Troa Anyipiewekëne Tuneka La Traeme Së Enehila
1 Maine hne së pala hi hna thele troa catre huliwa i Iehova, thaa tro jë kö a pë jole së! (1 Kor. 15:58) Easë a wangatrehmekune hnyawa la enyipiewekëne la troa isa inine la Tusi Hmitrötr, easë isa alacas, maine ngöne la fami, nge tro fe a e lapaane eje nöjei drai, troa hnëkëne fe me sine la itre icasikeu ne la ekalesia, nge tro pala hi a catre cainöje trootro. Itre qatre thupe a troa cilëne la itre hnëqa ne thupë mamoe, me wange hnyawa la itre xaa götrane hnëqa i angatre ngöne la ekalesia. Ketre nyimutre fe thei angatre la itre trene hnëqa ka tru e hnine la fami, maine pena hetrenyi la itre xaa hnëqa nyine tro angatre a kuca kowe la itre xan. Maine hetre ajane së isa alacas, troa kuca hnyawa la itre hnëqa cili, nyipiewekë catre koi së troa isa atreine hnëkë, me tuluthe la ka nyipiewekë catr.
2 Nyi Göhnene Jë Itre Nyipi Ewekë: Troa hetre thangane ka loi la aqane tro së a ‘anyipiewekëne la itre ijine së’, e hne së hna atreine atrehmekune me waiewekë. (Efe. 5:15, 16) Nyipiewekë fe tro së a thele troa atrepengöne hnyawa la “nöjei ewekë ka isa pengöne kö” nge troa fejane itre eje ngöne la i lis, ngo troa nyi göhnene itre ej, ngöne la itre pane ewekë nyine troa kuca. (Fil. 1:10) Hna qeje pengöne hnene la lue xaa trefëne la aqane mele i nyidro thenge la aja i Akötresie, öni nyidro: “Kola mama laka, nyipici la ka xomiujine la mele i nyio . . . Ame la nyipici, ke, thaa ketre hnepe götrane ne kö la mele i nyio, ngo celë hi emele i nyio lai. Ame asë hi la nöjei ewekë, itre eje asë hi a xötreithe ej.” Ewekë ka sisitria la troa amë panëne ngöne la mele së, la hmi i Iehova me huliwa i Nyidrë.
3 Wangatrehmekune Ju La Traeme Hna Aluzin: Hetrenyi la 168 lao hawa ngöne la wiik, nge easë a ajane troa inamacane ngöne la aqane tro së a melëne la itre hawa ka lapa pe, matre kepe thangane ka loi së qa ngön. Maine easë a ajane troa hetre traeme së kowe la itre huliwa i Akötresie, nyipiewekë catre tro së a wangatrehmekune la itre hawa hna aluzin, matre thele jëne troa nango xome hnyawa la itre xan. Kola mama hnyawa e etazini, laka, 30 lao hawa nge sin, hna xome hnene la itre ka tru ngöne la wiik, troa wai televizio! Ame koi itre xan, tru la itre hawa hnei angatre hna xome troa e la itre itusi ne fen. Nyimutre fe la itre atr ka wangatrehmekune laka, tru la traeme hna xome troa pane ce kuca la itre xaa huliwa, maine troa kuci madrin, me traeme ne mano, maine nöjei pengöne huliwa hna troa kuca jëne la itre ordinatör. Qa ngöne lai, nyipiewekë catre tro së a wange hnyawa la itre hne së hna kuca lapaane o drai, matre troa thele la aqane troa huliwane hnyawa la traeme së. Maine hetrenyi the së la inamacan, ke, tro së a nyi ifegone la traeme hne së hna xome kowe la itre huliwa ka thaa nyipiewekë kö.
4 Majemine Jë Kuca La Itre Ewekë Ka Hetre Thangane Ka Loi: Ngacama isa pengöne kö la itre ewekë hne së hna melën, ngo ijije hi tro së isa alacaasi a anyipiewekëne la traeme thatraqane la itre hna aja kow ngöne la ua. Alanyimu la itre ka wangatrehmekune laka, maine hnei angatre hna canga hlë e nöjei drai, atreine hi tro angatre a kuca la itre ewekë ka nyimutre. Maine qea la itre hawa ne tro së kowe la hna huliwa, maine ngöne la easë a treqene pena la itre xaa atr, loi e tro së a thele ngöne la itre ijine cili, troa e la Tusi Hmitrötr, troa hnëkëne la itre icasikeu, maine troa drenge la itre xaa mekune ka sisitria hna kuca hnei sasaiatri jëne la itre kaset. Hetrenyi la itre manathithi ka tru hna kapa hnene la itre fami, qa ngöne laka, hnei angatre pala hi hna hnëkëne la ketre hawa troa ce inine pala hi la Tusi Hmitrötr. Maine tro pala hi la nöjei atrene la fami a traqa ngöne la traeme hna sa thatraqane lai ini tusi cili, tro hë angatre isa alacasi a kepe thangane lai, ngöne laka, pëkö traeme hna troa aluzin.
5 Kolo pala hi a tro la itre drai, nge easë a atrehmekune hnyawa trootro laka, “xoxopate pehi la ijin.” (1 Kor. 7:29) Maine hne së hna huliwane hnyawa la traeme së, atreine hi troa hetre thangane ka lolo kowe la mele së. Maine hne së hna anyipiewekëne la itre ijine ka ijij, hnene la hna amë panëne la itre aja ne la Baselaia ngöne la mele së, tro hë së a kapa la itre manathithi ka tru!—Mata. 6:33.