Kola Sa La Itre Hnyinge i Nyipunie
◼ Pine nemene matre hetre thangane ka loi koi së, tro sa hane goeëne la itre xötre hna upi së troa xome hnene la ketre trejine ka hamë cainöj?
Nyipi ewekë tro angeice a wangatrune la troa e la itre mekune nyine ithahnatan, nge loi e tro fe a wange la itre xötre ne la Tusi Hmitrötr, matre troa atrehmekune la itre nyine troa ce xome memine la itre atr ka drenge la cainöj.
Ame la ketre kepine matre easë a e la itre xötre ne la Tusi Hmitrötr, ke ene la troa anyipicine ka hape, ame la hne së hna qaja, ke qa hnine la Tusi Hmitrötr. (Ite Huliwa 17:11) Ame la ketre aja ne la ka hamë cainöj, ke, ene la troa wange hnyawa la itre xötre ka troa eköthe la itre mekune hna troa ithahnatan, ene pe tro ha acatrene la lapaune së asë. Maine tro së a öhne la enyipicine la Tusi Hmitrötr, nge kola e la mekune ka tru ne lai xötr, eje hi lai laka, tro ha lapa catre la mekune cili ngöne la itre he së. Ketre, maine tro mina fe së a hane xomi not, me trotrohnine hnyawa la itre mekune ka nyimutre hna hamën, eje hi laka, troa hetre thangane ka loi së.
Ame la kola hamëne la nyimu xötre hnei Sasaiatri ngöne la ketre cainöj, ke nyine thatraqane hi la atre cile fë cainöj, matre troa xatua angeice ngöne la angeice a hnëkë. Ketre ceitune itre eje me iafitrene la ithuemacanyi hna troa hamën, nge nyine tro fe a xatuane angeice troa hneheene la itre trepene meköti qa hnine la Tusi Hmitrötr, nge matre troa trotrohnine fe la aqane troa tro xome la cainöj. Tro la ka cile fë cainöje a iëne la itre xötre ka nyipi ewekë troa xome matre troa eköthe la cainöj, me sipone kowe la itre ka drei angeice troa ce xome me ce e itre ej, me qeje pengön. Ame itre xaa xötr hna hamëne hnine la cainöj, ke, maine jë tro hi a qaja la mekene me xötr, maine tro hi a qaja la aliene itre ej, ngo thaa nyipi ewekë kö troa ce xome itre eje memine la itre ka drenge la cainöj.
Loi e tro fe la ka cainöje a xome la Tusi Hmitrötr matre troa e la itre xötr, ngo thaa tro kö a nyihnane hnene la hna cinyihane hë e hnine la ipepa. Ame la kola sipone hnene la ka cainöje troa ce e me angeice la itre xötr, loi e tro pala hi angeice a qaja amamane la tus, me meken, memine la itre xötr. Nyipi ewekë troa hnyinge ngöne la kola thele la mekene tus hnene la itre atr, maine troa nango amexeje la kepine matre kola troa xome lai xötr hna troa e, ketre matre hetre ijine ne la itre atr troa xome lai xötr. Loi mina fe troa anyimua qaja la xötre hna troa xom. Ngo ma thaa nyipi loi kö e troa hamëne la götrane hna troa xome ngön la xötr, pine laka, thaa ceitune jë kö la itre Tusi Hmitrötre thene la itre ka drenge la cainöj. Maine troa sipo së troa thele ngöne la Tusi Hmitrötre së, eje hi laka, tro sa nyitrepene hnyawa la aqane tro së a e la itre xötre ne la Tusi Hmitrötr, eje hi laka, tro ha xatua së troa kepe thangane hnyawa la mene ne la Wesi Ula i Akötresie, ke, kola qeje pengöne eje ngöne la kola kuca la cainöj.—Heb. 4:12.