The Tro Kö Sa Luelue Troa Cainöj
1 Maine easa hnëkë troa cainöje ngöne la itre hnalapa trootro, ke, ame la jole nyine tro sa cile kow, tre, thaa eje kö laka hna thipetrije la maca ka loi hnene la itre atr, ngo kola mama laka, easë la ka thele jol. Maine hetrenyi the së la itre mekune ka ajolë së, haawe, tro hë së a luelue troa hane qaja la nyipici kowe “la nöjei ate.” (1 Tim. 2:4) Ngo, loi e thaa tro pi kö sa luelue troa cainöjëne la maca ka loi. Pine nemen?
2 Ketre Maca Qaathei Iehova: Hnei Iehova hna hamëne la wesi ula i Nyidrë jëne la Tusi Hmitrötr. Ame la easë a tro fë la maca celë kowe la itre xaa atr, ke, easë hi lai a qaja trongëne la itre mekune i Nyidrë, ngo thaa itre mekune së kö. (Rom. 10:13-15) Maine tro la itre atr a thipetrije la maca ne la Baselaia, ke, kösë angatre hi lai a thipetriji Iehova. Ngo, thaa tro pi kö sa kucakuca. Easë a mejiune laka, troa kapa la maca celë hnene la itre atr ka ajane troa saze la itre aqane mele e celë fene hnengödrai, nge ka thele la itre aja ngöne la götrane la ua.—Ezek. 9:4; Mat. 5:3, 6.
3 Iehova a Ea La Itre Atr: Ma tro la ketre atr ka xele ma drei së ekö a hmala troa porotrike me easë enehila, qa ngöne laka, saze hë la aqane mele i angeic, nge menyike hë la hni angeic. Haawe, maine jë tro Iehova a fe amamane la ihnimi Nyidrë kowe lai atr, me ‘e angeic.’ (Ioane 6:44, 65) Maine kola eatre la ewekë celë, ke, loi e hetrenyi the së la ajane troa nue Iehova, me itre angela troa eatrongë së, matre troa öhne la itre atr cili.—Hna ama. 14:6.
4 Akötresieti a Hamë Së La Uati Hmitrötre i Nyidrë: Kola aijijë së hnene la uati hmitrötre troa “qaja catëne göi [“Iehova,” MN].” (Ite Huliwa 14:1-3) Haawe, maine easë a lapa mekune laka, the së la manathithi ka tru cili ngöne la huliwa ne cainöje së, ke, thaa tro kö sa cile troa qaja la nyipici kowe la itre atr ka lapa ezi së, me itre sine huliwa së, me itre sine ini së, me itre sinee së, maine itre atr ka sisedrëne la itre ini ka tru, maine pena itre atr ka trenamo.
5 Hnei Iesu Hna Ini Së La Aqane Troa Kuca: Hnei Iesu hna xome la itre hnyinge ka ahlëne la aja ne la itre atr, me qaja la itre ceitune ka ihmeku memine la aqane mele i angatr e celë fen, me thele mekune hnine la Tusi Hmitrötr. Hnei nyidrëti hna qeje pengöne hnyawa la nyipici, nge menyike me lolo la aqane ithahnata i nyidrë, nge qaa kuhu hni. Celë hi itre aqane kuca lai ka sisitria, a ka hetre thangan ka lolo pala fe enehila. (1 Kor. 4:17) Ma isa pengöne kö la aqane mele ne la itre atr hne së hna cainöje kow enehila, ngo ame pe, ke, caasi pala hi la mene ne la maca ne Baselaia.
6 Hnei Iehova hna hamëne koi së la ketre hnëqa ka lolo, ene la troa xatuane la itre atr jëne la ketre aqane huliwa ka caas, nge ka sisitria. The cile kö së troa cainöj! Epi tro sa catr, me aijijë Iehova troa “fe koi [së] la jëne wesi ula” matre hetre trenge catre së troa qaja la maca ka loi kowe la itre xaa atr.—Kol. 4:2-4.