Hetre Madrine e Hna Canga Hnëkë Hnyawa
1 Hetre madrine ka tru hne së hna troa kapa qa ngöne la hne së hna cainöje trootro. (Sal. 89:15, 16) Eje hi laka, ame la ewekë ka sisitria ka aijijë së troa kapa hnyawa la madrine cili, ke ene la troa hnëkë. Maine tro së a hnëkë hnyawa, tro ha kökötre la itre huliwa së, nge pine laka, kökötre catre la itre huliwa së, haawe, tro fe ha atraqatre catre la madrine së.
2 Xome Jë La Itre Jiane Huliwa Hna Hamën: Ame ngöne la easë a hnëkë, loi e troa pane e me trotrohnine hnyawa la itre mekune e hnine la Huliwa ne Baselaia. Easë a kapa la itre aqane nyiqaane ithahnata hna xome nyine troa xatua së matre hmaloi nge hetre thangane ka loi la easë a tro fë la maca ne Baselaia. Tro hë së a öhne la itre ceitune ngöne la aqane troa sa hmekune la itre mekune hna majemine fe koi së hnene la itre atr. Hetrenyi la itre mekune ka lolo hna hamëne koi së, nyine aijijë së troa kepe thangane ka loi qa ngöne la easë a iwai hmaca, me thele jëne troa nyiqaane inine la Tusi Hmitrötr. Atreine hi tro sa iëne la itre mekune nyine ixatua celë, ka troa ahmaloeë së troa cainöje trootro. Troa nyixane itre eje hnene la itre mekune ka nyimutre nge ka isa pengön, hna xome qa hnine la itus Comment raisonner, ene lo itre aqane nyiqaane ithahnata, me itre mekune ka ajolëne la maca ka loi; celë hi itre mekune lai ka troa xatua së troa atreine qëmeke hnyawa kowe la nöjei aqane mekune ne la itre atr hne së hna cainöje kow.
3 Xome jë la itus hne së hna troa tro fë, nge iëne jë la caas maine lue mekune ka tru nyine troa amamane kowe la itre atr. Maine pena, troa xome la itre ithuemacanyi hne së hna drenge maine e ngöne zonal, matre nyine tro së a nyi jëne nyiqaane ithahnata memine la itre atr. Loi e troa canga hnehene hnyawa la itre nyine troa sa la itre mekune la itre atr ka ajolëne la maca ka loi, matre thaa jole e troa ce ithahnatane me angatr. Thupene lai, xome jë la itre hnepe menetre matre troa amacane la itre nyine troa qaja ngöne la hna cainöje trootro.
4 Troa Sine La Nöjei Icasikeu Göi Huliwa Ne Cainöj: Loi e troa drenge hnyawa la kola ce ithahnatan, me ce wange me iamacanyine la itre mekune nyine ixatua e hnine la Huliwa ne Baselaia. Nyipi ewekë troa fejane la itre mekune hne së hna ajane troa amë hnine la aqane nyiqaane ithahnata së. Amexeje hmaca jë la itre ewekë hna majemine qëmeke kow ngöne la hna cainöje trootro, nge mekune jë së la itre aqane troa kepe thangane ka loi qa ngöne la hna cainöj. Ithahnatane jë la itre ewekë celë memine la itre xaa trejine qëmekene me e thupene la icasikeu.
5 Loi e troa xecie hnyawa koi së laka, maine hne së pala hi “hna hnëkë kowe la nöjei huliwa ka loi,” haawe, ijije hi tro sa kapa la ketre madrine ka tru, nge atreine hi tro së a xatuane la itre xaa atr matre tro angatre a hane öhne la gojenyi ne tro kowe la mel.—2 Tim. 2:21.