“Tro Eö Elany a Ketre Pionie Ka Lolo!”
1. Tune kaa la aqane goeëne hnene la ketre trejine föe la huliwa ne pionie i nyiidro?
1 Hanawange la hna qaja hnei Kathe B. Palm, kola hape: “Pëkö ketre huliwa hnenge hna öhne ka tune la huliwa celë, laka, eje a ahmaloeëne la meleng nge eje mina fe, a hamëne koi ni la itre manathith ka tru ngöne la götrane la ua.” Traqa koi itre macatre ka nyimutre ne xome nyiidro la huliwa ne pionie, me haöthe asë la ketre nöj hna hape, Chili ketre götrane ahuë ne Amerika. Ame la kola mekune hmaca la itre manathithi hna kapa hnene la ketre atr ka cainöj ngöne la drai ka pexej, maine jë angeic a qaja koi epun, ka hape: “Tro eö elany a ketre pionie ka lolo!”
2. Qaja jë la kepine matre ame la kola elitrauje la madrine së, tre, hnene la hna xome la itre huliwa ngöne la götrane la ua.
2 Ketre Aqane Mele Ka Lolo: Kola keukawa hnyawa la hni Iesu lo Tulu së, hnene laka hnei nyidrëti pala hi hna kuca la aja ne la Tretretro i nyidrë. (Ioane 4:34) Qa ngöne lai, ka hni ka nyipici Iesu ngöne la nyidrëti a inine la itretre drei nyidrë, ka hape, ame la mele ka lolo, tre, thangane hi la hna huliwa koi Iehova. Easa madrine ngöne la kola tiqa la mele së hnene la itre huliwa hna kapa hnei Iehova nge ka amadrinëne la hni Nyidrë. Ketre, kola kökötre la madrine së hnene laka easa nue la traeme së, me trenge catre së me itre mo së, matre troa xatuane la itre xaa atr.—Ite hu. 20:31, 35.
3. Maine tro sa nue hnyawa la traeme së troa cainöj, nemene la manathithi hne së hna troa kapa?
3 Maine troa tru la traeme hne së hna nue thatraqane la huliwa ne cainöj, eje hi lai laka, tro fe ha nyimu ijine tro sa madrine troa nyiqaane inine la Tusi Hmitrötr memine la itre atr. Ngacama nyimutre la itre atrene la itre hnalapa ka thaa hane kö semesine së, ngo ame koi së, maine jë tro ha hetre thangane catre la götran hna cainöje ngön, ke, maca hnyawa ha së me hetre hne së hna melëne hë ngöne la huliwa ne cainöj. Loi e tro la itre pionie a huliwane hnyawa la itre ini hnei angatre hna kapa qa ngöne lo Ini Thatraqane La Itre Pionie, ene lo ini hnei angatre hna kapa thupene la caa macatre ne pionie angatr. (2 Tim. 2:15) Maine tro sa catre cainöj, haawe, tro hë sa traane hnyawa la itre itine feja ne la nyipici ka troa wa wen ngöne la nyipi ijin.—Ate cai. 11:6.
4. Nemene la nyine tro la itre thöthi a mekune hnyawa qëmekene troa afenesine la itre ini i nyudren?
4 Itre Thöth: Maine fenesi hë epuni qa hna ini, hapeu, hane kö epuni mekune hnyawa la hnei epuni hna troa kuca ngöne la itre drai elany? Eje hi lai laka hnei epuni pala hi hna eköthe la porogarame i epun thenge la itre nyine tro epuni a kuca ngöne la hna ini. Ngo thupene la itre ini i epun, tune kaa la aqane tro epuni a huliwane la traeme hnei epuni hna nue ekö thatraqane la ini? Hapeue matre troa pane wanga atrune ngöne la thith la aja celë, ene la troa pionie lapaa hune la troa thele troa huliwa i maseta ngöne la drai ka pexej? Ame la itre ini hnei epuni hna xome qa ngöne la hna cainöj kowe la itre atr ka isapengöne la itre aqane mel, me qa ngöne la hna cile kowe la itre jol ka eje ngöne la mele i epun, me qa ngöne la hna atreine xomehnöth me maca troa hamë ini, celë hi itre ini lai ka troa hetre thangane ka loi kowe la mele i epun.
5. Tune kaa la aqane tro la itre keme me thin memine la ekalesia asë a ithuecatre troa xome la huliwa ne pionie?
5 Hapeue nyipunie itre keme me thin, epuni kö a xatuane la itre nekö i epun troa xome la huliwa ne cainöj ngöne la drai ka pexej? Tro la trenge ewekë i epun memine la tulu ka lolo i epun a xatua nyudren troa amë panëne la Baselaia. (Mat. 6:33) Kola mekune hmaca hnei Ray, ketre trejine ka xome la huliwa ne pionie thupene hi la kola ase lo itre ini ka tru i angeic, ka hape: “Hnene pala hi la thineng hna mekune laka, ame la aqane mele ka lolo, tre, eje a xulu qa ngöne la huliwa ne pionie.” Loi e tro mina fe la nöjei atrene la ekalesia a ithuecatre troa xome la huliwa ne pionie, hnene la trenge ewekë me ixatua. Kola qaja hnei Jose qaa Sepania, ka hape: “Hnene pala hi la ekalesia i eni hna goeëne la huliwa ne pionie ceitu memine la huliwa ka sisitria catr thatraqane la itre thöth. Hnene la aqane qaja aloine angatr la huliwa ne pionie me wanga atrune ej, memine fe la ixatua i angatr, hna aijijë ni troa xome la huliwa cili.”
6. Nemene la nyine tro sa kuca, maine thaa ajane kö së kö enehila troa pionie?
6 Elë Hune Jë La Itre Itupath: Ngo nemene la nyine troa kuca, maine epuni a qaja, ka hape, ‘Thaa ajane kö ni troa pionie.’ Maine celë hi la aqane ujë i epun ngöne lo xötrei, haawe, fe amamane jë la aliene hni epuni koi Iehova ngöne la thith, nge qaja jë koi Nyidrë, ka hape, ‘Thaa xecie hnyawa kö e kuhu hning, laka, thatraqai eni la huliwa ne pionie, ngo ame la ajang, tre, ene la troa kuca la itre ewekë ka amadrinë Cilie.’ (Sal. 62:8; Ite edomë 23:26) Thupene lai, thele jë la ixatua i Nyidrë jëne la Wesi Ula me organizasio i Nyidrë. Nyimutre la itre pionie lapaa ka “deme” la huliwa ne pionie hnene la hna pane pionie ka ixatua; nge hnene la itre manathithi hnei angatre hna kapa hna uku angatr troa cainöj ngöne la drai ka pexej.—Sal. 34:8.
7. Tune kaa la aqane tro epuni a cile kowe la ewekë hnei epuni hna lueluën, ene laka thaa ijiji epuni kö troa eatrëne la 70 lao hawa ngöne la treu?
7 Nemene la nyine tro epuni a kuca, maine epuni a luelue laka, thaa ijiji epuni kö elanyi troa eatrëne la 70 lao hawa ngöne la treu? Tune kaa matre troa pane ithanatane lai memine la itre pionie ka hane melëne fe la itre jole ka eje thei epun? (Ite edomë 15:22) Thupene lai, fejane jë ngöne pepa la itre porogaram ka ihmeku hnyawa nge ka ijije koi epun. Maine jë tro epuni a öhne laka, thaa ka jole kö troa eatrëne la itre hawa hna amekötin, ke, hnei epuni hna nyipiewekëne lo itre ijine hna amë ekö kowe la itre huliwa ka gufa, thatraqane pena ha la huliwa ne cainöj.—Efe. 5:15, 16.
8. Pine nemene matre nyipi ewekë tro pala hi sa waipengöne hmaca la mele së?
8 Waipengöne Hmaca Jë La Mele i Epun: Kola saze e itre xaa ijin la itre aqane mele së. Loi e tro pala hi sa waipengöne hmaca la mele së. Drei la ketre ceitun, hapeu easenyi jë hë tro epuni a mano hna huliwa i maseta? Kola qaja hnei Randy ketre trejine ka canga xomi reteret, ka hape: “Hnene la mekune cili hna aijijë ni me föi eni troa xome la huliwa ne pionie lapaa, nge ketre, hna aijijë nyiho fe troa nue la nöje i nyiho me tro kowe la ketre götrane gaa aja ka cainöj. Nyimutre la itre manathithi hnenge hna kapa qa ngöne la hna xome la mekune cili, ngo atraqatre kö la manathithi celë, ene la troa hetre mekuthethewe ka loi.”
9. Nemene la nyine troa wanga atrune hnene la itre trefën?
9 Hetrenyi la itre xaa trefën ka wanga atrehmekune thupene la hnei angatre hna waipengöne la mele i angatr, laka, thaa nyipi ewekë kö tro nyidroti asë a huliwa i maseta ngöne la drai ka pexej. Nyipici laka kola ukune la itre atrene la hnepe lapa troa ahmaloeëne la mele i angatr, ngo thaa ewekë ka hmaloi kö. Kola qaja hnei John göne la föi angeic ka nuetrije la huliwa i eahlo matre troa catre cainöj, ka hape: “Pëkö ketre madrine ka tru koi ni, ene la troa atre laka, kola kuca o drai la huliwa i Iehova hnene la föi eni.”
10. Nemene la ka upe la itre Keresiano troa wanga atrune la huliwa ne pionie?
10 Ketre Hatrene La Ihnim Me Lapaun: Hnei Iehova hna kuca matre tro sa xome la huliwa ne cainöj, ke, celë hi huliwa ka nyipi ewekë catre lai. Easenyi hë matre lepe apaatrene pi la fene ka ngazo celë, nge tro pe hi a mele la itre atr ka hëne la atresiwa i Iehova. (Rom. 10:13) Tro la ejuine la ihnimi së me hni ne ole së kowe la itre ewekë hnei Nyidrëti hna kuca koi së, a uku së troa drengethenge la hna amekötine hnene la Hupuna i Nyidrë, ene la troa catre cainöj. (Mat. 28:19, 20; 1 Ioane 5:3) Ketre, maine easa lapaune laka, easa mele ngöne la itre drai tixenuë, haawe, tro ha upi së troa kuca la hne së hna atrein matre troa cainöj e ijine pala kö, ngo thaa tro pi kö sa lö hnine menune la itre huliwa ne la fene celë.—1 Kor. 7:29-31.
11. Maine ketre atr a qaja koi së, ka hape, tro së elanyi a ketre pionie ka lolo, tune kaa la aqane tro sa goeëne lai?
11 Ame la troa pionie lapaa, tre, thaa ene hmekuje kö la troa eatrëne la itre hawa hna amekötine hnene la organizasio; ngo kolo mina fe a amamane laka, ase hë së sa xepu koi Akötresie. Haawe, maine tro la ketre atr a qaja koi epuni, ka hape, tro epuni elanyi a ketre pionie ka lolo, tre, kapa ju la mekune cili ceitu me ketre mekune ka lolo. Nge epi tro epuni a wanga atrune ngöne la thith, ene la troa ce huliwa memine la itre atr ka xome la huliwa i Akötresie cememine la madrin.
[Iatr ne la götran 4]
Hapeue nyipunie itre keme me thin, epuni kö a xatuane la itre nekö i epun troa xome la huliwa ne cainöj ngöne la drai ka pexej?
[Iatr ne la götran 5]
Hnei Iehova hna kuca matre ame la huliwa ka sisitria nyine tro sa xom, easë isa ala caas, tre, ene la huliwa ne cainöj.