Loi e Troa Atre Hnene La Itre Atr La Ëje i Akötresie
1. Nemene la thangan la troa atre la sipu ëje i Akötresie hnene la itre atr?
1 Tune ka la aqane ujë së ngöne lo easë a hane xötrei atre la ëje i Akötresie? Alanyimu la itre atr ka ujë tune la föe celë, öni eahlo ka hape: “Hna xöla la itre trenge timidrang, ngöne la eni a hane xötrei öhne la ëje i Akötresie hnine la Tusi Hmitrötr. Hetre thangane catre la atrehmekun, matre atre hë ni enehila nge eni fe a hane xome la sipu ëje i Akötresie.” Ame koi eahlo, ame la troa atre la ëje i Iehova, tre, celë hi ketre jëne ka nyipiewekë catr troa atre Iehova ceitune me ketre atr, nge qaane ju hi lai, atreine hë së troa hane acatrene la aqane imelekeu së me Nyidrë.
2. Pine nemen matre nyipi ewekë koi së troa inin la itre xaa atr la pengöi Iehova?
2 Pine Nemen Matre Nyipi Ewekë Troa Atre? Ame la kola atre la ëje i Akötresie, tre kolo mina fe a inin la itre thiina ka lolo i Nyidrë, me itre aja me itre huliwa i Nyidrë. Maine easë a ajan troa mel, ka loi mina fe tro sa atre la ëje i Nyidrë. Hna cinyihan hnei Paulo aposetolo ka hape: “Tro ha mele angat’ asë angete hëne la atesiwa i Joxu.” Öni nyidrëti fe ka hape, ngo “tro angate a hë nyidëti tune ka,” nge thaa pane thele pe troa inin la pengöi Nyidrë me lapaune koi Nyidrë? Celë hi matre loi e troa qaja hnene la itre Keresiano la ëjë i Iehova memine la itre alien ej. (Rom. 10:13, 14) Ngo hetre ketre nyipi kepin matre loi e troa atre hnene la itre atr la ëje i Akötresie.
3. Nemene la pane kepin matre easë a cainöj?
3 Ame ngöne lo itre macatre 1920, hnene la itre hlue Akötresie hna wangatrehmekune hnine la Tusi Hmitrötr laka, troa manathithi la hnengödrai memine la itre atr e celë fen, e hna pane acile la musi ka draië i Akötresie, me ahmitrötrën la ëje i Nyidrë. Qëmekene tro Iehova a apaatrene la itre atr ka ngazo me ahmitrötrën hmaca la ëje i Nyidrë, troa pane “mama e cailo fene asë” la nyipici göi Nyidrë. (Is. 12:4, 5; Ezek. 38:23) Qa ngöne lai, ame la pane kepin matre easë a cainöj, tre, ene laka easë a atrunyi Iehova qëmekene la itre atr asë nge kola ahmitrötrëne fe la ëje i Nyidrë qëmekene la nöjei atr asë. (Heb. 13:15) Tro la ihnimi së koi Akötresie memine la itre atr ka lapa ezi së a upi së troa catre xome la huliwa hna acile hnei Akötresie.
4. Hna tune kaa matre wangatrehmekune jë la Itretre Anyipici Iehova memine la ëje i Akötresie?
4 “Ketre Nöj Thatraqane La Ëjeng”: Ame ngöne lo macatre 1931 hne së hna xome la ëje hna hape, Itretre Anyipici Iehova. (Is. 43:10) Qaane ju hi lai, hna catre cainöjën hnene la nöje i Akötresie la ëje i Nyidrë kowe la itre atr asë, ene pe kola qaja ngöne la itus Prédicateurs götrane 124, ka hape: “Kola mama e cailo fen laka, ame la atr ka xome la ëje i Iehova, tre canga wangatrehmekunyi angeice ju hi a ketre ene lo Itretre Anyipici Iehova.” Hapeu, hane kö wangatrehmekunyi epuni tune lai? Kola upi së hnene la ole së kowe la ihnimi Iehova troa ‘atrun la ëje i Nyidrë,’ me qeje Nyidrë ngöne la nöjei ijine ka ijije koi së.—Sal. 20:7; 145:1, 2, 7.
5. Nemene la aqane tro sa ujë ngöne la easë a xome la ëje i Akötresie?
5 Pine laka easë la “nöje thatraqane la atesiwa i nyidë,” loi e tro sa catre cilëgölin la itre hnei Nyidrëti hna amekötin. (Ite Huliwa 15:14; 2 Tim. 2:19) Ame la hna lapaa canga öhne hnene la itre atr thene la Itretre Anyipici Iehova, tre, ene la elolon la aqane ujë i angatr. (1 Pet. 2:12) Thaa ajane kö së troa thaipiën la ëje i Nyidrë hnene la hna wajahuje la itre trepene meköti Nyidrë, maine amë pena la hmi së ngöne la hnaluene göhnë ngöne la mele së. (Lev. 22:31, 32; Mal. 1:6-8, 12-14) Loi e tro pala hi a mama qa ngöne la aqane mele së laka, easë a madrine atraqatr troa xome la hnëqa së ene la troa xome la ëje i Akötresie.
6. Nemen la hnëqa ka lolo hne së hna madrine troa kuca enehila me epine palua?
6 Ame enehila, easë a öhne la aqane eatre hnyawa la hna qaja hnei Akötresie, kola hape: “Qane hna xulu hnei jö uti hë la hna lö hnen’ ej, troa atrune la ëjenge hnene la nöjei nöj.” (Mal. 1:11) Loi e tro sa catre troa qaja la nyipici göi Iehova me “qaja aloine la atesiwa ka hmitöte i nyidë epin’ epine palua.”—Sal. 145:21.