Maca Ka Loi Jëne “Internet”

Kola elë pala hi la inamacane ne la atr, pine laka, atreine hi tro së enehila a kapa la itre ithuemacanyi ka nyimutre, jëne la itre ewekë hna kuca hnei atr, tui Internet. Haawe, hna amë hnei sasaiatri la itre ithuemacanyi ka lolo ngöne la itre ini hna lapaune kow hnene la itre Temoë i Iehova, me itre huliwa hna kuca hnei angatr.

Ame la aderesi hnë troa xome la itre ithuemacanyi ka lolo göi Organizasio i Iehova, ke, http://www.watchtower.org; nyimutre la itre tarake hna amaman, me itre boroshür, me itre zonale La Tour de Garde me Réveillez-vous! me itre hna cinyihane qene Papale, qene Caina (hna ahmaloeën), qene Alema, Rusia, me qene Sepania, ketre tune mina fe la itre xaa qene hlapa. Hetrenyi asë hi la itre itusi cili e hnine la ekalesia, nge hna tro fë trongëne hë itre eje ngöne la hna cainöje trootro. Kola mekune troa huliwane la Internet, thaa göi tro kö a amamane la itre itusi ka hnyipixe, ngo jëne tro fe a hane ithuemacanyi kowe la itre atr trene ordinatör. Thaa nyipi ewekë kö troa hamëne la itre mekune së jëne Internet, maine ngöne la itre Temoë i Iehova, ngöne itre huliwa së, maine ngöne la itre ini hne së hna lapaune kow. Hna hnëkëne ijije la götrane cili ngöne Internet, matre troa hamëne hnyawa la ithuemacanyi ka meköti koi itre atr ka hni ka ajan.

Ngacama thatreine kö tro së a jëne Internet la itre maca hne së hna ajane troa qaja kowe la ketre ka lapa ngöne la itre xaa filiale i sasaiatri e cailo fen, ame pe, ijije hi tro la itre atr a cinyanyi kowe la filiale ka easenyi kowe la hnei angatre hna lapa. Hane jë fe hamëne la aderesi sasaiatri ngöne Internet, kowe la itre atr ka mekune troa nyiqaane inine la nyipici ne la Tusi Hmitrötr, jëne la jiane huliwa cili.