Loi e Kökötr La Madrine Së Troa Cainöj
1 Hane kö nyipunie kapa la madrin, qa ngöne la hna tro fë la maca ka loi? Maine thaa hmeke kö së, atreine hi troa ameijë së troa cainöj, hnene la fene ka ngazo, ene pe troa thapa la madrin ka eje the së. Ketre, tro mina fe a ananazijë së hnene laka, pëkö ka drei së ngöne la teritoar. Nemen la itre nyine troa kuca ka lolo, ka troa akökötren la madrine së ngöne la hna cainöj?
2 Loi e Troa Loi La Aqane Waiewekë: Ame la nyipi ixatua koi së, tre, ene la troa hetrenyi la aqane ujë ka lolo. Ame la ketre aqane troa kuca, tre, ene la troa thele ewekë me mekune hnyawa la hnëqa së ka tru, ene laka, itretre “ce huliwa tro kö me Akötresie.” (1 Kor. 3:9) Ce easë fe me Iesu ngöne la easë a xom la huliwa cili. (Mat. 28:20) Nge nyidrëti a xatua së jëne la itre sooce i nyidrë, ene la itre angela. (Mat. 13:41, 49) Loi e troa xecie hnyawa koi së laka, troa eatrongë së hnei Akötresie. (Hna ama. 14:6, 7) Ngacama troa xele la itre atr troa drei së, ngo ame pe, tre, hetre madrin atraqatr e hnengödrai!
3 Loi e Troa Hnëkë Hnyawa: Troa hetre madrine së mina fe, e hne së hna hnëkë hnyawa. Thaa nyipi ewekë kö troa tru menu la traem hna xom troa hnëkë troa cainöj. Maine tro hi a xom la itre hnepe menetr matre troa wang la ketre mekun ka tru qa hnine la itre zonal nyine ithanatan, maine hnine la itus nyine troa tro fë ngöne la treu. Iëne jë la ketre aqane troa tro fë, jën lo hna cinyihan hna hape, “Troa Qeje Nemen Gön La Itre Zonal” hnine la Huliwa Ne Baselaia. Wange ju la sinecetrone ej ngöne la treu Januare 2002, hna hape, “Itre Aqane Nyiqaane Ithanata Nyine Ixatua Göi Cainöje Trootro,” maine goeëne ju pena la itus Comment raisonner göi ketre aqane nyiqaane ithanata ka lolo. Maine kola ajolë nyipunie hnene la ketre mekun ka icilekeu hna majemine qaja hnene la itre atr, haawe, hnëkëne jë la ketre mekun nyine troa sa thenge la mekune i angatr me tro xome meköti angatr kowe la ketre topik ka troa ahlën la aja i angatr. Troa ketre ixatua ka tru la itus Comment raisonner ngöne la aqane huliwa cili. Maine tro sa xom la itre mekun cili nyine ixatua, tro ha hetre mejiune së troa cainöj cememin la madrin.
4 Loi e Tro Sa Catre Thith: Maine easë a ajan troa cile huti la madrine së, nyipi ewekë tro sa thith. Pine laka easë a kuca la huliwa i Iehova, nyipi ewekë tro sa xëwe koi nyidrë me sipon la uati hmitröt, ka troa hamën la madrine koi së, ke, eje la ketre wen ne la ua. (Gal. 5:22) Tro Iehova a hamëne koi së la trenge catr, matre tro së a catr cainöj. (Fil. 4:13) Maine tro së a thith thatraqan la huliwa ne cainöje së, tro hë së a atreine cile kowe la itre jol hne së hna melën ngöne la hna cainöje trootro. (Ite Huliwa 13:52; 1 Pet. 4:13, 14) Maine easë a nango hetrenyi la xou, tro ha xatua së troa cile catr me madrin troa cainöj.—Ite Huliwa 4:31.
5 Loi e Troa Thel Me Xomi Ijin: Troa atraqatre catr la huliwa ne cainöje së, e hne së hna thel troa iöhnyi memine la itre atr me cainöje koi angatr. Maine tro së a saze la porogarame së matre troa cainöje trootro ngöne la itre hawa ka isapengön, maine jë e hnaipajö hej, maine e heji pena, eje hi laka, troa hetre thangane catr la hna huliwa. Easë a iöhnyi memine la itre atr ngöne nöjei ijin easë a tro ngöne la gojeny, maine easë pena a itö, maine xomi kar, maine tro agö ngöne la ketre park. Tune kaa matre hnëkëne jë pena la ketre hnepe aqane troa thele porotrik matre troa ithanata memin la itre atr hne së hna öhn ka pi troa drei së? Maine ngöne pena la hna huliwa i maseta, maine ngöne la hna ini, itre götran ka aijijë së troa ithanata ngöne la drai memine la itre xaa atr. Atrein fe tro së a cainöj, maine jëne hi la ketre mekun qa hnine la Tusi Hmitrötr ka troa ahlën la aja ne lai atr. Hetrenyi la itre mekun nyine ixatua ngöne la pane götran ne la sinecetron la Huliwa Ne Baselaia ne Januare 2002. Trenge catre lai ka ijij troa kuca matre troa akökötren la madrine së troa cainöj.
6 Pine laka kola xatua së hnene la madrin troa xomihni ahoeany, haawe, nyipi ewekë troa hetrenyi pala hi la madrine cili! Maine tro së a kuca tune lai, tro hë së a menuën la itre manathith ka tru, elany e kolo ha troa umuth la huliwa celë hna thaa tro hmaca kö a kuca. Celë mina fe mekune la ka troa akökötren la madrine së troa catr cainöjën pala hi la maca ka loi.—Mat. 25:21.