Loi e Tro Sa Hmekëne La Itre Ethanyine La Internet!
1 Madrine la nöje i Iehova troa ce mele ngöne la meköt. Angatre a iqajakeune la itre ewekë hna melëne ngöne la hna cainöje trootro, nge kola madrine fe troa atre la itre ewekë ka traqa e cailo fene kowe la Itretre Anyipici i Iehova, me kowe la huliwa ne Baselaia. Angatre a ajane troa hane atre la itre ewekë ka ngazo ka traqa kowe la itre trejine me easë, maine itre ethanyine la fene pena, nge angatre a ajane troa atre, maine hetre nyine tro fe angatre a kuca matre troa ixatua. Kolo hi la a amamane la caasi ne la itre trejin; nge nyine anyipicine ka hape, easë a ihnimikeu hnyawa.—Ioane 13:34, 35.
2 Enehila, canga drenge hi së la itre ewekë ka traqa e cailo fen. Kola amamane hnene la ipoos me televizio la nöjei ewekë asë ka traqa ngöne la nöjei götrane ne la fen. Ketre tune la telefon, laka, thaa jole kö tro sa canga ithahnata memine la ketre atr ka nanyi koi së. Hetrenyi la ketre jëne troa ithahnatakeu, ka jilapane enehila la fen, ene la Internet.—Wange ju la Réveillez-vous ! ne 22 julai 1997.
3 Kola aijijë së isa ala caasi hnene la telefon, troa canga ithuemacanyi kowe la atr hne së hna pi ithahnata memin. Maine nyipici laka, ame la telefon, ke, ketre ewekë ka lolo, ngo hne së pala hi hna thupëne la aqane troa huliwan, pine laka, atreine hi troa ketre jiane huliwa ka troa hetre ethane koi së, qa ngöne laka, itre atr ka ngazo hna troa ithahnata memin, maine itre huliwa pena hna troa kuca, nge tru menu la hna telefon, haawe, tro ha tru mina fe la thupen. Ame ipoos me televizio, ke, lolo catre göi troa hamë ini. Ngo ngazo pe, nyimutre la itre porogarame ka ngazo, nge ketre kola aluuzi traem. Qa ngöne lai, loi e tro sa inamacane la aqane tro së a huliwane la televizio me radio.
4 Ame Internet, ke eje a aijijë së troa ithahnata memine la itre atr ka ala nyimu catr, itre milio la etrun e cailo fen, ngo thaa tru kö la thupen; ketre, atreine hi jëne eje troa kapa la itre ithuemacanyi ka nyimutre catr. (Réveillez-vous ! ne 8 januare 1998) Maine thaa hna huliwane hnyawa kö la Internet, eje hi laka, troa hetre ethane eje koi së, ngöne la götrane la ua, me ngöne la aqane mele së. Nemene la engazone ej?
5 Pëkö ejolene kowe la itre atr ka thele ithuemacanyi ngöne la aqane troa kuca la itre jiane isi, tune la itre boob, pine laka, hetrenyi e hnine Internet. Thaa madrine kö la itre maseta, pine laka, kola aluuzi traeme me goeë Internet hnene la itre ka huliwa. Kolo fe a hane qaja hnene la itre itusi së, la engazone la Internet ngöne la götrane la ua. Nyimutre la itre porogarame ngöne Web ka amamane la nöjei pengöne iakötrë, me itre aqane kuci ngazo ka sisi catr, a ka thaa meköti kö kowe la itre keresiano. (Sal. 119:37) Kola nyixane la itre ngazo cili, hnene la ketre ngazo ka thaa mama kö, ngo nyine troa thupëne hnene la Itretre Anyipici Iehova, wanga amenu angatre pi. Nemene la ngazo cili?
6 Thatreine kö tro së a könëne la trehnyiwa, nge thatre pengöi angeice kö hne së. Nge maine thatreine kö troa atrepengöi angeic, hapeu, tro kö së a nue angeice troa lapa caasi memine la itre nekö së? Troa traqa kowe lai, jëne Internet.
7 Atreine hi tro sa iupi fë me kapa la itre maca, qaathene la itre atr hne së hna thatre. Ketre tune mina fe, atreine hi tro së a ifekeune la itre mekun kösë kola icasikeu, maine porotrike pena memine la itre xaa atr, jëne Internet. Haawe, ame itre xan, ke maine jë tro angatre a qaja ka hape, Itretre Anyipici i Iehova angatr, ngo thaa nyipici pe. Maine tro ketre a thoi ka hape, ketre thöthi angeic, maine pena, troa nyi föe maine trahmany.
8 Ame ithuemacanyi hna kapa, ke, maine jë troa ketre ewekë hna melëne hë hnene la ketre atr, maine itre mekune pena hna hamëne ngöne la itre ini së. Ithuemacanyi lai hna troa öhne hnei itre xaa atr, matre angatre pena a hane iupi fë ju koi itre xan. Ame itre xaa ithuemacany, ke thaa trenge nyipici kö, nge thatreine kö tro së a waienyipicin. Haawe, kösë itre mekune lai hna troa xome hnene la perofeta thoi matre troa sili trenga thoi së.—2 Thes. 2:1-3.
9 Nyipi ewekë tro sa mekune hnyawa lai, matre ame ngöne la easë a huliwa ngöne Internet, easë a thele jë ka hape: ‘Nemene la aqane huliwane eje ni? Hapeu, troa hetre ethane qa ngöne la aqane huliwane eje ni? Hapeu, eni a hane caas me angatre troa akötrëne la itre xane ngöne la ua?’
10 Porogarame Ngöne Web Ne La “Itre Temoë i Iehova”: Hanawange la ketre ceitun, hna eköthe la itre porogarame ngöne Internet, hnene la itre atr ka qaja ka hape, Temoë i Iehova angatr. Angatre a hë së troa hane goeëne la porogarame i angatr, matre troa hane e la itre ewekë hna melëne hnene la itre xaa atr, ka qaja mina fe ka hape, itre Temoë. Hna ithuecatre koi së troa ithawakeune la itre mekun, me itre aqane ketri së hnene la itre itus i Sasaiatri. Itre xane a hamë mekune göi aqane troa nyiqaane ithahnata ngöne la hna cainöje trootro. Itre porogarame la ka aijijë së troa lö hnine la porotrike i itre xan, me hane ithahnata me angatr, tune ngöne la easë a telefon. Haawe, angatre a köja së ju pena la ketre porogarame, me fe koi së la ketre jëne troa hane ithahnata memine la itre xaa Temoë e cailo fen. Ngo hapeu, xecie kö koi së laka, thaa itre perofeta thoi kö lai ka fe gojenyi së?
11 Thaa ihmeku kö la caasi jëne Internet, memine la ithuecatre hna hamëne ngöne Efeso 5:15-17. Hna cinyihane hnei Paulo aposetolo, ka hape: “Wange hnyawa kö la aqane tronge i nyipunie, the tune kö la ite hmo, ngo tune ju la ite ka inamacan, kola anyipi ewekëne la nöjei ijin, ke ngazo la nöjei drai. Qa ngöne lai the wangadrapa kö nyipunie, ngo trotrohnine ju la aja i Joxu.”
12 Ame la ekalesia i keresiano, ke, ewekë hna hnëkëne hnei Akötresie, matre troa ithua së hnene “la hlue ka nyipici me ka inamacan,” ngöne la götrane la ua. (Mat. 24:45-47) Jëne la organizasio i Iehova, kola eatrongë së, me thupë së matre thaa tro kö së a sine la fen, nge kolo mina fe a hamë së la ithuecatre matre tro sa catre huliwa i Joxu. (1 Kor. 15:58) Hna amamane hnene la atre cinyihane la salamo, laka, hetre madrine i nyidrë, nge pëkö xou i nyidrë hnine la ekalesia i Akötresie. (Sal. 27:4, 5; 55:14; 122:1) Kola hamëne fe hnene la ekalesia la ithuecatre me ixatua ngöne la ua, kowe la itretre lapa hnin. Nge e cili, easë a öhne hnyawa la ihnimi ne la itre atren, kola hnehengazone la akötre i ketre, nge hetre hni ne ajane troa ixatua—itre atr lai hne së hna atre, nge ka saqe troa ixatua me akeukawane la itre xan, e ijine akötr. (2 Kor. 7:5-7) Hna thupëne la itre atrene la ekalesia jëne la itre hna amekötine hnine la Tusi Hmitrötr, matre troa upetrije la itre ka thaa ietrane kö la itre ngazo i angatr, maine ka acatrene pena la itre mekune ne la itre perofeta thoi. (1 Kor. 5:9-13; Tito 3:10, 11) Hapeu, hetrenyi kö la itre aqane ihnimi cili me aqane thupë së, ngöne la easë a mekune troa ce memine la itre xaa atr, jëne Internet?
13 Mama hnyawa ha laka, pëkö nyine thupë së. Ame itre xaa porogarame, ke, kola nyi jëne la itre ini ne la itre perofeta thoi. Ame itre xaa porogarame ke, kösë pëkö engazone itre ej, nge ame itre porogarame i itre perofeta thoi, ke angatre a qeje pengöne me qaja hnyawa ka hape, itre Temoë i Iehova angatr. Maine jë tro angatre a hane sipo ithuemacanyi koi së, matre troa atrepengöne ka hape, maine jë ketre Temoë i Iehova së.
14 Iehova a ajane tro së a atreine waiewekë. Pine nemen? Pine laka, atre hi Nyidrë laka, ewekë lai ka troa thepe së qa ngöne la nöjei pengöne ngazo. Ite Edomë 2:10-19 a qaja ka hape: “Maine lö e kuhu hni’ö la inamacan, nge sheminge kowe la u i’ö la ate hmekun, troa thupë eö hnene la mekun, troa wai’ö hnene la trotrohnin.” Troa wai’ö qa ngöne nemen? Qa ngöne la itre ewekë cili, ceitune me “jëne ngazo,” ene la itre ka jea qa ngöne la gojenyi ka meköt, me itre ka kuca la thiina ka ngazo, nge tria la aqane ujë.
15 Ame ngöne la easë a tro kowe la Uma ne Baselaia, pëkö hnyinge së göne la itre trejin, pine laka, atre angatre hi hne së. Pekö ka thele enyipicine lai pine laka ka mama hnyawa la ihnimikeu thene la itre trejin. Thaa hna upi së kö troa pane anyipici së, maine ketre Temoë i Iehova fe së. E celë hi la easë a öhne hnyawa la nyipi ithuecatrekeu hna qaja hnei Paulo ngöne Heberu 10:24, 25. Ame la itre porogarame ne ordinatör, ka sajuëne la caas, te thatreine kö itre eje troa hamëne la itre ewekë cili. Loi e troa eje ngöne la itre mekune së la itre trenge ewekë ngöne Salamo 26:4, 5, matre troa hmekë së la itre ngazo ka troa canga ajojezi së, ngöne la easë a huliwane la itre porogarame ngöne Internet.
16 Thaa hna nyi ifegone kö maine sa tulune pena la ithuemacanyi hna sajuëne maine hna atreine kapa hnene la itre trene Internet. Haawe, hmaloi hi troa ajojezine la itre nekönatr, me itre thöth, matre troa ihumuth, maine troa huliwa angatre pena. Hetre mejiune ne la itre nekönatr, me pi atre, me pi ajane troa öhne la ketre götrane ka ketre pengön, hna hape, cyberespace. Qa ngöne lai, nyipi ewekë troa elemekene hnyawa hnene la itre keme me thine la itre nekö i angatr, me hamëne la itre trepene meköti ka lolo qa hnine la Tusi Hmitrötr, matre troa atreine huliwane la Internet, tune lo angatre a xatuane la itre nekö i angatre troa iëne la miuzik, maine film.—1 Kor. 15:33.
17 Ngazo pe hetrenyi la itre trejine me easë, trahmanyi me föe hna upetrij, pine laka, hna nyiqaane thele sine porotrike hnine Internet, ene pe kei ju hi kowe la kuci ngazo. Atraqatre la hmahma thene la itre qatre thup, matre hnei angatre hna cinyihane ka hape, ame la itre trefëne ka isa lapa enehila, ke qa ngöne laka, hna iöhnyi pena ha me ketre föe maine trahmanyi jëne Internet. (2 Tim. 3:6) Hnei itre xane hna thipetrije la nyipici, pine laka, hna lapaune pena ha kowe la itre mekune ne la itre perofeta thoi. (1 Tim. 4:1, 2) Maine hne së hna wangatrune la itre ethane ka ngazo qa ngöne Internet, hapeu, tro kö së a hmekëne wanga hane jë fe së lö hnine la porotrike ne la itre atr ngöne Internet? Eje hi laka, tro ha thupë së qa ngöne la ewekë cili, e hne së hna hetrenyi la inamacan, me atrehmekun, me atreine mekun, me trotrohnine hna qaja ngöne Ite Edomë 2:10-19.
18 Nyipici, hetrenyi fe la itre xaa atr ka kuca la itre porogarame hnine Internet, matre troa cainöjëne la maca ka loi. Nyimutre la itre porogarame cili hna sajuëne hnene la itre trejine ka iahlë. Maine jë ame itre xaa prorogarame ke hna sajuëne hnene la itre perofeta thoi, ka thele troa iaöne la itre ka thaa hmeke kö. (2 Ioane 9-11) Kola ithahnatane hnene la Huliwa Ne Baselaia ne nofeba 1997, götrane 3, göne maine nyipi ewekë jë kö tro la itre trejine a hamëne la ketre ithuemacanyi jëne Internet; hna qaja ka hape: “Thaa nyipi ewekë kö troa ithuemacanyi jëne Internet, göne la pengö së Itretre Anyipici i Iehova, me itre huliwa së, maine lapaune së. Kola amamane hnene la porogarame hna kuca hnei Sasaiatri ngöne Internet, [www.watchtower.org] lo itre ithuemacanyi ka lolo koi itre ka pi atrepengö së.”
19 Itre Ixatua Göi Etid Jëne Internet? Hna mekune hnei itre xane ka hape, angatre a ixatua la kola hamëne la itre ithuemacanyi ngöne la nöjei götrane la huliwa i Akötresie. Maine jë tro la ketre a thele ithuemacanyi ngöne la ketre cainöje kowe la ka ala nyim, nge thupene lai, kola iupi fë pi, me mekune ka hape, troa ketre ithuemacanyi ka lolo catre kowe la itre xane ka troa hnëkëne lai cainöje ka caas. Itre xane a troa iupi fë la itre xötre ne la Tusi Hmitrötr, thatraqane la zonal, La Tour de Garde hna troa ce wang, ka troa traqa, maine troa hamëne la itre mekune nyine troa wange ngöne la Ini Ne Cainöje Qaathei Akötresie, maine Ini Tusi pena. Itre xane a hamëne la itre aqane nyiqaane ithahnata, thatraqane la huliwa ne cainöj. Hapeu, hetre thangane ka loi kö la ixatua cili?
20 Hna hamëne hnene la organizasio i Iehova la itre itusi me itre jiane huliwa, matre jëne la itre mekune ka lolo hne së hna kapa, tro hë së a atreine waiewekë, nge kola ini së fe troa “wangate hmekune la loi me ngazo.” (Heb. 5:14) Haawe, atreine kö tro sa hane traqa kowe lai, e hna thele la itre mekune hnene la itre xane koi së?
21 Hna qaja la itretre Berea, ka hape, “sisitria la thina ka loi angate la hui angete Thesalonika.” Pine nemen? Pine laka, “hnei angate hna kapa la Wesi Ula hnene la hni ka ajan, me thele o drai la ite hna cinyihan, maine nyipici la nöjei ewekë cili.” (Ite Huliwa 17:11) Thaa hnei angatre kö hna mejihnine la cainöje i Paulo me Sila, ngo hnei angatre hna ketre thele fe troa atrepengöne hnyawa la nyipici.
22 Maine tro pala hi së a nyiahnane la hna huliwa hnene la ketre, me itre mekune hna thele göne la ketre cainöj, maine troa hnëkëne la ketre icasikeu, eje hi laka, thaa ihmeku kö memine la aliene la troa isa inine la Tusi Hmitrötr! Hapeu, thaa aja së kö troa hane acatrene la sipu lapaune së, me mejiune së kowe la Wesi Ula i Akötresie? Eje hi laka, maine eje the së la mejiune cili, atreine hi troa mama la lapaune së ngöne la itre cainöje së, ngöne itre mekune hna qaja hnine la itre icasikeu, maine ngöne hna cainöje trootro. (Rom. 10:10) Maine troa xome la hnei ketre hna huliwa, thaa kolo kö a tro thenge la hna cinyihane ngöne Ite Edomë 2:4, 5 laka, tro së isa ala caasi a ‘thele la atrehmekune i Akötresie, me thele eje kösë trengamo hna juetrën.’
23 Maine tro së a isa xome la nöjei xötre ngöne la sipu Tusi Hmitrötre së, atreine hi tro së a pane wange hmaca la itre xötre qëmeken, me thupen. Atreine hi tro sa tui Luka, laka, angeice a ‘ate hmekune asë la nöjei ewekë,’ ngöne la angeice a cinyihane la evangelia i angeic. (Luka 1:3) Maine tro së a ketre isa catre thele la itre ithuemacany, haawe, tro ha xatua së troa atreine thele la itre xötre ngöne la hna cainöje trootro, me ngöne la easë a cile fë cainöj. Nyimutre la itre ka qaja ka hape, hnei angatre hna haine la Itretre Anyipici i Iehova, pine laka, atrepengöne hnyawa angatre la aqane troa huliwane la Tusi Hmitrötr. Tro fe së a hane atrein, e hne së hna majemine troa isa goeëne la itre xötre hnine la Tusi Hmitrötre së.
24 Huliwane Hnyawane Jë La Traeme Së: Ame la ketre nyine tro sa wange hnyawa, ke ene la etrune la traeme ne kuca, me e, me sa la itre maca hne së hna kapa jëne Internet. Kola ithuecatre ngöne Salamo 90:12, troa thith: “Ateinë huni troa e la ite drai hun, mate tro huni a hetenyi la hni ka inamacan.” Hna qaja hnei Paulo ka hape: “Xoxopate pe hi la ijin.” (1 Kor. 7:29) Öni nyidrëti fe e thupen: “Qa ngöne lai tro sha kuca la loi kowe la nöjei ate asëjëihë e hete ijine shë, ngo sisitia kowe la nöjei ate ne la lapa i angete lapaun.”—Gal. 6:10.
25 Itre ihaji la ka lolo catr, nyine troa xatua së troa huliwane hnyawa la traeme së. Drei la eloine la tro sa ami traeme troa e la Wesi Ula i Akötresie! (Sal. 1:1, 2) Sisitria catre kö la itre hawa hne së hna xome thatraqane lai! (2 Tim. 3:16, 17) Itre keme me thin, epuni kö a inine la itre nekö i epuni la enyipi ewekëne la troa huliwane inamacanëne la traeme i angatre thatraqane la itre huliwa ne la Baselaia? (Ate Cai. 12:1) Eje hi laka, sisitria kö la traeme hne së hna kapa qa ngöne la etidi së, me etidi ne la hnepe lapa, me itre icasikeu, me cainöje trootro, ke, tru la itre manathithi hna kapa qa ngön, hune la troa aluuzi traeme troa wai ithuemacanyi ngöne Internet.
26 Qa ngöne lai, nyipi ewekë tro së a inamacan, me wangatrune hnyawa la itre mekune ngöne la götrane la ua, me itre ewekë ka lolo, nge ka sisitria thatraqane la mele së itre keresiano. Qa ngöne lai, loi e tro së a atreine ië ewekë hnyawa, me xomi traeme me mekun thatraqane la ithuemacanyi ka loi koi së. Hnei Keriso hna qaja la sipu aliene la mele ne la keresiano, öni nyidrëti ka hape: “Ngo pane thele jë nyipunie la baselaia i Akötesie, me thina ka meköti anganyidë; nge troa hamëne fe koi nyipunie la nöjei ewekë cili.” (Mat. 6:33) Hapeu, thaa madrine kö së ngöne la easë a nyialiene la mele së hnene la itre ewekë ne la Baselaia, nge thupene pëhë la itre xaa huliwa?
27 Tusi Jëne Internet E-Mail : Maine nyipici laka, lolo e tro së a hamëne la itre xaa hnepe ithuemacanyi ngöne la mele së me itre mekuna së kowe la hnepe lapa së maine itre enehmu së ka mele ananyi së, ngo hapeu, easë lai a ihnimi la easë a hane iupi fë itre eje kowe la itre xaa atr menu pena ha, ka thatre kö la hnepe lapa së me itre enehmu së? Hapeu, hna amë itre eje ngöne ordinatör, matre atreine hi tro nöjei atr a e? Hapeu, hna fejane la itre ithuemacanyi cili me iupi fë menune pi hi itre eje kowe la itre atr hne së hna atre maine hna thatre pena? Ketre, maine easë a kapa la itre maca qaathene la itre xaa atr, nge mama hi laka, thaa koi së kö, hapeu, easë a ihnimi la easë a iupi fë ju pena kowe la itre xan?
28 Nge tune kaa kö e thaa trenge nyipici kö la hne së hna mekune troa iupi fë? Hapeu, thaa kolo kö lai a ce thë la trenga thoi hna qaja trongën? (Ite edomë 12:19; 21:28; 30:8; Kol. 3:9) Eje hi laka, maine tro së a “wange hnyawa la aqane tronge [së] thaa tune kö la ite hmo, ngo tune la ite ka inamacan,” haawe, tro hë së a wangatrune hnyawa lai. (Efe. 5:15) Drei la madrine së ngöne la easë a kapa jëne la Annuaire, La Tour de Garde, me Réveillez-vous ! la nyipici ngöne la itre ewekë hna melëne hnene la itre trejin; itre ewekë lai ka xatua së me upi së troa trongëne pala hi “la gojeny”!—Is. 30:20, 21.
29 Hetrenyi pala kö la ketre engazone la Internet. Hna qaja hnei Paulo aposetolo göne la itre xan, ka hape: “Angat’a inine troa hminyaj, me tro agö kowe la nöjei uma; nge tha hminyaje hmekuje kö, ngo itete omë ewekë, me itete lue ime i hudumene pe, kola qaja la ite ewekë ka tha ijij.” (1 Tim. 5:13) Kola hmekë së matre thaa tro kö së a aluuzine la traeme së me trenge catre së troa iupi fë ithuemacanyi ka gufa kowe la itre trejine me easë.”
30 Nge drei kö la etrune la traeme hne së hna xome matre troa e me sa la itre tusi ka nyimutre jëne Internet! Qa ngöne lai, hna qaja ngöne la itus, Data Smog (qene papale) ka hape: “Maine tro la ketre atr a goeë Internet lapaa, ame hë la itre maca, tro itre eje a saze, ene pe kola ae drai, nge huliwa ka tru pine laka, maine nyimutre la itre tusi hna kapa ngöne la nöjei drai qaathene la itre sine ce huliwa, itre enehmu, me itre hnepe lapa, haawe, kola troa e me sa itre ej, . . . me itre ithuemacany, tune la itre publicité.” Kolo fe a qaja ka hape: Nyimutre la itre atr ka atre catre la nöjei ewekë, nge hnei angatre hna majemine troa iupi fë menune kowe la itre xane la itre ithuemacanyi hnei angatre hna atre: ene la itre ihnyimasai, me itre ifejicatre, me icinyanyikeu e hnine la ordinatör.”
31 Kola mama hnyawa ngöne la itre tusi jëne Internet, hna e hnene la itre trejine ka nyimutre, laka,—ame itre xan, kola qene hnyima, maine kola ihnyimane la hna cainöje; itre edromë hna nyitrepene hnene la itre ini së; itre ceitune hna xome qa ngöne la itre cainöje hna cile fë, ngöne itre asabele, maine itre kovasio, maine ngöne Uma ne Baselaia; itre hna melëne ngöne la hna cainöje trootro; me itre xane ju kö—Maine jë itre ewekë la ka pëkö engazon. Ala nyimu la itre ka canga ithawakeune ju hi la itre tus, ngo thaa pane atrepengöne kö la atr ka iupi fë; matre kösë jole e troa atre hnyawa la sipu atre cinyihane la ithuemacany, ene pe troa isa hnyingëne maine nyipici jë maine trenga thoi.—Ite edomë 22:20, 21.
32 Ame la itre maca ka ngazo cili, ke, thaa ihmeku kö memine lo itre trenge ewekë ka eje ngöne la mekune i Paulo, ngöne la nyidrë a cinyanyi koi Timoteo ka hape: “Ame la itre tulu ne tenge ewekë ne mele hnei’ö hna denge qa theng, xölehuje catëne ju ngöne la lapaune me ihnim, lo ka eje thei Keriso Iesu.” (2 Tim. 1:13) Ame la “aqane ewekë ka wië” ne la nyipici, ke celë “itre tulu ne tenge ewekë ne mel”, hna nyitrepene hmekuje hnene la taan la Tusi Hmitrötr, ene la troa anyipicine la musi Iehova, hnene la Baselaia. (Zef. 3:9) Loi e tro së a catre kuca asë la hne së hna atrein, ngöne traeme me trenge catr, matre troa sajuëne la emekötine la musi Iehova.
33 Pine laka, easenyi catre hë la pune la fene celë, loi e tro pala hi së a hmek. Kola hmekë së hnei Tusi Hmitrötr, ka hape: “Inamacane pi, me hmekëne jë; ke ithupëjia me nyipunie, ene diabolo, a tro agö, kösë liona a ho, kola thele tha i nyën.” (1 Pet. 5:8) Kolo fe a hape: “Xetëne ju la ixete ne ishi ka pexeje i Akötesie, mate ateine nyipunie troa thipe tije la ite nyinyithina i diabolo.”—Efe. 6:11.
34 Maine hne së hna huliwane angazone la Internet, haawe, tro hë Satana a nyi jëne la jiane huliwa cili, matre troa thapa la itre hna iaöne hnene la edraië ne ej. Nge ngacama hna nyi ifegone hi la eloine ej, ngo hetre ethane pala hi, e thaa hna hmeke kö. Nyipi ewekë catre troa thupëne hnene la itre keme me thine la itre hna kuca hnene la itre nekö i angatr, ngöne Internet.
35 Thaa tro kö a hetre ethane koi së la Internet, e hne së hna inamacane ngöne la aqane troa huliwane ej. Easë a madrine la mekune ka ijije hna hamëne hnei Paulo, ka hape: “Loi . . . angete huliwane la ite ewekë ne fen, the huliwan’atrun; ke kola pate la pengöne la fen.” (1 Kor. 7:29-31) Maine tro së a mekune hnyawa la itre ewekë cili, haawe, tro ha xatua së me itre hnepe lapa së troa hmekëne wanga thepe së jë hnene la nöjei aja me madrine ne la fen, tui Internet.
36 Nyipi ewekë tro së a epe catre kowe la itre trejine me easë ngöne la ekalesia, me huliwane inamacanëne la itre ijine celë ka xoxopatre pe hi, haawe troa hetre ijine së thatraqane la itre huliwa ne la Baselaia. Pine laka, easenyi hë la pune la fene celë, loi e “tha tro hmaca kö së a tro tune la ite ethen, angete tro thenge la ite hni angate ka waqa,” ngo loi e tro së a “trotrohnine la aja i Akötesie.”—Efe. 4:17; 5:17.