Thupëne Kö Së Troa Thele La Itre Ewekë “Ka Pë Ixamixam”
1 Ame la ketre ithuemacanyi ka hlemu enehila, tre, ene la troa cinyanyin jëne ordinatör, la ketre tus hna hape, E-mail. Maine nyipici laka, ame la ordinatör, tre, ketre jën ka lolo tro së a ithawakeun la itre ithuemacany göi së, me qaathene la itre fami së, me itre enehmu së, ngo nemen la itre ewekë ka “pë ixamixam [ka pë eloin]” nyine tro sa thupën ngöne la easë a cinyany jëne ordinatör?—Ite edomë 12:11.
2 Thupëne Kö Së La Aqane Tro Sa Cinyany Jëne E-Mail: Kola mekun hnene la itre xaa trejin ka hape, angatr a imajemikeu hnyawa memine la organizasio i Iehova, qa ngöne laka angatr a kapa la itre ithuemacany ka hnyipixe jëne E-mail. Kolo lai a qaja la itre ewekë hna melën hnei angatr, me itre ithuemacanyi göne la itre ewekë ka traqa hnine la Bethela, me itre ithuemacany göi itre hulö ka traqa, maine göi icilekeu pena, me ithuemacanyi thaa nyine tro kö a iqajakeun hna hamën ngöne la itre Ini Ne Cainöjëne La Baselaia. Ame itre xan, tre angatr a canga thele troa iupi fë la itre maca cili, ke troa pa i angatr troa thuemacan la itre enehmu i angatr.
3 Ame ngöne la itre xaa ijin, tre, ame la itre ithuemacany memine la itre ewekë hna melën hnene la itre trejin, tre, tria kö la aqane qeje pengön, maine tru menu hmaca pena ha la aqane qaja. Maine pena, hnene la ajan troa qaja agöne la itre ewekë ka iasesëkötrë, ene pe troa ketre pengöne hmaca pena ha la aqane troa qaja lai ithuemacany. Ame itre xaa ijin, tre, thatre pengöne hnyawa kö hnene lai ka canga cinyany, la nöjei pengöne lai ithuemacany. (Ite edomë 29:20) Ngöne la itre xaa ijin, ngacama hetrenyi la itre ewekë hne së hna thatrein troa jele nyipicin, ngo kola pi ajan hnene la itre atr troa iqajakeun. Ame la itre ithuemacanyi cili ka pëkö enyipicin, maine ka iamenu pena, tre, celë hi lo hna hape lai, “itre ifejicatre,” ka thaa ithuecatre kö troa kuca la aja i Akötresie.—1 Tim. 4:6, 7.
4 Maine epuni a iupi fë la ketre ithuemacany ka mama laka thaa ka nyipici hnyawa kö, tre, epuni la atrekë zön elany e hace ju me luelue la itre atr. Ame ngöne lo kola qaja koi Davita ka hape ase hë humuthe asë la itre nekö i nyidrë trahmany, ene pe nyidrëti a akötr, me “kuie zezene pi la itre ixeetre i nyidrë.” Ngo trenga thoi, pine laka, caasi hi la nekö i nyidrë ka mec. Ketre ewekë ka akötrë lai, ngo kolo hmaca kö a nyixane lai akötre i nyidrë, hnene laka, tria kö la ithuemacanyi hna qaja. (2 Sam. 13:30-33) Qa ngöne lai, thaa tro pi kö së a kuca la ketre ewekë ka troa iamenu, maine ka troa ananazijën la itre xaa trejine me easë.
5 Jën Hna Acile Hnei Akötresie: Loi e tro pala hi së a mekune hnyawa laka, ame la jëne ithuemacany hna amekötin hnei Akötresie, tre, ene lo, “hlue ka nyipici me ka inamacan.” Hnëqa ne la “hlue” cili troa axeciën maine ijij troa hamën la ketre ithuemacany kowe la itre trejin, nge kolo mina fe a treqen la “nyipi ijin” troa iqajakeun lai ithuemacany. Ame la xeni ne la ua cili, tre, troa kapa hmekuje ej, jën la organizasio i Akötresie. Loi e tro pala hi së a thele la nyipi ithuemacanyi jëne la hna acil hnei Akötresie, thaa nyidrëti kö a jëne la itre ka hamë ithuemacany jëne Internet.—Mat. 24:45.
6 Itre Ithuemacany Ngöne Internet: Hetrenyi la itre nyipi ithuemacany hna hamën hnei Sasaiatri, ame la aderes, tre: www.watchtower.org. Itre nyipi ithuemacanyi lai hna aijijën troa kapa, hnene la itre atr ka aja ithuemacany göi sasaiatri. Thaa nyipi ewekë kö tro la ketre atr, maine ketre kometr, maine ketre ekalesia pena, a ami trepen hnine internet la itre xaa mekun göne la Itretre Anyipici i Iehova. Ame itre xan, hnei angatr hna fejan lo itre alien la itre itusi së memine la itre xötr me itre itus ka qejepengöne itre ej, nge goi hamëne fe angatr la itre mekun hna ithanatane hnine la itre kovasio me thele maniën. Ngacama hetre mani qa ngön, maine pë pena, ngo hna wathebon hnei mus la troa fejan me ihamënekeun la itre itusi ne la Itretre Anyipici Iehova jëne internet. Maine kola mekun hnene la itre xan ka hape, kola pane xatuan la itre trejin, thaa ka loi kö e troa huliwa tune lai, nge loi e troa hmaca.
7 Maine tro sa atreine waiewekë, me mekune hnyawa la nyine tro sa kuca ngöne la easë a ithuemacany jëne ordinatör, eje hi lai laka, tro ha xecie hnyawa koi së laka, ka tiqa la itre mekuna së hnene la “nöjei nyipi mo me ite ka sheming.”—Ite edomë 24:4.