Nyiqaane Ithahnata Jë Jëne La Itre Tarak
1 Hapeu, nyipici laka, kola hetre thangane catre la hne së hna cainöj, qa ngöne laka, hne së hna thele troa nyiqaane ithahnata memine la itre atr? Ame la jole ka tru, ke, ene la troa qaja la ketre mekune ka troa ahlëne la aja ne la atr, me hane ketr la hni angeic. Ngo troa kuca tune kaa matre troa hetre thangane ka loi, la aqane cainöje cili?
2 Nyimutre la itretre cainöje ka öhne laka, atreine hi troa nyiqaane ithahnata memine la itre atr jëne la itre tarak, ngo troa iëne hnyawa la itre hnepe hnëewekë nyine troa pane qaja. Lolo catre la itre taan, nyimu hane la itre iatr, nge canga hule hi la itre lue meke së. Thaa tro kö a sixele la itre atr troa xome la tarak, pine laka, co hi la nyine troa e. Ketre, canga trotrohnine hi së, nge hetre ajane së troa e la itre maca e hnine la itre tarak, nge atreine hi troa nyiqaane etid jëne itre ej.
3 Celë fe mekune ka eje thene la ketre trejine föe, öni eahlo ka hape: “Ame ngöne la fene ka jole celë, thaa nyipi ewekëne hë la itre atr la e tus, ngo ijije hi tro la itre tarake a hamëne la maca ka sisitria; thipëne pë hë angatr, nge atre hë angatre la aliene itre ej. Hnenge hna e la itre tarake ka nyimutre, nge enehila atre hë ni la nyipici.” Thaa tro pi kö së a wanga hmaloeëne la mene ne la Wesi Ula i Akötresie hna qeje pengöne jëne la itre maca ka xoxopatr, hna cinyihane hnine la itre tarak.—Heb. 4:12.
4 Foa Lao Mekune Nyine Ixatua Ka Hmaloi: Ala nyimu la itre trejine ka madrine troa xome la itre aqane nyiqaane ithahnata ka hmaloi. (1) Amamane jë la itre xaa tarak, nge hnyingëne jë kowe lai atr la tarak hna ajane troa ithahnatan. (2) Thupene la hna iëne la caas, qaja jë la ketre hnyinge hna hnëkëne hnyawa ka troa köjane la mekune ka tru hnine la tarak. (3) E jë la ketre paragarafe ka sa lai hnying, maine ketre xötre pena hnine la tarak. (4) Maine kola drei së hnene lai atr, haawe, ithahnatane jë la itre aliene lai tarak, maine xome jë pena la itre xaa mekune ka ijije qa hnine la ketre ini ne la boroshür, Thele, maine qa hnine la ketre mekene la itus, Atrehmekune. Aqane tro fe së lai a eatrongë angatr, troa hane inine la Tusi Hmitrötr. Hane cahu itre mekune ka troa xatua së, troa hnëkëne la nyine troa qaja ngöne la kola tro fë la foa lao tarak.
5 Troa hnyinge jëne la taan la tarak celë hna hape “ Qui domine vraiment le monde ? ” : Maine tro la ketre atr hne së hna ithahnata memin, a sa la hnyinge cili, me hape “Akötresie” maine “thatre kö ni,” e jë la lue pane hnëewekë ngöne götrane 2 memine la pane paragarafe ne götrane 3. Amamane jë la 1 Ioane 5:19 me Hna Amamane 12:9. Ngacama kola luelue maine atre hi lai atr ka hape, ka mele Satana lo Diabolo, maine öhne hi angeice la aqane ajojezine nyëne la fen, haawe, sisedrëne jë la porotrike me ce ithahnatane la topike cili, jëne la itre mekune hna cinyihane acon, hna hape “L’origine des conditions mondiales.” Maine kola drei së hnene lai atr, xome jë la itre mekune ngöne götrane 3 me 4 ne la tarak, matre troa qaja la götrane hna xulu qa ngön hnei Diabolo.
6 Atreine hi troa canga ahlëne la aja ne la itre atr hnene la tarak “ Quel espoir y a-t-il pour nos chers disparus ? ” Pane qaja jë ka hape:
◼ “Hapeue la mekuna i nyipë, atreine kö tro së a iöhnyi hmaca memine la itre atr hne së hna hnim, ka meci hë?” Thupene la hna sa hnene la atr, amamane jë la hnaaluene paragarafe götrane 4 ne la tarak nge e jë la Ioane 5:28, 29. Thupene lai, qaja jë ka hape, eje a xatua së troa trotrohnine la ithuemacanyi ngöne la pane taane ka co hna cinyihane hnine la tarak. Sipone jë troa pane ce ithahnatane ej.
7 Ketre ixatua ka tru kowe la itre hnepe lapa e cailo fen, la tarak “ Une vie de famille agréable. ” Xome jë nge qaja jë ka hape:
◼ “Maine jë nyipëti a hane öhne laka, kola jole la itre hnepe lapa ngöne la hnedrai së. Hapeue la mekuna i nyipë, Nemene la nyine troa kuca matre troa acatrene la itre otrene la hnepe lapa?” Thupene la hna sa hnene lai atr, amamane jë la itre mekune ngöne la pane paragarafe ngöne götrane 6. Xome jë la ketre xötre hna cinyihane ngöne götrane 4 me 5 ne la tarak, nge qeje pengöne jë la aliene ej. Thupene lai, sipone jë troa etidi me angeic.
8 Atreine hi troa xome la aqane nyiqaane ithahnata celë, jëne la tarak “ Pourquoi avoir confiance en la Bible ” :
◼ “Ala nyimu la itre atr ka atre la mele i Kaina me Abela, hna cinyihane hnine la pane tusi ne la Tusi Hmitrötr. Kolo fe a hane qaja hnene la tusi Genese, lo föe i Kaina. Atre fe hi epuni ka hape, ka xulu qaa kaa nyidro?” Xome jë la paragarafe tixenuë ne la götrane 2 ne la tarak, matre troa sa lai hnying. Qaja jë ka hape kola ithahnatane hnene la tarake la itre mekune ka sisitria qa hnine la Tusi Hmitrötr, göne la itre drai elany. Nyiqaane jë troa ithahnatane la hnaakönine paragarafe ngöne götrane 5, nge xome jë fe la itre xötre qa hnine la Tusi Hmitrötr matre troa anyipicin.
9 Kolo pala hi a mama laka, hetre thangane ka loi la troa tro fë tarak, ketre aqane troa tro fë maca ka loi ka lolo catr. Pine laka, hmaloi e troa xome trongën, haawe, ijije hi tro së a tro fë itre eje ngöne la hna cainöje ngöne itre hnalapa trootro, me ngöne la easë a cainöje ngöne la nöjei ijin. Nyipi ewekë catre la itre tarak, pine laka, itre eje a aijijë së troa eatrëne hnyawa la huliwa ne cainöje së. Xome jë la nyimu pengöne tarak, nge thele jë la nöjei aqane troa nyiqaane ithahnata jëne itre ej.—Kol. 4:17.