Catre Pi Së “Ngöne La Huliwa Ka Loi”
1 Easë hë a hane kuca la itre ewekë ka loi, qa ngöne laka, easë fe hë a hane nyihlue i Iehova Akötresie. Ngo ame ngöne la itre hneijine ka ngazo celë, ame la jole ka tru, ke ene la troa kuca me catre “ngöne la huliwa ka loi.” (Gal. 6:9) Ngacama thaa ewekë ka hmaloi kö koi së, ngo atreine hi tro sa traqa kowe lai. Troa tune kaa?
2 Loi e Troa Eje Fe The Së La Aqane Mekune i Iesu: Atreine hi tro sa hane catre cile huti pala hi tui Iesu, ngöne la itre itupath, e hne së hna amë hutine pala hi la mekune së ngöne la mejiune së kowe la Baselaia. (Heb. 12:2, 3) Loi e xecie pala hi koi së laka, Iehova a hnimi së, nge aja i Nyidrëti tro sa hune ngöne la itre itupath. (2 Pet. 3:9) Lapaune jë koi Nyidrë, me mejiune laka, tro Nyidrëti a xatua së. (1 Kor. 10:13) Catre pi së troa thith, me sipo Iehova troa xatua së troa xomihni ahoeany. (Rom. 12:12) Madrine jë me mejiune laka, pine la hne së hna xomihni ahoeany, tro ha jele meköti së xajawai Akötresie. (Rom. 5:3-5) Qa ngöne laka, easë a mele nyipici, me thele troa “ce hni thenge Iesu Keriso,” haawe tro ha hetrenyi the së la madrine, nge easë mina fe a amadrinë Iehova.—Rom. 15:5; Ite edomë 27:11.
3 Catre Pi Së Troa Kuca La Itre Huliwa Ka Meköt: Loi e tro së a eatrëne asë la nöjei hnei Iehova hna amekötine koi së, nyine troa xatua së troa kuca la itre huliwa ka loi. Nyipi ewekë troa majemine e pala hi la Wesi Ula i Akötresie, me thele ini qa ngöne la itre itusi ka qeje pengöne la Tusi Hmitrötr, hna hamë së hnene la hlue ka nyipici me ka inamacan. Loi e tro mina fe së a catre hnëkëne me sine la nöjei icasikeu asë ne la ekalesia, me hane qeje mekune ngöne itre ej. Qëmekene me thupene la itre icasikeu së, loi e tro së a thele troa pane hane porotrike memine la itre trejine me easë trahmanyi me föe ngöne la götrane la ua. Loi e tro sa thele troa atreine tuluthe hnyawa pala hi la itre hne së hna ajane troa kuca ngöne la huliwa ne cainöj, matre troa hetre madrine së troa cainöje trootro, nge troa kökötre lolo pala hi la aqane tro së a tro fë la maca ka loi kowe la itre xaa atr.
4 Ame la ka nyipi ewekë ke ene laka, ame la easë a catre kuca la itre ewekë ka loi, easë mina fe a kapa la itre madrine ka tru. Celë hi matre hna qaja hnene la ketre trejine qaa Italie ka hape: “Hejiheji hë eni hmaca ha a bëeke kowe la hnalapa i eni thupene la caa drai ka pexeje ne huliwa koi Iehova; nyipici laka, nango kucakuca ni. Ngo eni a madrin, nge eni a olene koi Iehova la hnei Nyidrëti hna hamëne koi ni la ketre madrine hna thatreine troa thapa hnei atr.” Qa ngöne lai, catre pi së troa kuca la itre hulliwa ka loi, nge tro ha hetenyi fe the së la madrine atraqatr.