“Iëne Jë Hë La Hnei Epuni Hna Troa Nyihluen”

1. Nemene la nyine tro sa kuca matre mele madrin, nge pine nemen? (Isaia 48:17, 18)

TRU catr la hna hnimi së hnene la Keme së e koho hnengödrai, nge aja i Nyidrë tro sa mele madrin enehila me elany. (A. Cai. 3:12, 13) Hnei Nyidrë hna isa xupi së memine la itre talan, ame pe, tha hnei Nyidrëti kö hna xupi së troa sipu musinën la mele së, maine iën la ka loi me ngazo. (A. Cai. 8:9; Iere. 10:23) Ketre, atre hi Nyidrë laka, tro sa mele madrin, e tro sa nyihlue i Nyidrë, me mele thenge la itre trepene meköt i Nyidrë.—E jë la Isaia 48:17, 18.

2. Nemene la aja i Satana, nge nemene la hna kuca hnei Iehova?

² Aja i Satana tro sa mekun ka hape, ijije hi tro sa madrin, ngacama patre kö Iehova ngöne la mele së, nge atreine hi së sipu musi koi së. (Gen. 3:4, 5) Matre hnei Iehova hna pane nue ijin kowe la itre atr troa sipu mus. Öhne hi easë enehila laka, ngazo catr la mel ne la itre ka iën troa sipu mus. Ngo ame kö la itre hlue i Iehova hna qaja e hnine la Tusi Hmitrötr, ke ka mele madrin ngöne la huliwa i Nyidrë. Tui Iesu. Tro sa pane ce wang la itre kepin, matre hnei nyidrëti hna iën troa nyihlue i Iehova. Thupene lai, tro sa ce wang la kepin matre meköti hi tro sa atrune la Keme së e koho hnengödrai. Nge tro fe sa ce wang la itre kepin matre iëne jë së troa nyihlue i Iehova.

KEPIN MATRE IESU A IËNE TROA NYIHLUE I IEHOVA

3. Tune kaa la aqane tupathi Iesu hnei Satana, nge nemene la hnei nyidrëti hna iën?

³ Ame lo Iesu e celë fen, hnei nyidrë hna iën la hnei nyidrëti hna troa nyihluen. Thupene la nyidrëti a ase bapataiso, öni Satana koi Iesu, e tro nyidrëti a thil koi angeic, tro hë angeic a hamë nyidrë la nöjei baselaia e celë fen. Ngo sa jë hi Iesu ka hape: “Tro pi Satana! Ke ase hë cinyihan ka hape: ‘Iehova Akötresi eö la nyine tro eö a thili kow, nge nyidrëti hmekuje hi la nyine troa nyihluen.’ ” (Mat. 4:8-10) Hnauëne la Iesu a ië Iehova? Tro sa ce wang la itre kepin.

4-5. Nemene la itre kepin matre Iesu a ië Iehova?

⁴ Ame la pane kepin matre ië Iehova jë hnei Iesu, ke hnene la ihnim i nyidrë koi Iehova. Tru catr la ihnim i Iesu kowe la Keme i nyidrë, nge ka catrecatr la aqane imelekeu i nyidro. (Ioa. 14:31) Ketre, atre hi Iesu laka, celë hi nyine tro nyidrëti a kuca. (Ioa. 8:28, 29; Hna Am. 4:11) Atre hi Iesu laka, Iehova la Qeqe ne mel, nge ka ham, nge Nyidrëti hi la nyine troa mejiun kow. (Sal. 33:4; 36:9; Iako. 1:17) Hnei Iehova pala hi hna qaja la nyipici koi Iesu, nge ame asë hi la hnei Iesu hna hetreny, ke qaathei Iehova. (Ioa. 1:14) Ngo ame pena Satana, ka thoi pala hi angeic, me pi hetreny, me meku angeice hi. Nge zöi angeice hi la mec. (Ioa. 8:44) Celë hi kepin matre, xele fe Iesu ma nyixöle i Satana, me icilekeu me Iehova.—Fil. 2:5-8.

⁵ Ame la ketre kepin matre Iesu a ië Iehova, ke atre hi Iesu la itre thangan, e tro nyidrëti a mele nyipici. (Heb. 12:2) Eje hi, e tro nyidrëti a mele nyipici, tro hë nyidrëti a ahmitrötrën la ëjene la Keme i nyidrë, me apatrene la itre akötr hna axulun hnei Diabolo.

KEPIN MATRE MEKÖT TRO SA NYIHLUE I IEHOVA

6-7. a) Hnauëne laka, ala nyimu la itre atr enehila ka tha nyihlue i Iehova? b) Pine nemene matre, meköt tro sa atrunyi Nyidrë?

⁶ Ala nyimu la itre atr enehila ka tha nyihlue i Iehova, ke thatre kö angatr la itre thiina ka mingöminge i Nyidrë, memine la itre ewekë hnei Nyidrëti hna kuca koi angatr. Celë hi pengöne la itre atr e Athenai hnei Paulo hna cainöje kow.—It. Hu. 17:19, 20, 30, 34.

⁷ Hnei Paulo hna qejepengöne koi angatr laka, hnene la nyipi Akötresie hna “hamë mel, me mano ne mel, me nöjei ewekë asë kowe la nöjei atr asë.” Nge öni angeice hmaca jë hi: “Easë a mel me enij hnei nyidrë.” Akötresie la Atre Xup ka “axulune la nöjei nöj asë qa ngöne la atre ka cas,” matre meköt tro sa atrunyi Nyidrë.—It. Hu. 17:25, 26, 28.

8. Maine ju, nemene la hnei Iehova hna troa kuca, ngo nemene pe la hnei Nyidrëti hna kuca?

⁸ Maine ju, tro hi Iehova a musinën la nöjei atr troa nyihlue i Nyidrë, ke Nyidrëti la Atre Xup me Joxu ne la fene hnengödrai asë. Ngo tha celë kö la hnei Iehova hna kuca. Hnei Nyidrëti pe hna hamë së la itre hatren ka amaman laka, ka mele Nyidrë nge Nyidrëti a hnimi së isa ala cas. Aja i Nyidrë tro la nöjei atr a nyisinee i Nyidrë uti hë epine palua. (1 Tim. 2:3, 4) Celë hi kepin matre, Iehova a ini së troa xatuane la itre xan troa atre la itre projet i Nyidrë, me aqane tro Nyidrëti a eatrën itre ej. (Mat. 10:11-13; 28:19, 20) Qa ngöne lai, hnei Nyidrëti hna acile la itre ekalesia, memine la itre atre thup ka ihnim matre thupë së.—It. Hu. 20:28.

9. Kola mama tune kaa la ihnim i Iehova?

⁹ Kola mama la ihnim i Iehova, ngöne la Nyidrëti a hamëne la itre ewekë ka loi kowe fe la itre atr ka xele troa atre Nyidrë. Pane mekune jë la: Qaan ekö, ala nyimu la itre atr ka kuci mekun göi loi me ngazo. Ame pe, hnei Iehova pala hi hna hamë angatre la ka nyipiewekë kowe la mel, me nöjei ewekë ka amadrinë angatr. (Mat. 5:44, 45; It. Hu. 14:16, 17) Tune la troa ce mel me itre xan, me hnaho, me kepe thangan qa ngöne la hna catre huliwa. (Sal. 127:3; A. Cai. 2:24) Kolo hi lai a amamane laka, Iehova Keme së e koho hnengödrai a hnime la nöjei atr. (Eso. 34:6) Tro pena sa ce wang enehila la itre kepin matre easa ië Iehova, me aqane amanathithi së hnei Nyidrë.

KEPIN MATRE HNE SË HNA IË IEHOVA

10. (a) Nemene la pane kepin matre easa nyihlue i Iehova? (Mataio 22:37) (b) Tune kaa la aqane xomihni eö hnei Iehova? (Salamo 103:13, 14)

¹⁰ Tui Iesu, ame la pane kepin matre easa nyihlue i Iehova, ke hnene la ejuine la ihnimi së koi Nyidrë. (E jë la Mataio 22:37.) Ame la easa atre la itre thiina i Iehova, tune la aqane xomihni së hnei Nyidrë, ke easa easenyi catre koi Nyidrë. Ame lo angetre Isaraela a tha idrei, hnei Nyidrëti hna iele angatr me hape: “Eni a sipo epun, bëeke hmaca jë.” (Iere. 18:11) Tha thëthëhmine kö Iehova laka, so ne dro së nge itre atr ka tha pexeje kö. (E jë la Salamo 103:13, 14.) Ame la easa lapa mekun la aqane xomihni i Iehova me itre xaa thiina i Nyidrë ka mingöming, ke hapeu, tha kolo kö lai a uku së troa nyihlue i Nyidrë uti hë epin?

11. Nemene la itre xaa kepin matre easa iën troa nyihluene Iehova?

¹¹ Easë fe a nyihlue i Iehova, ke atre hi së laka, ewekë ka loi lai. (Mat. 4:10) Ketre, atre hi së la itre eloin e tro sa mele nyipici. Eje hi tro hë së lai a ahmitrötrëne la ëje i Iehova, me jelethoi Diabolo, me amadrinëne la hni ne la Keme së e koho hnengödrai. Maine tro sa iën troa nyihlue i Iehova enehila, ke ijiji easë troa nyihlue i Nyidrë uti hë epin!—Ioa. 17:3.

12-13. Nemene la hna ini së hnene la hna melën hnei Jane me Pam?

¹² Ngacama jeune ju hë së, ngo ijiji easë fe troa hnimi Iehova, me akökötren la ihnimi cili la easa tru trootro. Tro sa pane ce wang la tulu ne la lue trejin, Jane me Pam.a Hnei nyidro hna nyiqaane ini Tus lo kola 11 me 10 lao macatre i nyidro. Ngacama xele kö la kem me thine i Jane me Pam troa ini Tus, ngo hnei nyidro hna nue la lue nekö i nyidro jajiny troa ce tro memine la itre Temoë, ngo casi hi, tro pala hi a tro koi uma hmitrötr e pune wiik. Matre öni Jane: “Ame la hnenge hna inine memine la itre Temoë, ke celë hi ka xatua ni troa thipën la dorog me kuci ngazo ngöne la hna ini.”

¹³ Ame hë la nyidroti a easenyi koi 20 lao macatre, hnei nyidroti hna nyiqaane cainöje trootro. Thupene lai, hnei nyidroti hna xom la huliwa ne pionie, me thupëne la kem me thine i nyidro ka utipië trootro. Ame la Jane a mekune hmaca la mele i angeic ekö, öni angeic: “Hnenge hna öhne laka, Iehova pala hi a thupëne la itre sinee i Nyidrë, nge tune la hna qaja ngöne 2 Timoteo 2:19, ‘Atre kö Iehova la itre atr i nyidrë.’ ” Eje hi, Iehova a thupën la itre ka iën troa hnimi Nyidrë me nyihlue i Nyidrë!

14. Tune kaa la aqane tro la itre trengewekë së me aqane ujë së a ahmitrötrëne la ëje i Iehova? (Wange ju fe la foto.)

¹⁴ Aja i easë fe troa ahmitrötrën la ëje i Iehova. Pane mekune jë la ketre sinee i eö ka lolo, ka ham, nge ka canga nue la ngazo. Ngo ame la ketre drai, eö a dreng la kola xöjetriji angeic me silitrengathoi angeic. Tro eö lai a u e cili? Tro eö lai a isigöli angeic. Ketre tune fe, ame la Satana me itre sine xöle i angeic a qaja angazo Iehova me silitrengathoi Nyidrë, ke easa isine troa qaja la nyipici göi Nyidrë, me cilëgöline la ëje i Nyidrë. (Sal. 34:1; Isa. 43:10) Easa amamane ka hape, tru la aja së troa nyihlue i Iehova, jëne la itre trengewekë me aqane ujë së.

15. Nemene la itre manathithi hnei Paulo hna kapa thupene la angeic a saze la aqane mele i angeic? (Filipi 3:7, 8)

¹⁵ Aja i easë asë hi troa saze la itre xaa ewekë ngöne la mele së, matre amadrinë Iehova maine huliwa atrun koi Nyidrë. Tui Paulo aposetolo. Hnei angeic hna nue la göhne i angeic ka tru thene la angetre Iudra, matre xötrethenge Keriso me nyihlue i Iehova. (Gal. 1:14) Celë hi matre, hnei angeic hna mele madrin e celë fen, me kapa la manathith troa ce mus me Keriso e hnengödrai. Tha ase pi kö angeice mekun laka, ka ngazo la aqane axecië mekune i angeic troa nyihlue i Iehova. Ketre tu së fe enehila.—E jë la Filipi 3:7, 8.

16. Nemene la hna ini së hnene la hna melën hnei Julia? (Wange ju fe la foto.)

¹⁶ Tro së lai a mele madrin enehila me elany, e tro sa amë panën la huliwa i Iehova ngöne la mele së. Tro sa pane ce wang la hna melën hnei Julia ketre trejine föe. Qëmeken tro Julia a atre la nyipici, hnei angeic hna majemine nyima taperas ngöne la uma hmitrötr, qaane lo angeic a co. Hnene la ketre ka nyima opéra hna öhne la talan i angeic, me ini angeic la aqane troa nyima. Ame hna canga hlemu hnei Julia, nge hnei angeic hna nyima ngöne la itre salle de concert ka tru. Thupene lai, hnei angeic hna ini ngöne la ketre uma ne ini ka tru ka kuci miuzik. Nge hnene la ketre sine ini i angeic hna qaja koi angeic laka, Iehova la ëje i Akötresie. Tha qea ju kö nge Julia fe hë a alua ini Tusi Hmitrötr ngöne la wiik. Matre hnei angeic hna iëne troa amë panëne la huliwa i Iehova hune la troa hlemu. Eje hi, tha ewekë ka hmaloi kö. Öni angeic: “Ala nyimu la itre atr ka qaja ka hape, eni a aluzine la talang, ngo ajang troa nue la meleng troa nyihlue i Iehova.” Nge tune kaa enehila thupene la 30 lao macatre? Öni angeic: “Ka tingeting la mekunang, nge eni a mejiun laka, tro kö Iehova elanyi a kapa la nöjei aja ne la hning.”—Sal. 145:16.

CATRE PI NYIHLUE I IEHOVA

17. Tune kaa së la easa atre ka hape, easenyi catre hë la pun?

¹⁷ Easenyi catre hë la pun. Öni Paulo: “ ‘Tha qea pe kö,’ nge ‘tro ha traqa hnene lo atre ka troa traqa, tha tro kö nyidrëti a hmitr.’ ” (Heb. 10:37) Kola hapeue lai koi së? Hohopatre pe hi la ijin kowe la itre atr troa ië Iehova. (1 Kor. 7:29) Nge ame easë, itre ka nyihlue i Iehova ha, atre hi së laka, tha ka huti kö la itre itupath ka traqa koi së.

18. Nemene la hnei Iesu me Iehova hna upi së troa kuca?

¹⁸ Tha hnei Iesu hmekuje kö hna upe la itretre dreng troa xötrethenge nyidrë. Ngo öni nyidrë, tro pala hi angatr a xötrethenge nyidrë. (Mat. 16:24) Haawe, ekö ju hë së nyihlue i Iehova, ngo loi e tro pala hi sa cile catr. Loi e tro sa isin troa eatrën lo mekuna së ekö, ene la troa nyihlue i Nyidrë. Eje hi, tha ka hmaloi kö, ngo tro së lai a kapa la itre manathith enehila, nge uti hë epin!—Sal. 35:27.

19. Nemene la hna ini së hnene la hna melën hnei Gene?

¹⁹ Itre xan a mekun ka hape, ka jole pala ha troa nyihlue i Iehova. Maine eö hi la ketre jeune, eö kö a mekun ka hape, eö a aluzine la mele i eö la eö a nyihlue i Iehova? Öni Gene ketre nekö trahmany ka nyihlue i Iehova ka hape: “Eni a mekun ka hape, kola hnöthe la meleng la troa nyihlue i Iehova. Kösë itre xaa jeune pala hi a feet, me kuci ihanyi, me elo jeux ka isi, nge ame ni, eni pala hi e cahu a icasikeu me cainöje trootro.” Nemene hë la hna kuca hnei Gene? Öni angeic: “Hnenge hna nyiqane kuca tu itre xan, nge eni a madrin lo xötrei. Ngazo pe, tha ka huti kö la madrine cili. Matre hnenge hna mekune hmaca lo itre trepene meköt hnenge hna nuetrij, me axeciëne troa nyihlue i Iehova hnene la hning ka pexej. Qaane ju hi lai, hnenge hna öhn laka, Iehova a sa la nöjei thithing asë.”

20. Nemene la ka troa xecie koi së?

²⁰ Hnene la atre cinyianyin la Salamo hna nyiman koi Iehova ka hape: “Madrine la atre hnei nyipëti hna iën me hën matre troa mele ngöne la itre ikur ne la uma i nyipë.” (Sal. 65:4) Epi tro fe sa catre huliwa koi Iehova me qaja tui Iosua ka hape: “Ame kö ni memine la faming, ke tro huni a nyihlue i Iehova.”—Ios. 24:15.