Ijije Kö Tro Epuni a Lö Jëne La “Qëhnelö Ka Ishaisha, Me Hete Huliwan”?
1. Nemene la “qëhnelö ka ishaisha me hete huliwan” hna fe koi së?
1 Ame la kola fe koi Paulo aposetolo la “qëhnelö ka ishaisha,” nyidrëti a canga xome ju la hnëqa ka lolo hna aijijë nyidrëti troa kuca, ene la troa catre sajuëne la itre aja ne la Baselaia ngacama nyimutre la itre ka icilekeu me nyidrë. (1 Kor. 16:9) Ame enehila, hetrenyi la 642 000 la etrune la itretre cainöj e cailo fen ka lö jëne la qëhnelö ka ishaisha, ene la troa hane aijijë angatr troa hane pionie lapaa.
2. Pine nemen matre ka loi troa waipengöne e itre xaa ijine la mele së?
2 Kola Saze La Itre Aqane Mel: Ngacama ame enehila, tre, maine jë hna nyifegone hi la hne së hna atreine troa kuca pine la itre jole ka eje the së, ngo ame pe kola saze la itre aqane mele së. Qa ngöne lai, ka loi e tro pala hi sa isa goeëne la itre aqane mele së, ngo thaa tro kö a treqene troa paatre asë la itre jol. (Ate Cai. 11:4) Epuni la ketre thöth ka easenyi troa kapa la ketre pepa qa ngöne la itre hna ini ka tru? Hapeu, easenyi hmaca ha troa nyiqaane ini la itre nekö i epun? Tune kaa, easenyi tro epuni a fenesi hna huliwa i maseta? Maine jë ame la itre ewekë celë ka saze ngöne la mele i epun, tre, itre ej a aijijë epuni troa hane pionie lapaa, pine laka tru la traem. Hnene la ketre trejine föe ka wezipo ekö hna pane hane mekune troa pionie nge 89 hë lao macatre i eahlo. Pine nemen? Pine laka, caa macatre ne thaa eahlo kö a pane lapa pital, ene pe hnei eahlo hna mekune ka hape, egöcatre hi eahlo troa pane hane pionie.
3. Tune kaa la aqane saze la itre xan la mele i angatr matre troa hane pionie lapaa?
3 Drei la pengö i Paulo, hnei nyidrë hna mekune troa pane wange la itre trejin me nyidrë e Korinito. Ngo hnei nyidrëti hna eköth la itre hnei nyidrëti hna mekune troa kuca thatraqane la maca ka loi. Nyimutre la itre ka pionie lapaa enehila ka saze la itre aqane mele i angatr matre troa hane pionie. Ame la itre xan, tre, hnei angatr hna ahmaloeëne la mele i angatr, ene pe angatr a huliwa ngöne la sine la drai matre tro hi a nyithupene lo itre hnei angeic hna ajan ka nyipi ewekë kowe la mele i angeic. Angatr a madrine hnyawa la hnëqa i angatr, ene la troa cainöj. (1 Tim. 6:6-8) Ame itre xaa ka faipoipo, tre, hnei angatr hna saze la mele i angatr, ene pe trahmanyi pë hë la ka huliwa, nge kola aijijë föe troa hane pionie.
4. Nemene la nyine tro sa kuca maine thaa xecie hnyawa kö koi së tro sa hane eatrëne la etrune la hawa hna amekötin?
4 The canga trije kö së la mekun troa pionie, ke easa xouene wanga thaa eatrëne ju së la etrune la itre hawa hna amekötin. Lue neköi hawa hi nyine troa kuca ngöne la drai. Maine thaa xecie hnyawa kö koi epuni laka, tro epuni a eatrëne lai, tupathe jë troa pane pionie ka ixatua ngöne la caas maine lue treu, ngo göi troa thele troa eatrëne elanyi la 70 lao hawa. Tro ha aijijë epuni troa kapa la itre manathithi qa ngöne la hna hane pionie. (Sal. 34:8) Porotrike jë memine la itre ka majemine xome la huliwa ne pionie. Maine jë ceitune hi la itre jole hnei angatr hna cile kow, memine la itre jol hnei epuni hna qëmeke kow. (Ite edomë 15:22) Sipo Iehova jë troa amanathithine la trenge catre hnei epuni hna hane xome matre troa catre cainöj.—1 Ioane 5:14.
5. Pine nemen matre ketre mekune ka nyipi ewekë catr nyine troa eatrën la troa pionie lapaa?
5 Ketre Mekun Nyine Eatrën Ka Nyipi Ewekë Catr: Maine tro fe sa hane pionie lapaa, haawe, tro hë së a kapa la itre manathithi ka nyimutre. Kola aijijë së troa melëne la manathithi ka tru hne së hna kapa qa ngöne la hne së hna ham atrun. (Ite hu. 20:35) Troa akökötrene hnyawa fe me maca la aqane tro sa thawa la Wesi Ula i Akötresie ka nyipici hnene la hne së hna pionie. (2 Tim. 2:15) Jëne tro mina fe së lai a öhne la iwanakoime i Iehova e xatua së. (Ite hu. 11:21; Fil. 4:11-13) Tro fe la huliwa ne pionie a xatua epuni troa eëne la itre thiina ka lolo ngöne la götrane la ua, tune la troa xomihni ahoeany, nge kola aijijë së fe troa easenyi catre koi Iehova. (Iako. 4:8) Ijije kö tro epuni a hane xome la qëhnelö matre troa hane pionie lapaa?