Ijije Kö Tro Së a Hane Hamë Ixatua?
1 Hnei Paulo aposetolo hna xatuane la itre atrene la ekalesia, troa “ithupënekeune la ite hnepe ngönetei.” (1 Kor. 12:25) Qa ngöne lai, loi e tro së a amamane laka, easë a hane wangatrune la itre xan, nge hetre aja the së troa hamëne cememine la ihnim, la ixatua e traqa ju la itre xaa hnepe jole koi angatr. Drei la ketre ceitun, ala nyimu la itre trejine me easë, itre föe ka hetrune caasine pë hë la itre nekö i angatre ngöne la nyipici. Ketre ehnefe ka tru hna thue hnene la itre trejine föe celë, ngöne laka, angatre a xome la hnëqa, ene la troa inine la itre nekö i angatre ngöne la götrane la ua. Eje hi laka, troa nyipi ewekë catre koi angatre la itre ithuecatre ka lolo, me itre ewekë hne së hna hamëne nyine ixatua “thenge la itre jole ka eje thei angatr.” (Rom. 12:13a, MN) Hapeu, ijije kö tro së a hane xatua angatr?
2 Itre Aqane Tro Së a Ixatua: Ka lolo catre la troa hane trotheng la itre atr ka pëkö loto, nge ka lapa xomi kar troa sine la itre icasikeu me itre asabele; ketre matre nango ahmaloeëne la itre hnepe lapa cili göi mani. Atreine fe tro së a hane xatuane la ketre thine troa pane thupëne la itre nekö i nyidroti ka co, matre tro nyidroti a hane kepe thangane hnyawa la itre icasikeu. Troa atraqatre la madrine ne la ketre föe, e hne së hna ixatuanekeune la nekö i nyidro, maine kola troa ce cainöje trootro me nyën. Maine tro së a wangatrune hnyawa la itre nekönatr, me amamane la ihnimi së koi angatr, eje hi laka, tro ha hetre thangane ka loi koi angatr. Tro mina fe a akeukawane ngöne la ua la hni ne la itre föe maine trahmanyi ka hiane caasine pe la itre nekö i angatr, e hne së hna hane hë angatre e itre xaa ijine troa hane ce sine me easë la ini tusi ne la hnepe lapa së.
3 Loi e Troa Hetre Hni Ne Metrötr: Loi e tro së a thupëne matre thaa tro kö a sipone ielene pala ha troa ixatua, ngo thaa ajane pe la atr. Ketre, thaa loi kö e tro pena së a hane lö hnine menune la itre jole ka eje thene la ketre atr me hnepe lapa i angeic, ngöne la easë a hamëne la ixatua së koi angeic. Ketre, sisitria catre kö e tro la ketre trejine föe, maine itre trefëne pena, a xatuane la ketre söre ka aja ixatua.
4 Hna xatuane asë hi la itre keresiano troa “majemine hnime la itre trehnyiwa,” me hane kapa fe la itre xan. (Rom. 12:13b) Maine tro së a hane hamëne la ixatua së kowe la itre trejine me easë ngöne la lapaun, itre trahmanyi me föe, ketre aqane tro hi së lai a amamane laka, itre keresiano së ka ihnimikeu.—Ioane 13:35.