Ka Nyipiewekë Koi Së La Ëje i Iehova

1-2. Nemene la ka amamane ka hape, ka nyipiewekë catr koi Iesu la ëje i Iehova?

KA NYIPIEWEKË catr koi Iesu la ëje i Iehova. Pëkö ketre atr ka isigöline la ëje i Iehova tui nyidrë. Tune la hne së hna ce wang ngöne la tane mekun hnapan, hnei Iesu hna mec pine la ëje i Iehova. (Mar. 14:36; Heb. 10:7-9) Nge ame ngöne la pune la 1 000 lao macatre ne musi nyidrë, tro nyidrëti a nue xeci la mus koi Iehova, matre troa hmitrötr la ëjene la Keme i nyidrë. (1 Kor. 15:26-28) Kola amamane hnene la ihnimi Iesu kowe la ëje i Iehova la ecatrene la imelekeu i nyidro. Celë hi ka amamane ka hape, tru la ihnimi Iesu koi Iehova.

² Hnei Iesu hna traqa e celë fen ngöne la ëje i Iehova. (Ioa. 5:43; 12:13) Hnei nyidrë hna qaja amamane la ëje cili kowe la itretre dreng. (Ioa. 17:6, 26) Hnei nyidrëti mina fe hna hamë ini, me kuca la itre iamamanyikeu ngöne la ëje i Iehova. (Ioa. 10:25) Nge hnei nyidrë hna sipo Iehova troa thupëne la itretre dreng “pine la ëje i [Nyidrë].” (Ioa. 17:11) Eje hi, ka nyipiewekë catr la ëje i Iehova koi Iesu. Maine thatre kö la ketre atr la ëje i Iehova, nge tha huliwane kö angeic, hapeu, ketre atre drei Keriso kö?

3. Nemene la hne së hna troa ce wang ngöne la tane mekune celë?

³ Ame easë itre ka xötrethenge la itre thupa ca i Iesu, ke nyipiewekë fe tro sa wangatrune la ëje i Iehova. (1 Pet. 2:21) Ame ngöne la tane mekune celë, tro sa ce wang la kepine matre Iehova a hamëne la ëje i Nyidrë kowe la itre ka catre cainöjën “la maca ka loi ne la Baselaia.” (Mat. 24:14) Tro mina fe sa ce wang la aqane tro së isa ala cas a nyipiewekëne la ëje i Iehova.

“KETRE NÖJ THATRAQANE LA ËJE I NYIDRË”

4. (a) Nemene la huliwa hnei Iesu hna hamën kowe la itretre dreng qëmeken tro nyidrëti a elë a tro hnengödrai? (b) Nemene la hnying hne së hna troa ce wang?

⁴ Qëmekene tro Iesu a elë a tro hnengödrai, öni nyidrë kowe la itretre dreng: “Tro nyipunie a kapa la men, e traqa pi la uati hmitrötr koi nyipunie. Nge tro hë nyipunie a itretre anyipici ni e Ierusalema, me ngöne la nöje Iudra asë, me e Samaria, me ngöne la nöjei götrane gaa nany ne la fene hnengödrai.” (It. Hu. 1:8) Tha tro hmekuje kö a cainöjëne la maca ka loi e Isaraela, ngo tro mina fe a tro fë ngöne la itre götrane gaa nany. Haawe, tro fe a aijijëne la itre atr ne la nöjei nöj troa hane atre drei Keriso. (Mat. 28:19, 20) Öni Iesu mina fe: “Tro hë nyipunie a itretre anyipici ni.” Hapeu, kolo kö lai a qaja ka hape, tro hi la itretre dreng a anyipici Iesu maine tro fe angatr a hane atre la ëje i Iehova? Tro sa ce wang la itre ewekë ka traqa ngöne Itre Huliwa mekene 15.

5. Hna amamane tune kaa hnene la itre aposetolo me itre qatre thup ne Ierusalema laka, tro la nöjei atr a atre la ëje i Iehova? (Wange ju fe la foto.)

⁵ Ame lo macatre 49 M.K., hnene la itre aposetolo me itre qatre thup ne Ierusalema hna icasikeu matre troa wang ka hape, tro kö la itre atre ne fen a xötrehatrene qëmekene troa atre drei Keriso. Öni Iakobo, trejine me Iesu ka hape: “Ase hë [Peteru] qejepengöne hnyawa lo ijine Akötresieti a xötrei ujë kowe la itre atre ne fen, me iëne qaathei angatre la ketre nöj thatraqane la ëje i nyidrë.” Drei la ëje hnei Iakobo hna qaja? Hnei angeic hna amexej lo hna qaja hnei Amosa perofeta ka hape: “Matre tro la munën ne la nöje celë me itre atr qa ngöne la nöjei nöj a thele Iehova. Nge troa hëne la itre atre cili ngöne la ëjeng, öni Iehova.” (It. Hu. 15:14-18) Matre tro la itre ka kapa la hmi keresiano a atrepengöi Iehova, nge tro fe a ‘hë angatr hnene la ëje i Nyidrë.’ Kolo lai a hape, tro angatr a xom la ëje i Akötresie, nge tro la itre atr a atre angatr hnene la ëje cili.

6-7. (a) Hnauëne laka, traqa pi Iesu e celë fen? (b) Nemene la kepin ka sisitria matre traqa pi nyidrëti e celë fen?

⁶ Ame la aliene la ëje i Iesu ke, “Iehova La Iamele.” Eje hi, Iehova a amelene la itre ka lapaune koi Nyidrë jëne Iesu. Hnei Iesu hna traqa kowe la fen troa huujëne la mele i nyidrë kowe la itre atr. (Mat. 20:28) Ame la Iesu a nyithupene mel, hnei nyidrë hna fe gojeny kowe la nöjei atr troa mel utihë epine palua.—Ioa. 3:16.

⁷ Ngo hnauëne la troa amelene la itre atr? Pine lo ewekë ka traqa e Edrena. Tune lo hne së hna ce wang ngöne la tane mekun hnapan, hnei Adramu me Eva lo lue pane keme me thine i easë, hna icilekeu me Iehova matre luzi pë hë lo mele ka pë pun. (Gen. 3:6, 24) Ngo hetre ewekë kö ka sisitria hune la mele ne la itre atr. Hna adrone la ëje i Iehova. (Gen. 3:4, 5) Tro la itre matra i Adramu me Eva a mel, e tro angatr a atrehmekune ka hape, ka hmitrötr la ëje i Nyidrë. Pine laka, Iesu la qeneqaja i Iehova, nge nyidrëti a xom la ëje i Iehova matre nyidrëti hi la ka ijij troa ahmitrötrëne la ëje i Iehova.

8. Nemene la nyine tro la itre ka lapaune koi Iesu a trotrohnin?

⁸ Loi e tro asë hi la itre ka lapaune koi Iesu, atre Iudra ju hë maine atre ne fen, a wangatrehmekun laka, Iehova la ka hamë mel. (Ioa. 17:3) Troa atre angatr hnene la ëje i Iehova, tui Iesu ekö. Loi e tro mina fe angatr a trotrohnine la enyipiewekën troa ahmitrötrëne la ëje cili ke, celë hi jëne mel. (It. Hu. 2:21, 22) Haawe, nyipiewekë tro la itretre drei Iesu asë a atre nyidrë, me atre Iehova mina fe. Celë hi matre, hnei Iesu hna nyipune la thithi nyidrë ngöne Ioane 17 ka hape: “Hnenge hna qaja amamane la ëje i nyipë koi angatr, nge tro pala kö ni a kuca tun, matre tro fe angatr a hane hnime la itre xa atr, tune la aqane hnimi ni hnei nyipë, nge tro fe hë ni a hane casi me angatr.”—Ioa. 17:26.

“EPUNI LA ITRE TEMOËNG”

9. Tro sa amamane tune kaa ka hape, ka nyipiewekë la ëje i Iehova koi së?

⁹ Nyipiewekë tro asë hi la itretre drei Iesu a ahmitrötrëne la ëje i Iehova. (Mat. 6:9, 10) Loi e tro angatr a wangatrune la ëje cili hune la itre xaa ëj, me amamane ngöne la aqane ujë i angatr. Ngo tune kaa la aqane tro sa ahmitrötrëne la ëje i Akötresie, me jelethoi Satana?

10. Nemene la ewekë ka traqa ngöne Isaia mekene 42 koi 44? (Isaia 43:9; 44:7-9) (Wange ju fe la foto.)

¹⁰ Kola amamane ngöne Isaia mekene 42 koi 44 laka, hetre nyine tro sa kuca matre ahmitrötrëne la ëje i Iehova. Ame ngöne la itre mekene cili, Iehova a upe la itre atr ka tha nyihlue i Nyidrëti kö troa amamane ka hape, ka mel la itre haze hnei angatr hna nyihluen. Ngo pëkö ka atreine amaman!—E jë la Isaia 43:9; 44:7-9.

11. Thenge la Isaia 43:10-12, nemene la hnei Iehova hna qaja kowe la itre hlue i Nyidrë?

¹¹ E jë la Isaia 43:10-12. Öni Iehova kowe la itre hlue i Nyidrë: “Epuni la itre temoëng, . . . nge eni la Akötresi epun.” E thupen, Nyidrëti a hnying koi angatr ka hape: “Hetre ketre Akötresieti kö?” (Isa. 44:8) Hna aijijë së fe troa hane sa. Tro sa anyipicine ka hape, Iehova la nyipi Akötresie jëne la hne së hna qaja me kuca. Ka draië kö la ëje i Nyidrë hune la itre xaa ëj. Ngacama tupathi easë ju hë hnei Satana, ngo tro sa amamane jëne la aqane mele së laka, tru la ihnimi së koi Iehova, nge aja i easë troa mele nyipici. Eje hi, ijiji easë fe troa ahmitrötrëne la ëje i Nyidrë.

12. Hna eatr tune kaa la hna perofetane ngöne Isaia 40:3, 5?

¹² Ame la easa isigöline la ëje i Iehova, ke easë hi lai a nyitipu Iesu. Öni Isaia mina fe ka hape, tro la ketre atr a ‘hnëkëne la jë i Iehova.’ (Isa. 40:3) Hna eatr tune kaa? Hnei Ioane Bapataiso hna hnëkëne la jë i Iesu, lo ka traqa e celë fen me ewekë ngöne la ëje i Iehova. (Mat. 3:3; Mar. 1:2-4; Luka 3:3-6) Ketre, öni Isaia: “Tro ha mama la lolo i Iehova.” (Isa. 40:5) Hna mama tune kaa? Ame lo Iesu e celë fen, hnei nyidrë hna nyitipu Iehova, matre kösë Iehova hi e celë fen.—Ioa. 12:45.

13. Tune kaa la aqane tro sa nyitipu Iesu?

¹³ Easë fe la itre temoë Iehova, tui Iesu. Easa xom la ëje i Iehova, nge easa qaja koi itre xan la itre ewekë ka mingöming hnei Nyidrëti hna kuca. Ngo tro sa anyipici Iehova hnyawa, e tro sa qaja koi itre xan la hnei Iesu hna kuca, matre ahmitrötrëne la ëje i Akötresie. (It. Hu. 1:8) Pëkö ketre atr ka anyipici Iehova tui Iesu, matre easa xötrethenge la itre thupa ca i nyidrë. (Hna Am. 1:5) Nemene la ketre ewekë nyine tro së isa ala cas a kuca, matre amamane ka hape, ka nyipiewekë la ëje i Iehova?

KA NYIPIEWEKË LA ËJE I IEHOVA KOI SË

14. Thenge la Salamo 105:3, tune kaa la aqane goeëne së la ëje i Iehova?

¹⁴ Easë a selëne la ëje i Iehova. (E jë la Salamo 105:3.) Ka madrine Iehova la easa selëne la ëje i Nyidrë. (Iere. 9:23, 24; 1 Kor. 1:31; 2 Kor. 10:17) Hnauëne la easa selën la ëje i Iehova? Ke madrine së troa nyihlue i Nyidrë, me troa atrune la ëje i Nyidrë me isigöli Nyidrë. The hmahma pi kö së troa qaja kowe la itre sine huliwa, me itre sine ce ini me itre ka lapa easenyi së, me itre xane ju kö laka, ka Temoë i Iehova së! Xele Diabolo tro sa qaja trongëne la ëje i Akötresie koi itre xan. (Iere. 11:21; Hna Am. 12:17) Aja i angeic me itre sine xöle i angeic, tro la itre atr a thëthëhmine la ëje i Akötresie. (Iere. 23:26, 27) Ngo ame kö së, itre ka hnime la ëje i Iehova, easa madrin koi Nyidrë “o drai.”—Sal. 5:11; 89:16.

15. Kola hapeu la troa hëne la ëje i Iehova?

¹⁵ Easë pala hi a hëne la ëje i Iehova. (Ioela 2:32; Roma 10:13, 14) Kola hapeu la troa hëne la ëje i Iehova? Tha kolo kö a hape, tro hi a atre me huliwane la ëje i Nyidrë. Ngo loi e tro mina fe sa atrepengöi Nyidrëti hnyawa, me mejiun koi Nyidrë, me thele ixatua me eamo thei Nyidrë. (Sal. 20:7; 99:6; 116:4; 145:18) Ketre, loi e tro sa qaja la ëje i Nyidrë me itre thiina i Nyidrë koi itre xan, me xatua angatr troa ietra, me nue trengecatr matre tro Nyidrëti a kepe angatr.—Isa. 12:4; It. Hu. 2:21, 38.

16. Tro sa amamane tune kaa ka hape, ka thoi Satana?

¹⁶ Tha xou i easë kö troa akötr pine la ëje i Iehova. (Iako. 5:10, 11) Ame la easa mele nyipici koi Iehova ngöne la itupath, easë hi lai a amamane ka hape, ka thoi Satana. Ame ngöne la hneijine i Iobu, hnei Satana hna qeje gelene la itre hlue i Iehova ka hape: “Ame asë hi la nöjei ewekë hna hetrenyi hnene la atr, ke tro angeic a hamën nyine thupene la mele i angeic.” (Iobu 2:4) Ame koi Diabolo, itre atr a nyihlue i Iehova, ke ka lolo la mele i angatr, ngo ame ngöne la itupath tro angatr a nuetriji Nyidrë. Hnei Iobu hna mele nyipici me amamane ka hape, trengathoi la hnei Satana hna qaja. Ijiji easë mina fe troa qaja ka hape, ka thoi Satana. Tune kaa? Traqa ju hë la nöjei jole qaathei Satana, ngo tha tro pi kö sa nuetriji Iehova. Loi e xecie koi së laka, tro pala hi Iehova a thupë së, pine la ëje i Nyidrë.—Ioa. 17:11.

17. Thenge la 1 Peteru 2:12, nemene la ketre aqane tro sa atrune la ëje i Iehova?

¹⁷ Easë a metrötrëne la ëje i Iehova. (It. Ed. 30:9; Iere. 7:8-11) Easa xome la ëje i Iehova, matre ijije hi tro sa atrune ej maine thaipiën ej. (E jë la 1 Peteru 2:12.) Celë hi matre, tru la aja së troa atrune la ëje i Iehova, hnene la aqane ithanata së me ujë së. Celë hi matre, ngacama itre atr ka tha pexeje kö së, ngo easa atrune la ëje i Nyidrë.

18. Nemene la ketre aqane tro sa amamane ka hape, ka nyipiewekë la ëje i Iehova? (Wange ju fe la ithuemacany.)

¹⁸ Easa wangatrune la ëje i Iehova hune la sipu ëje së. (Sal. 138:2) Pine nemen matre ka nyipiewekë? Pine laka, tru la itre atr ka goeë angazo së maine qaja angazo së, pine la ihnimi së kowe la ëje i Iehova.a Tha cile kö Iesu troa mec tune la ketre atrekënö, matre troa atrune la ëje i Iehova. ‘Tha nyipiewekëne kö nyidrëti la hmahma.’ Eje hi, tha ka nyipiewekë kö koi nyidrë la aqane goeë nyidrë hnei itre xan. (Heb. 12:2-4) Xecie koi nyidrë troa kuca la aja ne la Keme i nyidrë.—Mat. 26:39.

19. Tune kaa la aqane goeën eö la ëje i Iehova, nge pine nemen?

¹⁹ Easa selëne la ëje i Iehova. Ketre, madrine ka tru koi së troa hë së ka hape, Temoë i Iehova. Celë hi matre, tha xou i easë kö la kola xele ma wai së. Eje hi, sisitria kö koi së la ëje i Iehova hune la sipu ëje së. Haawe, catre jë së atrune la ëje i Iehova, ngacama kola lepi së hnei Satana. Aqane tro hi së lai a nyipiewekëne la ëje i Iehova, tui Iesu.