Loi e Tro Sa Wange Hnyawa La Aqane Tro Sa Huliwan La Traeme Së
1. Nemene la jole hna cile kow hnene la itre atr enehila e cailo fen?
1 Ame ngöne la hneijine së enehila, tru catre la itre ewekë ka ahmaloeën la mele së, ngo kola öhne hnene la itre xaa atr ka hape kolo jë petre hi ka hape tru jë hnei nyine troa kuca nge co pë hë hnei traeme ne troa kuca itre ej. Tune kaa la mekune i epun, jol e troa kuca matre troa tro loi pala hi la itre hna majemine ngöne la götrane la ua? Tune kaa, aja i epuni kö troa tru hnei traeme ne cainöj? Tune kaa la aqane tro sa kuca matre huliwane hnyawa la traeme së?—Sal. 90:12; Fil. 1:9-11.
2, 3. Nemene la itre jol hna axulun hnene la itre jiane huliwa hna kuca hnei atr enehila, nge tune kaa la aqane tro së isa ala caas a isa wai melen?
2 Loi e Troa Atrehmekun La Itre Ewekë Ka Aluuzi Traem: Loi e tro pala hi së a wange hnyawa la aqane tro sa xome la traeme së. Kola ithuecatr hnei Tusi Hmitrötr ka hape: “Wange hnyawa kö la aqane tronge i nyipunie, the tune kö la ite hmo, ngo tune ju la ite ka inamacan, kola anyipi ewekëne la nöjei ijin, ke ngazo la nöjei drai.” (Efe. 5:15, 16) Wange jë la itre jol ka xulu qa ngöne la itre jiane huliwa enehila hna kuca hnene la itre atr. Maine nyipici laka itre jiane huliwa ka loi enehila la ordinatör me itre xaa ewekë ju kö kowe la mele ne la atr, ngo atreine hi tro itre eje a ketre hnö kowe la mele së, ngöne laka, e thaa thupëne hnyawa hë së la aqane tro sa xome la traeme së thatraqane la itre ewekë cili, canga tro hi sa jötr.—1 Kor. 7:29, 31.
3 Loi e tro sa isa thele ka hape: ‘Hapeu, eni kö a xome la traemeng troa e me sa ngöne la nöjei drai la itre tus hna iupi fë koi ni jëne ordinatör, itre tus ka thaa nyipi ewekë menu kö? Hapeu, eni kö a lapaa telefon maine iupi fë jëne ordinatör la itre tusi ka thaa nyipi ewekë kö? (1 Tim. 5:13) Hapeu, eni kö a goeë ëternet ngo pëkö nyipi ewekë hna thel, maine saze porogarame lapaa ngöne la eni a wai televizio? Tune kaa la itre elo ngöne ordinatör maine ngöne ketre jëne pena, itre eje kö a nango nyiqaane troa xuje trongëne la traem hnenge hna amë nyine troa inine la Wesi Ula i Akötresie?’ Itre ewekë lai ka troa athixötrë së ngöne la götrane la ua.—Ite edomë 12:11.
4. Nemene la ewekë hna kuca hnene la ketre thöth matre troa saze la aqane ujë i angeic, nge pine nemen?
4 Loi e Tro Sa Huliwa Inamacanën La Traeme Së: Kola wangatrehmekune laka ame ngöne itre xaa ijin tre, kösë kola aluuzin la traeme së me thepe së hnene la itre jiane huliwa tune la ordinatör. Hna hnöthe la mele ne la ketre thöth hnene la itre elo hnine ordinatör, matre öni angeice ka hape: “Ame ngöne la itre xaa ijin hnenge hna pane elo qëmekene tro ni a tro troa cainöj, maine troa sin la itre icasikeu i Keresiano, jole catre pi hë tro ni a drenge hnyawa la itre hna qaja ngöne la itre ijine icasikeu. Thaa mano kö ni mekune la aqane tro ni a thele nyin la ketre elo, ngöne la eni a bëeke hmaca kowe la hnalapa. Hetre ethane lai kowe la itre ewekë hnenge hna eköth, ene la ini tusing memine la troa e lapaan la Tusi Hmitrötr. Kolo ha troa nyiqaane nanazije trootro la madrineng troa nyihlue i Akötresie.” Hnei angeic hna atrehmekune laka, nyipi ewekë troa saze la aqane ujë i angeic, ene pe hnei angeic hna xome trije asë la itre elo i angeic qa hnine la ordinatör. Öni angeice ka hape: “Jole catre pi hë. Öninge pena kö ka hape ka hmaloi hi, ngo eni a öhne laka eni ha troa meci la eni a isa lapa memine la itre elong. Ngo eni a öhne hnyawa laka kösë hnenge hna hun qa ngöne la ketre isi, hnene laka atre hi ni ka hape, nyine loi kowe la meleng la hnenge hna kuca.”—Mat. 5:29, 30.
5. Tune kaa la aqane tro sa ami ijin thatraqane la itre aja së ngöne la götrane la ua, nge nemene la aqane tro sa kepe thangane ka loi qa ngöne la hna ujë tune lai?
5 Maine jë nyipi ewekë troa pane thele la nyine troa kuca, maine hetrenyi la itre xaa götran epuni a öhne laka loi e troa saze. Hapeu, ijije kö tro epuni a pane xome la 30 lao menetr ngöne la nöjei drai thatraqane la itre huliwa ka nyipi ewekë? Celë hi etrune la traeme hna troa xome matre troa e la Tusi Hmitrötr, me tupath troa afenesin ngöne la pune la macatre. Drei kö elanyi la itre manathith hnei epuni hna troa kapa ngöne la götrane la ua! (Sal. 19:7-11; 119:97-100) Loi e troa ami ijine troa e la Tusi Hmitrötr, me hnëkëne la itre icasikeu memine la huliwa ne cainöj. (1 Kor. 15:58) Maine tro sa kuca tune lai, atreine hi tro sa thupën matre thaa tro kö a aluuzin la traeme së, nge kolo mina fe a troa xatua së troa “trotrohnine la aja i Iehova.”—Efe. 5:17.