“Nyi Hlue i Iehova Jë Memine La Madin”
1. Nemene la ketre jëne madrine ka tru kowe la itre hlue i Iehova?
1 Hna cinyihan hnei Paulo aposetolo ka hape: “Madine pala jë koi Joxu ; nge ini hmaca a qaja, ka hape, Madine jë.” (Fil. 4:4) Ame la hnëqa ka sisitria, ene la troa tro fë la maca ka loi, me troa xatuan la itre atr hna aceitunëne me itre mamoe troa thili koi Iehova, tre celë hi jëne madrine ka tru lai. (Luka 10:17; Ite hu. 15:3; 1 Thes. 2:19) Ngo tune kaa kö la easë a öhne laka pëkö madrine së ngöne la hna cainöje trootro e itre xaa ijin, nemene la nyine tro sa kuca?
2. Tune kaa la aqane tro sa wangatrune hnyawa la qaane la hnëqa së ka troa hamë madrine koi së?
2 Huliwa Hna Amekötine Hnei Akötresie: Loi e tro pala hi së a mekune laka, qaathei Iehova la hnëqa ne troa cainöj. Nyipici, drei la ketre iatrunyi ka tru ene la tro së a “ce huliwa tro kö me Akötesie,” troa cainöjën la maca ne Baselaia me troa inine la itre atr! (1 Kor. 3:9) Ce Iesu me easë ngöne la huliwa celë, huliwa hna thaa tro hmaca kö a kuca. (Mat. 28:18-20) Itre angela fe a ce me easë, nge angatr a ce huliwa me easë troa menuën enehila la igahlapa ka tru ngöne la götrane la ua. (Ite hu. 8:26; Hna ama. 14:6) Kola amamane hnyawa hnene la Tusi Hmitrötr memine la hna melën hnene la itre hlue i Iehova, laka, Nyidrëti a amanathithine la huliwa cili. Haawe ame la easë a cainöj, easë hi lai a tro “thei [“ceme,” MN] Keriso xajawa i Akötresie . . . nge qa thei Akötesie.” (2 Kor. 2:17) Drei la ketre kepin ka tru matre easë a madrin!
3. Nemene la thangane la thith matre troa hetrenyi pala hi la madrine së kowe la huliwa i Akötresie?
3 Nyipi ewekë catre troa thith, maine easë a ajan troa hetre madrine së pala hi ngöne la huliwa i Akötresie. (Gal. 5:22) Pine laka easë a atreine kuca la huliwa i Akötresie hnene la trenge catre i Nyidrë, nyipi ewekë tro sa sipone la uati hmitrötr cememine la hni ka menyik, lo hnei Nyidrëti hna hamëne gufane kowe la itre atr ka sipo Nyidrë. (Luka 11:13; 2 Kor. 4:1, 7; Efe. 6:18-20) Maine tro sa thithi thatraqane la huliwa ne cainöje së, tro lai a xatua së troa hetrenyi pala hi la aqane waiewekë ka loi ngöne la kola xele ma drei së hnene la itre atr. Tro fe la thithi a aijijë së troa catre me madrine troa cainöjëne pala hi la Baselaia.—Ite hu. 4:29-31; 5:40-42; 13:50-52.
4. Maine tro sa hnëkë hnyawa, tune kaa la aqane troa xatua së hnene la ewekë cili troa akökötren la madrine së troa cainöj, nge nemene la itre xaa aqane troa hnëkë ka lolo?
4 Troa Hnëkë Hnyawa: Ame la ketre aqane troa akökötrene hnyawa la madrine së troa cainöj, tre ene la troa hnëkë hnyawa. (1 Pet. 3:15) Thaa nyipi ewekë kö troa tru menu pala ha hnei traem hna troa xom matre troa hnëkë. Itre hnepe menetre hi nyine troa xom matre troa wange hmaca la itre aqane nyiqaane ithanata hna hnëkëne thatraqane la itre zonale së, maine pena ketre aqane nyiqaane ithanata pena ka loi göne la itus hne së hna troa tro fë kowe la itre atr. Ka loi troa wange la itus Comment raisonner maine itre Huliwa Ne Baselaia, matre troa xome la aqane nyiqaane ithanata ka ijij. Ame itre xaa ka cainöj, tre, angatr a öhne la eloine la troa cinyihan la ketre hnepe aqane nyiqaane ithanata ngöne la ketre sine pepa. Haawe angatr a lapaa acaa goeëne hmaca lo lai hna cinyanyin matre thaa tro kö a thëthëhmin. Kola xatua angatre lai troa trije la xou me acatren la mejiun thei angatr troa catre cainöje kowe la itre xan.
5. Tune kaa la aqane kepe thangane së memine la itre xan la madrin?
5 Nyimutre la manathith ka cia qa ngöne la madrin. Kola hule la itre atr troa drenge la maca së, e madrine la aqane tro fë ej hne së. Hnene mina fe la madrin matre easë a catre troa xomihnine ahoean la itre itupath. (Neh. 8:10; Heb. 12:2) Nge ame la ka sisitria catr, tre, kola atrunyi Iehova hnene la aqane huliwa së ka madrin. Qa ngöne lai, loi e tro sa “nyi hlue i Iehova cememine la madrin.”—Sal. 100:2.