Nyipi Ewekë Koi Së La Troa Inine Pala Hi La Itre Atr
1 Qëmekene tro Iesu a elë hnengödraieë, hnei nyidrëti hna upe la itretre drei nyidrë troa “inine la nöjei nöj’asëjëihë.” Nyidrëti a ajane tro angatre a catre troa cainöje me inine la itre atr, nge loi e troa haöthe la fene hnengödrai asë hnene la maca hnei angatre hna troa tro fë. (Mat. 28:19, 20; Ite Huliwa 1:8) Hapeue la hnëqa cili, ceitune eje me ketre ehnefe ka hace nyine troa thu? Ohe, thaa celë kö la mekune i Ioane lai. Hanawange la hnei nyidrëti hna cinyihane thupene la 65 lao macatre ne cainöje nyidrë; öni nyidrë: “Ke dei lola aja i Akötesie, laka, eësha denge thenge la ite wathebo i nyidë; nge tha hace kö la ite wathebo i nyidë.”—1 Ioane 5:3.
2 Kola amamane hnei Tusi Hmitrötre la aqane huliwa ne la itre Keresiano ne la hneijine i Iesu, laka, hnei angatre hna thele troa kuca hnyawa la hnëqa i angatr, ene la troa inine la itre atr matre tro angatre a hane itretre drei Iesu Keriso. (2 Tim. 4:1, 2) Thaa hnei angatre kö hna xome la hnëqa cili ceitune me ketre qa, ngo angatre pe a catre kuca la huliwa cili pine laka, hetrenyi thei angatre la ihnimi me hni ka ajane troa atrunyi Akötresie me tro fë la maca ne iamele kowe la itre xaa atr. (Ite Huliwa 13:47-49) Canga kökötre nyimenyime hi la ekalesia i keresiano ne la hneijine i Iesu, pine laka, ame asë hi lo itre atr ka hnyipi xome la bapataiso, angatre a nyixane lo itretre pane drei Iesu me hane inine pena ha la itre xaa atr.—Ite Huliwa 5:14; 6:7; 16:5.
3 Kola Kökötre Nyimenyime La Huliwa Ne Ini: Atraqatre catre kö la huliwa ne ini hna kuca ngöne la hneijine së! Ame enehila, kola e la itre milio la itre atr ka kapa la maca ka loi me trongëne ej. (Luka 8:15) Nge pine laka, kola saqe catre la ijine troa apaatrene la fene celë, haawe, kola hamë së hnene la “hlue ka nyipici me ka inamacan” la itre jiane huliwa ka aijijëne la itre atr ka hni ka menyike troa canga kapa la nyipici.—Mat. 24:45.
4 Ame ngöne lo macatre 1995, hne së hë hna kapa lo itus Atrehmekune Ka Eatrongë Nyipunie Kowe La Mele Ka Pë Pun, nge thupene jë hi la itusi cili, kola sisedrëne eje ngöne lo 1996, hnene la boroshüre hna hape, Nemene La Hnei Akötresieti Hna Thele The Së? Kola qaja la itus Atrehemekune hnene la zonal, La Tour de Garde, ne 15 januare 1996, götrane 14 ka hape: “Atreine hi troa asaqene la ini hna troa hamëne jëne la itusi celë ka 192 lao götran, nge ijije hi troa kapa hnene la itre atr ‘ka hni ka ajane troa mele epine palua’ la trotrohnine qa hnine la ini cili ka troa aijijë angatre ngöne la kola afenesine la itus, troa hane nue la mele i angatre troa nyihluei Iehova, me xome la bapataiso.”—Ite Huliwa 13:48.
5 Hetrenyi lo sinecetrone la Huliwa ne Baselaia ne juun 1996, ame la taan ke, hna hape, “Aqane Troa Inine La Itre Atre Jëne La Itus Atrehmekune,” eje a qaja la ewekë hne së hna thele troa traqa kow, kola hape: “Tro ha kökötre hnyawa la hnainine, e hna aeatrëne pala hi la itre hna isa pui ngöne la nöjei wiik, hnene la hnainine memine la ka ini.” Hna qaja fe ka hape: “Tro ha mama ngöne la ijine kola afenesine hnene la hnainine la itus Atrehmekune, laka, nyipici me jui la ajane i angeice troa nyi hlue i Akötresie.” Hna qaja fe ngöne la itre mekune hna eköhagen, ngöne la Huliwa ne Baselaia ne okotropa 1996, ka hape: “Kola mekune laka, ngöne hi la itre hnepe ijine ka xoxopatr, ijije hi troa xatuane hnene la ketre trejine ka hamë ini, la ketre atr ka hni ka menyik, matre troa hane kapa la atrehmekune ka aijijë angeice troa ketre mekune troa nyihlue i Iehova.”
6 Hetre Thangane Catre La Itus Atrehmekune: Ame ngöne la ijine kola xome la bapataiso hnene la ketre föe hmae, hnei nyidroti hna qaja la mekune ka eje thei nyidro, göne la itus, Atrehmekun. Hetre madrine i nyidroti troa etid ngöne la itus Vivre éternellement. Ngo traqa pi hi la itus Atrehmekune, ene pe amë ju hi nyidro lo lai hnapan, nge kola nyiqaane ju pena ngöne la itusi ka hnyipixe. Haawe, canga öhne ju hi la hnainine laka, kola upi angeice troa ketre amamane la aja i angeic; ene pe qane ju hi lai, hmalahnine hë nyidroti troa canga kökötre ngöne la nyipici. Ame hë enehila ketre trejine fe hë eahlo me easë, öni eahlo ka hape: “Hna xatua ni hnene la itus Vivre éternellement, troa hnimi Iehova, ngo ame la itus Atrehmekune, eje a ithuecatre koi ni troa axeciëne la ajan, ene la troa nyihluei Nyidrë.”
7 Tro fe sa ce wange la aqane canga kapa la ketre föe la nyipici. Thupene la hnaaluene etidi nyidro, haawe, hnei nyidroti hna hane sine la ketre icasikeu ngöne la uma ne Baselaia, ngo ngöne pe lo ijine iwai ne la atre thupëne la sirkoskripsio. Ame ngöne la wiike cili kola kuca jë la hnaakönine etidi nyidro, nge nyidroti fe hë a qaja kowe la qatre thupe ka hape, nyidroti a ajane troa nue la mele i nyidroti koi Iehova, me sipo troa hane ketre ka cainöj thaa hna bapataisone petre kö. Hna kapa la aja i eahlo hnene la itre qatre thup, nge ame ju fe kö lai wiike thupen, nyidroti fe hë a hane nyiqaane cainöje trootro. Pine laka atraqatre pala ha la ajane i nyidroti troa etid, haawe, nyidroti a sipo jë troa pane nue la huliwa i maseta matre ijije troa akönia etid ngöne la wiik, nge nyimu ijine troa hane cainöje trootro. Ame ngöne la itre xaa ijin, nyidroti a acaa tro kuca la luetre maine köni mekene la itus, ngöne la caa ijine etid. Haawe, nyidroti a trongëne jë la itre hnei nyidroti hna inin, ngöne la nöjei götrane la mele i nyidro; hnei nyidroti hna afenesine la itus Atrehmekune, ngöne la foa lao wiik, me kökötre trootro uti hë la hane xome nyidroti la bapataiso!
8 Hnene la ketre trahmanyi ka faipoipo memine la ketre trejine föe, hna qeje pengöi nyidrë, me qaja ka hape, nyidrëti ekö la “ketre tulu ne trahmanyi ka thaa hane kö hmi.” Ame ngöne la ketre ijin, hnene la ketre trejine trahmanyi hna amamane koi nyidrë la itus Atrehmekune, me thele troa etidi me nyidrë; ngo hna qaja pe koi nyidrë ka hape, atreine hi tro nyidrë a qeje fenesi thupene la pane etid, maine pena e thupen. Ame hnene la trahmanyi hna nangëne la etid, ngacama thaa hane kö nyidrëti ekö ini hnyawa ngöne la kola co, nge pëkö itusi ne hmi hna hane e pena, a 20 hë lao macatre enehila. Nemene hë la thangane la etidi nyidrë, ngöne la itus Atrehmekune? Öni nyidrëti ka hape: “Eni a madrine atraqatre la itusi celë ka ixatua troa qeje pengöne hnyawa la Tusi Hmitrötr, lolo la aqane cinyihane nge hmaloi catre e troa trotrohnin. Pine laka, pëkö ejolene troa trotrohnin, nge thaa hajihaji kö la ithuemacanyi hna hamën, haawe, ame la ajang, loi e canga traqa hmaca pi la etid ka troa xulu. Kola hamëne pala hi thenge la inamacan hnene la ka etidi koi ni, lo itre pengöne aqane troa inine la itre atr, a hna kapa qa thei sasaiatri; eni mina fe a kapa la ixatua qa thene la uati hmitrötre i Iehova, nge thupene la foa lao treu, eni a hane xome ju la bapataiso. Nyipici, atreine hi tro sa xome la hnëqa ka ketre pengöne kö, ene la troa xatuane la itre atr troa trotrohnine la Tusi Hmitrötr, e maine atraqatre la ihnimi së troa inine la itre atr, me catre thele la itre ka hni ka menyike ngöne la hna cainöje trootro, me xome la itus Atrehmekune memine la itre xaa jiane huliwa hna hamëne hnei sasaiatri me tro fë itre eje kowe la itre atr, nge hne së fe hna hane sipo Iehova jëne la thithi troa eatrongë së.” Ngo eje hi laka, itre ceitune la ka ketre pengöne kö, thaa ka kökötre nyimenyime tune asë kö lai itre hne së hna etidi kow.
9 Thaa Ceitu Kö La Isa Aqane Kökötre La Itre Hnainin: Thaa ka sihngödre kö la mekune celë, laka, isa pengöne catre la itre hna atreine kuca hnene la itre hnainine memine la itre ka ini angatr, göi wesi ula i Akötresie. Atreine hi troa kökötre nyimenyime ngöne la götrane la ua, maine tro pena a hmitr. Maine kola kökötre nyimenyime hnene la itre xaa hnainine ngöne hi la itre treu ka xalaith, ngo ame pena ha koi itre xane ke, troa hmitre catr. Hetrenyi la itre ewekë ka troa hetre emenene ngöne la aqane troa kökötre la atr ngöne la ua, ene la ini hnei angeice hna kapa, memine la aqane wange angeice la itre ewekë ngöne la götrane la ua, nge tune mina fe la ejuine la ihnimi angeice koi Iehova. Thaa hnene asë kö la itre atr ka etid, hna inine ngöne la nöjei drai la Tusi Hmitrötr, cememine “la hni ka ajan”, tune lo aqane kuca ekö hnei angetre Berea, matre hane jë fe angatre kapa la nyipici.—Ite Huliwa 17:11, 12.
10 Celë hi matre ngöne la sinecetrone la Huliwa ne Baselaia ne treu eiperem 1998, hna hape, “Loi e Troa Nyimutre Pala Hi La Itre Etid,” kola ixatua ka hape: “Eje hi laka, thaa ceitune kö la aqane kökötrene la nöjei hnainine asë ngöne la atrehmekun. Hetrenyi la itre atr, thaa canga hmala kö la itre hni angatre kowe la xeni ne la ua, matre hmitre catre angatre xome la itre ini hna hamëne koi angatr. Ame itre xan, tru hnei jole i angatr, nge thatreine kö angatre troa nue la ketre hnepe hawa, matre troa ce wange la nyimu paragarafe ngöne la nöjei wiik. Qa ngöne lai, ma loi e troa nyimu etid hna kuca ngöne la caa mekene la itus, nge e thaa ijije pala hi, haawe, troa xome la ca macatre nge hetre munëne matre troa fenesine hnyawa la itus.”
11 Loi e Troa Atreine Waiewekë Ngöne La Kola Inine La Itre Atr: Maine easë a ajane troa afenesine la etidi ne la ketre hnainin, nyipi ewekë troa wange hnyawa la aqane troa xomiujine hnyawa la ini tus, matre troa hamëne la ka ijij, thenge la aqane mele memine la hna atreine trotrohnine hnene la hnainin. Pine laka hna xatua së troa pane nyiqaane la itre etid, ngöne la boroshüre Thele, atreine hi troa xome la luetre maine köni treu ne ini tus, qëmekene troa sisedrëne eje hnene la itus Atrehmekune. Maine tro së a xome la itre ixatua asë hna hamëne ngöne la sinecetrone la Huliwa ne Baselaia ne juun 1996, haawe, troa sikisi lao treu, caa macatre, maine itre xaa treu ju kö ka ijije matre troa afenesine lai itus Atrehmekune. Maine hna nyiqaane hë la itus Atrehmekune, nge kola öhne ka hape, jole kowe la hnainine troa trotrohnine hnyawa la itre ini hna hamën, haawe, pane amë ju lai itus, nge nyiqaane ju la etid ngöne la boroshüre Thele. Nge maine kolo pena a kökötre hnyawa la hnainine ngöne la etidi angeic, loi e troa ini pë hë ngöne la boroshüre Thele, e thupene la hna afenesine la itus; kolo hi lai a aijijëne la hnainine troa wange nyimenyimëne hmaca la itre trepene nyipici qa ngöne la wesi ula i Akötresie. Ngo ngacama canga trotrohnine hi la hnainine la itre ini hnei angeice hna kapa, loi e tro së a thupëne matre thaa tro kö a nyimenyimëne la etid, me thele troa canga afenesine la itus. Nyipi ewekë tro asë hi a hetrenyi hnene la nöjei hnainin, la trepene ka catre thatraqane la ewekë ka hnyipixe, hnei angeice hna lapaune kow hnine la wesi ula i Akötresie.
12 Qa ngöne laka, easenyi catre hë së kowe la pun, nyipi ewekë tro së a thele troa canga xatuane la itre xaa atr troa atre la nyipici. Maine easë pala hi a sipone jëne la thith, matre troa hetrenyi la itre xaa etid, loi e tro mina fe së a thithi fë la itre atr ka nyiqaane inine hë la Tusi Hmitrötre me easë. Haawe, tro ha atraqatre la madrine së troa bapataisone la itre atr “ngöne la nöjei drai asëjëihë uti hë la pune la fene hnengödrai.”—Mat. 28:20.