“Trane Jë La Itre Itine Feja Ne La Baselaia” Thene La Itre Ka Majemine Kapa La Itre Zonal

¹ Hetrenyi lo ketre nyima ngöne la itusi ne nyima lo hna hape, Louons Jehovah par nos chants; ame la taan, ke, hna hape, “Traane Jë La Itre Itine Feja Ne La Baselaia.” Hna nyitrepene eje hnene la ceitune hna hamëne hnei Iesu; nyidrëti aceitunëne la huliwa ne inine la atr memine la troa tra itine feja. (Mat. 13:​4-8, 19-​23) Önine la nyima ka hape: “Ije itine feja hnei epuni hna traan, ka mala ngöne la dro ka lolo/Troa hetre wene ne la huliwa, e hne së hna catre cainöj.” Nemene la aqane tro së a akökötrene la atreine së, ngöne la huliwa ne cainöj? Ame la ketre aqane ke, ene la troa öhne me catre kuca pala pë hë la ketre gojenyi zonal.

² Nyimu eloine la troa xötrëne lapaane la itre gojenyine zonal. (1) Kola aijijë së hnene la itre iwai hmaca e nöjei hnaaluene wiik, troa nyiqaane imajemikeu memine la itre atr ka drenge la maca ka loi. (2) Hetrenyi pala hi thei epuni la ketre ithuemacanyi ne iamele, hna xome qa hnine la zonal, La Tour de Garde me Réveillez-vous! (3) Jëne la itre mekune hne së hna ce ithahnatane memine la ketre atr, atreine hi tro së a ixatua me ini angeice troa hane ahmitrötrëne la nyipici e hnine la Tusi Hmitrötr, me aijijë angeice fe troa hane inine la Tusi Hmitrötr.​—1 Pet. 2:2.

³ Drei La Aqane Troa Nyiqaane La Ketre Gojenyi Zonal: Maine kola ajane hnene la ketre atr troa e la itre zonal, qaja ju koi angeice ka hape, hetrenyi la itre mekune ka lolo e hnine lai lue zonal, nge epuni a ajane troa tro fë pala hi itre eje koi angeic, thupene la lue wiik. The thëthëhmine kö troa xome la ëje me hnalapa i angeic, ketre tune mina fe la drai ne iöhny, me itre ijine kola hamëne la itre zonal, memine la hna cinyihane hna ce goeën, me itre mekune hna ajane troa ce ithahnatane hnene lai atr.

⁴ Loi e tro epuni a nyiqaane la ketre gojenyi zonal, memine hi la itre atr ka xalaith. Thupene lai, epuni a nango aelëne la etrune la itre gojenyi zonale i epun; kola nyixane hnene la itre atr hnei epuni hna hamë zonale kow. Nge pine laka, tiqa trootro hnei gojenyi zonale i epun, haawe, loi e tro epuni a waipengöne hnyawa la aqane tro epuni a huliwane itre eje ngöne la teritoare i epun, matre troa hmaloi e tro epuni a kuca asë itre ej. Loi e troa cinyihane hnyawa pala hi la itre zonale hnei epuni hna tro fë ngöne la nöjei epuni a iöhnyi memine lai atr, nge tro fe a qaja la ijin. Cinyihane ju fe la itre xaa mekune ngöne la itre hnei epuni hna ce ithahnatan, memine la aqane troa akökötrene trongëne la aja ne la atr kowe la nyipici, ngöne la kola troa iwai hmaca thupen.

⁵ Thatraqai Itre Ka Saleme Fe Me Itre Ka Huliwa: Kola mama hnyawa laka, hna hane kapa pala hi la itre zonale së hnene la itre atr ka salem, me itre ka huliwa i maseta. Ame ngöne la ketre traon, hnene la ketre qatre thupe hna hamëne la itre zonale kowe la maire, matre ketre gojenyi zonale i angeice fe hë nyidrë. Hnene la ketre trejine hna nyiqaane inine la Tusi Hmitrötre memine la ketre atr ka trene batima, thupene la hna hamë zonale koi nyidrë ngöne la treene lao macatre; pë pi kö macatre hna trian!

⁶ Hnene la ketre söre ka pionie hna lö hnine la ketre magazë, nge hnei eahlo hna iöhnyi memine la lue trefëne ka sixele pi kö ma kepe eahlo. Ngo pine laka, hnei nyidro hna kapa la itre zonal, haawe, hnene la pionie hna mekune ju troa hane e nyidro ngöne lo itre gojenyine zonale i eahlo. Thupene lai, hnene lai trejine föe hna mekune troa pane nue nyidro, pine laka, ka wesitramenyi pala hi, nge pë pala pe hi mekune hna hane hamëne ngöne la eahlo a hane hnyingë nyidroti la mekune i nyidro göne la itre xaa ewekë. Ngo hnene la trejine hna pane thithi fë lai jole cili, me mekune troa tro fë kowe lai lue trefëne la itus, Vivre éternellement. Thupene la hnene la föe hna e lai itus, eahlo a qaja ka hape: “Haawe, öhnë hë ni la nyipici!” Ame hna nyiqaane jë la ketre etid, nge ame hë thupene lai, kola hane xome fe la bapataiso hnene la lue trefën. Haawe, nyipici laka, hetre thangane pi hë la hna catre huliwa hnene la pionie.

⁷ Loi e Troa Catre Iwai Hmaca: Nyipi ewekë troa canga e la itre hna cinyihane asë, ngöne la epuni a kapa la itre zonale ka hnyipixe. Thele jë la itre mekune hna pi ajane troa isa e hnene la itre atr hnei epuni hna majemine hamë zonale kow. Nge ame la epuni a bëeke hmaca, qaja jë ka hape: “Hnenge hna meku epuni ngöne la eni a e la hna cinyihane celë, laka, tro fe epuni a ajane troa hane e ej.” Ngacama qatre maine nekönatr, easë asë hi a madrine troa hetre gojenyi zonale së. Atreine fe tro la ketre nekönatre a qaja ka hape: “Eni a madrine troa iöhnyi hmaca me epun. Hane hë lo la itre zonale i epuni ka hnyipixe, La Tour de Garde me Réveillez-vous! Eni a mekune laka, tro epuni a ajane troa hane e la hna cinyihane celë hna hape . . .”

⁸ Loi e troa canga amamane kowe la itre atr hne së hna hamë zonale kow, la itre hna cinyihane hna eköhagen, hna hape “Hnine La Itre Zonale Ka Troa Xulu”; itre hna cinyihane lai ka eje pë hë ngöne la itre zonale ka troa traqa. Maine nyimutre la itre hna cinyihane ka qaja la ketre mekune ka caas, amamane ju itre eje kowe la itre atr, nge xatua angatre jë troa e asë itre ej, thaa tro kö a triane la caas. The thëthëhmine kö troa e pala hi la itre iwai hmaca, ngöne la epuni a hamëne la itre zonale kowe lai itre gojenyi zonale i epun. Nge loi e tro pala hi së asë a mekune laka, ame la nyipi ewekë ke, ene la troa catre iwai hmaca matre troa traqa kowe la aja ka tru, ene la troa nyiqaane inine la Tusi Hmitrötre memine la itre atr.

⁹ Loi e Tro Pala Hi a Nyi Trepene La Itre Gojenyi Zonal: Atreine hi tro epuni a wange la itre gojenyi zonale i epun, ngöne la nöjei ijine ka ijije koi epun​—ngöne la ketre hmakanyi ne la ketre wiik, maine e hejihej, maine e heji lapa, maine e mecixeni me sabath, thupene la hna pane cainöje ngöne itre hnalapa trootro. Maine thaa ijije kö tro epuni a kuca la itre gojenyi zonale i epun, pine laka, epuni a wezipo, maine epuni a tro troa mano ngöne la ketre nöj, haawe, sipone jë kowe la ketre atrene la hnepe lapa i epun, maine ekalesia pena, troa nyihnai epuni me tro fë pë hë la itre zonal. Nyipi ewekë troa huliwa tune lai, matre tro pala hi la itre atr hnei epuni hna majemine tro fë zonale kow, a kapa itre eje ngöne la ijine ka ijij.

¹⁰ Ame la ketre aqane troa traane la itre itine feja ne la Baselaia, ke, ene la troa xome pala hi la itre zonal, La Tour de Garde me Réveillez-vous!, me tro fë itre eje kowe la itre gojenyi zonale i epuni asë. Nge, ame la epuni a ini angatre la nyipici qa hnine la Tusi Hmitrötr, angatre a trotrohnine hnyawa la aliene la wesi ula ne la Baselaia, ene pe hane ju fe hi angatre wa me hetre wene ne la Baselaia tui epun.​—Mat. 13:​8, 23.