Itre Ijine Mano Kö Ngöne Göhnen Itre Ej
1 Ame ngöne la itre hneijin ka jol celë, easë asë hi a ajan troa pane nango mano ngöne la itre xaa ijin. Haawe, hetreny la itre xaa ewekë ka ijij troa kuca ngöne la itre ijine cili. Ngo eje hi lai laka, maine ketre tru menu pala ha la itre ijin hna xom troa mano me kuci madrin, haawe, tro ha xeexe amekölen la atr, matre co kötre hë la aja memin la traem ne troa thel la itre huliwa ngöne la götran la ua. Qa ngöne lai, loi e tro së a amë la itre ijin mano me madrin ngöne kö la itre göhnen itre ej. (Mat. 5:3) Troa tune kaa? Ene la troa xötrethenge la eamo hna hamën ngöne la Efeso 5:15-17.
2 Loi e Troa Ami Ifego: Hnei Paulo hna cinyihan ka hape, loi e tro la itre Keresiano a “wange hnyawa” la aqane tro angatr a huliwan inamacanën la mele i angatr. Nyipi ewekë tro angatr a atreine tulu ewekë, me xomihni, ngöne la aqane tro angatr a tuluth la itre ijine angatr a troa mano. Ka lolo catr tro së a mekun hnyawa la aqane tro së a xom la itre traem ne troa mano. Loi e troa nyine loi koi së la itre ijine mano me madrin hne së hna xom, ngo thaa tro kö a mama koi së laka, hne së hna aluuzin la traeme së, maine kuca kuca hmaca pena ha së thupen la itre ijine mano cili. Maine easë a öhn laka, thupen la hne së hna kuca la ketre nyine madrin, pëkö madrine së, pëkö thangan ka loi hne së hna kapa, nge jole hmaca pena ha la mekuthethewe së thupen la hne së hna kuca la ketre huliwa, haawe, kolo hi lai a amaman ka hape, nyipi ewekë tro së a pane wang hmaca la aqan huliwane së la traeme së.
3 Loi Tro Së a Atrein Tulu Ewekë: Hnei Paulo hna hamën la eamo ngöne la aqan troa “anyipi ewekëne la nöjei ijin” thatraqan la itre ewekë ka sisitria kowe la mel, ngo thaa tro kö a “wangadrapa.” Thaa loi kö e tro la itre Keresiano hlue i Akötresie, a eköth la mele i angatr hune la itre nyine madrin. Maine nyipici laka, ame la troa pane mano, ngöne la itre nyine madrin, tre itre ijine lai ka troa pane ahnyipixen hmaca la trenge catr ne la ngönetrei së, ngo ame la qeqen la trenge catr ngöne la ua, ke easë a kapa jën la uati hmitrötre i Akötresie. (Is. 40:29-31) Easë a kapa la uati hmitrötr jën la itre huliwa qaathei Akötresie—ene la troa inin la Tusi Hmitrötr, me sin la itre icasikeu ne la ekalesia, me hane cainöje trootro—ngo thaa jëne ijine mano kö, me itre nyine madrin.
4 Loi e Troa Amë Panën La Itre Huliwa Ka Sisitria: Hnei Paulo hna inin la itre Keresiano troa “trotrohnine la aja i Joxu [Iehova]. Hnei Iesu hna ini së tro la itre huliwa së a sajuën la Baselaia i Akötresie, nge loi e troa amë panën itre ej ngöne la mele së. (Mat. 6:33) Loi e tro së a kuca panën la itre ewekë ka troa aijijë së troa eatrën lo hne së hna sisiny, laka, troa nue la mele së koi Nyidrë. Qa ngöne lai, tro pë hë la itre ijine mano me madrin a isa lapa ngöne kö lo itre sipu göhnen itre ej. Maine tro së a kuca tune lai, troa pë ethan itre ej kowe la mele së, nge ketre, tro ha atraqatr catr pala hi la madrin hne së hna kapa qa ngön itre ej.—Ate Cai. 5:12.