Huliwane Inamacanëne Jë La Traeme Së
1 Kola upi së hnene la ajan troa amadrinë Iehova, troa nyitrepene la mele së hnene la itre huliwa ne la ua. Wesi Ula i Nyidrë a ini së troa ‘thele panën la baselaia’ me “tupathe la nöjei ewekë ka [“sisitria,” MN].” (Mat. 6:33; Fil. 1:10) Tro sa amë panën tune kaa la traeme së thatraqane la itre aja ne la Baselaia, nge pine pë hë la itre huliwa ka thaa nyipi ewekë ngöne la isa göhnëne itre ej?—Efe. 5:15-17.
2 Pane La Itre Huliwa Ne La Baselaia: Eköthe hnyawa jë la traeme së matre thaa tro kö a aluuzin hnene la itre huliwa ka thaa nyipi ewekë kö. Itre xan a hnëkëne amë e nöjei treu ngöne la idrai, la itre ijine troa cainöje trootro. Nge angatr a thupën wanga nyihnane la itre hna ahnith amë hë. Atreine fe tro sa ami ijin thatraqane la itre icasikeu, me sipu ini tusi së me itre kovasio. Nyimutre la itre ka nyiqaane la drai me nyipune ej hnei e Tusi Hmitrötr. Axeciëne hnyawa jë la ijine ka ijij kowe la itre huliwa ka tru, nge the nue kö troa xom ej hnene la itre xan ka thaa nyipi ewekë kö.—Ate Cai. 3:1; 1 Kor. 14:40.
3 The Lö Hnine Menune Kö La Fen: Ka hmaloi troa kuca ngöne la itre xaa nöj la itre elo, itre nyine madrin, me ijine mano, me itre xaa aja ju kö. Nyimutre la itre ka wai televizio lapaa maine kuci ordinatör. Ngo maine hne së hna xome menune pala ha la itre nyine madrin me itre ewekë ka hnyipixe ne la fene celë, tro ha ajojezin la mele së. (1 Ioane 2:15-17) Haawe, Tusi Hmitrötr a hmekë së matre thaa tro kö sa lö hnine menune la fen. (1 Kor. 7:31) E tro sa drenge hnyawa la eamo ka inamacan, atreine hi tro sa amamane koi Iehova laka, easë a amë panën la hmi Nyidrë.—Mat. 6:19-21.
4 Hna e pe hi la itre drai ne la fene ka ngazo celë. Tro ha madrin me kapa hnei Akötresie la itre ka amë panën la itre aja ne la Baselaia. (Ite edomë 8:32-35; Iako. 1:25) Haawe, catre pi së troa huliwane inamacanën la itre mo së me traeme së.