Hapeue Ijije Kö Tro Nyipunieti a Hane Xome Enehila La Huliwa Ne Pionie?
1 Kola amekunë së hnene la Annuaire 1999, ka hape, easë pala kö ngöne la “drai ne mel” i Iehova. (2 Kor. 6:2) Ngo easenyi pala ha matre umuthe pi la drai ne iamele cili. Thupene lai, tro pena ha nyiqaane la “drai ne amekötin.” (2 Pet. 2:9) Iehova pala hi a pane nue ijine troa amelene la itre atr, nge kola mama qa ngöne laka, kola kökötre catre pala hi la etrune la itre atr ka kepe Nyidrë!
2 Haawe, ame la ajane la itre hlue i Iehova asë, ke, ene la troa canga thele la itre atr ka hni ka menyik, e ijine petre kö. Ame kowe la itre trejine ka nyimutre, ke, kolo lai a hape, loi e troa xome la huliwa ne pionie. Hapeu, hetrenyi kö la ajane the së troa xome la huliwa ne pionie enehila? Pine nemene matre, nyipi ewekë tro së a sa la hnyinge celë?
3 Amamane Jë La Ole Së: Tune la hna qaja hë ngöne la Huliwa ne Baselaia ne januare 1999, hna nango acone hë la itre hawa hna amekötine troa kuca hnene la itre pionie lapa me itre pionie ka ixatua. Haawe, ame koi itre pionie lapa, ke 70 lao hawa ne tro angatre a cainöje trootro ngöne la nöjei treu, matre kösë 840 asë hi lao hawa hna troa kuca ngöne la macatre. Ame koi itre pionie ka ixatua, ke tro angatre a thele la 50 lao hawa ne cainöje trootro ngöne la treu. Hanawange la itre xaa hnepe aqane amamane itre xane la ole i angatr, ngöne laka, hetre thangane ka loi la itre hna amekötine cili:
“Drei la ketre ahnahna ka sisitria koi së qaathene la Tretretro së ekoho hnengödrai!”
“Thatreine kö troa qaja la etrune la madrin, memine la ihnim, memine la ole kowe la itre hna amekötine cili!”
“Qa ngöne la ewekë cili, hmaloi hë troa eatrëne la itre programme hne së hna hnëkën!”
“Eahuni a sipone jëne la thithi matre troa nyimu trejine ka xome enehila la huliwa ne pionie, me kapa la itre manathithi qa ngöne laka, hna thele troa akökötrene la aqane nyihlue i Iehova.”
4 Pine laka, easenyi catre hë matre umuthe pi la drai ne iamele i Akötresie, haawe, aja i Nyidrëti tro la itre hlue i Nyidrëti a catre cainöje ngöne la itre hnepe ijine tixenuë pe. Troa kökötre catre la aqane mexemi ne la maca cili (1) qa ngöne laka, kola tru trootro la etrune la itre ka cainöjëne la maca ne Baselaia (2) nge qa ngöne la kola thele hne së isa ala caasi troa kuca asë la hne së hna atreine ngöne la huliwa ne cainöje trootro. Iehova la “ka acian,” nge nyimu aqane nyi thangane Nyidrëti la hni ne ajane la nöjei atr asë ka kapa la iamele.—1 Kor. 3:6, 7; Sal. 110:3.
5 Wange Kö Ke Kapa Gufane Jë La Ihnimi Gufa i Akötresie: Hnei Paulo hna hajine la itre Keresiano göne la drai ne iamele i Iehova, öni nyidrë: “Eëhuni angete ce huliwa me nyidë [Iehova], a iele nyipunie wanga kapa gufane hnei nyipunie la ihnimi gufa i Akötesie.” Thaa tro pi kö së a “kapa gufane la ihnimi gufa i Akötesie,” maine easë a öhne laka, “enehila la ijine kapa” nge ijine troa huliwa me thele la nöjei aqane troa amelene la itre xaa atr. (2 Kor. 6:1, 2) Nyipi ewekë la itre trenge ewekë i Paulo, thatraqane la hnedrai së enehila. Atraqatre la ihnimi ne la itre Keresiano koi Iehova, matre angatre a wangatrune la hnëqa ka lolo, ene la troa kuca la hnei angatre hna atreine ngöne la huliwa ne cainöj, huliwa hna upi angatre troa kuca hnei Akötresie. Ijije kö tro epuni a hane xome la huliwa ne pionie lapa enehila?
6 Celë Hi Ketre Aja Ka Ijije Troa Eatrëne: Aja së asë hi troa elë la etrune la itre pionie lapa ngöne la 1 Semitrepa, e Kaledonia, me Tas, me Walis me Futuna; maine ijije troa 60 lao pionie lapa, maine troa sasaithe lai. Easë a mejiune laka, ketre mekune lai ka ijije hi troa eatrëne ej. Pine nemene matre atreine tro sa qaja tune lai? Ngöne la treu Maac 1997, hetrenyi la 249 lao trejine trahmanyi me föe ka pionie ka ixatua e Kaledonia nge 59 e Tas. Ngöne lo treu Eiperem 1998, 203 e Kaledonia nge 38 e Tas. Nge ngöne la treu januare 99, kola e la 9 lao pionie ka ixatua e Walis me Futuna. Ala nyimu catre la itre ka kuca la 60 lao hawa—kösë 10 pe hi lao hawa matre weje pi lo itre hawa hna amekötine enehila thatraqane la pionie lapa! Maine tro hi la 13 lao trejine ka pionie ka ixatua enehila a xome la huliwa ne pionie lapa, qëmekene la pune la macatre celë, haawe, atreine hi tro sa nyiqaane la treu semitrepa hnene la 60 maine tru catre pena hune lai lao pionie lapa!
7 Nyipi Ewekë La Ketre Programme: Hapeu, nango jole pala kö koi epuni e troa kuca la 70 lao hawa ngöne la treu? Maine jë troa pane tupathe la 17 lao hawa ngöne la wiik. Xome jë la itre programmes ngöne la götrane thupen, nge tupathe jë troa kuca la programme hna hnëkëne thatraqane la pionie lapa, thenge la hnei epuni hna isa atreine troa kuca. Ame hë la easë kuca la programme hne së hna iën, nyipi ewekë mina fe tro së a ithahnata memine la itre trejine ka pionie hë, matre troa kapa la itre mekune nyine ixatua ngöne la aqane ce xome hnyawa angatre la huliwa ne pionie memine la itre hnëqa i angatr, ngöne la sipu mele i angatr, me ngöne la hnepe lapa. Hnyingëne jë kowe la atre thupëne la sirkoskripsio, la aqane kuca la itre pionie ne la sirkoskripsio, matre troa eatrëne la huliwa ne cainöje i angatre ngöne la nöjei wiik. Thupene lai, sipo Iehova jë matre tro Nyidrëti a amanathithine la itre mekune hne së hna hnëkëne matre troa pionie.—Ite edomë 16:3.
8 Loi e Troa Eje La Aja Thene La Hnepe Lapa: Hapeu, hnei epuni kö hna kuca matre troa ajane troa pionie hnene la itre atrene la hnepe lapa i epun? Maine jë nyipi ewekë tro epuni a pane ce ithahnatane memine la hnepe lapa i epuni la aqane troa hnëkë hnyawa me ce huliwa, memine la caas, maine lue atrene la hnepe lapa ka ijije troa pionie. Eje hi laka, ame itre xane ke, tro angatre a öhne laka, thaa nyipi ijiji angatre kö troa eatrëne hnyawa enehila la huliwa ne pionie lapa. Haawe, wange ju matre troa eatrëne la aja cili ngöne la itre macatre ka troa xulu. Qa ngöne lai, nyiqaane hnëkë jë troa huliwa mekune la ketre drai hna axeciën, matre troa hane nyiqaane troa pionie. Maine jë troa anyimua xome la huliwa ne pionie ka ixatua ngöne la nöjei treu ne la macatre, göi troa xome thupene la huliwa ne pionie lapa.
9 Isa pengöne catre la itre jole ka eje ngöne la mele ne la itre pionie lapa ne Kaledonia me Tas, laka, ala 48 asë angatr. Thaa ka egöcatre asë kö angatr, nge ala nyimu thei angatre la itre ka trene nekönatr, nge hetre itre ewekë nyine troa nyithupen. Kola e la 24 lao pionie ka tru macatrene hë, kösë 50 nge sin lao macatre, nge luetre ka 65 hë lao macatre. Ala 16 angatre itre thöth, 3 ka 25 lao macatren. Hetrenyi la 39 lao trejine föe nge 9 lao trahmany; ala nyimu la itre trene hnepe lapa, nge itre trene hnëqa e hnine la ekalesia. Angatre asë hi a “anyipi ewekëne la nöjei ijin” thatraqane la huliwa ne pionie; kolo fe lai a hape, thaa tro kö a thele ejolene la aqane mel, nge loi e troa nyipine ju hi la itre ewekë ka sisitria thatraqane la mel.—Kol. 4:5.
10 Aja Së Kö Troa Hane Ahmaloeëne La Aqane Mele Së? Ijije fe tro së a hane xome la huliwa ne pionie, e hne së hna ahmaloeëne la mele së. Hapeu, ceitune kö la mele së memine la ketre uma ka nyimu hnahagene menu pala ha, nge ketre tru menu pala ha hnei ewekë e hnin, matre kösë tru catre la jol, pine laka, kola xome la traeme së, kola thele manie troa nyithupene itre ej, nge kola huliwa thatraqane itre ej? Maine aqane mele së hi lai, loi e tro së a pane thele troa atreine ahmaloeëne la aqane mele së, matre ijije tro së a hane pionie. Hapeu, ijije kö tro së a nango wange matre troa acone la itre hawa ne huliwa koi maseta? Ijije kö tro së a hane xome la itre hawa hne së hna majemine xome thatraqane la itre huliwa ka thaa nyipi ewekë menu kö, maine troa atreine tuluthe la etrune la traeme ne pane mano me kuca la itre hnepe nyine madrin?
11 Kola xatua së hnei Tusi Hmitrötre ngöne 1 Timoteo 6:8, ka hape: “E hetrenyi hë shë la xeni me ixete, ea mejihnine ju hë lai.” Ame la troa mejihnin, celë hi ketre aqane mele lai ka nyipi ewekë catr, maine easë a ajane troa kuca la hne së hna atreine ngöne la huliwa i Iehova, nge jëne tro fe së lai a ahmaloeëne la mele së matre troa amë panëne pala hi la itre aja ngöne la götrane la ua. (Mat. 6:22, 33) Nyimutre la itre mekune nyine ixatua hna hamëne ngöne la Annuaire götrane 104; kola amamane la kepine matre hetrenyi thene la itre trejine qaa Zapo la hni ne ajane troa pionie. Hanawange la ketre kepin: “Nyipici laka, thaa ka tru menu kö la uma ne la itretre Zapo, matre kösë thaa ka tru ejolene kö e troa nyihnyawan, nge kola mama hnyawa laka, hmaloi catre la aqane mele i angatr.” Hapeu, thaa celë kö lai sipu aliene la hna qaja ngöne 1 Timoteo 6:8?
12 Ame ngöne la fene hnengödrai asë kolo pala hi a thele troa catre cainöjëne la maca ka loi hnene la itretre nyihluei Akötresie, qëmekene troa umuthe la drai ne iamele i Iehova. Celë hi matre, atraqatre la madrine së, pine laka, ame lo macatre ka ase hë ke, 168 (141 e Kaledonia, 21 e Tas nge 6 e Walis me Futuna) lao itre trejine ka xome la huliwa ne pionie ngöne la itre xaa treu. Hapeu, ijije kö tro së a hane eköthe la mele së matre troa hane ce pionie me angatr? Kola hë së asë troa wange hnyawa la itre aqane mele së ngöne la thith, matre tro së a hane sa la hnyinge celë, hna hape: “Hapeu, ijije kö tro nyipunieti a hane xome enehila la huliwa ne pionie?”
[Iatr ne la götran 3]
KOLA AJA: 60 LAO PIONIE LAPA!