Loi e Tro Së a Wangatrune La Atresiwa i Iehova Ka Lolo
1 Hnei Satana hna adrone la ëje i Akötresie, ngöne la angeice a li ewekë kowe la pane keme me thine së, matre kuca nyidroti la ngazo. Qa ngöne la aqane nyinyithina i Diabolo, hnei angeice hna sili trenga thoi Iehova koi Adamu. (Gen. 3:1-5) Pine laka, thatreine kö troa aisane la ëje i Akötresie memine la atreine i Nyidrëti troa aeatrëne la trenge ewekë i Nyidrë, haawe, trenga thoi ka ngazo catre la hna sile hnei Satana hui Akötresie. Ngo hnei Nyidrëti hna ahmitrötrëne hmaca la ëje i Nyidrë me alolone ej, jëne la itre mekuana i Nyidrë hna eatrëne trongën.—Is. 63:12-14.
2 Easë la nöje hnei Akötresieti hna ‘ati ëjene qa ngöne la ëje i Nyidrë.’ (Ite Huliwa 15:14, 17) Haawe, jëne tro së lai a amamane la aqane metrötrëne së la ehmitrötrene la ëje i Nyidrë. Easë a atrehmekune hnyawa la eloine la ëje i Iehova, ngöne laka, eje e ngöne la atresiwa i Nyidrëti la lolo, me thiina ka loi, me ole, me meköt. Atraqatre la xou së me metrötre së, kowe la edraiëne memine la elolone la atresiwa i Akötresie. (Sal. 8:1; 99:3; 148:13) Matre kola upi së troa tune kaa?
3 Troa Ahmitrötrëne La Ëje i Akötresie: Ka pë ethane la ëje i Akötresie, nge ka hmitrötre kö eje qaane ekö. Ngo atreine hi tro së a hane amamane ka hape, easë a ahmitrötrëne ej, qa ngöne la elolone la aqane ujë së me aqane canöje së. Loi e qaja hne së ka hape: “Atrunyi Iehova jë, hëne jë la atesiwa i nyidë; amamane jë thene la ite nöje la ite huliwa i nyidë; nge thue macane jë laka, ka sisitia la atesiawa i nyidë.” (Is. 12:4) Nemene la aqane tro sa kuca?
4 Atreine hi tro sa thele la nöjei aqane tro së a qaja la atresiwa i Iehova, me qeje pengöne la enyipi ewekëne ej. Troa atrunyi Iehova hnene la aqane cainöje së, maine ngöne la nöjei ijin, maine ngöne hna salemë ume mo, maine jëne telefon. Nge e öhne hë së la itre atr ka drei së, haawe, loi e tro së a isa pui hnyawa matre troa wai angatre hmaca, me ini angatre pala hi la pengöi Iehova. Kolo lai a hape, loi e tro pala hi së a eatrëne hnyawa la itre hna isa pui, me catre troa nyiqaane inine la Tusi Hmitrötre memine la itre atr. Drei la madrine së ngöne la kola traqa ala nyimu pala hi la itre atr ngöne la nöjei macatre, itre thauzane la etrun, matre troa atrepengöne me metrötrëne me ahmitrötrene la atresiwa i Iehova ka lolo.
5 Maine tro së a huliwa cememine la hni ka pexej, ngöne la easë a ahmitrötrëne la atresiwa i Akötresie, haawe, tro ha mama hnyawa la pengö së ngöne la mekune hna amejëne hnei Satana e Edena. Celë hi huliwa lai ka sisitria nge hna jele loin, ka nyipi ewekë tro sa kuca ngöne la mele së. Epi wangatrune catrëne pala hi së, me catre atrune la atresiwa i Iehova ka nyipi lolo!—1 A. l. ite jo. 29:13.