Ka Nyipiewekë Koi Iesu La Ëje i Iehova

1-2. (a) Nemene la hnei Iesu hna kuca lo jidr qëmeken troa humuthi nyidrë? (b) Nemene la itre hnying hne së hna troa ce ithanatan ngöne la tane mekune celë?

EASË e jeudi 14 Nisan 33 M.K. Hnenyipajidri hë nge easenyi hë troa salemë Iesu, me kootrë nyidrë, me axösisi nyidrë, uti hë la kola humuthi nyidrë. Nyidrëti a ce xen memine la itre aposetolo i nyidrë, ngöne la ketre hnahag e koho hune la uma. Ame la angatr a ase xen, nyidrëti a hamëne koi angatr la itre ithuecatr tixenuë. Nge qëmeken tro angatr a mejë, hnei nyidrëti hna cile fë la ketre thith ka nyipiewekë catr. Hnei Ioane aposetolo hna fejan la thithi cili, ngöne Ioane mekene 17.

² Nemene la hnei Iesu hna hnehengazon ngöne la ijine cili? Nemene la ewekë ka sisitria koi nyidrë, lo nyidrëti a cainöj e celë fen? Tro sa ce ithanatane la itre hnyinge celë.

“HNENGE HNA QAJA AMAMANE LA ËJE I NYIPË KOI ANGATR”

3. Nemene la hnei Iesu hna alua qaja ngöne la nyidrëti a thith, nge kola hapeue lai? (Ioane 17:6, 26)

³ “Hnenge hna qaja amamane la ëje i nyipë koi angatr.” Alua qaja lai hnei Iesu lo nyidrëti a thith. (E jë la Ioane 17:6, 26.) Nyidrëti a qeje nemen e cili? Hapeu, thatre kö la itretre dreng la ëje i Iehova? Nyipici! Angetre Iudra angatr, matre atre hi angatr laka, Iehova la ëje i Akötresie. Itre thauzane lao mama la ëje i Nyidrë, ngöne la itre Hna Cinyihane qene Heberu. Tha Iesu kö a qaja la ëje i Akötresie, ngo nyipi pengö i Nyidrë, ene la itre projet i Nyidrë, itre huliwa me itre thiina i Nyidrë.

4-5. (a) Tune kaa la aqane tro sa atrepengöne hnyawa la ketre atr? Qaja jë la ketre ceitun. (b) Tune kaa la aqane kuca la itretre drei Iesu, matre atrepengöi Iehova hnyawa?

⁴ Pane mekune jë laka, hetreny ngöne la ekalesia i eö la ketre qatre thup ka droketre, nge David la ëje i nyidrë. Ka iatre hnyawa hi epon. Ame ngöne la ketre ijin, kola nyape sai eö a tro pital, nge nyidrëti la ka opéré eö me aloine la meci eö. Matre, drei hë nyidrëti koi eö? David lo qatre thup, maine kolo droketre ka amele eö?

⁵ Ketre tune mina fe, atre hi la itretre drei Iesu la ëje i Iehova. Ngo jëne la huliwa ne cainöje i Iesu, mama ha koi angatr la aliene la ëje cili. Hnauëne la easa qaja lai? Pine laka, hnei Iesu hna amamane la itre thiina i Iehova, jëne la itre hnei nyidrëti hna qaja me kuca. Matre hnene la itre aposetolo hna atrepengöi Iehova hnyawa, ke hnei angatr hna dreng la aqane hamë ini Iesu, me goeëne la aqane ujë i nyidrë koi itre xan.—Ioa. 14:9; 17:3.

“ËJE I NYIPË, LO HNEI NYIPËTI HNA HAMË NI”

6. Nemene la aliene la Iehova a hamëne la ëje i Nyidrëti koi Iesu? (Ioane 17:11, 12)

⁶ Hnei Iesu hna thithi fë la itretre dreng me sipo Iehova ka hape: “Wai angatre pe kö pine la ëje i nyipë, lo hnei nyipëti hna hamë ni.” (E jë la Ioane 17:11, 12.) Kolo kö lai a qaja ka hape, tro Iesu a xom la ëje i Iehova? Waea. Öni Iesu lo, “ëje i nyipë.” Matre tha ëje i Iesu kö, ngo ëje i Iehova. Hnauëne kö la Iesu a qaja ka hape, hnei Akötresie hna hamëne la ëje i Nyidrë koi Iesu? Ame la hnapan, Iesu a amamane ka hape, nyidrëti la qeneqaja i Iehova. Hnei nyidrëti hna traqa e celë fen me kuca la itre iamamanyikeu, ngöne la ëje i Iehova. (Ioa. 5:43; 10:25) Ame la hnaaluen ke, ame la aliene la ëje i Iesu ke, “Iehova La Iamele.” Matre hna hane fe amë la ëje i Iehova ngöne la ëje i Iesu.

7. Qaja jë la ketre ceitun ka amamane ka hape, ijiji hi tro Iesu a ithanata ngöne la ëje i Iehova.

⁷ Ame itre xaa ijin, angajoxu a upe la qeneqaja i nyidrë troa ithanata memine la itre jin, kösë nyidrëti hi la ka ithanata me angatr. Ketre tune mina fe, Iesu la qeneqaja i Iehova, matre ijiji nyidrëti hi troa ithanata kowe la itre atr, ngöne la ëje i Iehova.—Mat. 21:9; Luka 13:35.

8. Pine nemene matre “thei” Iesu la ëje i Iehova, lo nyidrëti pala kö e hnengödrai? (Esodro 23:20, 21)

⁸ Tusi Hmitrötr a hë Iesu ka hape, Trengewekë, ke nyidrëti la qeneqaja i Iehova. Nyidrëti la hna up troa tro fë la itre ithuemacany, me itre hna amekötin kowe la itre angela me itre atr. (Ioa. 1:1-3) Iesu hi lo angela hnei Iehova hna up, matre thupëne la angetre Isaraela ngöne la hnapapa. Hnei Iehova hna upe la nöje i Nyidrë troa drengethenge la angela cili, ke öni Nyidrë: “Thei angeice la ëjeng.”a (E jë la Esodro 23:20, 21.) Pëkö ketre atr ka isigölin me ahmitrötrëne la ëje i Iehova tui Iesu. Celë hi matre, “thei” nyidrë la ëje i Akötresie.

“KAKA, EPI TRO PE A AHMITRÖTRËNE LA ËJE I NYIPË”

9. Iesu kö a nyipiewekëne la ëje i Iehova? Qejepengöne jë.

⁹ Tune lo hne së hna ce wang, qane lo Iesu e hnengödrai, hnei nyidrë hna nyipiewekëne la ëje i Iehova. Matre tha sesëkötre kö së laka, hnei nyidrëti hna nyipiewekëne la ëje i Iehova e celë fen! Qëmeken troa nyipune la huliwa ne cainöje i nyidrë, öni nyidrë: “Kaka, epi tro pe a ahmitrötrëne la ëje i nyipë.” Canga sa jë hi Iehova qa hnengödrai, nge kola mexem tune la hedreng. Öni Nyidrë: “Ase hë ni ahmitrötrën ej, nge tro pala kö ni a ahmitrötrën.”—Ioa. 12:28.

10-11. (a) Hnei Iesu hna atrune tune kaa la ëje i Iehova? (Wange ju fe la foto.) (b) Pine nemen matre nyipiewekë troa ahmitrötrëne me isigöline la ëje i Iehova?

¹⁰ Hnei Iesu hna atrun la ëje i Iehova. Tune kaa? Hnei nyidrëti hna qaja koi itre xan la itre thiina i Iehova, me itre huliwa i Nyidrëti ka mingöming. Ngo hetre ketre ewekë nyine tro nyidrëti a kuca. Loi e tro fe Iesu a amamane ka hape, Iehova hmekuje hi la ka ijij troa mus, me ahmitrötrëne la ëje i Nyidrë.b Hnei Iesu hna amaman ka hape, ka nyipiewekë catre lai, lo nyidrëti a inine kowe la itretre dreng la tulu ne thith. Hnei nyidrëti hna upi angatr troa thith ka hape: “Kakati fe e koho hnengödrai, epi hmitrötr la ëje i nyipë.”—Mat. 6:9.

¹¹ Pine nemene matre nyipiewekë troa ahmitrötrën la ëje i Iehova me isigöli Nyidrë? Pine laka, ame ngöne la hlapa e Edrena, hnei Satana hna thaipiëne me qaja angazo Iehova Akötresie. Hnei Satana hna jele Iehova ka hape, atre thoi nge ka cipane la loi koi Adramu me Eva. (Gen. 3:1-5) Goi qaja fe angeic ka hape, ka ngazo la aqane ujë i Iehova. Hnene la itre trengathoi Satana hna adrone la ëje i Iehova. Ame e thupen ngöne la hneijine i Iobu, hnei Satana hna qaja ka hape, itre atr a nyihlue i Iehova göi thupen. Goi qaja fe angeic ka hape, pëkö ca atr ka troa nyihlue i Iehova ngöne la itupath. (Iobu 1:9-11; 2:4) Drei la atre thoi? Iehova maine Satana? Tro kö a mama e thupen.

“TRO NI A NUE LA MELENG”

12. Nemene la hnei Iesu hna kuca pine la ëje i Iehova?

¹² Pine laka, tru catre la ihnimi Iesu koi Iehova, matre aja i nyidrë troa ahmitrötrëne me isigöline la ëje i Iehova. Öni nyidrë “Tro ni a nue la meleng.” (Ioa. 10:17, 18) Eje hi, ka hnëkë hnyawa nyidrë troa meci pine la ëje i Iehova.c Hnei Adramu me Eva, lue atr ka pexej, hna nuetriji Iehova me xötrethenge Satana. Ame pena Iesu, aja i nyidrë troa traqa e celë fen, matre troa amamane la ihnimi nyidrëti koi Iehova. Hnei nyidrë hna amamane tune kaa? Hnei nyidrëti hna mele nyipici koi Iehova. (Heb. 4:15; 5:7-10) Eje hi, hnei nyidrëti hna mele nyipici uti hë la nyidrëti a mec hune la sinöe ne iaxösisi. (Heb. 12:2) Hnei nyidrëti hna amaman e cili la ihnimi nyidrëti koi Iehova me kowe la ëje i Nyidrë.

13. Pine nemene matre Iesu hi la ka ijij troa jelenyipicine ka hape, Satana la ka thoi? (Wange ju fe la foto.)

¹³ Jëne la aqane mele i Iesu, hnei nyidrëti hna jelenyipicine laka, Satana la ka thoi, ngo tha Iehova kö! (Ioa. 8:44) Pëkö ketre atr ka atre Iehova hnyawa tui Iesu. Maine ka nyipici ju la ketre trengathoi Satana, ke tro hi Iesu lai a atre. Ngo hnei nyidrëti pala hi hna isigöline la ëjene la Keme i nyidrë. Ame lo Iehova a nue Iesu hune la sinöe ne iaxösisi, ke aja i Iesu troa mec, hune la troa nuetriji Iehova.—Mat. 27:46.d

“HNENGE HNA . . . AFENESINE LA HULIWA HNEI NYIPËTI HNA AHNITHE KOI NI”

14. Hnei Iehova hna amanathithi Iesu tune kaa?

¹⁴ Ame lo hej qëmekene tro Iesu a mec, öni nyidrë e thith ka hape: “Hnenge hna . . . afenesine la huliwa hnei nyipëti hna ahnithe koi ni.” Xecie koi nyidrë laka, tro kö Iehova a amanathithi nyidrë, ke hnei nyidrëti hna mele nyipici. (Ioa. 17:4, 5) Nge ka mejiune nyidrë kowe la Keme i nyidrë. Tha aja i Iehova kö tro Iesu la lapa e hnine la hua. (It. Hu. 2:23, 24) Hnei Iehova hna amele Iesu hmaca, me hamë nyidrë la ketre göhnë ka tru e hnengödrai. (Fil. 2:8, 9) E thupen, hna acili Iesu troa joxu ne la Baselaia i Akötresie. Nemene la hna troa kuca hnene la Baselaia? Kola sa hnene la hnaaluene götran ne la tulu ne thith, kola hape: “Epi traqa pi la Baselaia i nyipë. Epi tro fe a eje la aja i nyipë e celë fen tun e koho hnengödrai.”—Mat. 6:10.

15. Nemene la hnei Iesu hna troa kuca?

¹⁵ Easenyi hë tro Iesu a isi memine la itre ithupëjia i Akötresie me apatrene la itre atr ka ngazo, ngöne la isi Amagedro. (Hna Am. 16:14, 16; 19:11-16) E thupen, tro nyidrëti a kuië Satana kowe “la hnaop ka jui nge ka thatrehmekun,” nge pëhë mene i angeic, kösë meci hë. (Hna Am. 20:1-3) Nge ame ngöne la ijine musi nyidrë, ka 1 000 lao macatre, tro nyidrëti a hamëne la tingeting kowe la fen, me xatuane la itre atr troa pexeje trootro. Nge tro nyidrëti a amelene hmaca la itre ka mec. Ketre tro nyidrëti a aparadraison asë la ihnadro. E cili, tro ha eatrëne la aja i Iehova!—Hna Am. 21:1-4.

16. Tro ha tune kaa la mel thupene la musi Iesu ka 1 000 lao macatre?

¹⁶ Tro ha tune kaa la mel thupene la musi Iesu ka 1 000 lao macatre? Patre hë la ngazo, nge pexeje hë së. Tha tro hmaca kö la itre atr a ietrane la itre ngazo i angatr, jëne la thupene mel. Ketre, tha nyipiewekë hmaca kö troa hetre atre itrosai maine atre huuj, matre hetre imelekeu me Iehova. Nge “tro ha apatrene la mec [qaathei Adramu], lo ithupëjia tixenuë.” Tro ha pë aliene la itre hua, ke ase hë amelene la itre ka mec. Nge troa pexej asë la itre atr.—1 Kor. 15:25, 26.

17-18. (a) Nemene la ewekë ka troa traqa ngöne la pun la 1 000 lao macatre? (b) Nemene la hnei Iesu hna troa kuca e fenesi hë la ijine musi nyidrë? (1 Korinito 15:24, 28) (Wange ju fe la foto.)

¹⁷ Nemene la ketre ewekë ka troa amamane ka hape, fenesi hë la ijine musi Iesu? Tro ha xeci kowe la itre atr ka hape, ka hmitrötr la ëje i Iehova, nge ka meköt Nyidrë. Pine nemen? Pine laka ame e Edrena, öni Satana lo, atre thoi Iehova nge ka pë ihnim la aqane musinëne Nyidrë la fen. Qane ekö, hnene la itre atr ka hnimi Nyidrë hna thel troa ahmitrötrëne la ëje i Nyidrë. Matre ame ngöne la pun la 1 000 lao macatre, ke tro ha ahmitrötrëne hnyawane la ëje i Nyidrë. Nge tro ha mama koi nöjei atr ka hape, Iehova hi la Kem ka ihnim.

¹⁸ Thupene la 1 000 lao macatre, tro hë la itre atr a atre ka hape, trengathoi lo hnei Satana hna qaja göi Iehova. Nemene la hnei Iesu hna troa kuca e fenesi hë la ijine musi nyidrë? Hapeu, tro kö nyidrëti a icilekeu koi Iehova tui Satana? Waea! (E jë la 1 Korinito 15:24, 28.) Tro hmaca Iesu a nue la Baselaia kowe la Keme i nyidrë, me thil kowe la Atre hamë mus. Eje hi, tha ceitu Iesu kö me Satana. Tru la ihnimi Iesu koi Iehova, matre tro Iesu a hamëne asë la men me musi nyidrëti koi Iehova.

19. Ka nyipiewekë kö la ëje i Iehova koi Iesu?

¹⁹ Tha sesëkötre kö së laka, hnei Iehova hna hamëne la ëje i Nyidrë koi Iesu! Hnei Iesu hna amaman ka hape, nyidrëti hnyawa hi la qeneqaja i Iehova. Ame koi nyidrë, pëkö ketre ewekë ka sisitria hune la ëje i Iehova. Nge aja i nyidrë troa meci pine la ëje cili. Thupene la 1 000 lao macatre, tro nyidrëti a nue hmaca la mus koi Iehova. Tro sa nyitipu Iesu tune kaa? Troa sa la hnyinge celë ngöne la tane mekun e thupen.