Eköthe Jë La Mele i Epuni Hune La Huliwa i Akötresie
1 Hnei Iesu hna aceitunëne la itretre drei nyidrë memine la lue atr ka acili uma. Hna eköthe hnene la ketre, la mele i angeice hune la etë, ene la drenge thenge Keriso; celë hi matre angeice a atreine cile kowe la itre akötre ka xulu qa ngöne la hna icilekeu me iakötrë. Ame ketre, ke hnei angeice hna eköthe la mele i angeice hune la ngöni, ene laka kola ketre sipu kuci mekune me thaa idrei, matre pëkö trenge catre troa cile catre ngöne la kola traqa la itre itupath. (Mat. 7:24-27) Pine laka, easë a mele ngöne la pune la fene hnengödrai, haawe, nyimutre la itre ewekë ka ngazo ka traqa koi së. Calemi hë la iakötrë ka tru, nge itre iawe ne qajaqaja eje a hmeköni trootro. Hapeu, tro kö së a hane cile huti uti hë la pun, me catre fë la lapaune së? (Mat. 24:3, 13, 21) Atreine hi tro sa hun, e hne së hna nyiqaane eköthe hnyawa la mele së enehila. Qa ngöne lai, nyipi ewekë tro sa isa thele ka hape, ‘Hapeu, pine laka keresiano ni, eni kö a hane ekögölithe hnyawa la melenge hnene la idrengethenge kowe la huliwa i Akötresie?’
2 Nemene la aliene la trenge ewekë celë hna qaja ka hape, troa eköthe la mele së hune la huliwa i Iehova? Kolo la a hape, troa xomi Iehova nyine trepene la mele së. Qa ngöne lai, nyipi ewekë troa sisitria la ajane the së troa cilëgöline la Baselaia. Kolo mina fe a hape, troa drenge thenge Akötresie ngöne la itre huliwa asë hne së hna kuca ngöne la nöjei drai ne mele së. Kola thele mina fe the së troa hetre hni ne ajane troa isa inine la Tusi Hmitrötr, isa ala caas, me e hnine la hnepe lapa, me hnine la ekalesia, me jëne la huliwa ne cainöje trootro; nge loi e troa itre ewekë lai ka troa sisitria ngöne la mele së, hna troa pane kuca pala hi. (Ate cai. 12:13; Mat. 6:33) Maine tro pala hi së a catre drenge thenge ngöne la mele së, haawe, tro la lapaune së a kösë hna eköthe hune la etë, nge thatreine jë kö troa akeine eje hnene la itre ethane la itre akötre me itre hace ka troa traqa koi së.
3 Atraqatre la madrine së troa goeëne la itre atr, itre milio la etrun, angatre a lapaune me eköthe la mele i angatre me mejiune kowe la itre drai elany, hune la huliwa i Akötresie, tune la hna kuca hnei Iesu. (Ioane 4:34) Angatre a trongëne hnyawa pala hi la porogarame ne la itre huliwa qa thei Akötresie, me kapa la itre thangane ka lolo qa ngön. Hna qeje pengöne hnene la ketre föe la eloine la aqane hiane eahlo la lue nekö i eahlo trahmanyi matre tro nyidroti a hane nyihluei Iehova: “Hne huni pala hi hna melëne la nyipici; eahuni a sine la nöjei asabele asë, me hnëkëne la itre icasikeu me hane sine itre ej, nge ame la troa cainöje lapaa, ke, celë hi ketre ewekë lai ka sisitria ne la mele hun.” Hna qaja fe hnene la fö i eahlo ka hape: “Ame la nyipici, thaa ketre götrane kö la mele hun, ngo celë hi mele hun. Ame pë hë la itre xaa ewekë, ke, hna amë asë xötreithe ej.” Hapeue la hnepe lapa i epun, eje kö a hane amë panëne la hmi i Iehova ngöne la mele ne ej?
4 Kuca Jë La Ketre Porogarame Ne Huliwa Thatraqane La Wiik: Kola xatua së hnene la organizasio i Iehova troa trongëne la ketre hna majemine ka lolo ngöne la ua, ene laka, hna hnëkëne la faifi lao icasikeu ngöne la wiik. Ame la itre Keresiano ka eköthe la mele i angatre hune la hmi i Iehova, angatre a hnëkëne me amë ijije la huliwa memine la itre xaa jole e hnine la fami, matre atreine troa hane sine la itre icasikeu asë ke, jëne mele lai koi angatr. Thaa hnei angatre kö hna nue la itre xaa mekune ka thaa nyipi ewekë kö troa thungijë i angatre troa sine pala hi la itre icasikeu.—Fil. 1:10; Heb. 10:25.
5 Kola wangatrehmekune hnyawa hnene la itre trejine ka macaje la mekune ka hape, maine nyipici laka, nyipi ewekë troa xeni pala hi ngöne la itre xaa hawa, me ngöne la nöjei drai, haawe, sisitria catre fe troa hnëkëne la ketre porogarame ka lolo thatraqai së isa ala caas, me kowe fe la ini tusi ne la hnepe lapa, ketre tune mina fe göi troa hnëkëne la itre icasikeu. (Mat. 4:4) Hapeu, ijije kö tro epuni a amë la 15 maine 20 menetre ngöne la nöjei drai, thatraqane la ini tusi epun? Ame la nyipi ewekë, ke, thaa tro kö a nue la itre xaa ewekë troa xome hmaca pena ha la traeme hna amekötine thatraqane la ini tus. Loi e troa ketre ewekë lai, hna majemine troa kuca. Celë hi matre, ngacama jole ngo nyipi ewekë troa canga hlë ngöne la nöjei hmakany. Kola canga hlë e hmakanyi hnene la 17 000 lao atrene la itre Bethela e cailo fen, matre troa ce ithahnatane la topike ne la drai. Qa ngöne lai, nyipi ewekë troa wai inamacanëne la ketre hawa ka ijij, matre troa canga meköl, nge lolo me egöcatre la kola hlë elanyi troa xejë la ketre drai ka hnyipixe.
6 Maine ketre hene hnepe lapa epun, inine jë troa hnëkëne me eköthe la porogarame thatraqane la hnepe lapa, göi itre huliwa i hmi. Ame la itre xaa hnepe lapa, angatre a e la Tusi Hmitrötr, me Annuaire, maine ketre itusi pena, ngöne la angatre a pane nango mano thupene hna xeni hej. Nyimutre mina fe la itre keme me thine ka öhne la itre nekö i angatre a kökötre uti hë la itre keresiano ka catre lapaunene nyudren; önine la itre keme me thine ka hape, ame la ewekë ka aijijë angatre troa kapa itre thangane ka loi cili, ke, ene laka, hnene pala hi la hnepe lapa hna amë la caa jidri ngöne la nöjei wiik, matre troa ce kapa madrine la ketre hnepe ijine troa ithuecatrekeu ngöne la götrane la ua. Hna qaja hnene la ketre keme ka hape: “Eni a mekune laka, ame la kola kökötre hnyawa la itre nekö i nyiho ngöne la götrane la ua, ke, hnene laka, ngöne la hnepe lapa hun, hne huni hna xome la nöjei jidri ne drai hnacian, troa inine la Tusi Hmitrötr, kolo ha troa 30 lao macatre ne kuca eahuni la ini tusi ne la hnepe lapa.” Hna bapataisone asë hi lai köni kuku nge itre nekönatre petre kö angatr, nge ame hë thupen, hnei angatre asë ala köni hna nue la mele i angatre ka pexeje kowe la huliwa ne cainöj. Thaa ini tusi ne la hnepe lapa hmekuje kö la hna kuca, kolo fe a amacane la itre hnëqa thatraqane la itre icasikeu, maine itre aqane troa tro fë la maca ka loi, me itre xaa ewekë ju kö ka lolo hna madrine troa ce kuca.
7 Tune ka la porogarame së thatraqane la wiik, easë kö a hane ‘anyipi ewekëne la nöjei ijin’ matre troa cainöjëne la Baselaia? (Kol. 4:5) Tru catre la itre jole së ngöne la mele së, maine jë qa ngöne laka, kola huliwa thatraqane la isa hnepe lapa së, me xome la itre hnëqa ka tru e hnine la ekalesia. Maine thaa hne së kö hna amekötine me amë la itre ijine troa cainöje me inine la itre atr ngöne la nöjei wiik, tro pena ha la itre xaa ewekë a xome la göhnë ne lai huliwa ka nyipi ewekë catre kowe la mele ne la atr. Hna qaja hnene la ketre atr ka axö öni, ka hape: “Ame ngöne la macatre 1944, hnenge hna trotrohnine ka hape, ame la ewekë ka loi nyine tro ni a kuca matre troa hane cainöje ke, ene la troa amë la ketre drai ngöne la wiik, thatraqai Nyidrë. Uti hë enehila, eni pala hi a xome la ketre drai ne la wiik, matre troa cainöj.” Hnene la ketre trejine nge atre thupëne la ketre ekalesia, hna trotrohnine hnyawa ka hape, hna aijijë nyidrë troa kuca la fifitrine lao hawa ne cainöje ngöne la treu, hnene laka, hnei nyidrëti hna kuca la ketre porogarame hna axeciëne hnyawa ha me athipe thatraqane la huliwa ne cainöj. Maine hetre jole hnei nyidrëti hna troa kuca ngöne la mecixen, haawe, nyidrëti a thele troa kuca ngöne la hnaipajö, thupene hna pane cainöje ngöne la hmakany. Hapeu, ijije kö troa kuca hnei epuni la ketre porogarame ne cainöje thatraqane la hnepe lapa i epun, maine troa caa drai ngöne la nöjei wiik, me xome la huliwa cili ceitune me ketre götrane ne la mele i epuni ngöne la götrane la ua?—Fil. 3:16.
8 Wange Ju La Itre Ewekë Hna Majemine Melën: Hetrenyi la itre ewekë ka sewe së troa eköthe la mele së hune la huliwa i Akötresie. Maine jë troa ajolëne hnene la itre ewekë ka asesëkötrë së, lo itre hne së hna amekötine hë ngöne porogarame së, maine göi ini tus, me itre icasikeu, me huliwa ne cainöje së. Nge tro la ithupëjia me easë, ene Satana, a kuca asë la hnei angeice hna atreine matre troa “ajolenyi së” me icilekeu memine la itre mekune hne së hna eköthe hë. (1 Thes. 2:18; Efe. 6:12, 13) The nue kö la itre ewekë cili ka ithungijë troa ananazijë së, ene pe nue trije pi së lo itre mekune ka sisitria hne së hna hnëkëne hë. Thele jë la nöjei pengöne aqane troa eköthe la porogarame i epun, matre troa eatrëne hnyawa pala hi la itre hna amekötine thatraqane la huliwa i Akötresie. Nyipi ewekë troa catre fë la mekune së me cile huti ngön, maine easë a ajane troa kuca la ewekë ka nyipi lolo me nyine atrun.
9 Thaa tro pi kö së a nue la itre iajojezine la fen, memine la ihuline la itre aja ne la ngönetrei, troa upi së troa xome la itre huliwa ka thaa nyipi ewekë kö kowe la mele së ngöne la ua, ene pe nyiqaane xome trongëne jë la traeme së memine la mekune së. Qa ngöne lai, nyipi ewekë tro sa ketre waipengöne hnyawa la aqane mele së, me thele ka hape: ‘Tune ka la aqane meleng, eje hë a hace trootro kowe la ngazo, maine kolo ha lapane la mekunenge hnene la itre ewekë ne fen? Hapeu, eni ha nango nyiqaane troa eköthe la melenge hune la itre ewekë ne la fene celë ka troa paatr? (1 Ioane 2:15-17) Tune ka la traeme hnenge hna xome troa kuca la itre sipu mekunang, me troa mano ngöne la itre xaa nöj, me troa kuca la itre nyine elo, maine itre xaa nyine madrine ju kö, tune la itre hawa ne wai televizio, hapeu, sisitria catre kö eje hune la traeme hnenge hna xome thatraqane la itre huliwa ngöne la götrane la ua?’
10 Maine easë a öhne ka hape, kola zikoziko la mele së hnene la itre huliwa ka nyimutre nge ka thaa nyipi ewekë kö, haawe, nemene la nyine troa kuca? Tune la hnei Paulo hna thithi fë laka, loi e “pexeje” maine “amë mekötine” la itre trejine, hapeu, matre sipo Iehova jë fe hnei epuni la ixatua, matre troa wangatrune hnyawa hmaca la huliwa i Nyidrë? (2 Kor. 13:9, 11, ith. e cahu fen) Thupene lai, catre pi së troa mele thenge la ewekë hne së hna axeciëne, me kuca la itre mekune ka lolo thatraqane la mele së. (1 Kor. 9:26, 27) Tro hë Iehova a xatua së troa thupëne wanga troa ujë kowe la götrane maca, maine kowe la götrane mi, nge triane pi la huliwa i Iehova.—Wange ju la Isaia 30:20, 21.
11 Loi e Tro Pala Hi Së a Catre Ngöne La Huliwa i Iehova Ka Lolo: Itre milio la itre atr ka catre thele la manathith, ngo angatre a wangatrehmekune laka, easenyi trootro hë la pune la mele i angatr, nge gufa kö lo manathithi ka tru hna thele ielene jëne la itre mo ne fen. Kolo lai a “xeni la eny.” (Ate cai. 2:11) Ketre, maine tro së a ami Iehova pala hi nyine trepene la mele së, ‘me ami Iehova pala hi qëmeke së,’ eje hi laka, tro ha atraqatre catre la madrine së. (Sal. 16:8, 11) Troa eje la mekune cili, pine laka, Iehova la qaane la mele së. (Hna ama. 4:11) Maine paatre ju Nyidrë, haze ka tru, eje hi laka, troa gufa la mel. Maine tro së a nyihluei Iehova, ke, easë a atiqane la mele së hnene la itre huliwa ka nyipi ewekë kowe la mele së, nge tro fe itre xane a hane ce kapa me easë la itre manathith, enehila nge uti hë epine palua.
12 Nyipi ewekë troa hmekëne wanga troa mekune menune ka hape, lolo hi la aqane mele së, ene pe thëthëhmine trootro pi lo laka, easenyi hë la pune la fene i Satana, nge calemi catre hë ej. Hetre thangane la aqane wange së la itre drai elany, ngöne la aqane mele së ngöne la nöjei drai. Hetrenyi la itre atr ngöne la hneijine i Noa, ka thaa lapaune kö ka hape, troa traqa la ketre iwë; haawe, “tha’te kö angate,” angatre pe kö a trongëne ngöne la itre drai ne mele angatr, la itre sipu mekune i angatr, ene la troa xeni me ij, me faipoipo, ene pe traqa ju hi la iwë, me “cengöne thei angat’asë pi.” (Mat. 24:37-39) Ame la itre atr ka eköthe enehila la mele i angatre ngöne la fene celë, tro hë angatre a öhne hnei lue meke i angatre la itre aja i angatr elany, kola troa paatre ngöne la iapaatrenyi ka tru hna thaa melëne kö hnei atr, ngöne la “drai [i Iehova NW].”—2 Pet. 3:10-12.
13 Qa ngöne lai, loi e tro pala hi së a mele koi Iehova, me kuca la aja i Nyidrë. Pëkö huliwa ka lolo hna atreine kuca hnei atr ka sisitria hune la huliwa nyine mejiune kow hna hamëne hnei Iehova. Thaa ka silitrengathoi kö Nyidrë, tro kö Nyidrëti a eatrëne elanyi la itre hnei Nyidrëti hna thingehnaean. (Tito 1:2) Ka mele epine palua Nyidrë, pëkö hnei Iehova hna thëthëhmin. (Hab. 1:12; 2 Tim. 1:12) Nyipi ewekë troa drenge thenge me lapaune enehila, ke, celë hi qaane la mele lai ka troa epine palua, e hnine la huliwa ka lolo ne la Akötresi së ka madrin!—1 Tim. 1:11; 6:19.
[Iatr ne la götran 3]
“Ame la nyipici, thaa ketre götranene kö la mele së, ngo mele së hi lai. Itre xaa ewekë pëhë hna amë xötreithe ej.”