Hnei Epuni Kö Hna Hane Xome Ekö La Huliwa Ne Pionie Lapaa?
1. Nemene la manathithi ka tru hna kapa hnene la itre trejine ka nyimutre, ngo nemene la ewekë ka traqa kowe la itre xan?
1 Ame ngöne la itre macatre, traqa koi itre thauzane la itre trejine ka “ini me cainöj” ngöne la drai ka pexej; ketre manathithi lai ka tru hnei angatre hna xom. (Ite hu. 5:42) Ngo hetrenyi la itre kepin ka isapengön, matre kola nango amë la huliwa ne pionie cili hnene la itre xan. Maine ketre pionie lapaa epuni ekö, hapeu, hnei epuni kö hna waipengöne la mele i epun enehila, me thele maine ijiji epuni hmaca kö troa xome la huliwa cili?
2. Pine nemene matre ka loi e tro la itre ka pionie ekö a waipengöne hmaca la aqane mele i angatr enehila?
2 Kola Saze La Itre Aqane Mele Së: Maine jë paatre hë la jole ka sewe epuni ekö troa sisedrëne la huliwa ne pionie. Drei la ketre ceitun, maine hnei epuni hna pane amë la huliwa cili pine laka thaa ijiji epuni kö troa eatrëne la 90 lao hawa ngöne la treu, haawe, ijiji epuni hmaca kö troa xome la huliwa cili, ke, hna amekötine hë enehila koi 70 lao hawa? Hapeu, qaane lo epuni a nue la huliwa ne pionie, hmaloi hë la itre hnëqa i epun ngöne la hna huliwa i maseta maine pena e hnine la fami? Hnene la ketre trejine föe hna pane amë la huliwa ne pionie, pine laka hna tithi eahlo hnei mec, ngo hnei eahlo hmaca kö hna xome la huliwa cili ngöne lo eahlo a 89 lao macatre. Kola tro la ca macatre, nge thaa lö pital pi kö eahlo, nge ketre, drenge fe hi eahlo laka, ijije hi la ngönetrei eahlo troa xome hmaca la huliwa ne pionie!
3. Tune kaa la aqane troa ce huliwa la itre atrene la ketre fami, matre troa xatuane la ketre e angatr troa pionie?
3 Maine jë thaa ketre pionie kö epun, ngo ame pe hetrenyi e hnine la fami epun la ketre trejin ka nue la huliwa cili matre troa thupëne la ketre atrene la fami epun, tune la ketre keme maine thin ka qatre hë. (1 Tim. 5:4, 8) Maine eje hi, haawe, tune kaa fe epun me itre xaa atrene la fami epun, ijije kö tro epuni a xatua angeic? Tune kaa matre troa ce ithanatane la itre jole cili? (Ite edomë 15:22) Ame la kola ce huliwa la itre atrene la fami matre troa aijijëne la ketre e angatr troa xome la huliwa ne pionie, tre, celë hi ketre ewekë ka sisitria catr.
4. Nemene la nyine tro epuni a kuca, maine thaa ijiji epuni kö enehila troa pionie?
4 Thaa tro pi kö epuni a kucakuca hnene laka thaa ijiji epuni kö enehila troa xome hmaca la huliwa ne pionie. Kola amadrinë Iehova hnene la aja atraqatr ka eje thei epun troa xome hmaca la huliwa cili. (2 Kor. 8:12) Thele jë ngöne la epuni a cainöj enehila troa huliwane hnyawa la itre atrein hnei epuni hna akökötrene tune la hna kuca hnene la ketre pionie. Catre jë thithi fë la aja i epuni cili, nge hmekëne kö la itre ijine ka sisitria matre troa sazene la aqane mele i epun. (1 Ioane 5:14) Maine jë, ame e ketre ijin, tro Iehova a thawa koi epuni la “qëhnelö ka ishaisha, me hete huliwan,” me hane aijijë epuni hmaca troa melëne la itre manathithi ka tru qa ngöne la hna pionie lapaa!—1 Kor. 16:9.