithe hi la itre ewekë ka cile huti hna kuca hnei atr, ngo ame itre hna thingehnaeane hnei Iehova, ka epine palua itre ej. Pine laka, pëkö ewekë ka thungijë i epuni troa hetrenyi la mele ka loi elany, haawe, drei la ketre ijine ka sisitria koi epuni enehila, ketre ijine tro epuni a mekune hnyawa la hnei epuni hna troa kuca thatraqane la mele i epuni ngöne la itre macatre ka troa xulu? Mekune hnyawa kö la huliwa ka lolo, ene la troa pionie. Thaa tro jë kö epuni a ietrane la huliwa hnei epuni hna iëne ngöne la mele i epun, ene la huliwa ne pionie.
HNYINGE 4: “Hapeu, ijije kö troa eatrëne pala hi la itre hawa hna amekötin? Tune ka kö e thatreine kö ni aeatrëne la itre hawang?”
15 Ame ngöne la epuni a nyialiene la pepa ne sipo troa pionie lapa, loi e tro epuni a troa sa la hnyinge hna hape: “Hnei epuni kö hna hnëkëne la mele i epuni matre atreine epuni troa eatrëne la itre hawa hna amekötin, ene la 1 000 lao hawa ngöne la macatre?” Maine epuni a ajane troa eatrëne la hna ie cili, haawe, nyipi ewekë tro epuni a kuca la köni hawa ne cainöje ngöne la drai. Eje hi laka, loi e tro epuni a hetrenyi la ketre idrai ne ameköti huliwa ka lolo, nge nyipi ewekë fe troa xomehnöthe la mel matre troa atreine trongëne ej. Ala nyimu la itre pionie ka kuca tune lai, matre angatre a eatrëne la itre hawa hna amekötine ngöne hi la itre treu ka xalaith.
16 Ngo kola qaja hnyawa ngöne Ate Cainöj 9:11, ka hape, ‘Ame la ijine memine la ewekë ka xulu, te, kola traqa koi angat’asë.’ Haawe, ame itre xaa ijine, ke, kola traqa la ketre meci ka tru koi angeic, maine ketre ewekë pena, nge thatreine ju hi angeice troa aeatrëne la itre hawa hna amekötin. Maine thaa ka tro kö a cile huti lai jol, nge kola traqa ngöne la kola xejë la macatre ne huliwa ne cainöj, maine jë, loi e troa pane kuca la ketre idrai ne ameköti huliwa, matre tru la huliwa hna troa kuca, nge atreine fe troa eatrëne la itre hawa hna amekötin. Ngo nemene la nyine troa kuca, e traqa ju la ketre jole ka tru ngöne la itre hnepe treu thupene la hna nyiqaane la huliwa, nge thatreine hë la pionie troa kuca asë la itre hawa hna amekötin?
17 Maine epuni a wezipo ngöne la itre xaa hnepe treu, maine hetrenyi pena la itre xaa kepine ka tru ka ajolë epuni troa eatrëne la itre hawa i epun, haawe, loi e tro epuni a wange la ketre atrene la kometre ne huliwa ne cainöje ne la ekalesia, me qeje pengöne koi nyidrë la jole ka eje thei epun. Maine kola mekune hnene la itre qatre thupe cili, ka hape, ijije troa nue epuni troa sisedrëne la huliwa ne pionie, ngacama tru hë la itre hawa hna thaa eatrën, haawe, atreine hi tro angatre a axeciëne tune lai. Tro la seketere a nyihatrene hnei peeni ngöne la karte ne lai atre cainöj, laka, thaa nyipi ewekë pë hë tro epuni a traqa kowe la itre hawa hna thaa eatrën. Thaa kolo kö lai a mano, ngo kolo pe a meku epuni pine la jole ka eje thei epun.— Wange ju la sinetrongene la Huliwa ne Baselaia ne ogas 1986, paragarafe 18.
18 Hetrenyi la itre trejine ka majemine hë pionie, angatre a kuca atrune la itre hawa ngöne la kola xötrei xejë la macatre ne huliwa ne cainöj. Pine laka angatre a amë panëne la huliwa ne pionie, haawe, angatre a öhne laka, nyipi ewekë troa acone la aqane kuca angatre la itre xaa ewekë ka thaa sisitria kö kowe la mel. Maine tro la pionie a thaa eatrëne la itre hawa i angeic, pine laka, ngazo la aqane hnëkëne la idrai ne ameköti huliwa, nge pëkö xomihni ngöne la aqane troa trongëne ej, haawe, zöi angeice kö la kola thaa eatrëne la itre hawa, nge thatreine kö troa kapa lo lai ewekë hna amekötine thatraqane la pionie ka cile kowe la ketre jole ka tru.
19 Hetrenyi la itre ijin, kola qëmeke hnene la pionie kowe la ketre ewekë hna thatreine kö troa neën. Maine jë, tro angeice a öhne laka, thatreine kö angeice troa eatrëne la itre hawa hna amekötine ngöne la ketre ijine ka ka nyimutre, hnene laka, hna tithi angeice hnene la ketre meci ka tru, maine kola tru catre la itre hnëqa e hnine la hnepe lapa i angeic, maine hnene la itre xaa ewekë ju kö. Ame e cili, loi e tro angeice a pane nue la pionie lapa, nge maine ijije koi angeic, tro pë hë a lapa xome la huliwa ne pionie ka ixatua. Pëkö ewekë hna hnëkëne nyine aijijëne la ketre trejine tro pala hi a pionie, maine thaa ijiji angeice kö troa eatrëne la itre hawa hna amekötin.
20 Eahuni a mejiune laka, tro la hna amekötine ka ketre pengöne kö nyine mekune lo itre pionie ka pane qëmeke kowe la ketre hnepe jol, a xatuane pala hi la itre xaa trejine troa xome la huliwa ne pionie, nge pëkö troa hetrenyi thei angatre la luelu. Kolo mina fe a troa ithuecatre kowe la itre trejine ka pionie huti hë, troa sisedrëne pala hi la huliwa cili. Ame la aja huni ke, loi e troa tro loi pala hi la huliwa hna xome hnene la itre trejine ka pionie hut.
HNYINGE 5: “Eni a ajane troa kuca la ketre ewekë nge madrine ni troa aeatrëne ej. Hapeu, tro kö ni a madrine qa ngöne la huliwa ne pionie?”
21 Tro së a hetrenyi la nyipi manathith, e lolo la aqane imelekeu së me Iehova, nge loi e eje fe the së la mejiune laka, easë a nyipici ngöne la aqane nyihluei Nyidrëti hne së. Hnei Iesu hna xomihnine la satauro, “ngöne la madrine hna amë xajawa i nyidë.” (Heb. 12:2) Ame la madrine cili, ka xulu qa ngöne la hna kuca la aja i Akötresie. (Sal. 40:8) Maine ka ihmeku la itre huliwa së memine la aqane hmi së koi Iehova, haawe, atreine hi tro së a kapa la nyipi madrine enehila ngöne la fene celë. Troa hetre eloine la mele së e hne së hna thele la itre aja ngöne la götrane la ua, nge tro hë së a atre laka, ewekë ka loi la hne së hna kuca. Manathithi la atre ham, nge atre hi së laka, ame la ewekë ka sisitria nyine tro së a kuca, ke ene la tro së a thele troa inine me amamane kowe la itre xaa atr la aqane troa hetrenyi la mele ka thaa ase palua kö ngöne la fene ka hnyipixe i Akötresie.—Ite Huliwa 20:35.
22 Hna qaja hnene lo pionie hne së hna ithahnatane ngöne la pane paragarafe ka hape: “Sisitria la madrine ka eje theng, ngöne la eni a öhne la atr hnenge hna etidi kow, a hane catre troa atrunyi Iehova. Ketre ithuecatre kowe la lapauneng, ngöne la eni a öhne la mene ne la wesi ula i Akötresie, kola upe la itre atr troa saze la aqane mele i angatr, matre troa amadrinë Iehova.” (Wange ju la zonal, La Tour de Garde ne 15 okotropa 1997, götrane 18-23.) Haawe, nemene la ka troa thue madrine i epun? Nyipi ewekë kö troa thele la madrine ka cile hut, hune la madrine hna thupatëne hna hamëne hnene la fen; maine tro epuni a xome la huliwa ne pionie, haawe, tro hë epuni a hetrenyi la madrine troa kuca la ketre huliwa ka mingöming, nge ka troa hamë epuni la nyipi manathith.
HNYINGE 6: “Maine thaa kolo kö a iupi troa pionie matre troa hetrenyi la mele ka thaa ase palua kö, hapeu, thaa qanyi së kö troa isa axeciëne maine tro së a ponie maine thaa tro pena së a xome la huliwa cili?”
23 Nyipici, isa qanyi së kö isa ala caas troa axeciëne la mekun, ene la troa pionie. Iehova hmekuje hi la ka ijije troa wai gelene la mele së. (Rom. 14:4) Nyidrëti a ajane tro epuni a nyihluei Nyidrë hnene la hni epuni ka pexej, me u, me mekun, me trengecatre i epun. (Mareko 12:30; Gal. 6:4, 5) Nyidrëti a hnime la atr ka ham hnene la hni ka ajan, ene la atr ka nyihluei Nyidrë cememine la madrin, ngo thaa ka huketö kö maine kuca pena la ketre huliwa me eetre thupen. (2 Kor. 9:7; Kol. 3:23) Loi e ame la kepine matre epuni a huliwa huti ngöne la hna cainöj, ke, hnene laka, hetre ihnimi epuni koi Iehova, memine la itre atr ngöne la teritoar. (Mat. 9:36-38; Mareko 12:30, 31) Maine celë hi aqane mekune i epuni lai, haawe, nyipi ewekë tro epuni a wangatrune la huliwa ne pionie.
24 Eahuni a mejiune laka, tro la itre mekune hne së hna ce ithahnatane a xatua epuni troa tuluthe hnyawa la hnei epuni hna atrein, matre troa hane pionie. Ijije kö tro epuni a hane saze la mele i epuni matre troa hane pionie lapa? Hane cahu ketre idrai hna hape, “Idrai ne Ameköti Huliwang e Nöjei Wiik Thatraqane la Huliwa ne Pionie.” Wange ju maine ijije jë fe kö tro epuni a hane kuca la ketre idrai ne ameköti huliwa i epun, ka troa aijijë epuni troa eatrëne la 23 lao hawa ne cainöj ngöne la nöjei wiik. Thupene lai, lapaune ju, nge mejiune jë koi Iehova. Atreine hi tro Nyidrëti a xatua epun, matre troa hetre thangane ka loi la huliwa i epun! Hnei Nyidrëti hna thingehnaeane ka hape: “Tro ni a . . . nenge hui nyipunie la manathithi uti hë atraqate cat.”—Mal. 3:10.
25 Haawe, kola hnyinge ka hape, “Tune ka la huliwa ne pionie, thatraqai epuni fe?” Maine tro epuni a sa ka hape “Eje hi,” haawe, mekune jë sa jë la ijine tro epuni a canga nyiqaane troa pionie lapa, nge loi e xecie hnyawa koi epuni laka, tro Iehova a amanathithi epuni me hamë madrine kowe la mele i epun!
[Hna eköhagen götran 6]
(Wange ju la itus)
Idrai ne Ameköti huliwang, Göi Huliwa ne Pionie e Nöjei Wiik