Enehila Hi La Ijine Troa Cainöj!
1. Pine nemen matre enehila hi la ijine troa cainöj?
1 “Qouju e Akötesie, me hamë nyidëti la atrun.” Fene la musi ne la itre angela, kola tro fë la maca celë kowe la “nöjei nöj’ asëjëihë, me nöjei tribu, me ite qene hlapa, me nöjei ate.” Pine nemen? “Ke traqa ha la ijine hnyingëne hnei [Akötresie].” Easë enehila a mele ngöne la “ijine hnyingën,” hna troa nyipun hnene la kola apaatren la fene celë. Nyipi ewekë tro la itre atr a thili “koi Nyidrë Ate xupe la hnengödrai, me fen, me hnagejë me itre timi ka qeqe.” Pëkö ketre huliwa hna troa kuca enehila ka nyipi ewekë nge nyine troa canga kuca, ka tune la troa cainöjëne la “maca ka loi ka tha ase palua kö.” Nyipici, enehila hi la ijine troa cainöj!—Hna ama. 14:6, 7.
2. Tune kaa la aqane amaman hnene la itre hlue Iehova laka, angatr a atrehmekune la enyipiewekën la itre drai enehila?
2 Ngöne lo treen lao macatre ka ase hë, kösë 12 miliar lao hawa ne cainöjën la Baselaia me inine la itre atr hnene la itre hlue i Iehova. Ala nyimu la itre ka saze la mele i angatr matre troa catre hane menue ngöne la götrane la ua. (Mat. 9:37, 38) Matre ame ngöne lo macatre hnapan, kösë 850 000 lao trejine ka pionie. Ame koi itre pionie lapaa, tre, angatr a troa kuca la 70 lao hawa ne cainöj ngöne la nöjei treu. Ame itre pionie ka ixatua, tre, 50.
3. Nemene la itre hna saze hnene la itre ka cainöj matre troa hane pionie?
3 Aqane Troa Pionie: Atrehmekune hë la itre pionie laka, “xoxopate pe hi la ijin,” angatr a catre ahmaloeën la mele i angatr. (1 Kor. 7:29, 31) Angatr a thele troa hnöth la aqane troa itö, matre nango co ju hi la traeme ne troa huliwa i maseta. Matre itre xan a thele uma ka co. Itre xan a nango inue memine la itre hna hetreny ka thaa nyipi ewekë kö. (Mat. 6:19-21) Ame itre xaa ijin, loi e tro fe a hnöth la itre sipu aja. Kola catre thel troa kuca tune lai, hnene laka, hetre ajane troa wanga atrun me tru hnei traem ne troa cainöj. (Ef. 5:15, 16) Qa ngöne la hnei angatr hna catr, me nue la mele i angatr, me mejiune me thithi koi Iehova, haawe, nyimutre la itre trejin ka atrein troa kuca la ketre porogaram ka lolo ka aijijë angatr troa pionie.
4. Nemene la itre jëne ka loi ka troa xatua nyipunie troa huliwa göi troa pionie?
4 Ijije kö tro epuni a hane pionie? Hnyingëne jë kowe la itre ka pionie hë la aqane kuca i angatr. Ce cainöje trootro jë me angatr, me hane madrine tui angatr. Xome jë la itre mekun hnine la itre itus ka qeje huliwa ne pionie. Eköthe jë la itre hnei epuni hna troa kuca ka loi, nyine jëne troa eatrën elanyi la huliwa ne pionie. Maine hetrenyi la itre ewekë ka sewe epuni troa hane pionie, xëwe fë jë itre ej koi Iehova jëne la thith me sipo Nyidrë troa xatua epun.—Ite edomë 16:3.
5. Tune kaa la aqane xatua së troa atreine cainöj, hnene la hna pionie?
5 Manathith Me Madrin: Kola tru trootro la madrine së la easë a pionie, ke easë a maca trootro ngöne la aqane tro sa xome la Wesi Ula i Akötresie. Önine la ketre thöth jajinyi ka pionie: “Ka hetre eloine catr la troa fe hnyawa la Wesi Ula i Akötresie ka nyipici. Ame la easë a pionie, easë pala hi a fe Tusi Hmitrötr. Atreine hë ni enehila troa xome la itre xötr ka ijij thatraqane la itre atr hnenge hna cainöje kow ngöne itre hnalapa trootro.”—2 Tim. 2:15.
6. Nemene la ini hna kapa qa ngöne la hna pionie?
6 Nyimutre fe la itre hne së hna atreine kuca ngöne la mele së hnene la hna pionie. Kola xatuan la itre thöth troa huliwane hnyawa la traem, me mani, me atreine ce mel. Hnene la hna pionie, matre nyimutre la itre ka maca ngöne la ua troa waiemekötine hnyawa la mel. (Efe. 4:13) Ketre, thaa sihngödri kö la ime i Iehova kowe la itre pionie.—Ite hu 11:21; Fil. 4:11-13.
7. Troa xatua së tune kaa hnene la hna pionie, troa easenyi catr koi Iehova?
7 Ngo ame kö la ketre thangane ka sisitria qa ngöne la hna pionie, tre, kola xatua së troa easenyi catr koi Iehova. Kola xatua së ngöne la itre itupath. Hna qaja hnene la ketre sör ka cile kowe itre jole ka tru ka hape: “Jëne la hnenge hna pionie, easenyi catre hë ni koi Iehova, nge celë hi ka xatua ni troa cile kowe la nöjei jol.” Öni eahlo fe: “Eni a madrine fe laka ame la eni a föe hmae, tre, hnenge hna nyi hlue i Iehova drai ka pexej. Hna aijijë ni troa kuca la itre ewekë, ngo thaa mekune kö ni troa atreine hane kuca.” (Ite hu. 20:35) Epi tro fe sa hane thele troa kapa la itre manathithi cili, ngöne la easë a kuca asë la hne së hna atrein troa xome la huliwa ne iamele, ene la troa cainöj.—Ite edomë 10:22.