Ijije Kö Tro Nyipunie a Hane Cainöj Ngöne La Itre Götran Gaa Aja Ixatua Catr?
1 Hane kö nyipunieti mekun troa hane tro kowe la ketre nöj gaa aja ka tro fë maca ne Baselaia? Maine hna hë ka hape, “tropi e kolemi . . . troa ixatua,” hapeu, tro kö nyipunieti a hane nangën tui Paulo, la ihë cili? (Ite Huliwa 16:9, 10) Nyimutre la itre ekalesia ka ajan troa ixatua hnene la itre hnepe lapa ka macaj ngöne la ua, maine itre pionie matre troa ixatua kuca la itre teritoar, maine itre qatre thup me itre drikona matre troa ixatua elemeken la ekalesia. Atraqatre catr la itre götran hnë troa cainöje ngön, itre tribu maine itre hnapet. Maine jë ka nanyi catr la itre götrane cili kowe la Uma ne Baselaia. Maine jë thaa ka hmaloi kö e troa öhnyi huliwa ngöne la götrane cili. Hapeu, ijiji nyipunieti hi troa hane cil kowe la itupathi cili? Nemene la aqane troa cil kowe la itre jole cili?
2 Nyipi Ewekë La Lapaun Memine La Mejiun: Thenge la hna amekötin hnei Akötresie, hnei Aberahama hna nue pe la uma i nyidrë e Ura, me trongën la 1 000 lao kilomet a tro Harana, nyidrë me föe i nyidrë, me utha e nyidrë, me keme i nyidrë ka qatre hë, ene Tera. (Gen. 11:31, 32; Neh. 9:7) Meci hë Tera, nge 75 hë lao macatre i Aberahama, haawe, hnei Iehova hna upi nyidrë troa tro qaa Harana me itre sinee i nyidrë, me tro kowe la ketre nöje tro Akötresie a amaman koi nyidrë. Aberahama, me Sara, me Lota a “tropi.” (Gen. 12:1, 4, 5) Eje hi laka, thaa Aberahama kö a tro troa ixatua ngöne la ketre götran gaa aja ka cainöj. Ngo thaa ka hmaloi kö lai mekun hna kapa. Nemene la ewekë hna troa thele thei angeic?
3 Nyipi ewekë koi Aberahama troa lapaun, me mejiun, ngöne la nyidrë a troa iën me xome la hnëqa hna ahnith koi nyidrë. Tro ha saze la aqane mekune i nyidrë, me aqane mele i nyidrë. Nyidrëti a troa tro qa ngöne la ketre götran, nyidrëti a mele ka loi memine la itre lapa i nyidrë. Ngo hnei nyidrë hna mejiun koi Iehova troa thupë nyidrëti memine la lapa i nyidrë. Nyimutre enehila la itre atr ka mejiun tune lai koi Iehova.
4 Ketre Hnepe Ijine Troa Xome La Itre Hnëqa: Hane kö nyipunieti kapa la itre manathith ka nyimutre qa ngöne la hna huliwa ngöne la ketre teritoar ka lapa caas? Ame ngöne lo macatre hnapan, kola öhn ngöne la itre nöj la itre ka cainöj, itre thauzan la etrun, hnei angatre hna xatuan la itre ekalesia ka nyimutre catr, matre troa cainöj ngöne la itre teritoar hna thaa majemine kö troa cainöje ngön. Ame koi itre xan, ke angatre a troa nyenyapën la itre gojeny ka nany. Hapeu, nyipi ewekë kö la trenge catr hna kuca?
5 Hna cinyihan hnene la ketre trejin ka hape: “Ame la kola xötrei ithanatan koi eni me sipo ni troa xom la ketre gurup, troa kuca la ketre teritoar thaa hna majemine kö troa cainöje ngön, hnenge hna nango luelue. Ngo kapa pi kö ni lai hnëqa. Atraqatre la madrineng, nge ketre kola saze la aqane meleng. Eni a olen koi Iehova ngöne la nöjei drai, la hnei nyidrëti hna hane aijijë ni troa hane sin la trongen lo lai itretre tro troa cainöj.” Hna qaja mina fe hnene la ketre trejine ka hape, ngöne 20 lao macatre ne melën angeic la nyipici, ketre ewekë lai hna thatrein hnei angeic troa thëthëhmin! Hna qaja hnene la ketre thöth, ka hape: “Kete ewekë lai ka sisitria catr ngöne la meleng!” Kola aejën la mekune hnene la itretre cainöj, ene laka, maine tro së a hane tro troa cainöj ngöne la ketre götran gaa aja ka troa tro fë la maca ka loi, ngacama hnepe ijine hi, ke, tro ha kökötr the së la madrin me aja kowe la huliwa ne cainöj. Ithahnata jë memine la itre trejin ka ixatua hë tune lai. Tro hë nyipunieti a öhne laka, hnei angatre hna kökötr ngöne la götrane la ua, nge angatre hmaca a ajan troa huliwa tun, elanyi e kolo hmaca a ihë.
6 Maine tro së a kapa la mekun, ene la troa hane ixatua ngöne la ketre götran gaa aja ixatua koi hnepe ketre ijine hi, haawe troa hetre ketre thangane lai. Ame la itre ka kuca tune lai, ke hetrenyi hë thei angatr la ketre ithuemacany ka lolo ka troa xatua angatr troa “e la thupen” e angatre a mekun troa mele pena ha ngöne la ketre nöj.—Luka 14:28.
7 Ka pexeje la mekune i Iehova troa ahlemun la maca ka loi “e cailo fen” qëmeken troa traqa la pun. (Mat. 24:14) Haawe, tune kaa fe së, maine ijije koi së, hetre hni ne ajane së fe kö troa tro kowe la ketre götran gaa aja ixatua? Nyimutre la itre götran ka tune lai. Atreine hi troa qaja koi nyipunie hnene la atre thupën la sirkoskripsio, la itre götran gaa aja ixatua.
8 Loi e Tro Së Kowe La Ketre Götran Gaa Aja Ixatua: Hapeu, thaa nyipunieti hmaca kö a huliwa i maseta? Lolo hi la etrun la manie hna lapaa kapa pë hë e pune treu? Maine thaa ijije kö, hapeu matre thel hnei nyipunie troa ketre sipu huliwa koi nyipunie? Hapeu, ijije kö tro nyipunie a kuca la ketre ewekë nyine jëne mani qa ngöne la ketre götran, hna jëne telefon, maine ordinatör? Maine thaa ijije kö tro nyipunie a tro kowe la ketre götran, hapeu, atreine kö tro nyipunie a xatuan la itre atren la fami ka troa cainöj ngöne la ketre götran?
9 Maine thupen la hne së hna thithi fë la mekun cili, nge easë a öhn laka, ijiji së hi troa cil kowe la jole cili, ene la troa tro troa mele ngöne la ketre götran gaa aja ixatua, haawe, ce ithanatane jë lai hnene la fami i nyipunie memine la itre qatre thup ne la ekalesia i nyipunie. Thupene lai, hnëkëne jë la ketre tus, nge hamëne jë kowe la itre qatre thup, matre tro angatre a pane ce wang, me ce axeciën la mekun nyine troa xom, qëmekene troa iupi fë ej kowe la Bethela.
10 Nemene la nyine tro nyipunie a hane qaja fe ngöne la tusi nyipunie? Macatre i nyipunie, me ijine xome la bapataiso, me itre hnëqa hna cilën hnine la ekalesia, ka faipoipo maine ka thaa faipoipo pena, cinyihane ju fe maine hetre nekönatr. Qaja jë la ejen la götran hnei nyipunie hna ajan troa ixatua ngön, thenge la itre aja ka ej thei nyipunie.
11 Hapeu, ka catre cainöj nyipunie, nge hetre hni ne ajane i nyipunie troa huliwa? Hapeue la mele i nyipunie, pëkö ejolen koi nyipunie troa hane ixatua ngöne la itre götran gaa aja ixatua? Maine ijije hi, haawe, goeëne jë së la aqane catre Iehova neng la itre manathith ka nyimutre kowe la itre atr ka mejiune koi Nyidrë, qa ngöne laka, angatre pala hi a isa hujën la mele i angatr thatraqane la huliwa i Nyidrë!—Sal. 34:8; Mal. 3:10.